Read Tombulu Matius 16 Bible Online

Matius 16 - Tombulu bible

Matius 16

¹ A méyé sé sana réwok tou Farisi wo Saduki wia si Yesus i mema'wa' ni Sia. Ni séra mahaléi wia ni Sia i mapa- ileké un toro tumuzu'mé wia ni séra, sa ni Sia én ulit wia si Opo Empung a méyé.

²Taan si Yesus é nimingkotla wia ni séra, “Im wengindo i si endo muntepo, pahpaan u langit rangdango, kuan niouo: I sando é rumaaz.

³Wo im woondo, ileken nioua u langit é rimangdang a marimbengbenga, kuan niouo: In tarékan é muzan. Ni kamu é mata'u i mahtotoz un endo taan ni kamu én zéi'kan mata'u tumotoz am pahwangunen ni Opo Empung in tarékan.

⁴ Sé tou léwo' wo zéi'kan ezen in tarékan é mahaléi wia ni Aku i mapaileka u makakompo'en, un tumuzu'mé i ni Aku ém wia si Opo Empung a méyé. Taan ni séra én zéi'kan mahile-ilekla u makakompo'en, akaz uman u makakompo'en nimamuali wia si nabi Yunus.” Makakuama niitu, a séra itula'uma ni Yesus.

⁵I sé pahtuzu'en ni Yesus méikaayola witi lewet u louz Galilea, ang kagenangan nérala i ni séra é nimaliuz umané i nimahalimé roti.

⁶ Kuan ni Yesus wia ni séra, “Tuméga-tégam wo mile-ilek im wana a ragi né sana réwok tou Farisi wo Saduki.”

⁷Kaitalingamé u méikuamé ni Yesus, a séra makagena-genangla a mahkuaala, “Niitu méikua-Namé pahpaan ni kita én zéi'kan nimahalimé roti.”

⁸Kata'uan ni Yesus um pahsiritan néra, a Sia kumuala, “É kamu in tou zéi'kan tahlous ma'éman! Kaa kamu maza'i uman taré tumoro un zéi'kan nimahalimé roti?

⁹ Zéi'kampé' kasii katulapan niou wé? Zéi'mo kagenangan nioula u roti lima méiwéhé wia sé limana riwu tou wo pirana lo'lo' a nimateza rinéwok nioula?

¹⁰ Kaapa u roti pitu méiwéhé wia sé epatna riwu tou, pirana lo'lo' a nimateza rinéwok nioula?

¹¹In tarékan, kaa kamu zéi'kan makatulap sa u méikua-Ku ing kataré én zéi'kan tumoro u roti? Mile-ilek im wana a ragi né sana réwok tou Farisi wo Saduki!”

¹²In toro niitumo an taré katulapan nérala un ipahkua ni Yesus wia ni séra. Un ipahkua-Na én zéi'kan tumoro u ragi ipahsembor i mahwangun a roti, taan an tutuzu' né sana réwok tou Farisi wo Saduki.

¹³I si Yesus méikaayomoma witi Kaisarea Filipi, ni Sia meligau wia sé pahtuzu'en-Na, “Kuan né tou, séi si Oki' ni Tou itii?”

¹⁴ A séra mingkotla, “Wéwéhan sé mahkua: Yohanes Menanarani, sé walina é mahkua: Elia wo sé walina kasii é mahkua: Yeremia kaapa si esaané im wia sé nabi.”

¹⁵A si Yesus meligau sumaup wia ni séra, “Taan sa kamu, ni Aku é séi?”

¹⁶ A mingkotla si Simon Petrus, “Ni Komo si Mesias, Oki' ni Opo Empung si menou-nou.”

¹⁷Ang kuan ni Yesus wia si Simon, “Mahpaa-paazla ni ko Simon oki' ni Yunus[20] pahpaan zéi'kan si tou si kimua niitu wia ni ko, taan si Ama'-Ku si witi kasendukan.

¹⁸Wo ni Aku kangkasii éng kumuama wia ni ko: Ni ko ém Petrus, ung kalakoana ém watu. Witu um wawo um watu kenu ni Aku é rumendai sé jamaat-Ku, wo um patéan zéi'kan mata'u kumawasa niitu.

¹⁹ Ni ko ém wéhang-Ku ung kawasa i mahimek sé tou-Ku tanumokan in timion ung kusi' witi Kakolanoan ni Opo Empung. A sinéro'mu im wia ung kaayahan ni- itu kangkasii é sinéro' im witi kasendukan, wo ang kinuamu in ulit im wia ung kaayahan niitu kangkasii én ulit im witi kasendukan.”

²⁰A séra séro'ela ni Yesus in tia' ipahkukua wia si séi uman i ni Sia é Mesias.

²¹Rengan in toro niitu, pahpakaulito ni Yesus wia sé pahtuzu'en-Na, i ni Sia é léwo'zéi' i mangé witi Yerusalem. Im wana ni Sia é mazéhan né pahtutu'an né tou Yahudi, né tonaas né walian wo né tou tulap un Torat. Ni Sia ém wunu'en, taan witu un endo katelu ni Sia én itou sumaup ni Opo Empung.

²²Taan si Yesus éng kinéhonga ni Petrus rimuruhla a Sia totoz i séro'ennala, kuana, “Tuang, mengalé-ngaléi uman un téntu én izou'ma ni Opo Empung! Un téntu én zéi'kan mahmua-mualila wia ni Ko.”

²³A si Yesus merena wia si Petrus, ang kuan-Na, “Mingkasa ko tonaas né sétang! Ni ko ém watu pahkasangkilan im wia ni Aku pahpaan ni ko én zéi'kan mahgenang ung ginenang ni Opo Empung, taan mahgenang uman ung ginenang ni tou.”

²⁴ Ang kuan ni Yesus wia sé pahtuzu'en-Na, “Séi si paaz kumiit ni Aku, ni sia léwo'zéi' in zéi'mo mahgenang ung katou-touanna in esa, masaan u salipna wo kumiit ni Aku.

²⁵ Pahpaan séi si paaz mahkelung ung katou-touanna, ni sia éng kaliongan ung katou-touan. Taan séi si kinaliongan ung katou-touanna pahpaan ni Aku, ni sia é makailek ung katou-touan makaz ing kauré-uré.

²⁶Apa un torona si tou nimakailek péléng am wia ung kaayahan, taan ni sia éng kinaliongan ung katou-touanna? Apa un toro iwéhéna i sumawel ung katou-touanna?

²⁷ Pahpaan si Oki' ni Tou é méyé sumaup karia né malaekat-Na wo karia ung kawasa ni Ama'-Na. In toro niitu, ni Sia é maér wia si tou mengiit am pinahlé'osa ni esa wo ni esa.

²⁸Uli-ulit ikua-Kuma wia ni kamu: Wéwéhan sé woopira im wia ni kamu im wia'i én zéi'kampé' nimaté puunala séra i mileka si Oki' ni Tou méyé ing Kolano witi Kakolanoan-Na.”