Read Tombulu Matius 26 Bible Online

Matius 26 - Tombulu bible

Matius 26

¹I si Yesus nimakakuamola niitu, ang kuan-Na wia sé pahtuzu'en-Na,

² “Kata'uan niouo, zuana endomokan é lumé'oso un endo mahpésta pahkuan Paskah, wo si Oki' ni Tou é maiayo i salipen.”

³In toro niitu, sé tonaas né walian wo sé pahtutu'an né tou Yahudi é nimaréwok witi istana ni Walian Wangko' makangaran Kayafas.

⁴Im witu, ni séra é nimeruz a maesaan in tumion si Yesus karia i mahwuni-wuni wo i munu' ni Sia.

⁵Taan kuan néra, “Ni Sia én tia'mo pahtitionan witu un endo i mahpésta, én taa sé tou rumikoka'.”

⁶I si Yesus witi Betania, witi walé ni Simon si i makasa én tinoro ung kusta,

⁷ a méyé wia si Yesus si wéwéné mahali-ali um wotel pualam[30] un tinahu'an u lana mahwou tariis totoz mahal. U lana itii méiwuwu'ma ni wéwéné itii witu un ulu ni Yesus si karegas rimumez i mahkan.

⁸Mileka niitu sé pahtuzu'en-Na é maupi' a mahkua, “Apa un torona i mahtitia' u lana itii?

⁹Pahpaan u lana itii én toro iwangkér mahal wo un zoitna én toro iwéhéma wia sé tou zéi'kan siapa apa.”

¹⁰Taan kata'uan ni Yesus am pegena-genangen néra, ang kuan-Na, “Kaa si wéwéné kenu pahsususan niou? Ni sia é nimangunola um wangun wia ni Aku.

¹¹ Pahpaan sé tou zéi'kan siapa apa sekezé ém witu u liklik niou, taan ni Aku zéi'kan sekezé é memali-mali karia niou.

¹²Pahpaan karia im winuwu'annamé u lana itii un awak-Ku, ni Aku é niimeknamola i mamoileweng.

¹³Uli-ulit ikua-Kuma wia ni kamu: Wisa uman wia ung kaayahan kenu u mawokaan né tou u Nuwu' Lé'os ni Opo Empung, um winangun ni wéwéné kenu én isirita néra kangkasii ing gumenang ni sia.”

¹⁴A si esaané im wia sé mapulu' wo zua pahtuzu'en ni Yesus si makangaran Yudas Iskariot, mangé wia sé tonaas né walian.

¹⁵ Kuana, “Apa un iwéhé niou wia ni aku, wo Sia iayoku wia ni kamu?” A sia wéhan nérala un teluna pulu' zoit péra'.[31]

¹⁶Rengané in toro niitu si Yudas é menéro-néro un oras i mayo si Yesus.

¹⁷Witu un endo kataré i mahpésta Roti Zéi'kan Rinagian[32], a méyé sé pahtuzu'en ni Yesus ang kumuama, “Wisa ung kapaaz-Mu i maimekan nai ung kanan i lumé'os um Paskah?”

¹⁸A mingkotla si Yesus, “Mangémo witi wanua tua'na wia si tou wo ikuala wia ni sia in téntii, ‘Kuan ni Méster: Un oras-Ku én zéi'mo uré, witu un untep um walémumo ung kanenang-Ku karia né pahtuzu'eng-Ku i lumé'os um Paskah.’ ”

¹⁹Am wangunela né pahtuzu'en-Na tanu u méikuama ni Yesus wia ni séra. A séra mimekla i lumé'os um Paskah.

²⁰Im wengimo, si Yesus rimumez ing kuman mahwali-wali karia né mapulu' wo zua pahtuzu'en-Na.

²¹Karegas séra i mahkan ang kuan ni Yesus, “Uli-ulit ikua-Kuma wia ni kamu, si esaané im wia ni kamu é mayo ni Aku.”

²²Kaitalingamé niitu, un até né pahtuzu'en-Na én totoz rumara a séra mahta'sama i mahkuama wia ni Sia, “Tuang, zéi'kan ni aku to?”

