Read Tombulu Markus 12 Bible Online

Markus 12 - Tombulu bible

Markus 12

¹ A si Yesus rengan i numuwu'ma wia sé tonaas né walian, sé tou tulap un Torat wo sé pahtutu'an karia un aandéan, kuan-Na, “Wéwéhan si tou nimukama un uma an tanemannama anggor an réhénennala makaliklik. Ni sia kimiarla woso pahpesutan an anggor wo nimangunla u menara pahtéizan witu un uma. An ipekiwendunama un umana itii wia sé mememendu, a sia suméngkota.

²In orasnamo i mupu' un anggor, iatunama si atana i mangé wia sé mememendu itii i maméndo um wéténgna.

³Taan si ata itii én tinionan néra umanla am wélwélené, an ipekiwurimé zéi'kan siapa um pinahalimé.

⁴A si makauma itii matu kasiima si atana walina i mangé wia ni séra. Si ata kenu ém winélwél néra umané taka-takazan un uluna nimapéla'mé wo totoz méipapaiza-izang néramé.

⁵A si makauma itii matu kasiima si atana walina i mangé wia sé mememendu itii. Taan si ata itii ém winunu' néra umané. Téntu kangkasii u nimuali néramé wia sé ata walina sé méiatuma, wéwéhan sé winélwél wo wéwéhan sé winunu'.

⁶In tarékan im wia ni sia ém wéwéhampé' si esa si nimatezama, ni siamo si oki'na si ikararaaténa. Ing kamurian, iatunama si oki'na itii mangé wia ni séra, kuanna, ‘Tantumo si oki'ku ém pahsigi'en néra.’

⁷Taan sé mememendu itii mahkua si esa im wia sé walina, ‘Si kenumo si maéndo makaanu un uma kenu, wunu'entamo sia, wo un uma kenu maéndo anuta.’

⁸A sia tionan nérala, wunu'en nérala, a sia ilombo' nérama méiondolé im witu un uma tinaneman an anggor itii.”

⁹A si Yesus meligau wia ni séra, “In tarékan, apa um wangunen ni makauma tinaneman anggor itii? Ni sia é méyé wo mémunu' sé mememendu un uma itii wo un uma tinaneman anggor itii én iwéhéna wia sé tou walina.

¹⁰ Zéi'kampé' binaca nioula wé u méipantik witu um Pinantik Lenas kenu, ‘Um watu mémoitia' né memamangun am walé é nimaéndomola watu to'tolan.

¹¹Si Opo Empung si nimangun niitu, wo ni kita sé nimilek um winangun-Na itii é mengusi-ngusingsing.’ ”

¹²Kaitalingamé niitu, a séra mahtututu' i mahtition si Yesus, pahpaan kata'uan néramo sa sé paza'i-Nala witu un aandéan itii é ni séra. Taan ni séra é maindé' wia sé tou lakez, niitumo ni Sia é méiwaya néramé, a séra mangé.

¹³A sé woopira tou im wia sé sana réwok tou Farisi wo sé tou Yahudi sé mahkii-kiit si kolano Herodes méiatuma mangé wia si Yesus i mahwewetes ni Sia karia u liligau.

¹⁴Ni séra é niméyé wia ni Sia ang kumua, “Méster, kata'uan nai, ni Ko én zéi'kan mahtowo wo zéi'kan siapa sé ikaindé'-Mu, pahpaan ni Ko én zéi'kan mahsanaweka wo ulit i mahtuzu' u lalan ni Opo Empung. Mengiit an tinotoz witu um pa'émanenta, toro wé i maér am pajak wia si Kaisar kaapa zéi'kan? Apa ni kai é léwo'zéi' i maér am pajak kaapa zéi'kan?”

¹⁵Taan kata'uan ni Yesus i ni séra é mahgau-gau lé'os. Ang kuan-Na wia ni séra, “Kaa kamu mema'wa' ni Aku? Pahaliné wia ni Aku un zoit esa dinar wo toro ilekeng-Ku!”

¹⁶Ni Sia wéhan nérala un zoit esa dinar. A Sia meligau wia ni séra, “Gio wo ngaran ni séi ung kenu?” Ni séra mingkotla, “Gio wo ngaran ni Kaisar.”

¹⁷Ang kuan ni Yesus wia ni séra, “Iwéhéla wia si Kaisar u léwo'zéi' iwéhé wia si Kaisar, wo iwéhéla wia si Opo Empung u léwo'zéi' iwéhé wia si Opo Empung!” Tumalingamé niitu, ni séra é mengusi-ngusingsing.

¹⁸ A méyé wia si Yesus sé woopira im wia sé sana réwok tou Saduki, sé makahkukuan sa si tou nimatémo én zéi'mo itou sumaup. Ni séra meligau wia si Yesus,

¹⁹ “Méster, si Musa é nimantik ung kenu wia ni kita: Sa wéwéhan si tou makatuari tuama matéma tumula'uma si mahayona taan zéi'kan siapa koki', si tuari ni tou itii é léwo'zéi' ing kumawéng si wéwéné mahayona itii, wo si tou nimatémoma itii toro makailek suzu.

²⁰Wéwéhan sé pitu mahtuari péléng tuama. Si tu'a éng kimawénga si esa wéwéné a matéma, taan zéi'kan nimakaileka suzu.

²¹A si kazua, kimawéngla karia ni wéwéné itii. Ni sia kangkasii én zéi'kan nimakaileka suzu a matéma. Téntu kangkasii u nimamuali wia si katelu

²²makaz wia si kapitu. Sé pitu mahtuari itii ém péléng zéi'kan nimakaileka suzu. Ing kamurian si wéwéné itii kangkasii é nimatéma.

