Read Tombulu Matius 6 Bible Online

Matius 6 - Tombulu bible

Matius 6

¹ Kuano kasii ni Yesus, “Gena-genangen! An tinotoz witu um pahempungan én tia' uman pahlé'osen niou witu saru-sarun né tou wo niitu ileken néramé. Pahpaan sa téntu, ni kamu én zéi'kan makailek um wawaér ni Ama' niou si witi kasendukan.

²Niitumo, sa ni kamu méhé a sasawang wia sé tou zéi'kan siapa apa, tia'mo ipahwowoka' niou tanu am pahwangunen né tou mahgau-gau lé'os im wana am walé peraragésan né tou Yahudi kaapa wana a lalan, i mekilooz. Uli-ulit ikua-Kuma wia ni kamu: Ni séra é nimakailekola um wawaér wia ni séra.

³Taan sa ni kamu méhéla a sasawang, tia' wo um winangunla u lengen kakan éng kata'uan u lengen kawihi.

⁴Sa méhé a sasawang én ipahwuni-wunila, si Ama' niou si mahileké an ipahwuni-wuni itii é méhé um wawaér wia ni kamu.”

⁵ “Sa ni kamu mengaléi én tia' tanu sé tou mahgau-gau lé'os i mengaléi. Ni séra sa mengaléi én totoz paaz mererendai witu un untep am walé peraragésan né tou Yahudi wo wana ang kaéngkolan a lalan, wo séra pahilekené né tou. Uli-ulit ikua-Kuma wia ni kamu: Ni séra é nimakailekola um wawaér wia ni séra.

⁶Taan sa ni kamu mengaléi, muntepla witi penenekelan niou, likepé um pepenet wo mengaléila wia si Ama' niou si witi tampa méikawuni. Karia in téntu, si Ama' niou si mahileké a méikawuni é méhé um wawaér wia ni kamu.

⁷Sa kamu mengaléi én tia' pelambo-lambo'en, tanu ung kinanaram né tou zéi'kan Yahudi sé zéi'kan mata'u si Opo Empung. Pahgenangen nérala sa lakez an ipahkua, am pengaléien néra én énéané.

⁸Niitumo, ni kamu én tia' tanu ni séra, pahpaan kata'uan ni Ama' niou am pemandungen niou, puunala niana im pahaléien niou wia ni Sia.

⁹Pahpaano niitu, sa kamu mengaléi, mengaléiola tanu ang kenu, Ama' nai witi kasendukan, u ngaran-Mu é lenasen,

¹⁰ung Kakolanoan-Nu é méyé, um paaz-Mu é mamuali wia ung kaayahan wo witi kasendukan.

¹¹Wéhané kai tikohon in endo i nania mengiit am pemandungen nai

¹²wo ampungané ni kai im wana ang kasumalaan nai tanu ni kai kangkasii i niméhéla un ampungan wia sé tou nimangunla ang kasumalaan wia ni kai;

¹³wo tia'mo ipahwali ni kai witu um pema'waan, taan ipiloté ni kai im wia si léwo'. [Pahpaan ni Komo si makaanu ung Kakolanoan, wo ung kawasa, wo ung kawangko'an makaz ing kauré-uré. Amin.]

¹⁴ Pahpaan sa kamu méhéla ampungan wana ang kasumalaan né tou, si Ama' niou si witi kasendukan kangkasii é méhé un ampungan wia ni kamu.

¹⁵Taan sa kamu soo méhé ampungan wia sé tou, si Ama' niou kangkasii én zéi'kan méhé un ampungan wana ang kasumalaan niou.”

¹⁶Kuan kasii ni Yesus, “Sa kamu mahpuasa, tia' ang gio niou ém pahileken in tekur tanu sé tou mahgau-gau lé'os. Pahwangu-wangunen néra ang gio néra, wo sé tou é mileké ni séra kare- gas i mahpuasa. Uli-ulit ikua-Kuma wia ni kamu: Ni séra é nima- kailekola um wawaér wia ni séra.

