Read Tombulu Matius 21 Bible Online

Matius 21 - Tombulu bible

Matius 21

¹I si Yesus wo sé pahtuzu'en-Na merétémoma u Yerusalem wo méikaayomola witi Betfage um witi kentur Zaitun, a si Yesus matuma sé zua pahtuzu'en-Na i lumampang mapuunama.

²Kuan-Na wia ni séra, “Mangémo witi wanua pahsaruna kenuma. I mawanala ni kamu é milek si keledai mezéi si méitapik wo si anakna witu u réténa. Owarané sé keledai zua itii wo pahaliné wia ni Aku.

³Sa wéwéhan si suméro'la ni kamu, kumuamola in téntii, ‘Si keledai kenu ém pemandungen ni Tuang wo ikii-kiit iwuri-Namokané sumaup.’ ”

⁴Péléng niitu é mamuali wo malekep u Nuwu' ni Opo Empung u méikua mengiité si nabi in téntii,

⁵ “Ikuamola wia sé tou witi Sion: Ilekena, si Kolano niou é mahéyémo wia ni kamu. Ni Sia én eluz uman wo simaké wia si keledai, si anak ni keledai peranggangpé'.”

⁶A sé zua pahtuzu'en-Na itii mangé am wangunen nérala tanu u méikuama ni Yesus wia ni séra.

⁷Am pahalin néramé wia si Yesus si keledai mezéi karia ni anakna. A sanihan nérala u ruuz ni keledai itii karia ang karai tonton néra. A si Yesus rumumezla witu u ruuz ni keledai itii.

⁸Sé tou totoz lakez mahsanih ang karai tonton néra witu u lalan, wo wéwéhan kasii sé makimetoré am panga rintek im wana ang kai am pahzeta' nérama witu u lalan.

⁹ Sé tou lakez mahlampang mahpuuna wo sé mahmurimé wia si Yesus é mahkérét, “Hosana wia si suzu ni Daud! Loozela Sia si niméyé karia u ngaran ni Opo Empung! Hosana witi tampa totoz rakék!”

¹⁰I si Yesus nimuntepoma witi Yerusalem, a maringka'mé péléng sé tou witi wanua tua'na itii wo mahliligauan, “Séi wé si tou kenu?”

¹¹A sé tou lakez itii mingkotla, “Si Kenumo si Nabi Yesus si witi Nazaret tana' Galilea a méyé.”

¹²A si Yesus muntepa witi lésaz um Walé ni Opo Empung a mohoma péléng sé tou sé mahwangkér wo mahteles witu. A méja pahsawelan an zoit wo a rurumezan né mahwangkér sé bombo é méitonga'-Nama.

¹³ Ang kuan-Na wia ni séra, “Witu um Pinantik Lenas é méipantik in téntii, ‘Um Walé-Ku é mapahkuan walé pahpengaléian.’ Taan winangun niouola wuwunian né maremu'!”

¹⁴A méyé sé tou letok wo sé tou kénto' wia si Yesus witi lésaz um Walé ni Opo Empung, a séra lé'osen-Nala.

¹⁵Taan i niilekla né tonaas né walian wo né tou tulap un Torat a makakompo'en winangun-Nama itii wo sé koki' i mahkérété im witi Walé ni Opo Empung, “Hosana, loozela si suzu ni Daud!”, ni séra én totoz maupi'!

¹⁶ Ang kuan néra wia si Yesus, “Pahtalinga-Numa an ipahkérét né koki' kenuma?” Ang kuan ni Yesus wia ni séra, “Éné, pahtalingang-Kumé. Zéi'kampé' pinahbaca-baca nioula wé u méipantik witu um Pinantik Lenas in téntii, ‘Wana a sumah né tou taré matoumé wo sé koki' menusupé' ni Ko én timuzu'moma a lolooz.’ ”

¹⁷A séra itula'u-Namé, a mangé witi wanua tua'na Betania. Im witu ni Sia é nimento'mé sana wengi.

