Read Tombulu Matius 24 Bible Online

Matius 24 - Tombulu bible

Matius 24

¹Kumawusa niitu, si Yesus mondolé im witu um Walé ni Opo Empung. Sé pahtuzu'en-Na niméyé wia ni Sia a mahtuzu'ma wana a méirendai witi Walé ni Opo Empung.

²Ang kuan ni Yesus wia ni séra, “Pahileken nioua péléng a méirendai itii? Uli-ulit ikua-Kuma wia ni kamu, zéi'kan siapa zozo' in esa im wana am watu wia un tampa kenu un iwaya i nimausunampé', péléng niitu é makemun.”

³Tumondong niitu, a si Yesus mangé witi kentur Zaitun. Im witu si Yesus rimumezla, a méyé sé pahtuzu'en-Na i mésumirita karia-Na, kuan néra, “Méster, ikuamé wia ni kai sawisa u méikua-Mumé itii mamuali, wo apa un tumuzu'mé ni Ko i mawurimé wo an tumuzu'mé ung kaakazan ung kaayahan?”

⁴Ang kuan ni Yesus wia ni séra, “Tuméga-tégam én taa ni kamu ilulu né tou.

⁵Pahpaan lakez sé tou é méyé wo maké u ngaran-Ku wo kumua in téntii, ‘Ni akumo si Mesias’, wo lakez sé tou mailulu néra.

⁶Ni kamu én tumalinga im wéwéhan sé mahkoro' kaapa a sirita tumoro sé mahkoro'. Taan, tuméga-tégam wo tia'mo maarét, pahpaan péléng niana é léwo'zéi' i mamuali, taan niitu én zéi'kampé' un orasna ung kaakazan ung kaayahan.

⁷Pahpaan sé tahsasana wanua é makumoro' wo sé tahsasana wanua walina wo ung kakolanoan esa é makumoro' wo ung kakolanoan walina. Ung kaahreman wo an éhzo' é mamuali wana a lakez tampa.

⁸Taan péléng a mamuali itii én taré ung kataré-taré, tanumokan si wéwéné i mahpendan u rumara pahpaan in tumoumo si oki'na.

⁹ In toro niitu, ni kamu én iayo in zézéhan. Ni kamu ém wunu'en wo maikazi'zis péléng né tou pahpaan mahkiit ni Aku.

¹⁰Wo lakez sé tou ma'éman wia si Opo Empung én tumamburi im wia ni Sia. Ni séra é mayo sé tou walina wo sé tou walina é mayo ni séra wia sé mahkawasa wo mahzi'zi-zi'zisan.

¹¹Lakez sé nabi towo sé méyé wo lumulu sé tou lakez.

¹²Pahpaan kalakeznamo a léwo'an, taka-takazan u raraatéan wia sé tou éng kaina'namo.

¹³ Taan sé tou ezen makaz ing kamurian é makailek ung katou-touan makaz ing kauré-uré.

¹⁴U Nuwu' Lé'os tumoro ung Kakolanoan ni Opo Empung kenu én ipakawoka' wia péléng sé tou wia ung kaayahan wo péléng sé tou toro tumalinga wo mata'u. Kumawusa niitu, taré ikaayola witu ung kaakazan ung kaayahan.”

¹⁵ Ang kuan kasii ni Yesus, “Ni kamu é milek si tou totoz léwo' si meléléwo' am péléng, makarendai witu un tampa lenas, mengiit u méikua ni nabi Daniel. (Si macama ang kenu é méhéla genang witu ung kalakoana).

¹⁶In toro niitu, sé tou witi Yudea é léwo'zéi' tumingkas wana ang kentur.

¹⁷ Si tou witu um wawo um walé én tia'mo mahtutumpamé i maméndo am witu un untep um walé. [28]

¹⁸Wo si witi uma én tia'mo maheesu'mé i maméndo ang karaina.

¹⁹Ikaléwo'la sé ina' mahawa-awak kaapa sé wéwéné pahsusuan né taré itoumé in toro niitu.

²⁰Mengaléila, wo ni kamu in tumingkas én zéi'kan witu un oras un zaté kaapa witu un endo Sabat.

²¹ Pahpaan in toro niitu é mamuali an zézéha zéi'mo kakuaan, un zéi'kampé' nimahmua-mualila rengané ung kaayahan im winangun makaz in tarékan wo un zéi'mo mahmua-mualila.

²²Sa un oras itii zéi'kan rewekena ni Opo Empung, zéi'kan siapa zozo' in esa si tou makailek ung katou-touan makaz ing kauré-uré. Taan pahpaan u raraatéan wia sé tou pinéléng-Na, un oras itii é rinewek-Na umana.

²³In toro niitu, sa wéwéhan tou kumuala wia ni kamu, ‘Ilekené si Mesias ém wia'i’, kaapa, ‘Si Mesias ém witi kenuma!’, um pahkua néra itii én tia' pa'émanen niou.

²⁴Pahpaan sé zéi'kan uli-ulit Mesias wo sé zéi'kan uli-ulit nabi é méyé wo ni séra é mangun a makakompo'en zéi'mo kakuaan, wo sa toro, ni séra kasii é lumulu sé tou pinéléngo ni Opo Empung.

²⁵Gena-genangen! Niitu é mémoikua-Ku wia ni kamu puunala niitu i mamuali.

