Read Tombulu Matius 23 Bible Online

Matius 23 - Tombulu bible

Matius 23

¹Ang kuan ni Yesus wia sé tou lakez wo wia sé pahtuzu'en-Na,

²“Sé tou tulap un Torat wo sé sana réwok tou Farisi é mahtuzu' an tinotoz witu un ukum Torat wia sé tou tanumokan i rimumez witu u rurumezan ni Musa.

³Niitumo, pahkiitela wo pahwangunela péléng am pahtuzu' néra. Taan tia' mahkii-kiit am pahmualin néra. Pahpaan an ipahtuzu' néra wia ni kamu én zéi'kan pahmualin néra.

⁴Ni séra nimangunla an tinotoz an totoz lakez an zéi'kan makawawa im wangunen. Tanumokan i niméhéla am pengalin totoz wutez wia sé tou, taan ni séra in esa é soo sumawang sé tou i mangun an tinotoz néra itii.

⁵ Péléng am paayangen am pahwangunen néra én akaz uman in ipapailek wia sé tou. Un tali pemamakén i mengaléi ém winangun nérala malempa-lempaz wo a rumbaina ung karai tonton néra é linambo-lambo'.[25]

⁶Ni séra ém paaz merurumez wana a rurumezan witi totoz puuna im wana am pahpéstaan wo wana am walé peraragésan né tou Yahudi.

⁷Ni séra ém paaz pahsigi'en né tou im wana am pasar wo paaz im pahtawahen né tou ‘méster’.[26]

⁸Taan ni kamu, tia' ipahwaya niou sé tou mahtawah ni kamu i ‘méster’! Pahpaan si Méster niou én esa uman wo ni kamu péléng é mahtuari.

⁹Tia' kamu mahtawah si séi uman in ‘ama'’ im wia ung kaayahan, pahpaan si Ama' niou én esa uman, ni Siamo si Ama' witi kasendukan.

¹⁰Tia' kamu pahkuan in ‘tonaas’, pahpaan si Tonaas niou én esa uman, ni Siamo si Mesias.

¹¹ Niitumo, séi si paaz i maéndo si pahsigi'en im wia ni kamu, ni sia é léwo'zéi' i maéndo menenelewir im wia ni kamu.

¹² Séi uman si mahraké-rakék un touna, ni sia én iroros ni Opo Empung wo séi uman si meroros un touna, ni sia én irakék ni Opo Empung.”

¹³Ang kuan kasii ni Yesus, “Ikaléwo'la ni kamu in tou tulap un Torat wo ni kamu i sana réwok tou Farisi, é kamu sé tou mahgau-gau lé'os. Pahpaan sé tou maéndo tou ni Opo Empung ém pahpoka-pokalan niou, un tanumokan i nimeneta um pepenet witi Kakolanoan ni Opo Empung. Ni kamu in esa é soo maéndo tou ni Opo Empung wo sé tou sé paaz maéndo tou ni Opo Empung ém pahapé-apé'an niou. [

¹⁴Ikaléwo'la kamu sé tou tulap un Torat wo kamu sé sana réwok tou Farisi, é kamu sé tou mahgau-gau lé'os. Pahpaan sé wéwéné mahesa-esamokan ém pahtowoan niou ing kumahat am walé néra. Am pakahpengaléi niou é lambo' i mahwuwuni a léwo'an niou. Pahpaano niitu, ni kamu én ukumen totoz wutez.]

¹⁵Ikaléwo'la ni kamu sé tou tulap un Torat wo ni kamu sé sana réwok tou Farisi, é kamu sé tou mahgau-gau lé'os. Pahpaan ni kamu mahleweta un tasik wo mahliklik ang katanaan i menéro tou zozo' in esa uman ing kumiit um pa'émanen niou. I ni sia mahkiito um pa'émanen niou, ni sia winangun nioula maéndo tou si maiuntep witi naraka, si makazuamé ung kaléwo'an niou.

¹⁶Ikaléwo'la ni kamu sé tonaas letok. Pahpaan ni kamu é mahtuzu' sé tou walina in téntii, ‘Sa si tou mahtiwa' karia um Walé ni Opo Empung, un tiwa' itii én zéi'kan matumoro si tou itii. Taan sa mahtiwa' karia u mas witu um Walé ni Opo Empung, un tiwa' itii é matumoro ni sia.’

¹⁷É kamu sé tou lemou wo letok. Wisa un ipahpuu-puuna, u mas kaapa um Walé ni Opo Empung u limenas u mas itii?

¹⁸Ni kamu kasii mahtuzu' in téntii, ‘Sa si tou mahtiwa' karia um pahtunuan a raragés witi Walé ni Opo Empung, un tiwa' itii én zéi'kan mahtoro ni sia. Taan sa mahtiwa' karia u raragés méizeta' witu um wawo um pahtunuan a raragés itii, un tiwa' itii én tumoro wia ni sia.’

¹⁹É kamu sé tou letok, wisa un ipahpuu-puuna, u raragés kaapa um pahtunuan a raragés u limenas a raragés itii?

²⁰Niitumo, séi uman si mahtiwa' karia um pahtunuan a raragés, ni sia é mahtiwa'mo um pahtunuan a raragés wo karia péléng a raragés méiwawo witu.