¹⁸Masandomé im woondo, karegas i mahlampang mawuri witi Yerusalem, si Yesus é maharemo.

¹⁹An ileken-Nama ung kai ara witu ruruh u lalan, a Sia mangé witu ung kai itii i menéro wua'na. Taan ni Sia én zéi'kan méikaileké wua'na im witu akaz uman an zani'na. Ang kuan-Na witu ung kai itii, “Ni ko én zéi'mo mahwua-wua'la makaz ing kauré-uré!” In toro niitukan ung kai ara itii é rengan i nimaperama.

²⁰I sé pahtuzu'en ni Yesus nimileka niitu, ni séra mengusi-ngusingsing. A séra meligau wia ni Sia, “Kura kahuman ung kai ara itii é rengan i nimaperama?”

²¹ A mingkotla si Yesus wia ni séra, “Uli-ulit ikua-Kuma wia ni kamu, sa kamu ma'éman wo zéi'kan mahzua-zua genang, ni kamu én zéi'kan uman toro mangun tanu um winangun-Kuma witu ung kai ara itii, taan ni kamu kangkasii én toro kumuama witu ung kentur kenu, ‘Mawutwuta wo ikalombo'ma witi tasik!’ niitu é mamuali.

²²Apa uman am pahaléien niou witu um pengaléien karia in uli-ulit ma'éman, niitu é makailekan niou.”

²³A si Yesus muntepa witi lésaz um Walé ni Opo Empung. Karegas Sia mahtuzu' im witu, a méyé sé tonaas né walian wo sé pahtutu'an né tou Yahudi. Ni séra meligau wia ni Sia, “Wisa a méyé ung kawasa wia ni Ko i mahwangun péléng niitu? Séi si niméhé ung kawasa itii wia ni Ko?”

²⁴A si Yesus mingkotla wia ni séra, “Ni Aku kangkasii é lumigau wia ni kamu wo sa um peligaueng-Ku toro kawingkotan niou, ni Aku kangkasii éng kumua séi si niméhémé ung kawasa wia ni Aku i mahwangun niana.

²⁵Wisa a méyé ung kawasa ni Yohanes i mahsarani sé tou? Wia si Opo Empung kaapa wia si tou a méyé?” Ni séra mahliligauan karia i mahkua, “Sa wingkotentama, ‘Wia si Opo Empung a méyé,’ ni Sia éng kumua wia ni kita, ‘Sa téntu, kaa kamu zéi'kan ma'éman ni sia?’

²⁶Taan sa kita kumuama, ‘Wia si tou a méyé,’ kaindé'ta uman é sé tou lakez, pahpaan si Yohanes ém pahgenangen nérala i nabi.”

²⁷Ang kuan néra wia si Yesus, “Zéi'kan kata'uan nai.” Si Yesus kasii éng kimuala wia ni séra, “Sa téntu, ni Aku kangkasii én zéi'kan kumua wia ni kamu séi si niméhémé ung kawasa wia ni Aku i mahwangun péléng niana.”

²⁸“In tarékan, kura sa ikiit ni kamu un aandéan kenu: wéwéhan si ama' makaoki' sé tuama zua. I sana endo, sia nimangé wia si oki'na tu'a ang kumua in téntii, ‘Oki'ku, in endo kenu mangémo wo mapé' mendumé witi uma tinanemangku an anggor.’

²⁹Si oki' itii nimingkotla, ‘Ni aku é soo.’ Taan si oki' itii nimakagena-genangkala a sia mangé witi uma tinaneman an anggor itii.

³⁰A mangé kasii si ama' wia si oki'na kazua, ang kumuala tanu u méikuanala ing kataré. A si oki' kazua itii mingkotla, ‘Éné ama'.’ Taan ni sia zéi'kan nimangé.

