Read Tombulu Matius 4 Bible Online

Matius 4 - Tombulu bible

Matius 4

¹ A si Yesus ipahwalima ni Roh ni Opo Empung witi kapelasan i mawa'wa'en ni tonaas né sétang.

²Im witu si Yesus é mahpuasa epatna pulu' endo wo epatna pulu' wengi, kumawusa niitu a Sia mendané maharem.

³A méyé si tonaas né sétang ang kumuama wia ni Sia, “Sa Ko Oki' ni Opo Empung, peréntanoma am watu kenu i mamualima roti.”

⁴ Taan si Yesus é nimingkotla, “Witu um Pinantik Lenas méipantik in téntii, ‘Si tou menou-nou én zéi'kan uman pahpaan u roti, taan wana péléng an ipahnuwu'mé ni Opo Empung.’ ”

⁵A Sia ipahwalima ni tonaas né sétang witi Yerusalem um wanua tua'na lenas. Im witu ni Sia é méipekirendaila ni tonaas né sétang witu um wawona um Walé ni Opo Empung.

⁶ Ang kuan ni tonaas né sétang wia ni Sia, “Sa Ko Oki' ni Opo Empung, mapanawu'moma, pahpaan méipantik witu Pinantik Lenas in téntii, ‘Tumoro ni Ko, si Opo Empung é meréntamé sé malaekat-Na i mésumikop ni Ko wo un a'é-Mu én zéi'kan ikawasal witu um watu.’ ”

⁷ A sia wingkotela ni Yesus, “Wéwéhan kasii u méipantik in téntii, ‘Tia' ko mema'wa' si Mahpiara, si Opo Empungmu!’ ”

⁸A si Yesus ipahwali kasiima ni tonaas né sétang witi wawona ung kentur totoz rakék, an ipapaileknala wia ni Sia péléng ang kakolanoan wia ung kaayahan karia ang kawa'ilanan néra.

⁹Ang kuan ni tonaas né sétang wia si Yesus, “Péléng am pahileken-Numa itii én iwéhéku wia ni Ko sa Ko mongkot wo sumigi' ni aku.”

¹⁰ Taan kuan ni Yesus wia si tonaas né sétang, “É tonaas né sétang, mangémo ko im wia'i! Pahpaan wéwéhan u méipantik, ‘Ni ko é léwo'zéi' i mahongkot wo mahsigi' si Mahpiara, si Opo Empungmu wo ni Sia uman si pahragésannu.’ ”

¹¹A si Yesus itula'uma ni tonaas né sétang. An ilekena, sé malaekat niméyé i mahselewir ni Sia.

¹² Ing kinatalingaala ni Yesus sa si Yohanes én tinionano wo méiuntepoma bui, a si Yesus mangé witi Galilea.

¹³ Ni Sia mondolé im witi Nazaret a mamento' witi Kapernaum, witi tembir u louz Galilea, witi tana' Zebulon wo Naftali.

¹⁴Karia in téntu, nimalekepola u méikua ni Opo Empung mengiité si nabi Yesaya in téntii,

¹⁵ “Un tana' Zebulon wo un tana' Naftali, u lalan mangé witi tasik, un tana' witi lewet u so'so'an Yordan, witi Galilea, witi tana' né tou zéi'kan Yahudi,

¹⁶sé tahsasana wanua mahento' wana ang karimbengbengan, é nimileko u Sena' Wangko'. Wo im wia ni séra sé mahento' witu un tampa kinawasa um patéan, u Sena' itii é mahsena'moma wia ni séra.”

¹⁷ Rengané in toro niitu si Yesus é mahwoka', “Itula'umola a singkéla' niou, pahpaan ung Kakolanoan ni Opo Empung é lelezokan!”

¹⁸I si Yesus mahlampang witi tembir u louz Galilea, ileken-Nama sé zua mahtuari, ni séra é si Simon si pahkuan kangkasii im Petrus wo si Andreas katuarina. Ni séra éng karegas i mahlombo' u lolombo' witu u louz, pahpaan ni séra é melolombo'.

¹⁹ Ang kuan ni Yesus wia ni séra, “Méyémo, kumiitomé ni Aku, ni kamu ém wanguneng-Ku mahpenéro tou ing kumiit ni Aku.”

²⁰Kaitalingamé niitu, an itula'u néramé u lolombo' néra ang kumiit si Yesus.

²¹Karegas si Yesus i mahlampang, an ileken-Na kasiima sé zua mahtuari walina, ni séra é si Yakobus wo si Yohanes, ni séra zua én oki' ni Zebedeus. Ni séra zua wo si ama' néra ém witu u londéi i mahimek[5] u lolombo'. A sé zua itii tawahené ni Yesus,

²²a séra rengan in timula'umé si ama' néra karia u londéi, ang kumiit si Yesus.

²³ Si Yesus mahliklik wana péléng an tampa witi Galilea. Ni Sia mahtuzu' wana am walé peraragésan né tou Yahudi wo mahwoka' u Nuwu' Lé'os tumoro ung Kakolanoan ni Opo Empung wo mahlé'os péléng a saki wo a lailai né tou witu.

²⁴An ikaolanga u sirita tumoro si Yesus wana péléng an tampa witi Siria. Niitumo sé tou mahwalimé péléng sé tou saki, sé tou totoz zézéha pahpaan a saki néra an zéi'mo kaezenan, sé tou sinelazan né sétang, sé mati-mati ayang wo sé lailai, a séra pakalé'osena ni Yesus.

²⁵A sé tou lakez mahto-tondongana i mahkiit ni Sia. Ni séra ém witi Galilea, witi Dekapolis[6], witi Yerusalem, witi Yudea, wo witi leweta u so'so'an Yordan a méyé.