¹⁷Taan sa kamu mahpuasa, rumia'musla wo lanala um wuuk niou,

¹⁸wo zéi'kan kata'uan né tou i ni kamu é mahpuasa, taan akaz uman si Ama' niou si witi tampa méikawuni si mahileké. Ni Sia si mahileké a méikawuni é méhémé um wawaér wia ni kamu.”

¹⁹ Kuano kasii ni Yesus, “Tia' kamu mahréwok uman a sangkum niou wia ung kaayahan, pahpaan im wia ung kaayahan sé meniksik wo an ta'ingkéré' é luméwo' niana, téntu kangkasii sé maremu' én toro rumemu' niana.

²⁰Taan ruméwokola a sangkum niou witi kasendukan, pahpaan im witi kasendukan sé meniksik wo an ta'ingkéré' én zéi'kan luméwo' niana, wo sé maremu' én zéi'kan rumemu' niana.

²¹Pahpaan wisa a sangkum niou, ung genang niou kasii ém witu.”

²²Kuano kasii ni Yesus, “Um weren én tanu u solo witu un tou. Sa um werenmu ém wangun, péléng un toumu én ayah.

²³Taan sa um werenmu éng kewur, péléng un toumu é rimbengbeng. Sa u sena' witu un toumu é rimbengbengo, a sangali karimbengbeng ung karimbengbengan itii.

²⁴Zéi'kan siapa si tou toro maayang wia sé zua tuang. Pahpaan sa téntu si esa é maikazi'zisna wo si walina én iraraaténa. Kaapa ni sia é mahtali-talinga wia si esa wo zéi'kan mahtali-talinga si walina. Ni kamu én zéi'kan mamuali i mahpaayang wia si Opo Empung wo karegas niitu mahpaayang wia si Mamon.”

²⁵“Niitumo ikua-Kuma wia ni kamu: Tia'mo ikaarét ung katou-touan niou, tumoro ung kanen kaapa un elepen niou wo tia' kangkasii ikaarét un awak niou, tumoro ang karaien niou. Zéi'kankuaa ung katou-touampé' un ipahpuu-puuna taan ung kakanen, wo un awakpé' un ipahpuu-puuna taan ung karai?

²⁶Ileken nioua sé tumétéwél witi langit, sé zéi'kan mahkeroz wo zéi'kan mahupu' wo zéi'kan mahréwoké ang kakanen wana an tatahu'an, taan si Ama' niou witi kasendukan é mahwéhémé ang kakanen wia ni séra. Zéi'kankuaa ni kamupé' sé ipahpuu-puuna taan sé tumétéwél itii?

²⁷Séi si wia ni kamu si pahpaan im paharétan, toro mawes zozo' in zéi'kan uré witu ung katou-touanna?

²⁸Kaa kamu paharétan tumoro ung karaien? Amoké ileken nioua am wunga bakung witi kapelasan, am wunga itii mahtoumé zéi'kan mahpaayang wo zéi'kan mahwangun wanang,

²⁹ taan ikua-Kuma wia ni kamu: Si Salomo im witu ung kawangko'anna, zéi'kan nimahkara-karaila tanu ung kawangun un esaané im wana am wunga itii.

³⁰Niitumo, sa an zukut witi kapelasan an tumoumé in tarékan wo i sando én ziketano ém pahimeken ni Opo Empung, zéi'kankuaa si Opo Empung é mimek ni kamu lumouspé'mé niitu, é kamu sé zéi'kan tahlous ma'éman?

³¹Pahpaano niitu, tia'mo kamu maarét wo mahkua, ‘Apa ung kanenta?’ kaapa ‘Apa un elepenta?’ kaapa, ‘Apa ung karaienta?’

³²Péléng niana ém penéro-néron né tou sé zéi'kan mata'u si Opo Empung. Taan si Ama' niou si witi kasendukan é mata'u, i ni kamu é memandung niana péléng.

³³Taan penérompé'la ung Kakolanoan ni Opo Empung wo um paaz-Na, wo péléng niana én iawes wia ni kamu.

³⁴Pahpaano niitu, tia'mo ikaarét niou tumoro u mamuali i sando, pahpaan i sando ém wéwéhan ung kasusaana in esa. Ung kasusaan in endo kenu én tia'mo pengawe-ngawesen.”