Read Tombulu Matius 20 Bible Online

Matius 20 - Tombulu bible

Matius 20

¹Ang kuan ni Yesus, “Ung Kakolanoan ni Opo Empung én tanu si tou makauma tinaneman anggor, si woondopé' karengan nimondoloma mamenéro tou i mamendu un umana.

²I mémoikaileké sé woopira tou mahpaayang, a sia mahkuaala karia néra, um wawaér wia ni séra witu u sana endo én esa dinar, tanu ung kinanaram ipahwaér in toro niitu. A séra iatunama i mamendu un umana tinaneman an anggor.

³Woo jam kasiou im woondo, sia mondola sumaup an ilekennala im witi pasar ém wéwéhampé' sé woopira tou zéi'kan siapa paayangen.

⁴Kuana wia ni séra, ‘Mamomendula kamu witi umaku un tinaneman an anggor, wo ni kamu ém waérangkumokan um wangun ing kailekan niou.’ Kaitalingamé niitu, a séra mangé i mamendu witi uma itii.

⁵Woo jam i mapulu' wo zua wo jam ing katelu im wengindo, sia mondol kasiima sumaup a mangun tanu un taré winangunnamé.

⁶Woo jam kalima im wengindo, sia mondol kasiima sumaup, a sia mahilekala wo sé tou walina sé zéi'kan kasii siapa paayangen. Kuana wia ni séra, ‘Kaa kamu zéi'kan nimaayangla i sana endo kenu?’

⁷A séra mingkotla wia ni sia, ‘Pahpaan zéi'kan siapa tou niméhé paayangen wia ni kai.’ Ang kuana wia ni séra, ‘Sa téntu, ni kamu é mamomendula witi umaku un tinaneman an anggor.’

⁸ Im wengimo, a si makauma itii kumuala wia si menénéiz sé mememendu, ‘Tawahené péléng sé mememendu itii wo séra waérala, rengané im wia sé nimaayang totoz kamurian makaz wia sé nimaayang kataré-taré.’

⁹A méyé sé nimendu rengané in jam kalima im wengindo, ni séra si esa wo si esa é nimakailek um wawaér esa dinar.

¹⁰Tumondong niitu, a méyé sé nimendu rengané ing kataré-taré, pahgenangen nérala un iwaéré wia ni séra é lumakezpé'mé u méiwaér wia sé nimaayang kamurian. Taan ni séra kangkasii si esa wo si esa é nimakailek umané un esa dinar.

¹¹I ni séra nimakailekomé un zoit itii, ni séra é mahpa'os wo menembu-nembut wia si makauma.

¹²Kuan néra, ‘Sé kamurian nimuntepé é nimendu uman sana jam wo pinasuatmu umané karia a méiwaér wia ni kai sé simanaendo i nimaayang wutez wo rinaazan.’

¹³Taan kuan ni makauma itii wia si esaané im wia ni séra, ‘É karia, ni aku én zéi'kan mahwangun u mahsanaweka im wia ni kamu. Zéi'kankuaa rengané ing kataré ni kita é nimahkuaano im waéran esa dinar i sana endo?

¹⁴Éndonoma um wawaérmu wo mangémo. Ni aku ém paaz i maér wia sé kamurian nimuntepé kenu tanu u méiwaérku wia ni ko.

¹⁵Wayaangku kurangku un zoitku. Kaapa ni ko menéutéu pahpaan ni aku é rumaraaté sé tou itii?’ ”

¹⁶ Ang kuan kasii ni Yesus, “Téntu kangkasii si tou ipahmuri-muri é maéndo ipahpuu-puuna wo si ipahpuu-puuna é maéndo ipahmuri-muri.”

¹⁷I si Yesus mahaangé witi Yerusalem, tawahen-Namé sé mapulu' wo zua pahtuzu'en-Na in timampasé ang kuan-Na wia ni séra karegas i mahlampang,

¹⁸“In tarékan ni kita é mangé witi Yerusalem wo im wana si Oki' ni Tou én iayo wia sé tonaas né walian wo sé tou tulap un Torat. Ni Sia én totozen néra im wunu'en.

