Read Tombulu Matius 17 Bible Online

Matius 17 - Tombulu bible

Matius 17

¹ I limangkoioma enemna endo, a si Yesus tumawahmé si Petrus karia né zua mahtuari, si Yakobus wo si Yohanes, i sumosoz karia-Na mangé witi kentur rakék. Im witu é ni séra uman.

²A si Yesus mawalinama im witu u saru-sarun néra telu, ung gio-Na é mahsena' tanu si endo wo ung kinarai-Na é nimakulo'ma meto-petot tanu u sena'.

³An ileken nérama si Musa wo si Elia karegas mahsirita karia ni Yesus.

⁴Ang kuan ni Petrus wia si Yesus, “Tuang, totoz makapaazen ni kita im wia'i. Sa si Tuang paaz, ni aku é rumendai un ténda telu im wia'i, un esa én anu ni Tuang, un esa én anu ni Musa wo un esa kasii én anu ni Elia.”

⁵ Taan i si Petrus karegaspé' mahnuwu', kumompo'mé an tumumpamé u ninahak mahsena' ang kumungkunga wia ni séra. Im witu un untep u ninahak itii tinalingamé u nuwu' kimuamé, “Si Kenumo si Oki'-Ku si ikararaaté-Ku, ni Sia si mahwangun un até-Ku mahpaa-paaz, pahtalingala Sia.”

⁶In timalingamé u nuwu' itii, sé pahtuzu'en ni Yesus ikakepama pahpaan in totoz i maindé'.

⁷Si Yesus méyé wia ni séra, a séra kotkoten-Nala ang kuan-Na, “Rumendaiomé, tia'mo maindé'!”

⁸Ileken nérala, zéi'mo siapa walina sé witu, akazokan si Yesus.

⁹I ni séra mahperosé im witi kentur itii, a si Yesus kumuala wia ni séra, kuan-Na, “Tia' ipahkukua niou wia si séi uman a ni- ilek nioué ing kataré, puunala si Oki' ni Tou in itoumé sumaup im wia sé nimaté.”

¹⁰ A sé pahtuzu'en ni Yesus meligau wia ni Sia, “Sa téntu, kaa sé tou tulap un Torat é mahkua i si Elia é mapuunamé im wia si Oki' ni Tou?”

¹¹A mingkotla si Yesus, “Ulit i si Elia é mapuunamé i mémimek péléng am péléng.

¹² Wo ikua-Kuma wia ni kamu: Si Elia é niméyémoma, taan sé tou én zéi'kan makana'u ni sia wo ni sia ém pahwangunan néra kiit um paaz néra. Téntumo kangkasii si Oki' ni Tou é mazézéhan néra.”

¹³In timalingala niitu a matulapla sé pahtuzu'en ni Yesus sa um paza'i-Nala én tumoro si Yohanes Menanarani.

¹⁴I si Yesus wo sé pahtuzu'en-Na nimawurima sumaup wia sé tou lakez itii, a méyé wia si Yesus si tou ang kumuruzla i mahsigi',

¹⁵kuana wia si Yesus, “Tuang, iraraaté ndootuumé si oki'ku. Ni sia é mati-mati ayang wo totozo in zéha. Ni sia mososeké én ikawéhéma witu un api kaapa ikaleseka witu un zano.

¹⁶Ni sia é mémoipahwalikuma wia sé pahtuzu'en-Nu, taan ni séra én zéi'kan makawawa i lumé'os ni sia.”

¹⁷Ang kuan ni Yesus, “É kamu in tou zéi'kan ma'éman wo méikalulu. Makaz sawisa ni Aku i memali-mali karia niou? Makaz sawisa ni Aku i mezen wia ni kamu? Ipahwalimé wia'i si koki' itii!”

¹⁸A si sétang si wia si koki itii peréntana ni Yesus i mondola. Si sétang itii é rengan i nimondola, in toro niitukan a malé'osa si koki' itii.

¹⁹A méyé wia si Yesus sé pahtuzu'en-Na. I ni séramokan sé witu, a séra meligau wia ni Sia, “Méster, kaa si sétang itii én zéi'kan kawawaan nai i moho?”

²⁰ Ang kuan-Na wia ni séra, “Pahpaan ni kamu én zéi'kan uli-ulit ma'éman. Uli-ulit ikua-Kuma wia ni kamu: Sa kamu uli-ulit ma'éman zozo' um pa'émanen niou itii én tanu uman katua'na um watuna totoz rintek wia ung kaayahan, ni kamu én toro kumuama ung kentur kenuma in téntii, ‘Mérama witi kenuma!’ Ung kentur itii én ikaéra witi kenuma wo zéi'kan siapa an zéi'kan mamuali wia ni kamu. [

²¹Si sétang tanu ni sia én zéi'kan kawawaan niou i moho, sa kamu zéi'kan mengaléi wo mahpuasa.]”

²²I si Yesus wo sé pahtuzu'en-Na nimaréwok witi Galilea, ang kuan ni Yesus wia ni séra, “Si Oki' ni Tou én iayo wia sé tou.

²³Ni Sia ém wunu'en néra, taan witu un endo katelu, ni Sia én itou sumaup ni Opo Empung.” In tinalinga nérala u méikua ni Yesus, un até néra én totoz rumara.

²⁴ I si Yesus wo sé pahtuzu'en-Na méikaayomola witi Kapernaum, a méyé wia si Petrus sé menanagi pajak um Walé ni Opo Empung, ang kumuama, “Apa si Méster niou é mahwaér pajak[21] um Walé ni Opo Empung kaapa zéi'kan?”

²⁵A mingkotla si Petrus wia ni séra, “Éné ya, ni Sia é mahwaér pajak.” I si Petrus nimuntepa witu um walé, am puunaané ni Yesus i meligau wia ni sia, “Petrus sa ikiit ni ko séi si léwo'zéi' i mahwaér pajak wia sé kolano wia ung kaayahan kenu, sé tou néra kaapa sé tou limepuh umané?”

²⁶A mingkotla si Petrus wia si Yesus, “Sé mahwaér pajak é sé tou limepuh umané.” Ang kuan ni Yesus wia ni sia, “Sa téntu, sé tou néra én zéi'kan mahwaér pajak.

²⁷Taan, wo séra zéi'kan maupi', mangémo mamopasé witi louz. Éndoné si seza' kataré niopasmumé wo wukala u sumahna, witu u sumah ni seza' itii ém wéwéhan un zoit un toro iwaér um pajakta zua witi Walé ni Opo Empung.[22] Éndoné an zoit itii wo maiwaéré wia ni séra um pajak-Ku wo um pajakmu.”