Read Tombulu Matius 28 Bible Online

Matius 28 - Tombulu bible

Matius 28

¹I limangkoioma un endo Sabat, puunala si endo sumerité in endo kataré witu un duminggu itii, si Maria tou Magdala wo si Maria walina é mamilek u linewengan itii.

²Kumompo'mé a méhzo'mé totoz repet pahpaan si malaekat ni Opo Empung si witi kasendukan én timumpamé a méyé witu um watu méipalot u lelewengan itii, a niitu isoro'nama a sia rumumezla witu um watu itii.

³Ung giona én tanumokan u sena'na un tila'pong wo ung kinaraina én totoz kulo' tanumokan u salju.

⁴Sé suraro mahtéiz witu én totoz ing kinaindé'an akaz i mahgerger an ikawenusa tanumokan sé tou nimatémo.

⁵Taan si malaekat itii éng kimuama wia sé wéwéné itii, “Tia'mo maindé'! Kata'uangku sa ni kamu é menéro si Yesus si sinalip itii.

⁶Ni Sia én zéi'mo wia'i pahpaan ni Sia é méitoumomé sumaup ni Opo Empung tanu u mémoikua-Nala. Méyé wia'i wo ilekené u zinetaan ni Sia.

⁷Mahrewekola, wo maikuala wia sé pahtuzu'en-Na, ni Sia é méitoumomé sumaup ni Opo Empung im wia sé nimaté. Ni Sia é nimapuunamoma im wia ni kamu i nimangé witi Galilea. Im wana ni kamu é mamilek ni Sia. Totoz gena-genangen a méikuakuma wia ni kamu!”

⁸A séra rengan in tumula'umé u lelewengan itii karia i maindé' wo totoz i mahpaa-paaz wo mahkara'ma i makumua péléng niitu wia sé pahtuzu'en ni Yesus.

⁹Kumompo'mé si Yesus é nimahilekanola karia néra a Sia sumigi'la wia ni séra. Séra rumétéla ni Sia, a mingki'la un a'é-Na a mahongkot wia ni Sia.

¹⁰Ang kuan ni Yesus wia ni séra, “Tia'mo maindé'. Mangémo wo maikuala wia sé katuari-Ku wo séra mangé witi Galilea. Im wana ni séra é mamilek ni Aku.”

¹¹Karegas sé wéwéné itii witi lalan, sé woopira im wia sé mahtéiz u linewengan si Yesus é nimangé witi wanua tua'na Yerusalem, a makumua péléng a nimamuali itii wia sé tonaas né walian.

¹²I nimakaeruzola karia né pahtutu'an, an totozen nérala i méhé zoit lakez wia sé menénéiz itii

¹³wo kimuama, “Ni kamu é léwo'zéi' makumua i sé pahtuzu'en ni Yesus é niméyéma im wengi a rumemu'ma un awak ni Yesus i ni kamu nimatekel.

¹⁴Wo sa niia katalingaana ni gubernur, ni sia é nuwu'an naimokan wo kamu zéi'kan maukumen.”

¹⁵Éndo nérama an zoit itii a mangun tanu a méikuama wia ni séra. U sirita kenu é méikaolanga wia sé tou Yahudi makaz in tarékan.

¹⁶ Sé mapulu' wo esa pahtuzu'en ni Yesus nimangé witi Galilea, witi kimeleng u méituzu'ma ni Yesus in angéan néra.

¹⁷I ni Sia niilek nérala, a séra kumuruzla ung gio makaz witu un tana' witu u sinaru-Na, taan sé woopira im wia ni séra é mahzua-zua genang.

¹⁸A si Yesus rumétéla ni séra ang kumuama, “Péléng ang kawasa witi kasendukan wo wia ung kaayahan é mémoiwéhé wia ni Aku.

¹⁹ Niitumo, mangémo wangunela péléng sé tahsasana wanua maéndo pahtuzu'eng-Ku wo saranila séra karia u ngaran ni Ama', ni Oki' wo ni Roh Lenas,

²⁰wo tuzu'ela séra i mahwangun péléng a mémoiperénta-Ku wia ni kamu. Kata'uan nioula, ni Aku é menaté-natér ni kamu makaz ung kaakazan ung kaayahan.”