Read Tolpan Apocalipsis 19 Bible Online

Apocalipsis 19 - Tolpan bible

Apocalipsis 19

¹Locopyaya yümücj nepé tjowelepj jin tjapjacas Dios pü'ü mpe. Gente pajal pülücj nepé la tupuyupj jin pjactsja. 'Ücj jisastsja pajal. Nin tjowelepj yupj:“Nun ca mvelé Dios 'üsüs way. Dios mpes ca 'üsüs mpatjaqué lovin. Más 'üsüs liji jupj pjü jis lal. Püné jupj; pjü way 'ücj liji jupj.

²'Üsüs nin, Dios nin liji cus la tül Babilonia, pülücj patja nt'a.Jupj nin la tjiji jupj tjevelá. Jupj tjevele t'üc' way pajal malala nyuca la tjajay Babilonia mo'o patjá.Quepj niyom pülücj lal wine jinwá la tjajay yupj. Yupj ma jisastsja Dios. P'a p'in jisastsja lovin.Nosis casá tapatjá, Babilonia nt'a lajaytsja jinwá quelel lajaytsja yupj, mpes yupj malala wa lajaytsja pajal.Dios jis capj tyüla Babilonia mo'o patja quinam, yupj p'iyá jis tjü'ünan Dios jomozopan.”

³Dios pü'ü nt'a niswa pajal yümücj tjowelepj:“Nun ca mvelé Dios 'üsüs way.Pülücj patja nt'a pwe, nepé ca viyá mim musus lovin.”

⁴Nin tjowelepj na niná, co'müypan veinticuatro palá nipi'tjin̈ Dios wolap'a'á, jupj tjijyü'ta mpe tjá'asa nt'a. Püné jupj, tjowelepj yupj. Nin p'iyá la tjajay wa yulupjanas janucunpan. Pjü yupj tjowelepj:“Nin qjuisas t'as.'Üsüs Dios, tjowelé nun.”

⁵Locopyaya Dios tjá'asa nepé vele jin tjapjacas. Tjevele:“Nun Dios jomozopan, mvelé nun Dios 'üsüs.Nun solejé jupj ca jis capj ntülüs malala la tjajay.'Üsüs pjac tjowelé nun pjü, Dios po'ó; nun noypan, tsjictjacj wa, ca nin mvelé nun”, nin tjapjacas, Dios tjá'asa mpe.

⁶Locopyaya pajal pülücj nepé javelepj jin tjapjacas wa. 'Üsǘ püné t'yüna na jinwá pjactsja. Pajal yümücj t'i'ila jin pjactsja wa. Yupj tjowelepj:“Nun ca mvelé Dios 'üsüs way. Qjuis Dios jyü'ta. Qjuis Jepa jupj. Jupj pajal püné pjü jis lal.

⁷'Ücj qjuisas t'as cupj. Pajal 'ücj qjuisas ca nsem. Ca mvelecj Dios pajal püné.Oveja Tsjicj ca mwayim quinam.Jupj lal ca mwayim jas tücüi'pe quinam lo wayis.

⁸Oveja Tsjicj p'iyá tje'yaya jupj jas quip. Jupj jas quip pje way, pajal 'üsüs justa, pajal salá way. Se jawca 'ots'ipj”, nin tjowelepj yupj. (Dios ts'uyupj pülül pje sin jacüipap, mpes ca qjuiyola mpalas yupj 'üsüs quinam Dios lal.)

⁹Locopyaya ángel tjevele napj lal: “Tepyaca jipj niná: ‘Dios nepénowa jis lal tjevele ncul pülücj jis la las la tjiji nt'a, ne'aj nlajacj ca Oveja Tsjicj ca mwayim mpes. Pajal 'üsüs ca jis mpalas, ne'aj jil mpes.’ ” Jupj tjevele wa: “Dios p'iyá tjevele niná”.

¹⁰Ángel nin tjevele na niná, jupj wolap'a'a palá nipi'tjis napj. Quelel veletsja jupj pajal püné. Jupj ma jostsja niná. Napj lal tjevele: “Ma nin la mijin niná. Napj ne Dios jomozo wa, jipj jinwá, jipj pyülücpan jinwá. Pjü nun poné Jesucristo nusin tji'yüsa la tjijá. Nin mpes Dios jomozopan nun. Dios wolap'a'a palá nipi'tjiqué la p'in. Ca mvelen jupj pajal püné. Pjü way cupj velecj Jesucristo velá. Nin p'iyá javelepj pjü way Dios mpes javelepj”, nin tjevele ángel napj lal. Jesucristo jac' niswá nosis casa'á.