²³Im witu un endo sé tou itoumé sumaup ni Opo Empung, i ni séra itoumé sumaup ni Opo Empung, séi si maéndo mahayo ni wéwéné itii? Pahpaan sé pitu mahtuari itii éng kimawénga kariana.”

²⁴A si Yesus mingkotla wia ni séra, “Ni kamu é mahsala'. Pahpaan zéi'kan katulapan niou a méipantik witu um Pinantik Lenas wo ung kawasa ni Opo Empung.

²⁵Pahpaan i ni séra itoumé sumaup ni Opo Empung im wia sé nimaté, ni séra én zéi'kan mahkawéng wo pahkawéng, taan ni séra péléng é menou-nou tanu sé malaekat witi kasendukan.

²⁶ Téntu kangkasii tumoro sé nimaté in itou sumaup ni Opo Empung, zéi'kankuaa binaca niouola witu ung kitap ni Musa tumoro un zukut menulah u mahlayas, i si Opo Empung kimua wia si Musa, ‘Ni Akumo si Opo Empung ni Abraham, Opo Empung ni Ishak wo Opo Empung ni Yakub?’

²⁷Si Opo Empung én zéi'kan Opo Empung né tou nimatémo taan Opo Empung né tou menou-nou. Ni kamu én totozo mahsala'!”

²⁸A si tou tulap un Torat si timalinga si Yesus wo sé tou wia sé sana réwok tou Saduki i mahéndo-éndoan wo mata'u sa a méiwingkota ni Yesus wia sé tou itii én totoz ulit, rumétéma wia si Yesus a lumigau, “Im wana péléng am perénta ni Opo Empung, perénta wisa un totoz ipahpuu-puuna?”

²⁹A si Yesus mingkotla, “Um perénta totoz ipahpuu-puuna é: ‘Talingana lumé'o-lé'os, é tou Israel! Si Opo Empungta, si Opo Empung itii én esa uman.

³⁰Iraraatéla si Opo Empungmu, karia péléng un atému, karia péléng si rohmu, karia péléng ung genangmu wo karia péléng ung ketezmu.

³¹ Wo um perénta kazua é: Iraraatéla sé kasuatmu in tou, tanu i rumaraaté un toumu in esa. Zéi'kan siapa perénta u lumousé in ipahpuu-puuna taan un zua perénta kenu.’ ”

³² A si tou tulap un Torat itii kumuala wia si Yesus, “Totoz timoro Méster, u méikua-Mumé itii én timoro, i si Opo Empung én esa uman, zéi'kan siapa walina.

³³ U rumaraaté si Opo Empung karia péléng un até wo karia péléng ung genang, wo karia péléng ung ketez wo kangkasii u rumaraaté si kasuat tou tanu i rumaraaté un tou in esa é lumouspé'mé in ipahpuu-puuna taan péléng sé tatamun tinunu in ipahragés kaapa a raragés walina.”

³⁴Si Yesus i nimilekla si tou itii nimingkoté én totoz timoro, ang kuan-Na, “Zéi'mo uré ni ko é maéndomo tou witi Kakolanoan ni Opo Empung.” Tumondong niitu, zéi'mo siapa zozo' in esa si wuaya i lumigau wia si Yesus.

³⁵I si Yesus karegas mahtuzu' witi lésaz um Walé ni Opo Empung, ni Sia éng kimua, “Kura sé tou tulap un Torat toro kumua i si Mesias é suzu ni Daud?

³⁶ Si Daud in esa, i ni sia kinawasa ni Roh Lenas éng kimua in téntii: Si Opo Empung éng kimua wia si Tuangku: ‘Rumumezola witu ung kakan-Ku, makaz sé kakoro'-Mu iwéhé-Ku witu u léléék-Mu.’

³⁷Si Daud in esa mahkua si Mesias in ‘Tuang’, kura kahuman ni Sia kangkasii é suzuna?” Sé tou lakez itii mahtalinga an ipahkua ni Yesus karia i mahpaa-paaz.

³⁸I si Yesus mahtuzu', ni Sia éng kimua, “Mile-ilek im wia sé tou tulap un Torat sé paaz melampa-lampang kimarai ung karai tonton wo paaz pahsigi'en né tou wana am pasar.

³⁹Ni séra ém paaz merurumez wana a rurumezan witi totoz puuna im wana am walé peraragésan né tou Yahudi wo wana am pahpéstaan.

⁴⁰Ni séra ém paaz menonowo wia sé wéwéné mahesa-esamokan ing kumahat am walé néra. Wo i mahwuwuni a léwo'an pahwangunen néra itii, am pakahpengaléi néra é lambo'. Ni séra é maukumen totoz wutez.”

⁴¹Makasamé, si Yesus rimumez makasaru um penanahu'an a raragés wo mena'u-na'u sé tou lakez i mahtahu'ma an zoit witu um penanahu'an itii. Lakez sé tou wa'ilan é mahtahu'ma an zoit lakez.

⁴²A méyé si wéwéné mahesa-esamokan si zéi'kan siapa apa. Ni sia én timahu'ma un zua zoit tambaga witu um penanahu'an itii, un zoit itii én totoz rintek im wana an zoit.

⁴³A si Yesus tumawahmé sé pahtuzu'en-Na ang kumua, “Uli-ulit ikua-Kuma wia ni kamu, u méiwéhéma ni wéwéné mahesa-esamokan si zéi'kan siapa apa kenu é lumakezpé'mé an zoit méitahu'ma né tou witu um penanahu'an a raragés.

⁴⁴Pahpaan ni séra é niméhéma an zoit raragés néra wana ang kalakez an anu néra, taan si wéwéné mahesa-esamokan kenu é niméhéma wana an anuna an toyo' uman, lumouspé'mé niitu péléng am pemandungenna i menou-nou é méiwéhénamoma.”