Read Tombulu Markus 13 Bible Online

Markus 13 - Tombulu bible

Markus 13

¹I si Yesus mondolé im witu u lésaz um Walé ni Opo Empung, wéwéhan si esa pahtuzu'en-Na kimuama wia ni Sia, “Méster, ilekena! Sangali kawangun a méirendai kenuma é kuaa? Niana ém watu tua'na an tu'tulen néra.”

²Ang kuan ni Yesus wia ni sia, “Pahileken nioua a méirendai totoz wangun kenu? Zéi'kan siapa zozo' in esa im wana am watu kenu un iwaya i nimausunampé', péléng niitu é makemun.”

³Tumondongla niitu, si Yesus karia né pahtuzu'en-Na mangé witi kentur Zaitun. Im witu si Yesus rimumezla simaru um Walé ni Opo Empung. A si Petrus, Yakobus, Yohanes, wo si Andreas marumétéla ni Sia a séra meligau,

⁴“Méster, ikuamé wia ni kai, sawisa u méikua-Mumé itii mamuali wo apa un tumuzu'mé sa niana péléng é mamualimo?”

⁵Kuan ni Yesus wia ni séra, “Tuméga-tégam én taa kamu ilulu né tou.

⁶Pahpaan lakez sé tou é méyé wo maké u ngaran-Ku wo kumua in téntii, ‘Ni akumo si Mesias’, wo lakez sé tou mailulu néra.

⁷Sa kamu tumalingamé im wéwéhan sé mahkoro' kaapa a sirita tumoro sé mahkoro', ni kamu én tia'mo maarét. Péléng niana é léwo'zéi' i mamuali, taan niitu én zéi'kampé' un orasna ung kaakazan ung kaayahan.

⁸Pahpaan sé tahsasana wanua é makumoro' wo sé tahsasana wanua walina wo ung kakolanoan esa é makumoro' wo ung kakolanoan walina. Wo un éhzo' é mamuali wana a lakez tampa wo ung kaahreman é mamuali. Péléng a mamuali itii én taré ung kataré-taré tanumokan si wéwéné i mahpendan u rumara pahpaan in tumoumo si oki'na.

⁹ Taan ni kamu én tuméga-tégamola! Ni kamu én iayo wia sé mahkama agama wo ni kamu kangkasii é masaluken witi walé peraragésan. Ni kamu é maisaru wia sé gubernur wo sé kolano pahpaan mahkiit ni Aku i makumua an tinalinga wo a niilek niou tumoro ni Aku.

¹⁰U Nuwu' Lé'os ni Opo Empung é léwo'zéi' in ipapata'upé'la wia péléng sé tahsasana wanua.

¹¹Sa kamu tionana an iayola, tia'mo ikaarét niou tumoro apa u léwo'zéi' in ikua niou. Taan in toro niitukan, ikuamola a méitambéré ni Roh Lenas wia ni kamu, pahpaan zéi'kan kamu sé mahnuwu' taan si Roh Lenas si mahnuwu'.

¹²Wéwéhan un orasna, si tou mayo si katuarina im wunu'en, téntu kangkasii, si ama' wia sé oki'na. Sé koki' é masumaru sé tu'a néra wo munu' ni séra.

¹³ Péléng sé tou é mazi'zis ni kamu pahpaan mahkiit ni Aku. Taan sé tou ezen makaz ing kamurian é makailek ung katou-touan makaz ing kauré-uré.”

¹⁴ Kuan ni Yesus, “Ni kamu é milek si tou totoz léwo' wo meléléwo' am péléng, makarendai witu un tampa zéi'kan wangun wia ni sia. (Si macama ang kenu é méhéla genang witu ung kalakoana). In toro niitu, tawimo sé tou witi Yudea én tumingkasa wana ang kentur.

¹⁵ Si tou witu um wawo um walé én tia'mo mahtutumpamé wo mahuuntep i maméndo apa uman am witu un untep um walé.

¹⁶Wo si witi uma, tia'mo maheesu'mé i maméndo ang karaina.

¹⁷Ikaléwo'la sé ina' mahawa-awak kaapa sé pahsusuan né taré itoumé in toro niitu.

¹⁸Mengaléiola, wo niana péléng zéi'kan mamuali in oras un zaté.

