Read Tombulu Markus 11 Bible Online

Markus 11 - Tombulu bible

Markus 11

¹I si Yesus wo sé pahtuzu'en-Na merétémoma u Yerusalem, rété um Betfage wo Betania um witi rété ung kentur Zaitun, a si Yesus matuma sé zua pahtuzu'en-Na

²karia ing kimuama, “Mangémo witi wanua um pahsaruna kenuma. I mawanala, ni kamu é rengan i milek si keledai peranggang méitapik wo si keledai itii én zéi'kampé' pinahsaké-sakéala né tou. Owarané si keledai itii wo pahaliné wia'i.

³Sa wéwéhan si kumuala wia ni kamu, ‘Kaa niowaran nioué si keledai itii?’ Wingkoten umanla in téntii, ‘Si keledai kenu ém pemandungen ni Tuang wo ikii-kiit iwuri-Namokané sumaup.’ ”

⁴Ni séra mangé, a maileken néra si keledai peranggang méitapik witu ung kasaru um pepenet witu u ruruh lalan. An owaran néramé si keledai itii.

⁵Sé woopira tou merenda-rendai witu kumuama wia ni séra, “Mahkura kamu? Kaa si keledai itii é niowaran nioua?”

⁶Am wingkoten nérala tanu u méikuamé ni Yesus. A séra iwayama né tou itii i nimahalima si keledai itii.

⁷Am pahalin nérama si keledai peranggang itii wia si Yesus, a sanihan nérala u ruuz ni keledai karia ang karai néra. A si Yesus sumakéla wia si keledai itii.

⁸Lakez sé tou mahsanihma ang karai tonton néra witu u lalan wo wéwéhan kasii sé mahzeta'ma am panga rintek mata'pé' a niéndo néramé wana an uma.

⁹ Sé tou mahlampang mahpuuna wo sé mahmurimé wia si Yesus é mahkérét, “Hosana! Loozela Sia si niméyé karia u ngaran ni Opo Empung,

¹⁰loozela ung Kakolanoan-Na u niméyé, ung kakolanoan ni Daud si nimaopota. Hosana witi tampa totoz rakék!”

¹¹I méikaayomola witi Yerusalem, a Sia muntepa witu um Walé ni Opo Empung. Im witu ni Sia é mahileka péléng u makaliklik um Walé ni Opo Empung itii. Taan pahpaan i mawengimo, Sia mondolé a mangé witi Betania karia né mapulu' wo zua pahtuzu'en-Na.

¹²Masandomé, i si Yesus karia né pahtuzu'en-Na timula'umomé um Betania, si Yesus é maharem.

¹³Zou'pé'ma é niilek-Namoma un esa kai ara an zani'na é rembuz. A Sia rumétéma i mahiilek sa ung kai itii é mahwua'. Taan ileken-Nala én zéi'kan siapa wua'na akaz uman an zani'na. Pahpaan in toro niitu én zéi'kampé' orasna ang kai ara i mahwua'.

¹⁴Ang kuan-Na witu ung kai itii, “Zéi'mo siapa si mahkakanla am pahwua'mumé makaz ing kauré-uré!” Sé pahtuzu'en-Na kangkasii én timalinga u méikua-Nama itii.

¹⁵A si Yesus karia né pahtuzu'en-Na ikaayoma witi Yerusalem. I ni Sia nimuntepoma witi lésaz um Walé ni Opo Empung, a Sia rengan i moho sé tou mahwangkér wo mahteles witu u lésaz um Walé ni Opo Empung. A méja pahsawelan an zoit wo a rurumezan né mahwangkér sé bombo é méitonga'-Nama.

¹⁶Zéi'kan iwéhé-Na sé tou mahali-ali an tineles kaapa an ipahwangkér néra i lumangkoi witu u lésaz um Walé ni Opo Empung.