²⁶ Niitumo, sa wéwéhan tou kumuala wia ni kamu in téntii, ‘Amoké ilekena, ni Sia ém witi kapelasan!’ Tia'mo ni kamu mahaangé witu. Kaapa sa wéwéhan kumuala wia ni kamu, ‘Amoké ilekena, ni Sia ém witu un untep um walé!’ Niitu én tia'mo pa'émanen niou.

²⁷Pahpaan kuramo un tila'pong i sumena'mé im witi sendangan makaz witi talikuzan, téntumo si Oki' ni Tou i mawurimé sumaup wia ung kaayahan kenu im woosawisa.

²⁸ Wisa um pahrimbu-rimbungan né kokoak, tumuzu'mé sa witu ém wéwéhan binatang wuul.”

²⁹ Ang kuan ni Yesus, “Sa nimazéi'moma an zézéha witu un oras itii, si endo é marimbengbeng wo si loloho'en én zéi'mo sumena'. Sé tototi'en é magogo im witi langit wo ang kawasa witi langit é makayo'.

³⁰ In toro niitu, sé tou é milek a mamuali witi langit un tumuzu'mé i si Oki' ni Tou é méyémo sumaup. Péléng sé tou wia ung kaayahan é mamé' wo ni séra é milek si Oki' ni Tou si witu um wawo u ninahak witi langit karia péléng ang kawasa wo ang kawangko'an-Na.

³¹Ni Sia é matu sé malaekat-Na i mondola karia i simengoma um pontuang ung karimez un zanina zéi'mo kakuaan. Ni séra é ruméwok péléng sé tou pinéléng-Na im wana péléng saruan, sé witi penpen u langit kasaru makaz witi penpen u langit kasaru.”

³²Ang kuan ni Yesus wia sé pahtuzu'en-Na, “Mahtata'ula witu ung kalakoan un aandéan tumoro ung kai ara. Sa am pangana rintek é mahmata'moma wo mahsuzumomé, kata'uan niou sa un oras i raazen é lelezo.

³³Téntu kangkasii, sa péléng a méikua-Ku ém pahileken niouola, kata'uan nioula sa un oras si Oki' ni Tou i méyé é lelezo, tanumokan witumo ung kauntepané.

³⁴Uli-ulit ikua-Kuma wia ni kamu, sé tou menou-nou in tarékan kenu ém wéwéhan sé zéi'kampé' nimaté puunala niana péléng i mamuali.

³⁵U langit wo ung kaayahan é mazéi', taan u Nuwu'-Ku én zéi'kan mahzéi-zéi'la.”

³⁶Kuan kasii ni Yesus wia ni séra, “Zéi'kan siapa tou si mata'u sa sawisa un orasna si Oki' ni Tou i mawurimé sumaup. Sé malaekat witi kasendukan én zéi'kan mata'u wo si Oki' ni Tou kangkasii én zéi'kan mata'u, akaz uman si Ama' in esa si mata'u.

³⁷ Pahpaan kuramo u nimamuali witu un oras ni Nuh, téntumo u mamuali i si Oki' ni Tou i mawurimé sumaup im woosawisa.

³⁸Kuramo séra i mahkan wo mahelep, mahkawéng wo pakawéngen, puunala un ampuhan i niméyé makaz witu un endo si Nuh i nimuntep witu u londéi tua'na,

³⁹ un zéi'kan kata'uan néra, makaz un ampuhan limeneua ni séra a séra maapuma, téntumo a mamuali i si Oki' ni Tou méyé sumaup im woosawisa.

⁴⁰In toro niitu, sa wéwéhan sé tou zua witi uma, si esa ém wénéten wo si esa én itula'u.

⁴¹Sa wéwéhan sé wéwéné zua mahgiling ang gandum, si wéwéné esa ém wénéten mangé witi kasendukan wo si esa én itula'u.

⁴²Niitumo, tuméga-tégam, pahpaan zéi'kan kata'uan niou sawisa si Mahpiara niou i mawurimé sumaup.

⁴³ Taan gena-genangen ang kenu: sa kata'uano ni makawalé um wengi si maremu' i mérumemu', tantumo ni sia én timégamo makaz um waléna zéi'kan untepen ni maremu'.

⁴⁴Niitumo, ni kamu kangkasii én tuméga-tégam, pahpaan si Oki' ni Tou é méyé witu un oras zéi'kan kata'uan niou.”

⁴⁵Kuano kasii ni Yesus, “Sa téntu, séi si ata mahtali-talinga wo tulap si éndon ni tuangna i maéndo tonaas né ata walina wo mahwéhé ung kanen wia ni séra witu un oras tinotozo?

⁴⁶Mahpaa-paazla si ata si méileken ni tuangna i nimawurimé, mahpaayang am paayangenna.

⁴⁷Uli-ulit ikua-Kuma wia ni kamu: Si tuangna itii én tumarawésa péléng a sangkumna wia si atana itii.

⁴⁸Taan sa si ata itii é léwo' wo gimenang in téntii,

⁴⁹‘Si tuangku é mauré-urépé' i mawurimé’, a rengan im pahpatezennama sé ata walina, wo mahkan mahelep karia né matetewelen.

⁵⁰Taan, i si tuangna itii mawurimé witu un endo zéi'kan pahgenangennala wo witu un oras zéi'kan kata'uanna,

⁵¹si ata itii ém wunu'en ni tuangna wo mangun ni sia maasar sé tou mahgau-gau lé'os. Im wana sé tou é mamé' makaz am waang éng karékétokan.”