Read Tolpan Apocalipsis 7 Bible Online

Apocalipsis 7 - Tolpan bible

Apocalipsis 7

¹Locopyaya Jesucristo nin 'yüsa la tjiji wa niná. Angelpan yulupjana tüwütüwǘ tjelejen̈ nosis casa'á, niná tjinyuc napj. Pjaní way ton̈ca norte nt'a, pjaní way sur nt'a ton̈ca, pjaní wa tsiquin mo'o ton̈ca, pjaní wa t'yaja mo'o ton̈ca. Lüpjǘ tyantaná la tjajay, lüpjǘ ma jas nlapjünüs nosis casa'á, ma wa ca jas nlapjünüs 'üsǘ püné casa'á, ma wa ca mojos yon jis lal.

²Ninana tjinyuc na, ángel p'a wa tjinyuc. Jupj tjac' ne'aj tsiquin mpe. Jupj tyá'atsja fierro jinwá, po'o la 'onsos gentá Dios juts'a'á, Dios ne pü'ü lovin. Ángel fierro tyá'atsja p'iyá, angelpan yulupjana jis lal tjevele jupj. Dios jis tje'yaya niná angelpan 'ücj malala jis la jay nosis, malala wa la mijicj 'üsǘ püné. Mpes ángel locopyaya tjac' yümücj tjevele yupj 'ücj jis la pjac:

³“Po ma malala la müjí nosis quinam. Po ma malala la müjí 'üsǘ püné, ma wa malala la müjí yo po'ó quinam. Cupj t'üc' jis wala po'o tje'yonsocj nasa Dios jomozopan, 'ücj nin lojí nun”, tjevele jupj.

⁴Napj tjapjacas nol Dios jomozopan yupj jis wala po'o tje'yonsocj yupj. Pajal pülüctsja, ciento cuarenta y cuatro mil. Pjü yupj Israel pajal püna tüpü'ü popa p'iyatsja. Israel jatjampan dóceya püna tapatja sin popé waytsja yupj, locopyaya tapatja sin popé. Pjü jatjampan dóceya sin popé waytsja yupj.

⁵Judá püna tüpü'ü popé, 12,000 sin tapac yupj.Rubén püna tüpü'ü popé, 12,000 sin tapac wa.Gad püna tüpü'ü popé, 12,000 watsja yupj.

⁶Aser püna tüpü'ü popé, 12,000 sin tapac wa.Neftalí püna tüpü'ü popé, 12,000 sin tapac wa.Manasés püna tüpü'ü popé, 12,000 watsja yupj.

⁷Simeón püna tüpü'ü popé, 12,000 sin tapac wa.Leví püna tüpü'ü popé, 12,000 sin tapac wa.Isacar püna tüpü'ü popé, 12,000 watsja.

⁸Zabulón püna tüpü'ü popé, 12,000 sin tapac wa.José püna tüpü'ü popé, 12,000 sin tapac wa.Benjamín püna tüpü'ü popé, 12,000 watsja yupj. Angelpan pjü yupj sin po'o sin tapac Dios mpes. Pajal malala ca mpalas nosis nt'a, ne ca pülücj mponecj Jesucristo po'ó.

⁹Niswa tjinyuc na, napj tjinyuc gente pajal pülücj 'a jis tjimyula. Ma polel sin la pactsja pülücj mpes. Yupj pjü gente sin popetsja, pjü 'a mulú patja sin popé, pjü se jütütj mpe sin popetsja wa, pjü jis tin javelepj sin popetsja wa. Yupj Dios wolap'a'a lejen̈tsja. Oveja Tsjicj wolap'a'a lejen̈ watsja. Oveja Tsjicj Jesucristo nitsja jupj. Gente ne'aj pjü sin quip pjetsja. Manaca pjwel jatatsja jis mas nt'a.

¹⁰Yupj pajal yümücj tjowelepj:“Dios jyü'ta.Jupj mpes, Oveja Tsjicj mpes wa, ca 'üsüs mpatjaquecj lovin.” Nin tjowelepj yupj.

¹¹Pjü angelpan t'asiyú tjelejen̈ Dios tjá'asa nt'a. Dios culupwen nt'a tjá'asa co'müypan jis lal, janucunpan yulupjana jis lal wa. Angelpan Dios wolap'a'a palá nipi'tjin̈ yupj. Yupj yólatsja pajal püné Dios.

¹²Niná tjowelepj:“Gente ninana tjowelepj, t'üc'.'Ücj la veles Dios 'üsüs. Jupj más 'üsüs liji pjü jis lal. Pjü si 'üsǘ wa jupj.'Ücj la veles wi'in̈ jupj la tjiji mpes. 'Ücj la veles jupj püné, 'ücj jyü'ta jupj, jas tjiyocj jupj pajal. 'Ücj nin la veles lovin.Pjü niná, t'üc'”, nin tjowelepj angelpan.

¹³Co'müy pjaní la tji'yüya napj lal: —¿Ncu selen niná pjacj niná sin quip pje? ¿Ncu selen ca'aj mpe tjiquil niná?

¹⁴Napj tjevelé jupj lal: —Ma selé napj. Jipj selen. Mpes jupj tjevele: —Yupj nosis casá tapatjá, nosis casa'á pajal malala tepyala na. 'Ücj jis tepyala quinam. Jesucristo tepe'e yupj mpes, oveja tsjicj jinwá. Jupj 'as tepyala mpes, 'üsüs jis tepyala Dios lal. Yupj Jesucristo lal topon na, sin quip tapatsj jinwá jis tepyala Dios lal.

¹⁵Nin mpes‘Dios wolap'a'a lejen̈ quinam lovin, jupj jyü'ta nt'a.Jaw na, püste na, tsji' lajay Dios mpes, jupj wo nt'a.Dios ca mpü'üm yupj jis lal, ma malala jis mpalas.

¹⁶Jupj liji ma ca vecj jis nca'lin̈ niswá, ma 'üsǘ sive wa mpalas.Lots'ac' mpes ma ca mpen̈ yupj. Ma ca malala jis mpalas pajal vyaja pwe mpes.

¹⁷Oveja Tsjicj 'üsüs la siji mpes ca nin nsem. Oveja Tsjicj Jesucristo ni jupj. Dios já'asa nt'a la jütütj, ne'aj já'asa wa jupj.Jupj ca jis majamas yupj, yom oveja jyama jinwá.'Üsǘ 'amá popa pyaca nt'a ca jis ncacanas yupj, ne 'üsǘ niná myü'ün̈ mpes, mpatjam ca lovin.Yun 'üsǘ ca ncjücjüs Dios.’ —Nin tjevele co'müy pjaní, gente niná sin po'ó. Jupj tjevele pajal 'ücj jisas mpatjam lovin.