Read Tombulu Matius 3 Bible Online

Matius 3 - Tombulu bible

Matius 3

¹In toro niitu, wéwéhan si tou makangaran Yohanes Menanarani. Ni sia nimangé witi kapelasan witi Yudea a mahwoka' wia sé tou,

² “Itula'umola a singkéla' niou, pahpaan ung Kakolanoan ni Opo Empung é lelezokan!”

³ Si Yohanes kenumo si im puuna paza'ila ni nabi Yesaya, “Wéwéhan si tou si mengéré-ngérét witi kapelasan: Imekela u lalan lampangan ni Mahpiara, terénela u lalan lampangan-Na.”

⁴ Si Yohanes éng kimarai ung karai tonton kulit ni onta am wangunen wo un embetna éng kawal ni binatang. Ang kakanenna é sé koropit wo a rarina' wana an talun.

⁵A méyé wia ni sia sé tou lakez sé witi Yerusalem wo péléng sé witi tana' Yudea wo péléng sé witi makaliklik un tana' Yordan.

⁶Karia i makaulit a singkéla' néra, ni séra pahsaranin ni Yohanes witi so'so'an Yordan.

⁷ Taan i niileknala lakez sé tou wia sé sana réwok tou Farisi wo Saduki niméyé i mekisarani, ang kuana, “É kamu sé suzu ni ulé' melangu. Séi si kimuala wia ni kamu i ni kamu én toro tumingkasé witu un upi' ni Opo Empung u méyé.

⁸Niitumo, ipapa- ilekla wana am pahwangunen niou i ni kamu én timula'umola a singkéla' niou.

⁹ Tia' kamu mahgenangla in zéi'kan makailek un ukuman pahpaan ni kamu é suzu ni Abraham. Ikuakuma wia ni kamu, si Opo Empung én toro mangun am watu kenu maéndo suzu ni Abraham!

¹⁰ Um pati ém witumo un tuuz ung kai wo péléng ang kai zéi'kan mahwua'mé wangun ém wanti'en wo itia' witu un api.

¹¹Ni aku é mahsarani ni kamu karia un zano, un tumuzu'mé ni kamu én timula'umola a singkéla' niou. Taan ni Sia si tumondongé ni aku, ni Siapé' si mahkawasa taan ni aku. Maan i muka uman u sapatu-Na[3], ni aku én zéi'kan wangun. Ni Sia masumarani ni kamu karia si Roh Lenas wo un api.[4]

¹²Un tataap ém witumo u lengen-Na in tumaap ang gandum makaz i maweresi. Ang gandum wangun é réwoken-Na witi pelélé'osan ang gandum, taan péléng am pesel é la'ungen-Na witu un api zéi'kan mahpaté.”

¹³A méyé si Yesus im witi Galilea. Ni Sia mangé witi so'so'an Yordan wia si Yohanes i saranin.

¹⁴Taan si Yohanes é soo i sumarani si Yesus, kuana, “Un ulitna, ni aku si léwo'zéi' i sarani-Nu, taan ni Ko é niméyé uman taré wia ni aku.”

¹⁵Ang kuan ni Yesus wia ni sia, “Iwayamola ni ko si sumaranimé ni Aku. Pahpaan karia i nimangunla niitu, ni kita é nimangunola péléng um paaz ni Opo Empung.” Kaitalingamé niitu, a si Yesus saraninala.

¹⁶I si Yesus sinaranimola, a Sia rengan mondolé im witu un zano. In toro niitukan, a mawukama u langit an ileken-Nama si Roh ni Opo Empung tanu si bombo timumpama witu um wawo-Na.

¹⁷ An talingané u Nuwu' witi kasendukan ung kimuamé, “Si kenumo si Oki'-Ku si ikararaaté-Ku. Ni Siamo si mahwangun un até-Ku mahpaa-paaz.”