Read Tombulu Matius 19 Bible Online

Matius 19 - Tombulu bible

Matius 19

¹I si Yesus nimakakuamoma péléng niitu, ni Sia mondolé im witi tana' Galilea a mangé witi tana' Yudea witi leweta u so'so'an Yordan.

²Lakez sé tou mahtotondongané mahkiité ni Sia wo ni séra é liné'os-Nala witu.

³A méyé wia si Yesus sé woopira tou im wia sé sana réwok tou Farisi. Ni séra meligau i mema'wa' ni Sia, kuan néra, “Mengiit an tinotoz witu um pa'émanenta, toro wé si tuama kimawéngo in tuma'sala si mahayona karia apa uman ung kinawalian?”

⁴ Si Yesus mingkotla, “Zéi'kampé' binaca nioula wé sa si Opo Empung rengané ing kataré-taré é nimangun ni séra in tuama wo wéwéné?

⁵ Wo ni Sia kasii éng kimua in téntii, ‘Niitumo si tuama én tumula'u si ama' wo si ina'na wo mahwali-wali karia ni mahayona. Wo ni séra zua é nimaesamo.’

⁶Ni séra én zéi'mo zua taan nimaesamo. Niitumo sé tou pinaesamo ni Opo Empung én zéi'kan toro pata'san ni tou.”

⁷ A séra meligau kasii wia ni Sia, “Sa téntu, kaa si Musa nimeréntama i méhéla um pinantikan in tima'samo sa si tuama tuma'sa si mahayona?”

⁸Ang kuan ni Yesus wia ni séra, “Pahpaan ung kaketéhan un até niou makaz si Musa niméné wia ni kamu in tuma'sa si mahayomu. Taan un ulitna rengané ing kataré-taré un téntu én zéi'kan niénéan ni Opo Empung.

⁹ Taan ikua-Kuma wia ni kamu: Séi uman si tuama tuma'sala si mahayona, taan si mahayona zéi'kan simamek, a si tuama itii kumawéngla karia ni wéwéné walina, si tuama itii é simamek.”

¹⁰Ang kuan né pahtuzu'en-Na wia ni Sia, “Sa téntu u mahmuali witu um pahile-ilekan né sana séndé', tawimo in tia'mo kumawéng.”

¹¹Taan kuan ni Yesus wia ni séra, “Zéi'kan péléng sé tou é makawawa ing kumiit u nuwu' itii, akaz uman sé tou tinambéran ni Opo Empung sé makawawa.

¹²Wéwéhan sé tou zéi'kan mata'u kumawéng pahpaan ni séra én téntumo rengané im pahawa-awakempé', wo wéwéhan sé tou zéi'kan kimawéng pahpaan winangun né tou walina nimaténtu. Wéwéhan kasii sé tou zéi'kan kimawéng pahpaan niitu ém paaz néra in esa wo séra toro maayang wia si Opo Empung si witi Kakolanoan-Na. Séi si makawawa i makatulap péléng niitu, ni sia é léwo'zéi' i mahtutulap niitu.”

¹³A sé tou mahwalimé sé koki' wia si Yesus wo Sia zumeta'ma u lengen-Na in ipengaléi-Na. Taan sé tou itii éng kinakoro'an umana né pahtuzu'en-Na.

¹⁴Taan kuan ni Yesus wia sé pahtuzu'en-Na, “Iwayamola sé koki' itii i méyé wia ni Aku! Tia' pahséro'en niou séra, pahpaan sé tou tanu sé koki' kenumo sé makaanu ung Kakolanoan ni Opo Empung.”

¹⁵A si Yesus zumeta'ma u lengen-Na wia sé koki' itii, a séra kamangen-Nala. A Sia tumula'umé un tampa itii.

¹⁶Wéwéhan si tou niméyé wia si Yesus, ang kumuama, “Méster, apa u lé'os u léwo'zéi' wangunengku i makailek ung katou-touan makaz ing kauré-uré?”

¹⁷A si Yesus mingkotla, “Kaa ko meligau tumoro u lé'os wia ni Aku? Akaz uman si Esa si lé'os. Taan sa ko paaz makailek ung katou-touan makaz ing kauré-uré, pahkiitela péléng am perénta ni Opo Empung.”

¹⁸ A si tou itii meligau kasii, “Am perénta wisa itu?” Kuan ni Yesus wia ni sia, “Tia' mahwunu' tou, tia' mahsamek, tia' mahremu', tia' mahtowo i mahkua tumoro a niilek wo tinalinga,

¹⁹pahsigi'ela si ama'mu wo si ina'mu, wo iraraatéla sé kasuatmu tou tanu ni ko i rumaraaté un toumu in esa.”

²⁰Ang kuan ni tarétumou itii wia si Yesus, “Péléng niana ém pinahkiitkumomé. Apapé' un zéi'kampé' winangunku?”

²¹Kuan ni Yesus wia ni sia, “Sa ko paaz uli-ulit kumiit si Opo Empung, mangémo wo ipakawangkéré an anumu wo ipeméténgla wia sé tou zéi'kan siapa apa, karia in téntu ni ko é makailek a sangkum witi kasendukan. Tumondong niitu mawurimé wia'i wo kumiitomé ni Aku.”

²²Kaitalingamé u méikuamé itii, a mangé si tarétumou itii karia i rumara un até pahpaan ni sia én totoz wa'ilan.

²³Ang kuan ni Yesus wia sé pahtuzu'en-Na, “Uli-ulit ikua-Kuma wia ni kamu, totoz susa si tou wa'ilan i muntep witi Kakolanoan ni Opo Empung.

²⁴Isaup-Kupé'ma wia ni kamu: si ontapé' si melé'os umana i muntep witu um wosona ung kéténgen taan si tou wa'ilan i muntep witi Kakolanoan ni Opo Empung.”

²⁵In timalingamé niitu, sé pahtuzu'en-Na é méikanganga ang kumuama, “Sa téntu, séi si toro ipilot im witu un ukuman wana a singkéla'?”

²⁶Si Yesus mileka wia ni séra, ang kumua, “Im wia sé tou, ung kenu én zéi'kan mamuali, taan im wia si Opo Empung, péléng am péléng én toro mamuali.”

²⁷Ang kuan ni Petrus wia si Yesus, “Péléng am péléng é méitula'u naimomé wo kumiit ni Ko, apa u makailekan nai?”

²⁸ Kuan ni Yesus wia ni séra, “Uli-ulit ikua-Kuma wia ni kamu, im péléng am péléng pinakawerumoma ni Opo Empung, i si Oki' ni Tou rumumez witu u rurumezan-Na ing Kolano um pahsigi'en wo pahloozen, ni kamu i mahkii-kiit ni Aku é marumumez kangkasii witu u mapulu' wo zua rurumezan né kolano in tumotoz ulit kaapa zéi'kan am winanguné né mapulu' wo zua suzu ni Israel.

²⁹Séi uman si pahpaan mahkiit ni Aku timula'umé um waléna, sé katuarina tuama kaapa sé katuarina wéwéné, si ama'na kaapa si ina'na, sé oki'na kaapa an umana, ni sia é makailek sumaup u makasana atusé wo kasii makailek ung katou-touan makaz ing kauré-uré.

³⁰ Taan lakez sé tou sé ipahpuu-puuna én ipahmuri-muri, wo sé ipahmuri-muri én ipahpuu-puuna.”