²³ A si Yesus mingkotla, “Si tou itii é si nimahwalima karia-Ku i simousoua u roti witu um piring, ni siamo si mayo ni Aku.

²⁴Si Oki' ni Tou é maté tanu u méipantik tumoro ni Sia witu um Pinantik Lenas. Taan ikaléwo'la si tou nimayo si Oki' ni Tou. Tawimo si tou itii in zéi'kan méitoumé.”

²⁵Si Yudas si gimenango i mayo si Yesus éng kimuama wia si Yesus, “Zéi'kan ni aku to, Méster?” A mingkotla si Yesus wia ni sia, “Ni ko in esa si kimuamé niitu!”

²⁶Karegas séra i mahkan, si Yesus méndomé u roti ang kumuama u makasé wia si Opo Empung, pemété-météngen-Nala u roti itii an ipahwéhé-Nama wia sé pahtuzu'en-Na ang kumua, “Éndonoma, kanenola, ung kenumo un awak-Ku.”

²⁷Tumondong niitu, a Sia méndomé um pengengelepan un tinahu'an anggor, kumuama u makasé wia si Opo Empung, an iwéhé-Nala wia ni séra ang kumua, “Ni kamu péléng é melepola witu um pengengelepan kenu.

²⁸ Pahpaan ung kenumo un zaha'-Ku, un zaha' nimenté' um pinataazan ni Opo Empung, un isaroi wia sé tou lakez i méhé un ampungan wana a singkéla' néra.

²⁹Taan, ikua-Kuma wia ni kamu, ni Aku én zéi'mo mahele-elepla un anggor kenu, makaz witu un endo ni Aku i melep un anggor weru karia niou witi Kakolanoan ni Ama'-Ku.”

³⁰Makakantarla ang kakantaren lolooz, a si Yesus wo sé pahtuzu'en-Na mangé witi Kentur Zaitun.

³¹ Ang kuan ni Yesus wia ni séra, “Im wengi kenu ni kamu péléng én tumula'u ni Aku. Pahpaan witu um Pinantik Lenas é méipantik, ‘Si memimiara sé domba ém wunu'eng-Ku, wo sé dombana én ikasera.’

³² Taan ni Aku i méitoumomé sumaup ni Opo Empung, ni Aku é mangé witi Galilea puunala ni kamu.”

³³A mingkotla si Petrus wia si Yesus, “Zozo' ni séra péléng tumingkasa tumula'uma ni Ko, taan ni aku én zéi'kan mahwangu-wangunla un téntu.”

³⁴Ang kuan ni Yesus wia ni sia, “Uli-ulit ikua-Kuma wia ni ko, im wengi kenu, puunala si laka' ing kumukuké, ni ko é nimakatelumola ing kimélong ni Aku.”

³⁵Taan kuan ni Petrus wia ni Sia, “Zozo' ni aku léwo'zéi' i maté karia-Mu, ni aku én zéi'kan kumélong ni Ko.” Péléng sé pahtuzu'en ni Yesus walina kasii éng kimuala in téntu.

³⁶Tumondong niitu, si Yesus wo sé pahtuzu'en-Na ikaayola witi tampa makangaran Getsemani. Ang kuan ni Yesus wia ni séra, “Rumumezola wia'i, karegas ni Aku i mamengaléi witi kenuma.”

³⁷A si Yesus tumawahma si Petrus wo sé zua oki' ni Zebedeus ing kumiita ni Sia. Un até-Na é mahpendano i rumara wo zéi'mo si katu'tulan.

³⁸A Sia kumuala wia ni séra, “Un até-Ku én totoz rumara, tanumokan i matémo. Mento'mola wia'i wo tumégamla karia-Ku.”

³⁹A Sia lumampanga oki', kumuruzla karia in timuktuk a mengaléi, “O Ama'-Ku, sa tanu an toro, izou-zou' im wia ni Aku an zézéha kenu, taan ikiitola um paaz ni Ama', zéi'kan mengiit um paaz-Ku.”

⁴⁰Kumawusa niitu, a Sia mawurimé wia sé pahtuzu'en-Na itii, maileken-Na ni séra é nimatekelo. Ang kuan-Na wia si Petrus, “Zéi'kan makawawa kamu wé in tumégamla karia-Ku zozo' i sana jam uman?

