Read Tombulu Matius 9 Bible Online

Matius 9 - Tombulu bible

Matius 9

¹Kumawusa niitu, si Yesus karia né pahtuzu'en-Na sumakéma witu u londéi a lumewet u louz. Tumondong niitu, a Sia ikaayola witi wanua tua'na pahwéha-wéhan-Na.[8]

²Sé woopira tou nimahwalimé wia si Yesus si tou lailai si méikolo' witu um wuwuléngan. I si Yesus nimilek um pa'émanen néra wia ni Sia, ang kuan-Na wia si tou lailai itii, “É oki'-Ku,[9] enté'ela un atému! A singkéla'mu é niampungano.”

³Tumalingamé niitu, witu un até né woopira tou tulap un Torat, ni séra é mahkua, “Si Tou kenu é mahséro'mo wia si Opo Empung.”

⁴Taan kata'uan ni Yesus am pegena-genangen néra, ang kuan-Na, “Kaa kamu megena-genang a léwo'an witu un até niou?

⁵Wisa u meripu' umané, kumuama, ‘A singkéla'mu é niampungano,’ kaapa ing kumuama, ‘Tumoozomé wo lumampangoma?’

⁶Taan wo kata'uan nioula sa im wia ung kaayahan kenu si Oki' ni Tou ém wéwéhan kawasa i méhé un ampungan wana a singkéla' né tou.” Ang kuan ni Yesus wia si tou lailai itii, “Rumendaiomé, éndonoma um winuléngané ni ko wo mawurimoma witi walému!”

⁷A si tou lailai itii rumendaié, a lumampang mawurima witi waléna.

⁸I nimilekla niitu, sé tou lakez itii maindé', a mahlooz si Opo Empung si niméhémomé ung kawasa tanu niitu wia sé tou.

⁹I si Yesus nimondolomé im witu, ileken-Nama si menanagi am pajak makangaran Matius makarumez witu um pahpaayanganna. Ang kuan ni Yesus wia ni sia, “Kumiitomé ni Aku.” A rumendaié si Matius ang kumiit si Yesus.

¹⁰Tumondong niitu, i si Yesus karegas mahkan witi walé ni Matius, a méyé sé menanagi am pajak wo sé tou mahsingkéla' ang kuman mahwali-wali karia ni Yesus wo sé pahtuzu'en-Na.

¹¹ I sé sana réwok tou Farisi nimilekla niitu, ang kuan néra wia sé pahtuzu'en ni Yesus, “Kaa si Méster niou é mahkan karia né menanagi am pajak wo né tou mahsingkéla'?”

¹²U méikua nérama én tinalingama ni Yesus, ang kuan-Na wia ni séra, “Zéi'kan sé tou zéi'kan saki sé memandung si dokter, taan sé tou saki.

¹³ Niitumo, mangémo wo pahtata'ula ung kalakoan u Nuwu' witu um Pinantik Lenas kenu, ‘Zéi'kan a raragés ang kapaaz-Ku, taan u raraatéan.’ Pahpaan ni Aku i niméyé én zéi'kan métumawah sé tou ulit, taan métumawah sé tou mahsingkéla'.”

¹⁴Sé woopira im wia sé pahtuzu'en ni Yohanes Menanarani niméyé wia si Yesus a meligau wia ni Sia, “Kaa kai wo sé sana réwok tou Farisi é mahpuasa, taan sé pahtuzu'en-Nu én zéi'kan?”

¹⁵A séra wingkotela ni Yesus, “Sa si brédégom ém witipé' pahpéstaan karia né kakariana, toro wé sé kakariana i mahpengasi'? Taan un orasna é méyé, si brédégom in éndon im wia ni séra. In toro niitumo ni séra mahpuasa.

¹⁶Zéi'kan siapa tou mapén u roko' weru witu ung karai tu'amo. Pahpaan sa téntu, u méipapén itii éng kumoskos wo ung karai tu'a itii é makésé' wo ung késé'na é sumelahpé'mé ung késé' kataré-taré.

