Read Tombulu Matius 22 Bible Online

Matius 22 - Tombulu bible

Matius 22

¹Ang kuan kasii ni Yesus wia ni séra karia un aandéan,

²“Ung Kakolanoan ni Opo Empung én tanu si kolano mangun um pésta kawéng ni tarétumouna.

³Ni sia nimatuma sé atana i matumawah sé tou kinuana i méyé witu um pésta kawéng itii, taan sé tou itii é soo méyé.

⁴An iatuna kasiima sé atana walina karia ing kinuaana in téntii, ‘Maikuala wia sé tou sé kinua i méyé witi pésta itii: Um pésta én uli-ulit niimekkumo. Sé sapi tuama wo sé tatamun éng kinerizo. Péléng am péléng é niimeko, méyémo wia um pésta kawéng kenu.’

⁵Taan sé tou kinua itii én zéi'kan pandung wana an ipahkua né ata itii, wéwéhan sé nimangé uman taré witi uma wo wéwéhan kasii sé nimangé uman simaru am papaayangen néra.

⁶Wo sé walina én timion uman taréla sé ata itii, an zézéhan, a munu'la ni séra.

⁷A maupi'mé si kolano itii, a matuma sé suraro i mamunu' sé nimunu'la sé atana wo luma'ungé um wanua tua'na néra.

⁸Kumawusa niitu, sia kimuama wia sé atana, ‘Um pésta kawéng é niimeko taan sé tou kinuaku én zéi'kan wangun i méyé witu um péstaku.

⁹Niitumo, mangémo wana am pinasungkulan a lalan tua'na, wo pakakuané péléng sé tou ipahpasungkul niou i méyé wia um pésta kenu.’

¹⁰A mangé sé ata itii an tumawahmé péléng sé ipahpasungkul néra wana a lalan, sé tou léwo' wo sé tou lé'os, taka-takazan un untep um pahpéstaan itii é mawuta-wutamo né sakéi.

¹¹I si kolano nimuntepa witi untep um pahpéstaan i mahilekan karia né sakéina itii, ilekennama ém wéwéhan si tou zéi'kan kimarai um pengangaraien wana am pésta.

¹²A sia meligau wia si tou itii, ‘É karia, kura kahuman ko i nimuntepé én zéi'kan kimarai ung karai pésta?’ Taan si tou itii é memene-menes uman.

¹³ Ang kuan ni kolano itii wia sé atana: Apusela un a'é wo u lengenna wo sia ilombo'ma witu ung karimbengbengan totoz rimbengbeng, im wana ém wéwéhan sé mahamé' makaz am waang néra éng karékétokan.

¹⁴Pahpaan lakez sé tou tinawah, taan toyo' uman sé mapéléng.”

¹⁵A sé sana réwok tou Farisi mangé i mameruz kura i mahwewetes si Yesus karia u liligau.

¹⁶An iatu nérama sé woopira pahtuzu'en néra wo sé woopira tou mahkii-kiit si kolano Herodes mangé wia si Yesus i lumigau, “Méster, kata'uan nai, ni Ko én zéi'kan mahtowo wo ulit i mahtuzu' u lalan ni Opo Empung. Wo zéi'kan siapa sé ikaindé'-Mu pahpaan ni Ko zéi'kan mahsanaweka.

¹⁷Sa ikiit si Méster, toro wé i maér am pajak wia si Kaisar kaapa zéi'kan?”

¹⁸Taan kata'uan ni Yesus ung kaléwo'an néra, ang kumuama, “É tou mahgau-gau lé'os, kaa kamu mema'wa' ni Aku?

¹⁹Amoké ipapailek nioué wia ni Aku un zoit ipahwaér um pajak!” Am pahalin nérama wia ni Sia un zoit esa dinar.

²⁰A si Yesus meligau wia ni séra, “Gio wo ngaran ni séi ung kenu?”

²¹A séra mingkotla, “Gio wo ngaran ni Kaisar.” Ang kuan ni Yesus wia ni séra, “Iwéhéla wia si Kaisar u léwo'zéi' iwéhé wia si Kaisar, wo iwéhéla wia si Opo Empung u léwo'zéi' iwéhé wia si Opo Empung.”

²²Tumalingamé niitu, ni séra é mengusi-ngusingsing an tumula'uma si Yesus.