²¹Séi uman si mahtiwa' karia um Walé ni Opo Empung, ni sia é mahtiwa' karia um Walé ni Opo Empung wo kasii karia ni Sia, si mahento' witu.

²² Séi uman si mahtiwa' karia ung kasendukan, ni sia é mahtiwa'mo karia u rurumezan ni Opo Empung ing Kolano wo karia ni Sia si rimumez witu.

²³ Ikaléwo'la ni kamu sé tou tulap un Torat wo ni kamu sé sana réwok tou Farisi, é kamu sé tou mahgau-gau lé'os. Pahpaan ni kamu é mahwéhé u sana pahpulu' wia si Opo Empung im witu u solasi, adas tombal wo jintan.[27] Taan un totoz ipahpuu-puuna im witu un ukum Torat én zéi'kan winéhan niou genang tanu: un zéi'kan mahsanaweka, u raraatéan wo u mahtali-talinga wia si Opo Empung. Un esa é léwo'zéi' im wangunen, wo am walina ém pahwéhanla genang.

²⁴É kamu sé tonaas letok. Si rongit witu um pahelepen niou én ipahtia' niou, taan si onta ém pahno'noten niou umana.

²⁵Ikaléwo'la ni kamu sé tou tulap un Torat wo ni kamu sé sana réwok tou Farisi, é kamu sé tou mahgau-gau lé'os. Pahpaan u liklikna um pengengelepan wo ung kakanan ém pahweresin niou, taan um witu un untepna én zéi'kan pahweresin wo mawuta-wuta ang kinahat wo a malo'it.

²⁶É kamu sé sana réwok tou Farisi sé letok! Weresimpé'la un untepna am pengengelepan niou, karia in téntu u liklikna am pengengelepan niou kangkasii é maweresi.

²⁷ Ikaléwo'la ni kamu sé tou tulap un Torat wo ni kamu sé sana réwok tou Farisi, é kamu sé tou mahgau-gau lé'os. Pahpaan ni kamu én tanu u lelewengan kinulo'. Um wawona ém pahileken wangun, taan am witu un untepna é mawuta-wuta an zuhi wo am wuul.

²⁸Téntu kangkasii ni kamu, pahileken né tou ni kamu é mahwangun an ulit, taan im witu un até, ni kamu é mawuta-wuta an zéi'kan ulit wo a léwo'an.

²⁹Ikaléwo'la ni kamu sé tou tulap un Torat wo ni kamu sé sana réwok tou Farisi, é kamu sé tou mahgau-gau lé'os. Pahpaan ni kamu é mahwangun a lelewengan né nabi wo mahrendai an tombol watu ing gumenang sé tou mahwangun an ulit witu u sinaru ni Opo Empung.

³⁰Wo ni kamu kasii mahkua: ‘Sa ni kai menou-nou witu un tinémpomé né nimaopo nai, tantumo ni kai én zéi'kan kimiit ni séra i nimahwunu'mé sé nabi itii.’

³¹Taan karia ni kamu i mahkuamé in téntu, ni kamu é nimakaulitola sa ni kamu é suzu né tou sé nimahwunu'mé sé nabi itii.

³²Niitumo, isampetola a léwo'an am pinahwangunomé né nimaopo niou!

³³ É kamu sé tou totoz léwo' sé tanumokan suzu né ulé' melangu! Kura kamu mapapilot un tou niou im witu un ukuman witi naraka?

³⁴Niitumo, ilekena! Ni Aku nimatumomé wia ni kamu sé nabi, sé tou lintas wo sé tou tulap un Torat. Sé woopira im wia ni séra ém wunu'en niou wo salipen niou, wo sé walina kasii é saluken niou wana am walé peraragésan niou in tou Yahudi wo pahkikiiten niou im witu um wanua tua'na esa makaz wana am wanua tua'na walina in zézéhan.

³⁵ Niitumo, ni kamu én ukumen ni Opo Empung pahpaan am winangun niou wo am winanguné né nimaopo niou i nimahwunu'mé sé tou zéi'kan siapa sinala' rengané wia si Habel, si tou ulit itii makaz wia si Zakharia si oki' ni Berekhya, si winunu' niou witu um pinaselat un tampa lenas wo um pahtunuan a raragés.

³⁶Uli-ulit ikua-Kuma wia ni kamu, péléng niia ém pengalin né tou in tarékan.”

³⁷“É tou Yerusalem, é tou Yerusalem! Ni kamu sé nimunu' sé nabi wo nimahwatumé sé tou méiatu ni Opo Empung i mangé wia ni kamu. Makalakezo ni Aku lumelo i ruméwok ni kamu witu u rété-Ku, tanu si makawali-wali i ruméwok sé sisina witu un tétéwélna, taan ni kamu é soo!

³⁸Niitumo, um walé niou kenu én itula'u ni Opo Empung wo mapene-penesa.

³⁹ Ikua-Kuma wia ni kamu: Rengana in tarékan ni Aku én zéi'mo pahile-ileken nioula, makaz ni kamu mahkua, ‘Loozela Sia, si niméyé karia u ngaran ni Opo Empung!’ ”