Read Tombulu Matius 11 Bible Online

Matius 11 - Tombulu bible

Matius 11

¹I si Yesus nimakatuzu'mola wia sé mapulu' wo zua pahtuzu'en-Na, an itula'u-Namé um pahento'an-Na itii, i matumuzu' wo mahwoka' u Nuwu' Lé'os wia sé tou wana am wanua tua'na rété witu.

²I si Yohanes Menanarani witi bui, ni sia timalinga am pahpaayangen ni Kristus.

³An iatunama sé pahtuzu'enna i malumigau wia si Yesus in téntii, “Ama', apa ni Komo si méitaaz ni Opo Empung i méyé, kaapa wéwéhan tou walina si totoz in ento'en nai?”

⁴A séra wingkotela ni Yesus, “Mangémo wo maikuala wia si Yohanes an tinalinga wo a niilek niou:

⁵ sé letok én toromo mahilek, sé lailai én toromo mahlampang, sé tinoro ung kusta é lé'oso, sé lunteng é mahtalingamo, sé nimatémo é méitoumomé sumaup wo sé tou zéi'kan siapa apa én timalingamo u Nuwu' Lé'os um wia si Opo Empung a méyé.

⁶Mahpaa-paazola sé tou simungkul ni Aku.”

⁷Kaiwurima né pahtuzu'en ni Yohanes, a si Yesus rengan mahnuwu' wia sé tou lakez witu tumoro si Yohanes. Kuan-Na, “Apa u maileken niou im witi kapelasan? Apa kamu mangé wana i mamilek si tou mahzua-zua genang, tanumokan ang kuhun mengogé-ngogé mahkii-kiit uman u reges?

⁸Kaapa apa un angén niou wana? Mamilek si tou kimarai ung karai wangun? Si tou kimarai ung karai wangun é mahento' witi istana ni kolano.

⁹Ni- itumo, makumura kamu i mangé wana? Mamilek si nabi? Ulit, wo ikua-Kuma wia ni kamu, si Yohanes é lumouspé'mé si nabi.

¹⁰ Pahpaan tumoro ni sia, méipantik witu um Pinantik Lenas, in téntii, ‘Ilekena, ni Aku nimatuma si aatu-Ku i mapuunama wia ni Ko,[14] ni sia é mamimek u lalan lampangan-Nu witu u sinaru-Mu.’

¹¹Uli-ulit ikua-Kuma wia ni kamu: Im wia sé tou sé nimatoumé im wia sé wéwéné, zéi'kan siapa si lumousé ung kawangko' ni Yohanes, taan si totoz kori' im wia sé tou witi Kakolanoan ni Opo Empungpé' si wangko' taan ni sia.

¹² Rengané si Yohanes i mawiamé makaz in tarékan, wéwéhan sé tou léwo' mahsaru wo mahkakawasa sé tou witi Kakolanoan ni Opo Empung.

¹³Pahpaan péléng sé nabi wo a méipantik witu ung kitap Torat é mahkua tumoro u Nuwu' ni Opo Empung makaz si Yohanes niméyé.

¹⁴ Sa kamu paaz sumungkul u méikua-Ku, si Yohanes kenumo si Elia si pa'ento'en i méyé itii.

¹⁵Séi si wéwéhan lunteng é mahtalingama lé'os!

¹⁶Karia un apa iandé-Kuma sé tou in tarékan? Ni séra én tanumokan sé koki' merume-rumez witi pahwangkéran wo mahkéréta sé kakaria néra in téntii,

¹⁷‘Ni kai é mahpeloit wia ni kamu, taan ni kamu é soo dumonci. Ni kai é mahkantar ang kakantaren wana am pinatéan, taan ni kamu én zéi'kan mahamé'.’

¹⁸Pahpaan si Yohanes i niméyé, ni sia zéi'kan mahkan wo zéi'kan mahelep wo ni sia ém pahkuan néra i sinelazan ni sétang.

¹⁹In tarékan si Oki' ni Tou é niméyé, ni Sia é mahkan wo mahelep wo ni séra é mahkua, ‘Ilekena, ni Sia é sorem wo matetewelen, kakaria né menanagi am pajak wo né tou mahsingkéla'.’ Taan ung katulapan ni Opo Empung én ikatuzu'mé im wana am pahlé'osen né tou mahkiit ni Sia.”

²⁰A si Yesus rengan i mahséro' wia sé tou wana am wanua tua'na sé soo tumula'u a singkéla' néra, zozo' im witu ni Sia makalakezo nimanguné a makakompo'en.

²¹ Kuano kasii ni Yesus, “Ikaléwo'mo ni kamu in tou Khorazim! Ikaléwo'mo ni kamu in tou Betsaida! Pahpaan sa a makakompo'en winangun-Ku wana am wanua niou ém winangun-Ku witi Tirus wo Sidon, tantumo urémo ni séra ing kimarai ung karai pengangaraien witi pinatéan wo an ulu néra ém wuzwuzan néra an awu, un tumuzu'mé ni séra é mene'selo wo timula'umola a singkéla' néra.

²²Taan ikua-Kuma wia ni kamu: Im witu un endo si Opo Empung in tumotoz ulit kaapa zéi'kan am pahlé'osen né tou, un ukumanpé' wia sé tou witi Tirus wo Sidon u rorak taan un ukuman wia ni kamu.

²³ Ni kamu in tou witi Kapernaum, ni kamu é mahgenangla im wénéten ni Opo Empung makaz witi kasendukan? Zéi'kan, ni kamu én itumpa witu naraka. Pahpaan sa a makakompo'en winangun-Ku witi wanua niou ém winangun-Ku witi Sodom, tantumo um wanua tua'na itii ém wiapé' makaz in tarékan.

²⁴ Taan ikua-Kuma wia ni kamu: Im witu un endo si Opo Empung in tumotoz ulit kaapa zéi'kan am pahlé'osen né tou, un ukuman né tou witipé' Sodom u rorak taan un ukuman wia ni kamu.”

²⁵In toro niitu si Yesus mengaléi, “Ni Aku kumuama u makasé wia ni Ko, Ama', Opo Empung u langit wo ung kaayahan, pahpaan niana é méiwuni ni Ama' im wia sé tou tulap wo lakez ang kata'uan. Taan niana é méipapailek ni Ama' wia sé tou kanaramen sé mahkii-kiit uman tanu sé koki'.

²⁶Niitu u nimangun un até ni Ama' i mahpaa-paaz.”

²⁷ A si Yesus kumua kasiima, “Péléng am péléng é mémoiayo ni Ama'-Ku wia ni Aku. Zéi'kan siapa zozo' in esa si mata'u si Oki', akaz uman si Ama' si mata'u si Oki', wo zéi'kan siapa zozo' in esa si mata'u si Ama', akaz uman si Oki' si mata'u si Ama' wo sé tou pinéléng ni Oki' sé makuaan-Na tumoro si Ama'-Na.

²⁸Méyémo wia ni Aku, péléng sé marawoi wo sé lakez am pengalin, ni kamu ém wéhang-Ku ung kaenaan.

²⁹ Kumiitola um perénta-Ku tanumokan i masaan um pasangan méipasaan-Ku, wo mahtata'umé wia ni Aku, pahpaan ni Aku én eluz uman wo roros até, wo si rohmu é makailek ung kaenaan.

³⁰Pahpaan am perénta-Ku é makapaazen wo um pengalin méipasaan-Ku é rorak uman.”