¹⁹ Pahpaan in toro niitu é mamuali un zézéha zéi'kampé' nimahmua-mualila rengané ing kataré-taré, i si Opo Empung nimangun ung kaayahan kenu, makaz in tarékan wo zéi'mo mahmua-mualila sumaup.

²⁰Wo sa un oras an zézéha itii zéi'kan rewekena ni Opo Empung, zéi'kan siapa zozo' in esa si tou si mamenou-nou. Taan pahpaan sé tou nimapéléng, sé pinéléng-Na in esa, niitumo un oras itii é sinogit-Na umana.

²¹In toro niitu, sa wéwéhan tou kumuala wia ni kamu, ‘Ilekené! Si Mesias ém wia'i!’ wo wéwéhan kasii sé mahkua, ‘Ilekena! Si Mesias ém witi kenuma!’, ni kamu én tia' ma'éman un ipahkua néra.

²²Pahpaan sé mahwangu-wangun Mesias wo sé mahwangu-wangun nabi é méyé. Ni séra é mémangun a makakompo'en wo an zéi'kan kakuaan i lumulu sé tou. Wo sa toro kangkasii, sé tou pinéléngo ni Opo Empung én ipahlulu néra.

²³Niitumo, ni kamu én tuméga-tégamola! Péléng ang kenu é mémoikua-Ku wia ni kamu!”

²⁴ Si Yesus kumua kasiila, “Taan kumawusa un oras in zézéha itii, si endo é marimbengbeng wo si loloho'en én zéi'mo sumena'.

²⁵ Sé tototi'en witi langit é magogo im witi langit wo ang kawasa witi langit é makayo'.

²⁶ In toro niitu, sé tou é milek si Oki' ni Tou si witu um wawo u ninahak méyé karia péléng ang kawasa wo ang kawangko'an-Na.

²⁷In toro niitu kangkasii sé malaekat én iatu-Na i maruméwok péléng sé tou pinéléng-Na sé wana an epat saruan, rengané witi pondol ung kaayahan makaz witi pondol u langit.”

²⁸Si Yesus kumua kasiila, “Mahtata'ula witu ung kalakoan un aandéan tumoro ung kai ara. Sa am pangana rintek é mahmata'moma wo mahsuzumomé, kata'uan niou sa un oras i raazen é lelezo.

²⁹Téntu kangkasii, sa péléng a méikua-Ku ém pahileken niouola, kata'uan nioula sa un oras si Oki' ni Tou i méyé é lelezo, tanumokan witumo ung kauntepané.

³⁰Uli-ulit ikua-Kuma wia ni kamu, ‘Sé tou menou-nou in oras in tarékan ém wéwéhan sé zéi'kampé' nimaté puunala niitu péléng i mamuali.

³¹U langit wo ung kaayahan é mazéi', taan u Nuwu'-Ku én zéi'kan mahzéi-zéi'la.’ ”

³² Si Yesus kumua kasiila, “Taan tumoro un endo wo un oras si Oki' ni Tou i mawurimé sumaup én zéi'kan siapa zozo' in esa si mata'u. Sé malaekat witi kasendukan én zéi'kan mata'u, téntu kangkasii si Oki' ni Tou én zéi'kan mata'u, akaz uman si Ama' in esa si mata'u.

³³Niitumo ni kamu é léwo'zéi' i mile-ilek wo tuméga-tégam! Pahpaan zéi'kan kata'uan niou sawisa un orasna i mamuali.

³⁴ Niitu é masuat wo si tou timula'u um waléna pahpaan i suméngkot witi zou'. Puunala sia i mangé, um paayangenna é méizéhonama wia sé atana i mahimek um waléna wo timuzu'la um paayangen wia si esa wo si esa. Ni sia kangkasii é nimeréntama sé mahtéiz um pepenet in tuméga-tégamla.

³⁵Téntu kangkasii ni kamu é léwo'zéi' in tuméga-tégam pahpaan zéi'kan kata'uan niou sawisa si makawalé i mawurimé. Ni sia ém woo mawurimé im wengindo, wengi uré, maayah kaapa im woondo.

³⁶Én taa sia mahkompo-kompo'mé i mawurimé, ni kamu méilekenna én timekel.

³⁷Apa u méikua-Ku wia ni kamu, ikua-Ku kangkasiima wia péléng sé tou, ‘Tuméga-tégamola!’ ”