²³ In endo itiikan, a méyé wia si Yesus sé woopira tou im wia sé sana réwok tou Saduki[23], sé mahéndo-éndoan sa si tou nimatémo én zéi'mo itou sumaup. Ni séra meligau wia ni Sia,

²⁴ “Méster, si Musa éng kimua sa si tou matéma zéi'kan siapa koki', si tuarina é léwo'zéi' ing kumawéng si wéwéné mahayona itii, wo si tou nimatémoma itii toro makailek suzu.

²⁵Wéwéhan sé pitu mahtuari péléng tuama. Si tu'a éng kimawénga a matéma. Pahpaan ni sia zéi'kan nimakaileké koki', niitumo si mahayona itii é méitula'unama wia si tuarina.

²⁶Téntu kangkasii u nimamuali wia si kazua, si katelu makaz wia si kapitu.

²⁷Ing kamurian, im péléng sé tuama mahtuari itii nimatémoma, si wéwéné itii kasii é nimatéma.

²⁸In tarékan, si wisa im wia sé pitu mahtuari itii si maéndo mahayo ni wéwéné itii witu un endo sé tou itoumé sumaup ni Opo Empung? Pahpaan péléng ni séra éng kimawénga si wéwéné itii.”

²⁹A si Yesus mingkotla wia ni séra, “Ni kamu é mahsala', pahpaan zéi'kan katulapan niou a méipantik witu um Pinantik Lenas wo ung kawasa ni Opo Empung!

³⁰Pahpaan witu un endo sé tou itoumé sumaup ni Opo Empung, ni séra én zéi'kan mahkawéng wo pahkawéng, taan ni séra péléng é menou-nou tanu sé malaekat witi kasendukan.

³¹Taan tumoro sé nimaté in itou sumaup ni Opo Empung, zéi'kankuaa binaca niouola u méikua-Na in téntii,

³² ‘Ni Akumo si Opo Empung ni Abraham, Opo Empung ni Ishak wo Opo Empung ni Yakub?’ Si Opo Empung én zéi'kan Opo Empung né tou nimatémo taan Opo Empung né tou menou-nou.”

³³Sé tou lakez sé timalingama a méipahtuzu'ma ni Yesus é mengusi-ngusingsing i mahtalingama a méipahtuzu'-Nama.

³⁴I sé sana réwok tou Farisi timalingala sa sé tou Saduki ém winangunola ni Yesus in zéi'mo siapa un toro ikua, séra maréwoké a mangé wia si Yesus.

³⁵ Wéwéhan si esaané im wia ni séra, si tou tulap un Torat mema'wa' si Yesus. Ni sia é meligau,

³⁶“Méster, um perénta wisa un pahpuu-puuna im witu un ukum Torat?”

³⁷ Ang kuan ni Yesus wia ni sia, “Iraraatéla si Opo Empungmu, karia péléng un atému, karia péléng si rohmu, karia péléng ung genangmu.

³⁸Niitumo um perénta pahpuu-puuna wo kataré-taré.

³⁹ Wo um perénta kazua u masuat wo niitu é: Iraraatéla si kasuatmu in tou tanu ni ko i rumaraaté un toumu in esa.

⁴⁰Witu un zua perénta kenumo un tino'tolan péléng am witu un ukum Torat wo an tutuzu' wana ang kitap né nabi.”

⁴¹I sé sana réwok tou Farisi nimaréwok witu, a si Yesus meligau wia ni séra,

⁴² “Sa ni kamu, séi si Mesias? Suzu ni séi Sia?” A séra mingkotla wia si Yesus, “Ni Sia é Suzu ni Daud.”

⁴³A si Yesus meligau sumaup wia ni séra, “Sa téntu, kaa im puuna i si Daud kinawasa ni Roh Lenas ni sia in esa éng kimua sa si Mesias itii én Tuangna. In toro niitu, ni sia éng kimua in téntii,

⁴⁴ ‘Si Opo Empung é nimuwu' wia si Tuangku: Rumumezola witu ung kakan-Ku, [24] makaz sé kakoro'-Mu iwéhé-Ku witu u léléék-Mu.’

⁴⁵Niitumo, sa si Daud mahkua si Mesias in ‘Tuang’, kura kahuman ni Sia kangkasii é suzuna?”

⁴⁶Zéi'kan siapa zozo' in esa si makawawa i mingkot um peligauen ni Yesus itii. Rengané in toro niitu, zéi'mo siapa zozo' in esa si wuaya i lumigau wia ni Sia.