⁴¹Tuméga-tégam wo mengaléila wo kamu zéi'kan ikakiit witu um pema'wa'en. Ulit i si roh ém paaz i mangun a lé'os, taan in tou uman, ni kamu én zéi'kan makawawa.”

⁴²A Sia mamengaléi ing kazua. Kuan-Na, “O Ama'-Ku, sa an zézéha kenu zéi'kan mamuali in izou'ma wia ni Aku, taan léwo'zéi' im pengaling-Ku, mamualimola mengiit ung kapaaz-Mu.”

⁴³A si Yesus mawurima sumaup wia sé telu pahtuzu'en-Na. Maileken-Na ni séra é nimatekelo sumaup pahpaan ni séra én totozo i mahtatando'.

⁴⁴An iwayamé ni Yesus séra im witu, a Sia mamengaléi ing katelu wo u méikua-Namé é masuat wo un taré ikua-Namé.

⁴⁵Kumawusa niitu, a Sia mawurimé sumaup wia sé telu pahtuzu'en-Na ang kumua wia ni séra, “Timekel wo kimana'pé' kasii kamu? Ilekena, un orasna é méikaayomola i si Oki' ni Tou iayo wia sé tou mahsingkéla'.

⁴⁶Rumendaiomé! Méyémo kita mangémo. Si tou si mayo ni Aku é merétémomé!”

⁴⁷I si Yesus karegaspé' mahnuwu', méyé si Yudas si esaané im wia sé mapulu' wo zua pahtuzu'en-Na, nimahwalimé karia né sana réwok tou lakez sé mahali-ali am pisou wo am wéwélwél. Ni séra é méiatumé né tonaas né walian wo né pahtutu'an né tou Yahudi.

⁴⁸Taan puunala niitu si Yudas éng kimuamola wia ni séra, “Si Tou si masiomengku, ni Siamo itu, tionanola Sia.”

⁴⁹I ni séra nimawitumola, a si Yudas rengan nimangé wia si Yesus ang kumua, “U sigi'ku Méster!” A Sia siomennama.

⁵⁰Taan si Yesus kimuama wia ni sia, “É karia, niitu ndéén u niéyému?” A rumétémé sé tou a si Yesus tionan nérala.

⁵¹Taan si esaané im wia ni séra sé kimiité si Yesus, simawuté um pisou, am wira'ennama si ata ni Walian Wangko' makaz u luntengna é nimatengkola.

⁵²Ang kuan ni Yesus wia si tou itii, “Iuma'la sumaup um pisoumu itii, pahpaan péléng sé tou mahpaké um pisou i munu' tou, ni sia kangkasii é maté karia um pisou.

⁵³Kaapa pahgenangen nioula i ni Aku én zéi'kan toro mahaléia wia si Ama'-Ku, wo rengan in iatu-Namé sé mapulu' wo zuana réwok suraro[33] né malaekat i mésumawang ni Aku?

⁵⁴Taan sa téntu, kurapé' kahuman i malekep u méipantik witu um Pinantik Lenas, ung kimua sa a mahmuali in tarékan é léwo'zéi' i mamuali?”

⁵⁵ A si Yesus kumuala wia sé tou lakez itii, “Pahgenangen nioula ni Aku én tou léwo' taka-takazan ni kamu nimahalimé am pisou wo am wéwélwél i métumion ni Aku? Sekez in endo ni Aku é rimumez wo mahtuzu' witi lésaz um Walé ni Opo Empung, taan ni Aku zéi'kan pahtitionan niou.

⁵⁶Taan péléng niia é léwo'zéi' mamuali wo malekep a méipantik né nabi witu um Pinantik Lenas.” Am péléng sé pahtuzu'en ni Yesus tumula'uma ni Sia an tumingkasa.

⁵⁷I si Yesus tinionan néramomé, a Sia ipahwali nérama isaru wia si Walian Wangko' Kayafas. Im witu é nimaréwoko sé tou tulap un Torat wo sé pahtutu'an né tou Yahudi.

