Read Tombulu Matius 2 Bible Online

Matius 2 - Tombulu bible

Matius 2

¹Si Yesus i nimatoumé witi Betlehem tana' Yudea, in toro niitu si kolano é si Herodes. Wéwéhan sé woopira tou tulap sé tototi'en sé witi sendangan a méyé, méikaayoma witi Yerusalem.

²Ni séra meligau wia sé tou witu, “Wisa si kolano né tou Yahudi si taré matoumé itii? Pahpaan niilek naimomé si tototi'en simerité witi sendangan si timuzu'mé ung kinatouan-Na wo ni kai niméyé i mémongkot wo sumigi' ni Sia.”

³Si kolano Herodes wo sé tou witi Yerusalem é mengompo' in timalingamé niitu.

⁴Niitumo pekiréwoknamé sé tonaas né walian wo sé tou tulap un Torat a meligau, “Si Mesias é matou wisa?”

⁵A séra mingkotla, “Witi Betlehem, witi tana' Yudea, pahpaan téntii u méipantik witu um pinantik ni nabi,

⁶ ‘Wo ni kamu in tou Betlehem witi tana' Yehuda, um wanua tua'na niou én zéi'kan ung kumori-kori' im wana am wanua tua'na witi Yehuda, pahpaan im wia ni kamu é méyé si maéndo tonaas, si matuméiz sé tou-Ku Israel.’ ”

⁷Kaitalingamé niitu, zéi'kan kata'uan né tou an tawahené ni Herodes sé tou tulap sé tototi'en itii, a mahtata'u lumé'o-lé'os sa ing kawisa an ileken néramé si tototi'en itii.

⁸A séra iatunama i mangé witi Betlehem, kuana, “Mangémo, wo mapenéro nioula lumé'o-lé'os si Koki' itii, wo sa Sia kinailekan niouomé, ituzu'mé wia ni aku wo ni aku toro mamongkot wo masumigi' wia ni Sia.”

⁹Kaitalingamé u méikuamé ni kolano itii, a séra mangé. Kumompo'mé, si tototi'en si pina'ilek néramé im witi sendangan é mahpuunamo im wia ni séra, a mento'la witu ung katoroan ni Koki' itii.

¹⁰I nimileka si tototi'en itii, ni séra én totoz mahpaa-paaz.

¹¹A séra muntepla witu um walé, a milekla si Koki' itii karia si Maria si ina'-Na, a séra kumuruzla i mongkot wo mahsigi' ni Sia. Wukan nérala am pelélé'osan néra, an éndon néramé u mas, ung kamania wo u mur an iwéhé nérala wia ni Sia.[1]

¹²Pahpaan witu un ipi, si Opo Empung nimapata'umo wia sé tou tulap sé tototi'en itii in tia'mo mawuri sumaup wia si Herodes, a séra mawurima witi tana' néra kimiita u lalan walina.

¹³I sé tou tulap sé tototi'en timula'umomé un tampa itii, si malaekat ni Opo Empung nimapaipima wia si Yusuf, ang kumuama, “Tumoozomé, ipahwalima si Koki' itii karia ni ina'-Na wo tumingkasoma mangé witi Mesir. Mento'pé'la wana makaz ni Aku kumuama wia ni ko sa toromo mawurimé, pahpaan si Koki' itii ém pahpenéron ni Herodes im wunu'en.”

¹⁴Si Yusuf mawongkémé, im wengikan itii an ipahwalinama si Koki' itii wo si ina'-Na, timingkasa witi Mesir,

¹⁵ a séra mento'la wana makaz si kolano Herodes nimaté. Péléng niana é nimamuali tanu u méikua ni Opo Empung mengiité si nabi in téntii, “Si Oki'-Ku én tinawah-Ku i mondolé witi Mesir.”

¹⁶I si kolano Herodes mata'ula i ni sia én tinowoanoma né tou tulap sé tototi'en itii, ni sia én totoz maupi'. An iatunama sé touna i mamunu' sé lowai witi Betlehem wo sé wana am wanua tua'na makaliklik witu. Sé lowai méipekiwunu'na é sé lowai zuana ta'un wo mawa'mé. Niitu é mengiit um pinahtata'unamé wia sé tou tulap sé tototi'en, i ni séra nimilek si tototi'en itii ing kataré-taré.

¹⁷Karia in téntu, nimalekepola u nuwu' ni Opo Empung mengiité si nabi Yeremia,

¹⁸ “Un amé' karia ung kérét i mahamé' un totoz makararaatén ém pahtalingané im witi Rama. Si Rahel[2] i mahamé' wia sé oki'na wo zéi'kan siapa si toro menou ni sia, pahpaan sé oki'na é nimatémo.”

¹⁹I si Herodes nimatémoma, a si malaekat ni Opo Empung nimapailek un touna witu un ipi ni Yusuf, witi Mesir.

²⁰Kuan ni malaekat itii, “Yusuf, tumoozomé wo ipahwalimoma si Koki' wo si ina'-Na i mawurima sumaup witi tana' Israel, pahpaan si tou mahwuwunu' si Koki' itii é nimatémoma.”

²¹A si Yusuf tumoozé, an ipahwalinama si Koki' wo si ina'-Na mawurima sumaup witi tana' Israel.

²²Taan ing kinata'uanla ni Yusuf sa si Arkhelaus oki' ni Herodes si nimaéndola kolano witi Yudea simawela si ama'na, si Yusuf é maindé'kan i mawuri wana. Pahpaan witu un ipina, ni sia ém pinapata'uan ni Opo Empung, a sia mangé witi tana' Galilea.

²³ I ni séra mémoikaayoma witi Galilea, a séra mento'la witi wanua tua'na makangaran Nazaret. Niitu é nimamuali, wo malekepla u nuwu' ni Opo Empung mengiité sé nabi tumoro si Koki' itii: “Ni Sia éng kuan in tou Nazaret.”