Read Tombulu Markus 1 Bible Online

Markus 1 - Tombulu bible

Markus 1

¹Ung kenumo ung kataré-taré witu u Nuwu' Lé'os tumoro si Yesus Kristus, si Oki' ni Opo Empung.

² Tanu u méipantik witu ung kitap ni nabi Yesaya in téntii, “Ilekena, ni Aku é nimatuma si aatu-Ku i mapuunama wia ni Ko, ni sia é mamimek u lalan lampangan-Nu.

³ Wéwéhan si tou si mengéré-ngérét witi kapelasan: Imekela u lalan lampangan ni Mahpiara, terénela u lalan lampangan-Na.”

⁴Si tou méiatumé ni Opo Empung itii é Yohanes Menanarani. Ni sia ém witi kapelasan wo mahwoka' wia péléng sé tou, ‘Itula'umola a singkéla' niou wo iwéhémola un tou niou i saranin wo a singkéla' niou ampungan ni Opo Empung.’

⁵A sé tou wana péléng an tana' Yudea wo péléng sé tou witi Yerusalem mangé wia si Yohanes. Karia i makaulit a singkéla' néra, ni séra pahsaranin ni Yohanes witi so'so'an Yordan.

⁶ Si Yohanes éng kimarai ung karai tonton kulit ni onta am wangunen wo un embetna éng kawal ni binatang am wangunen. Ang kakanenna é sé koropit wo a rarina' wana an talun.

⁷Ni sia mahwoka' in téntii, “Wéwéhan si méyé tumondongé ni aku, ni Siapé' si mahkawasa taan ni aku. Maan i mongkot umanla i mowar un tali sapatu-Na, ni aku én zéi'kan wangun.

⁸Ni aku é mahsarani ni kamu karia un zano, taan ni Sia é sumarani ni kamu karia si Roh Lenas.”

⁹In toro niitu si Yesus ém witi Nazaret um witi tana' Galilea a méyé, a Sia saranila ni Yohanes witi so'so'an Yordan.

¹⁰I si Yesus nimondolé im witu un zano, ileken-Nama u langit é nimawukama, a si Roh ni Opo Empung tanu si bombo tumumpama witu um wawo-Na.

¹¹ An talingané u nuwu' witi kasendukan a méyé, “Ni Komo si Oki'-Ku, si totoz ikararaaté-Ku. Ni Komo si mahwangun ni Aku mahpaa-paaz.”

¹²Kumawusa niitu, si Yesus rengan i niahkita ni Roh ni Opo Empung mangé witi kapelasan.

¹³Epatna pulu' endo Sia im pema'wa'en ni tonaas né sétang witu. Si Yesus i mahwitu-witu éng karia né liontana' wo sé malaekat mahselewir ni Sia.

¹⁴I si Yohanes tinionanoma, si Yesus mangé witi Galilea a mahkua u Nuwu' Lé'os ni Opo Empung,

¹⁵ kuan-Na, “Un oras tinotoz ni Opo Empung én tarékano, ung Kakolanoan ni Opo Empung é lelezokan. Niitumo, itula'umola a singkéla' wo ma'émanola u Nuwu' Lé'os ni Opo Empung.”

¹⁶I si Yesus mahlampang witi tembir u louz Galilea, ileken-Nama sé zua mahtuari, si Simon wo si Andreas. Ni séra éng karegas i mahlombo' u lolombo' witi louz pahpaan ni séra é melolombo'.

¹⁷A séra tawahené ni Yesus, “Méyémo, kumiitomé ni Aku! Ni kamu ém wanguneng-Ku mahpenéro tou ing kumiit ni Aku.”

¹⁸A rengan itula'u néramé u lolombo' néra ang kumiit ni Sia.

¹⁹Tumondong niitu, si Yesus timerusa i limampang, an ileken-Nama sé zua mahtuari, si Yakobus wo si Yohanes sé oki' ni Zebedeus, sé karegas mahimek[1] u lolombo' witu u londéi.

²⁰Si Yesus é rengan in timawahma ni séra, a séra tumula'umé si ama' néra, si Zebedeus witu u londéi karia né tou pahwaéranna ang kumiit si Yesus.

²¹Si Yesus wo sé pahtuzu'en-Na é mémoikaayola witi Kapernaum. I méikaayomola witu un endo Sabat,[2] si Yesus rengan i nimuntepa witu um walé peraragésan né tou Yahudi a mahtuzu' witu.

²² Sé tou witu é mengusi-ngusingsing i mahtalinga am pahtuzu'-Na, pahpaan ni Sia i mahtuzu' éng karia ung kawasa, zéi'kan tanu sé tou tulap un Torat.

