Read Tombulu Matius 1 Bible Online

Matius 1 - Tombulu bible

Matius 1

¹Ung kenumo um pinantikan a ngaran né nimaopo ni Yesus Kristus, si suzu ni Daud wo ni Abraham.

²Si Abraham makaoki'mé si Ishak. Si Ishak makaoki'mé si Yakub. Si Yakub makaoki'mé si Yehuda wo sé katuarina.

³Si Yehuda makaoki'mé si Peres wo si Zerah im wia si Tamar. Tumondong niitu si Peres makaoki'mé si Hezron. Si Hezron makaoki'mé si Ram.

⁴Si Ram makaoki'mé si Aminadab. Si Aminadab makaoki'mé si Nahason. Si Nahason makaoki'mé si Salmon.

⁵Si Salmon makaoki'mé si Boas im wia si mahayona si Rahab. Si Boas makaoki'mé si Obed im wia si mahayona si Rut. Tumondong niitu si Obed makaoki'mé si Isai.

⁶Si Isai makaoki'mé si kolano Daud. Si Daud makaoki'mé si Salomo im wia si Batsyeba si mahayo ni Uria.

⁷Si Salomo makaoki'mé si Rehabeam. Si Rehabeam makaoki'mé si Abia. Si Abia makaoki'mé si Asa.

⁸Si Asa makaoki'mé si Yosafat. Si Yosafat makaoki'mé si Yoram. Si Yoram makaoki'mé si Uzia.

⁹Si Uzia makaoki'mé si Yotam. Si Yotam makaoki'mé si Ahas. Si Ahas makaoki'mé si Hizkia.

¹⁰Si Hizkia makaoki'mé si Manasye. Si Manasye makaoki'mé si Amon. Si Amon makaoki'mé si Yosia.

¹¹ I sé tou Israel méitia' witi Babel, si Yosia makaoki'mé si Yekhonya wo sé katuarina.

¹²I simampetoma sé tou Israel méitia' witi Babel, si Yekhonya makaoki'mé si Sealtiel. Si Sealtiel makaoki'mé si Zerubabel.

¹³Si Zerubabel makaoki'mé si Abihud. Si Abihud makaoki'mé si Elyakim. Si Elyakim makaoki'mé si Azor.

¹⁴Si Azor makaoki'mé si Zadok. Si Zadok makaoki'mé si Akhim. Si Akhim makaoki'mé si Eliud.

¹⁵Si Eliud makaoki'mé si Eleazar. Si Eleazar makaoki'mé si Matan. Si Matan makaoki'mé si Yakub.

¹⁶Si Yakub makaoki'mé si Yusuf si nimaéndola mahayo ni Maria. Si Maria timoumé si Yesus, si pahkuan kangkasii ing Kristus.

¹⁷Niitumo, rengané wia si Abraham makaz wia si Daud é mapulu' wo epat suzu. Wo rengané wia si Daud makaz sé tou Israel i méitia' witi Babel é mapulu' wo epat suzu kasii. Tumondong niitu, rengané sé tou Israel i méitia' witi Babel makaz wia si Kristus é mapulu' wo epat suzu kasii.

¹⁸ U sirita tumoro si Yesus Kristus i nimatou én téntii: I si Maria, si ina'-Na tinotozo ing kumawéng karia ni Yusuf, puunala séra menou-nou i sana séndé', si Roh Lenas nimangunola si Maria i mahawa-awak.

¹⁹Pahpaan si Yusuf mahayona én ulit witu u sinaru ni Opo Empung wo soo mapaiza-izang si mahayona witu saru-sarun né tou lakez, ni sia éng gimenango in tuma'sa si Maria karia i mahwuni-wuni.

²⁰Taan i si Yusuf megena-genangpé' niitu, a méyé si malaekat ni Opo Empung witu un ipina, ang kumuama, “Yusuf, suzu ni Daud, tia'mo ko maindé' i méndo si Maria maéndo mahayomu, pahpaan si koki' pahawa-awakenna ém wia si Roh Lenas a méyé.

²¹ Ni sia én tumoumé si lowai wo ni Sia é ngaranannula Yesus, pahpaan ni Siamo si mamilot sé tou-Na im witu un ukuman wana a singkéla' néra.”

²²Péléng niitu é mamuali, wo malekepa u nuwu' ni Opo Empung mengiité sé nabi.

²³ “Un ulitna, si raraha itii é mahawa-awak wo tumou si lowai wo ni Sia é ngaranan néra Imanuel.” (Ung kalakoana: Si Opo Empung é menaté-natér ni kita).

²⁴I si Yusuf nimawongkémomé, am wangunennala tanu a méiperéntama ni malaekat ni Opo Empung wia ni sia. Si Maria niéndonala mahayona,

²⁵ taan zéi'kan nimahteke-tekela kariana makaz si Maria in timoumé si lowai, a Sia ngaranala ni Yusuf i Yesus.