¹⁹Ni Sia én iayo néra wia sé tou zéi'kan Yahudi i séro'an néra, saluken wo salipen, taan witu un endo katelu ni Sia én itou sumaup ni Opo Empung.”

²⁰A méyé wia si Yesus si mahayo ni Zebedeus karia né oki'na zua. A sia kumuruzla witu u sinaru ni Yesus im wéwéhan um pahaléien.

²¹Kuan ni Yesus wia ni sia, “Apa ung kapaazmu im wanguneng-Ku?” Kuana wia si Yesus, “Kapaazku sé oki'ku zua kenu toro rumumez witi Kakolanoan-Nu im woo sawisa, si esa ém witu ung kawihi-Mu wo si esa kasii ém witu ung kakan-Mu.”

²²Taan kuan ni Yesus, “Um pahaléien niou én zéi'kan kata'uan niou. Makawawa wé kamu i mendan an zézéha pendaneng-Ku un tanumokan i melep witu un eelepan u léwo'zéi' in elepeng-Ku?” A séra mingkotla, “Ni kai é makawawa.”

²³Ang kuan ni Yesus wia ni séra, “Totoz ulit, ni kamu é mamendan an zézéha un tanumokan i melep witu un eelepan u léwo'zéi' in elepeng-Ku. Taan tumoro séi sé marumumez witu ung kakan kaapa witu ung kawihi-Ku, ni Aku én zéi'kan siapa kawasa in tumotoz niitu. U rurumezan itii é maiwéhé ni Ama'-Ku wia sé tinotoz-Namo i makailek niitu.”

²⁴In timalingamé niitu, sé mapulu' pahtuzu'en-Na walina, maupi' wia sé zua mahtuari itii.

²⁵ Taan si Yesus tumawahmé ni séra, ang kumua, “Kata'uan niou sé tonaas né tahsasana wanua sé zéi'kan mata'u si Opo Empung é mahzézéha sé tou néra. Wo sé pahsigi-sigi'en witu é mahwangun kiit um paaz néra wia sé tou néra.

²⁶ Taan ni kamu én zéi'kan tanu ni séra! Séi si paaz i maéndo tou pahsigi'en im wia ni kamu, ni sia é léwo'zéi' i maéndo menenelewir im wia ni kamu.

²⁷Wo séi uman si paaz maéndo kataré im wia ni kamu, ni sia é léwo'zéi' i maéndo ata im wia ni kamu.

²⁸Téntu kangkasii si Oki' ni Tou i méyé én zéi'kan i selewiren, taan i mésumelewir wo i mayo ung katou-touan-Na in tumubus a singkéla' né tou lakez.”

²⁹I si Yesus wo sé pahtuzu'en-Na nimondolé im witi Yerikho, sé tou lakez mahtotondongané i mahkiit ni Sia.

³⁰Wéwéhan sé zua tou letok sé makarumez witu ruruh u lalan, timalingamé i si Yesus é lumangkoi, a séra kumérét, “Tuang, Suzu ni Daud, iraraaté ndootuumé kai!”

³¹Taan sé zua tou letok itii é sinéro'la né tou lakez wo séra menesla. Taan karimezna uman taré ni séra i mahkérét, “Tuang, Suzu ni Daud, iraraaté ndootuumé kai!”

³²A si Yesus mento'la an tumawahmé ni séra zua. Kuan-Na wia ni séra, “Apa ung kapaaz niou im wanguneng-Ku wia ni kamu?”

³³A séra mingkotla, “Tuang, ni kai ém paaz in toro milek.”

³⁴A mawiamé u raraatéan ni Yesus wia ni séra. An irasak-Nama u lengen-Na wana am weren néra zua, in toro niitukan ni séra én toromo mahilek, a séra kumiit si Yesus.