Read Tombulu Matius 15 Bible Online

Matius 15 - Tombulu bible

Matius 15

¹A sé woopira im wia sé sana réwok tou Farisi wo sé tou tulap un Torat sé witi Yerusalem a méyé, mangé wia si Yesus ang kumuama,

²“Kaa sé pahtuzu'en-Nu zéi'kan mahkiit ang kinanaram né nimaopota? Ni séra én zéi'kan zimano ang kuman.”

³Taan si Yesus nimingkotla, “Kaa kamu kangkasii én zéi'kan mahkiit am perénta ni Opo Empung akaz uman i mahkiit ang kinanaram né nimaopo niou?

⁴ Pahpaan si Opo Empung éng kimua, ‘Pahsigi'ela si ama'mu wo si ina'mu.’ Wo kasii, ‘Séi si mahtiwa' si ama'na kaapa si ina'na, ni sia é léwo'zéi' in ukumen i maté.’

⁵Taan ni kamu é mahtuzu': Séi uman si mahkua wia si ama'na kaapa wia si ina'na in téntii, ‘Péléng a sasawang a léwo'zéi' in iwéhéku wia si ama' wo si ina' é mémoiragéskula wia si Opo Empung,’

⁶si tou itii én zéi'mo totoz sumigi' si ama'na kaapa si ina'na. Karia in téntu, u Nuwu' ni Opo Empung é zinéi' niouola karia ang kinanaram niou itii.

⁷É kamu in tou mahgau-gau lé'os! Ulito u méikua ni Opo Empung tumoro ni kamu mengiité si nabi Yesaya in téntii,

⁸ ‘Sé tahsasana wanua kenu é mahlooz ni Aku karia a sumah néra, taan an até néra én zou' im wia ni Aku.

⁹Zéi'kan siapa torona séra i mahragés wia ni Aku, pahpaan an tutuzu' ipahtuzu' néra ém perénta ni tou.’ ”

¹⁰An tawahené ni Yesus sé tou lakez ang kumuama wia ni séra,

¹¹“Talingana wo wéhanla genang: zéi'kan a mahuntepa witu u sumah a mahwangun si tou makati'tiren, taan a mondolé im witu u sumah, niitumo u mahwangun si tou makati'tiren.”

¹²A sé pahtuzu'en-Na rumétéla wia si Yesus ang kumuala, “Zéi'kan kata'uan-Nu wé sa un até né sana réwok tou Farisi é rumara pahpaan u méikua-Muma itii?”

¹³A si Yesus mingkotla, “An tinanem zéi'kan méitanem ni Ama'-Ku si witi kasendukan ém pakasawuten makaz wana an ahmutna.

¹⁴ Iwayamola sé sana réwok tou Farisi itii. Ni séra é masuat wo si tou letok mengahkit si tou letok. Sa si tou letok mengahkit si tou letok, ni séra zua én ikatahu' witu um woso.”

¹⁵Ang kuan ni Petrus wia si Yesus, “Ikuamé wia ni kai ung kalakoan un aandéan itii.”

¹⁶A si Yesus mingkotla, “Apa maan ni kamu kangkasii én zéi'kampé' makatulap niitu?

¹⁷Zéi'kan kata'uan niou wé sa péléng a muntepa witu u sumah é meméhé-méhéma umana witu um poot wo tumondongla niitu é maitia' witi muri?

¹⁸ Taan u mondolé witu u sumah ém witu un até a méyé, wo niitumo u mahwangun si tou makati'tiren.

¹⁹Pahpaan witu un até mahondolé péléng ang genang léwo', u mahwunu' tou, u mahmuali a sinéro' im pahmualin né zéi'kampé' kimawéng, u mahsamek, u mahremu', u mahkua an zéi'kan ulit tumoro a niilek wo an tinalingana, wo kasii u mahtawuruk.

²⁰Nianamo a nimangun si tou makati'tiren. Taan mahkan karia u lengen zéi'kan zimano én zéi'kan mahwangun si tou makati'tiren.”

²¹Si Yesus tumula'umé un tampa itii a mangé witi tana' Tirus wo Sidon.

