Read Tombulu Markus 16 Bible Online

Markus 16 - Tombulu bible

Markus 16

¹I limangkoioma un endo Sabat, si Salomé, si Maria tou Magdala wo si Maria si ina' ni Yakobus é matimelesé u lana mahwou tariis um pahalin witi lelewengan i maisu' un awak ni Yesus.

²In endo kataré witu un duminggu itii, i si endo taré mahserité, ni séra nimangé witi lelewengan.

³Im witi lalan ni séra é mahkua si esa im wia sé walina, “Séi rékén si masumoro' um watu méipalot u lelewengan?”

⁴Taan ni séra i merétémoma u lelewengan, ileken nérama um watu totoz tua'na itii é mémoikasoro'.

⁵Ni séra i nimuntepa witu un untep u lelewengan, maileken néra im witu ung kakan ém wéwéhan si tarétumou rimumez kimarai ung karai tonton kulo'. Niitumo ni séra mengompo'.

⁶Taan si tarétumou itii éng kimuama wia ni séra, “Tia'mo maindé'! Kata'uangku sa ni kamu é menéro si Yesus, si tou Nazaret si sinalip itii. Ni Sia én zéi'mo wia'i. Ni Sia é méitoumomé sumaup ni Opo Empung. Ilekena! Kenumo u zinetaan nérala ni Sia.

⁷ Niitumo in tarékan mangémo, maikuala wia sé pahtuzu'en-Na, wo wia si Petrus in téntii, ‘Ni Sia é nimapuunamoma i nimangé witi Galilea. Im wana ni kamu é milek ni Sia tanu u mémoikua-Na wia ni kamu.’ ”

⁸A séra mondolé im witu u lelewengan itii ang kumara'ma pahpaan ni séra én totoz maindé' makaz i mahgerger. Ni séra én zéi'kan nimahkua-kuama apa im wia sé tou pahpaan un indé' néra. [Péléng a méikuamé itii ém pinerewek néra umana i méisiritama wia si Petrus wo sé kakariana. Kumawusa niitu, si Yesus in esa mengiité sé pahtuzu'en-Na mahwoka' u nuwu' lenas u makaz ing kauré-uré tumoro u méipilot im witu un ukuman wana a singkéla'.]

⁹In Duminggu im woondo, si Yesus i nimatoumomé sumaup, ni Sia kataré-taré é nimapailek un tou-Na wia si Maria tou Magdala. I makasa si Yesus é nimoho sé sétang pitu im wia ni sia.

¹⁰A si Maria tou Magdala itii makumua a niilekna wia sé mahkii-kiit si Yesus, sé karegas i mahpengasi' wo mengamé-ngamé'.

¹¹Taan in timalingala u siritana i ni sia é nimileké si Yesus si nimatoumomé sumaup, ni séra én zéi'kan ma'éman.

¹²Kumawusa niitu, i sé zua pahtuzu'en ni Yesus melampang mondol im witi wanua tua'na, si Yesus nimapailek un tou-Na wia ni séra taan ni Sia én zéi'kan kinana'uan nérala pahpaan ni Sia ém pahilekeno im walina.

¹³A séra mawurima i mapata'u wia sé kakaria néra walina i ni séra é nimahilekanomé karia ni Yesus. Taan sé kakaria néra kasii én zéi'kan ma'éman.

¹⁴Ing kamurian, si Yesus é nimapaileka un tou-Na wia sé mapulu' wo esa pahtuzu'en-Na, karegas séra i mahkan. Ni séra é sinéro'-Nala pahpaan ung kaketéhan un até néra wo pahpaan zéi'kan ma'éman wia sé tou nimilekomé ni Sia i nimatoumomé sumaup.

¹⁵ Ang kuan-Na wia ni séra, “Mangémo wia péléng ung kaayahan, wo iwoka'la u Nuwu' Lé'os ni Opo Empung wia péléng sé tou.

¹⁶Séi si ma'éman wo sinarani, ni sia é makailek ung katou-touan makaz ing kauré-uré. Taan séi si zéi'kan ma'éman én ukumen.

¹⁷Sé tou ma'éman é mangun a makakompo'en kenu: Moho sé sétang karia u ngaran-Ku, mahnuwu' a nunuwu'en walina an zéi'kampé' pinahnuwu-nuwu' nérala,

¹⁸tumion sé ulé' melangu wo zozo' nimelep a melangu taan ni séra én zéi'kan makura. Wo sa séra zumeta'ma u lengen néra wia sé tou saki, sé tou saki itii é malé'os.”

¹⁹ Makanuwu'la si Yesus wia sé pahtuzu'en-Na, a Sia mawénéta mangé witi kasendukan, a marumumez witu ung kakan ni Opo Empung.

²⁰Tumondong niitu, sé pahtuzu'en ni Yesus mangé wana péléng a saruan i mahwoka' wia sé tou u Nuwu' Lé'os tumoro si Yesus. Karegas niitu, si Mahpiara é mahpaayang karia néra mahwangun a makakompo'en i menté' u Nuwu' Lé'os itii.