²³In toro niitu witu un untep um walé peraragésan itii ém wéwéhan si tou sinelazan ni sétang. Si tou itii é mahkérét,

²⁴“Yesus, tou Nazaret! Apa un éyé-Nu wia ni kai? Apa Ko i niméyé é méluméwo' ni kai? Ni Ko éng kata'uangku: Ni Komo si Lenas si wia si Opo Empung a méyé.”

²⁵Taan si Yesus rimekaka ni sia, “Menesla! Mondolé im wia ni sia!”

²⁶Si sétang itii nimangun si tou itii totoz i mahgerger, wo karia i ma'ulit mahkérét si sétang itii nimondolé im wia ni sia.

²⁷Péléng sé tou witu é mengusi-ngusingsing, akaz si esa é mahkua wia sé walina, “Apa mokala ang kenu! Ang kenu én tutuzu'mo weru ung kinaria ung kawasa! Ni Sia é mahperénta sé sétang wo sé sétang é mahkiit am perénta-Na.”

²⁸A rengan in ikaserama u sirita tumoro ni Sia wana péléng an tampa witi Galilea.

²⁹Kaiondolé im witu um walé peraragésan né tou Yahudi, a si Yesus karia ni Yakobus wo ni Yohanes mangé witi walé ni Simon wo ni Andreas.

³⁰In toro niitu, si mahnuang wéwéné ni Simon é meneke-nekelokan pahpaan im pasu', a rengan i maituzu' nérala wia si Yesus.

³¹Si Yesus mangé wia si mahnuang wéwéné ni Simon itii, wo karia in timionla u lengenna, sia sawangan-Namé i méitoozé. In toro niitukan a mazéi'ma um pasu'na, a sia masumelewir ni séra.

³²I mawengimo, i si endo nimuntepola, sé tou mahwalima wia si Yesus péléng sé tou saki wo sé sinelazan né sétang.

³³Péléng sé tou witi wanua tua'na itii é nimaréwoké witu ung kauntepala um walé itii.

³⁴Si Yesus limé'osa a saki né tou lakez a nimahwali-walinaan, wo kangkasii lakez sé sétang simelaz wia sé tou sé méiwoho-Nama. Zéi'kan iwéhé-Na sé sétang itii i numuwu', pahpaan ni Sia éng kata'uan néra.

³⁵Im woondopé' lé'os, i mahnana'upé' tou, si Yesus én timoozé a mondola. Ni Sia é nimangé witi tampa zéi'kan siapa tou a mengaléi.

³⁶Taan si Simon wo sé kakariana é manimenéro ni Sia.

³⁷I ni Sia kinailekan néramola, kuan néra, “Péléng sé tou mahpenéro ni Ko.”

³⁸A mingkotla si Yesus, “Méyémo, kita mangé witi tampa walina, wana am wanua tua'na rété wia'i, wo im wana kangkasii ni Aku mahwoka' u Nuwu' Lé'os ni Opo Empung, pahpaan niitumo u niéyé-Ku.”

³⁹ A si Yesus mangé wana péléng am wanua witi Galilea. Ni Sia é mahwoka' u Nuwu' Lé'os wia sé tou wana am walé peraragésan néra wo mahwoho sé sétang simelaz wia sé tou.

⁴⁰Si tou tinoro ung kusta niméyé wia si Yesus. Karia ing kimuruz witu u sinaru-Na si tou itii é mekitulung, kuana, “Sa Ko paaz, ni Ko én toro lumé'osé ni aku.”

⁴¹A mawiamé u raraatéan ni Yesus wia si tou itii. Ni Sia nimayola u lengen-Na an tumiona wia si tou itii ang kumua, “Ni Aku ém paaz, malé'osoma.”

⁴²In toro niitukan, ung kusta ni tou itii é nimazéi'moma a sia malé'osa.

⁴³Kumawusa niitu si Yesus é rengan i nimatuma si tou itii i mangémo karia in totoz mapagenagla wia si tou itii,

⁴⁴ “Gena-genangen! Tia'mo ipengua-ngua wia si séi uman u nimamuali wia ni ko. Taan mangémo wia si walian, papailekla un toumu wia ni sia wo iwéhéla u raragésmu tanu u méiperénta ni Musa, un tumuzu'mé wia ni séra i ni ko én uli-ulit lé'oso.”

⁴⁵Taan si tou itii masimirita u nimamuali itii wana am pahangéannamé. Niitumo, si Yesus zéi'kan mata'u muntep witi wanua tua'na tanu ung kanaramen. Ni sia é mahento'mokan witi ondolé um wanua tua'na wana an tampa zéi'kan siapa tou. Taan zozo' in téntumokan, sé tou sé woo wisa wo mahéyé én zéi'kan kumana' i mengéyé-ngéyé wia ni Sia.