¹⁷ A Sia mahtuzu' ni séra, kuan-Na, “Witu um pinantik lenas é méipantik in téntii, ‘Um Walé-Ku é mapahkuan walé pahpengaléian péléng né tahsasana wanua.’ Taan winangun niouola wuwunian né maremu'!”

¹⁸U nimamualima itii éng kinatalingaala né tonaas né walian wo né tou tulap un Torat. A séra mahtututu' i munu' ni Sia. Ni séra é maindé' ni Sia pahpaan nimilekla im péléng sé tou ém paaz an tutuzu'-Na.

¹⁹I mawengimo, si Yesus wo sé pahtuzu'en-Na é nimondol kasiimé im witi Yerusalem.

²⁰Masandomé im woondo, i si Yesus karia né pahtuzu'en-Na lumangkoi witu ung kai ara itii, ileken nérama ung kai ara itii ém peramo makaz wana an ahmutna.

²¹A si Petrus ikagenanga u nimamuali ing kahwii, a sia kumuala wia si Yesus, “Méster, ilekena! Ung kai ara méitiwa'-Muma ém peramo.”

²²A si Yesus mingkotla, “Ma'émanola wia si Opo Empung.

²³ Uli-ulit ikua-Kuma wia ni kamu: Séi uman si kumuama witu ung kentur kenu, ‘Mawutwutomé wo ikaweritoma witi tasik!’ Sa sia zéi'kan mahzua-zua genang wo ma'éman u méikuanama itii é mamuali, niitu én uli-ulit mamuali.

²⁴Niitumo ikua-Kuma wia ni kamu: Apa uman um pahaléien niou witu um pengaléien wia si Opo Empung, pa'émanela i niitu éng kinailekan niouo, karia in téntu am pahaléien niou itii é makailekan niou.

²⁵ Sa kamu rimendai i mengaléi, ampungampé'la si tou si simala'la wia ni kamu, wo si Ama' niou si witi kasendukan é méhé un ampungan wana ang kasumalaan niou.” [

²⁶Taan sa si tou simala'la wia ni kamu zéi'kan winéhan nioula ampungan, si Ama' niou witi kasendukan kangkasii én zéi'kan méhé ampungan wana ang kasumalaan niou.]

²⁷A si Yesus karia né pahtuzu'en-Na mawurimé sumaup witi Yerusalem. I si Yesus melampa-lampang witi lésaz um Walé ni Opo Empung, a méyé sé tonaas né walian, sé tou tulap un Torat wo sé pahtutu'an né tou Yahudi.

²⁸Ni séra meligau wia si Yesus, “Wisa a méyé ung kawasa wia ni Ko i mahwangun péléng niitu? Séi si niméhé ung kawasa itii wia ni Ko taka-takazan ni Ko mahwangun niana?”

²⁹A séra wingkotela ni Yesus, “Ni Aku kangkasii é lumigau wia ni kamu. Wingkotempé'mé um peligaueng-Ku kenu, taré ni Aku kumua wia ni kamu séi si niméhémé ung kawasa wia ni Aku i mahwangun niana.

³⁰Wisa a méyé ung kawasa ni Yohanes i mahsarani sé tou? Wia si Opo Empung kaapa wia si tou a méyé?”

³¹Ni séra mahliligauan karia i mahkua, “Sa wingkotentama, ‘Wia si Opo Empung a méyé’, ni Sia éng kumua, ‘Sa téntu, kaa kamu zéi'kan ma'éman ni sia?’

³²Taan, sa kita kumuama, ‘Wia si tou a méyé!’ Ni séra é maindé' wia sé tou lakez, pahpaan péléng sé tou mahgenangla i si Yohanes én uli-ulit nabi.”

³³A séra mingkotla wia si Yesus, “Zéi'kan kata'uan nai!” Ang kuan ni Yesus wia ni séra, “Sa téntu, ni Aku kangkasii én zéi'kan kumua wia ni kamu séi si niméhémé ung kawasa wia ni Aku i mahwangun niana.”