³¹Sa mengiit ni kamu séi si nimangun ung kapaaz ni ama' néra?” A sé tonaas né tou Yahudi itii mingkotla, “Si oki' tu'a.” Ang kuan ni Yesus wia ni séra, “Uli-ulit ikua-Kuma wia ni kamu, sé menanagi am pajak wo sé wéwéné sangayapé' sé puuna i muntep witi Kakolanoan ni Opo Empung taan ni kamu.

³² Pahpaan si Yohanes Menanarani i niméyé é métimuzu' ung katou-touan ulit witu u sinaru ni Opo Empung, taan ni sia én zéi'kan pa'émanen niou. Taan sé menanagi am pajak wo sé wéwéné sangaya é ma'éman si Yohanes. Zozo' kamu nimilekola péléng niitu, taan ni kamu zéi'kan mene'sel wo zéi'kan ma'éman wia ni sia.”

³³ “Talingana un aandéan walina kenu. Wéwéhan si makauma nimukama un uma an tanemannama anggor a réhénennala makaliklik. Ni sia kimiarla woso pahpesutan an anggor wo nimangunla u menara pahtéizan witu un uma itii. An ipekiwendunama un umana itii wia sé mememendu, a sia suméngkota.

³⁴I lelezo mupu', an iatunama sé atana i mangé wia sé mememendu un uma itii i maméndo um wéténgna.

³⁵Taan sé atana én tinionan umanla né mememendu itii. Si esa ém winélwél nérala, si esa ém winunu' nérala wo si esa kasii ém winatu nérala.

³⁶An iatu kasiima ni makauma sé atana walina i mangé wia sé mememendu itii. In tarékan kahuman sé méiatunama é lumakezpé'mé sé méiatunama kataré-taré. Taan ni séra kangkasii ém pinahwangunan umané tanu um winanguné wia sé kakaria néra ing kataré-taré.

³⁷Ing kamurian si makauma nimatuma si oki'na i mangé wia sé mememendu itii. Witu ung genangna, ‘Tantumo si oki'ku ém pahsigi'en néra.’

³⁸Taan i si oki' ni makauma niileka né mememendu itii, a séra mahkua si esa im wia sé walina, ‘Si kenumo si maéndo makaanu un uma kenu, wunu'entamo sia, wo un uma kenu é maéndo anuta.’

³⁹A sia tionan nérala an ilombo' nérama méiondolé im witu un uma itii, am wunu'en nérala.”

⁴⁰A si Yesus meligau wia ni séra, “I si makauma tinaneman an anggor itii méyé, apa um wangunenna wia sé mememendu itii?”

⁴¹A séra mingkotla, “Tantumo sé tou léwo' itii ém wunu'enna wo un uma tinaneman an anggor ém pekiwenduna wia sé mememendu walina, sé mahwéténg a niupu'mé sa orasnamo i mupu'.”

⁴² Kuan ni Yesus wia ni séra, “Zéi'kampé' pinahbaca-baca nioula wé u méipantik witu um Pinantik Lenas, ‘Um watu méitia' né memamangun am walé é nimaéndomola watu to'tolan. Si Opo Empung si nimangun niitu wo ni kita sé nimilek um winangun-Na itii é mengusi-ngusingsing.’

⁴³Niitumo, ikua-Kuma wia ni kamu, péléng an tinotozo in iwéhé wia ni kamu im witi Kakolanoan ni Opo Empung ém pakaéndon im wia ni kamu wo maiwéhé sé tahsasana wanua walina sé makumiit am perénta-Na. [

⁴⁴Séi uman si ikazemak witu um watu itii é makemu, wo séi uman si kaempisan um watu itii é marempék.]”

⁴⁵I sé tonaas né walian wo sé sana réwok tou Farisi timalingama an aandéan méikuama ni Yesus, kinatulapan nérala sa sé paza'ila ni Yesus é ni séra.

⁴⁶Niitumo, ni Sia ém pahtututu'en néramo im pahtitionan, taan ni séra é maindé' sé tou lakez, pahpaan si Yesus ém pahgenangela né tou lakez i nabi.