¹¹Locopyaya p'a wa tjinyuc, p'a jawas ca mpalas. Tjinyuc jun cjoltsja Dios pü'ü nt'a. Tjinyuc wa cavayú pje. Jupj, cavayú casá tja'asá, “T'üc' Way Vele” ló jupj. “Ma Li Tsuwile” ló wa jupj. Jupj 'üsüs Dios lal, mpes jis capj tyüla malala nyuca lajay. Nin mpes jupj le palana malala nyuca lajay jis lal.

¹²Jupj jun, 'awa wolaqué jinwá. Jupj jay pjucj po'ó corona pülücj jay jatja, jupj pülücj jis Jepa mpes. Jupj ló pjaní jupj po'o tapac, jupj p'in selé tsjan mpes nin ló jupj.

¹³'As mo'o tepya'ta jin justa jupj jas quip. “Dios Tjevelá” ló wa jupj pjü jis lal.

¹⁴Pjü Dios militarpan cus tocon̈ jupj. Jupj cjüil tjil. Pjü yupj cavayú pje casá tjatja tjil wa. Pjü sin quip pje pajal 'üsüs yustapj sin quípetsja yupj. Pajal salá waytsja sin quip.

¹⁵Cavayú casá tjá'asa, jupj la mpe pje'á tjeyaca polomay pjoye. Polomay ninana lal ca jis mojo'os Dios ma jisas. Ma lajay jupj jyü'tá, yümücj ca jis capj ntülüs, acero mpes syüpa jinwá. Dios nin ca la mijis gente pajal malala nyuca la tjajay mpes, ne ninana p'iyá ca jis capj ntülüs. Uva sey jajatsj 'üsǘ ca mpalas, nin jinwá ca la mijis jupj, Dios ma jisas jis lal. Dios pajal püné pjü jis lal.

¹⁶Cavayú casá tja'asá, jas quip po'o tapac jupj ló p'a wa. Ninana nin tapactsja: PJÜ JEPAPAN JIS JEPA. PAJAL PÜNÉ PJÜ JIS LAL. Nin p'iyá tapac watsja tüecj po'ó.

¹⁷P'a wa ángel tjinyuc. Lots'ac' mo'o tón̈catsja jupj. Yümücj tjevele manta witjacj jis lal: “Nculá nun. Dios pülücj liji nun nu lo las. 'A nu tjumulus quinam nin nt'a.

¹⁸Ne'aj ca nlajá jepapan jis p'üy. Jepapan militar jis p'üy ca nlajá wa, niyom sin tjiyocpan 'a nin p'iyá. Ne'aj cavayú jis p'üy nlajá wa ca, casá tjatja nlajá wa ca nun. Pjü Dios ma quelel lajaytsjé, jis p'üy nlajá wa ca. Nepénowa esclavopan, nepénowa esclavopan tulucj. Yupj nepénowa tsjictjacj, nepénowa noypan”, nin tjevele ángel manta witjacj jis lal.

¹⁹Locopyaya wa napj tjinyuc Animal Ts'i 'Inyá, jupj ne 'üsǘ mpe pje'á tjeyaca p'iyá. Jepapan nosis casá patja cus tocon̈ wa. Jis militarpan jis lal tjiquil jepapan. Ne'aj 'a jis tjimyula jis la palan cavayú pje casá tjá'asa lal, jupj militarpan jis lal 'ots'ipj.

²⁰Malala jis tepyala la p'in. Yupj sin tjiyocj tuluctsja cavayú pje casá tjá'asa lal. Ntji'lin̈ Animal Ts'i 'Inyá. Profeta li tsuwiletsjé, 'a ntji'lin̈ wa. Profeta niná líjitsja, gente ma polel lajay jinwá. Nin la tjiji yus tsyawilí gentas, yupj ne Animal mpes sin po'o tapac. Püné jin yólatsja pwen, Animal jin justa. Mop'in malala tepyala jupj, Profeta Malala. 'Awa püné mo'o la ts'i jupj Animal Ts'i 'Inyá lal. Así janucun ne'aj la ts'i yupj. Azufre, 'yüma ne'aj.

²¹Cavayú casá tjá'asa jis tji'yü'na wa pjü la p'a wa, yupj ne ne'aj tjiquil jis la palan jupj lal. Jupj polomay la mpe pje'á tjeyaca mpes jis tji'yü'na yupj. Nin la tjiji na, manta witjacj pjü tjiquil, tjalá. Pajal jis col pit'a tepyala, jis p'üy tjalá mpes. Niná napj tjinyuc, p'a jawasa ca nin mpalas.