¹⁷Téntu kangkasii, un anggor werupé' én zéi'kan itahu' witu um penanahu'an anggor un urémo, ung kawal né binatang am wangunen. Pahpaan sa téntu, um penanahu'an anggor itii é mawenta' wo un anggor én ikatia'. Taan un anggor weru én itahu' witu um penanahu'an anggor um werupé' wo karia in téntu un anggor wo um penanahu'an én zéi'kan maléwo'.”[10]

¹⁸Karegas si Yesus i mahkua niitu wia sé pahtuzu'en ni Yohanes Menanarani, méyé si tonaas um walé peraragésan né tou Yahudi, ang kumuruzla i mahsigi' ni Sia ang kumuama, “Si kooki'ku én taré kalekepala, taan sa tanu an toro mangépé'mé witi waléku wo maizeta'mé u lengen-Mu wia ni sia wo ni sia matou sumaup.”

¹⁹A si Yesus rumendaié a mangé karia né pahtuzu'en-Na kimiita si tou itii.

²⁰Karegas séra i mahlampang wéwéhan si wéwéné si mapulu' wo zuana ta'uno zézéha im pahondolan. Ni sia é rimétéla witu u muri ni Yesus a sumahiza u rawisna ung karai tonton ni Yesus.

²¹Pahpaan witu ung genangna, “Maan ni aku sumahiz umana ung karai tonton-Na, ni aku é malé'os.”

²²Taan si Yesus luméngéma muri wia si wéwéné itii ang kuan-Na, “É oki'-Ku[11], enté'ela un atému! Um pa'émanennu u limé'os ni ko.” In toro niitukan si wéwéné itii é lé'oso.

²³I si Yesus méikaayomola witi walé ni tonaas um walé peraragésan né tou Yahudi, mailekenna sé menenengo am peloit wo sé tou lakez é riomokan,

²⁴ang kua-Na, “Mondoloma, pahpaan si kooki' kenu zéi'kan nimaté, ni sia én timekel uman.” In timalingamé niitu, si Yesus én ipahké'ké' néra uman.

²⁵I sé tou itii méipekiondolomé, a si Yesus muntepa, tionan-Nala u lengen ni kooki' itii, a si kooki' itii rumendaié.

²⁶An ikawoka'ma u nimamuali itii witi péléng un tana' itii.

²⁷I si Yesus timula'umomé un tampa itii, wéwéhan sé zua tou letok mahkiité ni Sia karia i mahkérété, “É suzu ni Daud! Iraraaté ndootuumé ni kai.”

²⁸I si Yesus nimuntepoma witu um walé esa, sé tou letok itii niméyé wia ni Sia. Ang kuan ni Yesus wia ni séra, “Pa'émanen niou i ni Aku én toro lumé'os ni kamu?” A séra mingkotla, “Éné, ni kai ma'éman, Tuang.”

²⁹An irasaka ni Yesus u lengen-Na wana am weren néra zua ang kuan-Na, “Mamualima tanu um pa'émanen niou.”

³⁰In toro niitukan ni séra én toromo mahilek. A séra totoz kuaala ni Yesus, “Tia' ipahkukua niou wia si séi uman tumoro u nimamualima kenu.”

³¹Taan ni séra nimondolé im witu um walé itii, an ipahwoka' nérama wana péléng an tampa witi tana' itii um winanguna ni Yesus.

³²Karegas sé zua tou letok itii mahondolé, an iwalima né tou wia si Yesus si tou wowo' si sinelazan ni sétang.

³³I si Yesus nimohomoma si sétang wia si wowo' itii, a si wowo' itii toromo mahnuwu'. Sé tou nimaréwok witu é mengusi-ngusingsing a mahkua, “Un tanu ung kenu én zéi'kampé' pinahile-ilek naila wia Israel!”

³⁴ Taan sé tou wia sé sana réwok tou Farisi é mahkua, “Ni Sia é mahwoho sé sétang karia ung kawasa ni tonaas né sétang.”

³⁵ Si Yesus wo sé pahtuzu'en-Na é melili-liklik wana péléng am wanua wo wanua tua'na; ni Sia é mahtuzu' wana am walé peraragésan né tou Yahudi wo mahwoka' u Nuwu' Lé'os tumoro ung Kakolanoan ni Opo Empung, wo mahlé'os péléng sé saki wo sé lailai.

³⁶ I si Yesus nimileka sé tou lakez i mengii-ngiit uman ni Sia, a méyé u raraatéan-Na wia ni séra, pahpaan ni séra marawoio wo melinga-linganga tanumokan sé domba zéi'kan siapa si memimiara.

³⁷ Ang kuan ni Yesus wia sé pahtuzu'en-Na, “An upu'en é lakez, taan sé mupu' én toyo' uman.

³⁸Niitumo, mahaléiola wia si makauma wo awesan-Namé tou i mémupu'.”