²²A méyé si wéwéné tou Kanaan si witi tana' itii, mah- aléi wia si Yesus karia i mahkéréta, “O Tuang, Suzu ni Daud, iraraaté ndootuumé ni aku! Si kooki'ku é sinelazan ni sétang wo totozo in zézéha.”

²³Taan si Yesus é nimenes umanla. A sé pahtuzu'en-Na méyé i mahaléi wia ni Sia, “Iatumoma si wéwéné itii i mangé, pahpaan ni sia é mengii-ngiit ni kita karia i mengéré-ngérét.”

²⁴A si Yesus mingkotla, “Ni Aku i méiatumé ni Opo Empung én akaz uman mésumawang sé tou Israel sé mémoikalulu, tanu sé domba mémoikalulu.”

²⁵Taan si wéwéné itii é rimétéla si Yesus ang kumuruzla wo mahsigi' wia ni Sia kuana, “Tuang, tulungen ndootuumé ni aku.”

²⁶Taan si Yesus nimingkotla, “Zéi'kan wangun i méndomé u roti un iwéhé wia sé koki' wo ilombo'ma wia sé asu.”

²⁷A mingkotla si wéwéné itii wia si Yesus, “Ulit Tuang, taan sé asu witu u lalem u méja kangkasii é mahkan a mahragosé im witu u méja pahkanan ni makaasu.”

²⁸Ang kuan ni Yesus wia ni sia, “É ina', um pa'émanennu én totoz wangko', niitumo in tarékan é mamualimoma tanu un ikapaazmu.” In toro niitukan, si kooki' ni wéwéné itii é nimalé'osoma.

²⁹In timula'umomé un tana' itii, si Yesus mahkiité un tembir u louz Galilea a sumosoza witu ung kimeleng a marumumez witu.

³⁰A sé tou lakez mahto-tondongané i niméyé wia ni Sia, nimahwalimé sé lailai, sé letok, sé kénto', sé wowo' wo lakezpé' kasii sé walina, a séra izeta' nérala witu u sinaru un a'é ni Yesus a séra péléng lé'osen-Nama.

³¹Sé tou lakez itii é mengusi-ngusingsing i nimileka sé wowo' én toromo mahnuwu', sé kénto' é lé'oso, sé lailai é mahlampango, sé letok é mahileko, a séra mahsigi' wo mahlooz si Opo Empung né Israel.

³²A si Yesus tumawahmé sé pahtuzu'en-Na ang kumuama “Un até-Ku é rumaraaté sé tou lakez kenu. Teluna endomo séra i mengii-ngiit ni Aku wo ni séra én zéi'mo siapa kanen. Ni séra zéi'kan ipekiwuri-Ku karia i maharem, én taa séra ikawesahla witi lalan.”

³³Ang kuan né pahtuzu'en-Na wia ni Sia, “Kura im wia un tampa zou'mé im wana am wanua kenu wo kita toro makailek roti ung kanen né tou sé téntumokala ung kalakez wo séra mawesuh?”

³⁴Kuan ni Yesus wia ni séra, “Pira u roti wia ni kamu?” A séra mingkotla, “Ni kai ém wéwéhan u roti pitu wo seza' rintek woopira.”

³⁵An iatula ni Yesus sé tou lakez itii i rumumezla witu un tana'.

³⁶Tumondong niitu an éndon-Namé u roti pitu wo sé seza' itii, ang kumuama u makasé wia si Opo Empung, am pemété-météngen-Nama an iwéhé-Nama wia sé pahtuzu'en-Na, an isekez nérama wia sé tou lakez itii.

³⁷Ni séra péléng éng kiman makaz nimawesuh. Kumawusa niitu, a réwokené né tou a roti nimateza. A roti nimateza ém pituna lo'lo' kumuwu-kuwu.

³⁸Ung kalakez né tou kiman in toro niitu én epatna riwu tuama, zéi'kampé' méikarékén sé wéwéné wo sé koki'.

³⁹A sé tou lakez itii ipekiwurima ni Yesus. Ni Sia sumakéma londéi a mangé witi tana' Magadan.