⁵⁸Karegas niitu, si Petrus é mengii-ngiité si Yesus witi zou'ma makaz witi lésaz um walé ni Walian Wangko'. I ni sia nimuntepola witu u lésaz itii, ni sia é marimumez karia né menénéiz um walé ni Opo Empung i mahiilek kura u mamuali wia si Yesus.

⁵⁹Sé tonaas né walian wo sé walina sé méikauntep witu u Mahkama Agama é menéro-néro tou sé kumua an towo tumoro an tinalinga wo niilek néra i sumaru si Yesus, wo Sia toro ukumen i maté.

⁶⁰Taan ni séra én zéi'kan méikailekla maan in esa, si toro tumuzu'mé ung kasumalaan-Na, zozo' lakez sé tou mahkuama an towo tumoro si Yesus. Ing kamurian niméyé sé tou zua,

⁶¹ ang kumuama, “Si Tou kenu i makasa éng kimua i ni Sia én toro gumogar um Walé ni Opo Empung wo rumendai niitu sumaup witu un teluna endo.”

⁶²A rumendaié si Walian Wangko' itii ang kumua wia si Yesus, “Zéi'kan siapa ikua-Ko wé ing kumelung un tou-Mu wana an ipahtoké néra kenu?”

⁶³Taan si Yesus é memene-menes uman. A si Walian Wangko' itii kumua kasiima wia ni Sia, “Karia u ngaran ni Opo Empung si menou-nou, ikuamé wia ni kai, apa ni Ko é Mesias, si Oki' ni Opo Empung, kaapa zéi'kan?”

⁶⁴ A si Yesus mingkotla, “Ni ko éng kimuamomé niitu, taan ikua-Kuma wia ni kamu, rengan in tarékan ni kamu é milek si Oki' ni Tou i rimumez witu ung kakan ni Totoz Mahkawasa wo méyé witu um wawo a ninahak witi langit.”

⁶⁵ A si Walian Wangko' itii sumangsanga ung kinaraina ang kumua, “Ni Sia mahséro'mo si Opo Empung. Apapé' un torona kita menéro tou ing kumua a niilek wo tinalinga tumoro ni Sia? In tarékan én tinalinga niouoma ni Sia i mahséro' si Opo Empung.

⁶⁶Sa kamu éng kura?” A séra mingkotla, “Ni Sia é léwo'zéi' in ukumen maté.”

⁶⁷ A séra mahrura' witu ung gio-Na, mahsondo' ni Sia wo sé walina é mahsepal ni Sia.

⁶⁸Ang kuan néra, “É Mesias! Amoké ikuamé wia ni kai, séi sé mahsepala ni Ko?”

⁶⁹Karegas niitu, si Petrus é rimumez witi lésaz um walé ni Walian Wangko'. A méyé wia ni sia si ata wéwéné ang kumua, “Ni ko kasii sekezé é memali-mali karia ni Yesus, si tou Galilea itii.”

⁷⁰Taan ni sia é mahkélong uman im witu u sinaru péléng né tou, kuana, “Zéi'kan kata'uangku um pahkuamumé.”

⁷¹I ni sia nimangé witi pepenet tua'na, si ata wéwéné walina nimileka ni sia ang kumua wia sé tou witu, “Si tou kenu é mahkari-karia si Yesus, si tou Nazaret itii.”

⁷²Taan ni sia kimélong uman kasiila karia i mahtiwa', “Si Tou itii én zéi'kan kata'uangku.”

⁷³Zéi'kan uré kasii, sé tou witu rimétéla si Petrus, ang kumuama, “Tantumo ni ko kasii én esaané im wia ni séra, niitu én toro kata'uan witu um pakahnuwu'mu.”

⁷⁴A si Petrus rengan i mahsalou wo mahtiwa', “Zéi'kan kata'uangku si tou itii.” In toro niitukan ang kumukuké si laka'.

⁷⁵Ang kagenangala ni Petrus u méikua ni Yesus wia ni sia, “Puunala si laka' ing kumukuké, ni ko é nimakatelumola ing kimélong ni Aku.” A sia mondola a mamamé' karia in totoz rumara un até.