Read Tombulu Markus 3 Bible Online

Markus 3 - Tombulu bible

Markus 3

¹A si Yesus mangé sumaup witi walé peraragésan né tou Yahudi. Im witu ém wéwéhan si tou, u lengenna kasaru é lailai.

²Im witu kangkasii ém wéwéhan sé woopira tou sé menéro-néro uman ung kasumalaan ni Yesus. Ni séra é mengile-ngilek ni Sia sa lumé'os si tou itii im witu un endo Sabat, wo Sia toro ipapahsasala' néra.

³A si Yesus kumuama wia si tou u lengenna kasaru é lailai itii, “Méyémo, rumendaié witu un unez.”

⁴A Sia kumuala wia sé tou witu, “Wisa un toro wangunen witu un endo Sabat? Mangun u lé'os kaapa u léwo'? Tumulung si tou wo menou-nou kaapa munu' si tou?” Taan ni séra é memene-menes uman.

⁵Un até-Na én totoz rumara pahpaan ung kaketéhan un até néra. Karia i maupi' ni Sia mahwerenna wia sé tou makaliklik-Na. Ang kuan-Na wia si tou itii, “Iayaté u lengenmu.” An iayatla ni tou itii u lengenna a malé'osa.

⁶Sé tou im wia sé sana réwok tou Farisi mondolé im witu, a séra rengan i mahesaala karia né mahkii-kiit si kolano Herodes i mahwuwunu' si Yesus.

⁷A si Yesus wo sé pahtuzu'en-Na tumula'umé un tampa itii nimangé witi louz Galilea. Lakez sé tou witi Galilea a méyé mahkiité ni Sia, wéwéhan kasii sé witi Yudea a méyé,

⁸sé witi Yerusalem, sé witi Idumea, sé witi lewet u so'so'an Yordan, sé witi Tirus wo Sidon a méyé. Ni séra péléng é niméyé wia si Yesus, pahpaan ni séra én timalingamoma péléng am winangun-Na.

⁹ Pahpaan sé tou én totoz lakez, a Sia matuma sé pahtuzu'en-Na i mamimek u londéi sakéan-Na, wo sé tou zéi'kan mahsésé'sé'an karia-Na.

¹⁰Pahpaan lakezo sé tou liné'os-Na, niitumo péléng sé tou saki é mahsésé'sé'an i mahtition wia ni Sia.

¹¹Sekez sé tou sinelazan né sétang mileka si Yesus, ni séra é mongkot makaz witu un tana' witu u sinaru-Na wo mahkérét, “Ni Komo si Oki' ni Opo Empung!”

¹²Taan ni séra én totoz sinéro'-Nala in tia' ipahkua wia sé tou walina sa séi Sia.

¹³Kumawusa niitu, a si Yesus sumosoza witu ung kimeleng. Tawahen-Namé sé tou pinéléng-Na a séra méyé wia ni Sia.

¹⁴A Sia tumotozla sé mapulu' wo zua tou, sé pahkuan kangkasii in aatu-Na i mahwali-wali karia-Na, wo maiatu-Na i mahwoka' u Nuwu' Lé'os ni Opo Empung

¹⁵wo kangkasii winéhan-Na kawasa i mahwoho sé sétang.

¹⁶Sé mapulu' wo zua tou tinotoz-Na itii é: Si Simon (si nginaranan-Na im Petrus),

¹⁷si Yakobus oki' ni Zebedeus wo si katuarina Yohanes. Ni séra zua é nginaranan-Na im Boanerges ung kalakoana én ‘oki' un erut’,[3]

¹⁸si Andreas, si Filipus, si Bartolomeus, si Matius, si Tomas, si Yakobus oki' ni Alfeus, si Tadeus, si Simon si wia sé sana réwok tou Zelot sé mahsaru sé tou Roma,

¹⁹wo si Yudas Iskariot si nimangkér si Yesus.

²⁰Tumondong niitu, si Yesus muntepa witu um walé. Lakez kasii sé tou nimaréwoké, taka-takaz ni Sia wo sé pahtuzu'en-Na én zéi'mo siapa orasna ing kuman.

²¹Ing kinatalingaana né katuari-Na i ni Sia ém witu, ni séra méyé i mahééyéma ni Sia, pahpaan pahkuan néra i ni Sia ém walinamo.

²² Sé tou tulap un Torat sé witi Yerusalem a méyé é mahkua, “Ni Sia é sinelazan ni Beelzebul! Karia ung kawasa ni tonaas né sétang ni Sia mahwoho sé sétang.”

²³Si Yesus tumawahma ni séra, a numuwu'ma wia ni séra karia un aandéan, “Kura kahuman si tonaas né sétang toro moho si sétang?

²⁴Sa sé tou witi kakolanoan esa é makahkoro', ni séra é makayo',

²⁵wo sa sé sana walé é makahkoro', ni séra é makayo'.

²⁶Téntu kangkasii sa sé sétang mahsaru sé kasétang néra wo sa séra nimahtatampasano, tantu ung kakolanoan né sétang itii én zéi'kan mauré-uré taan lamo mazéi'.

²⁷Taan zéi'kan siapa si tou toro muntep witu um walé ni tou ketezen i makumahat a sangkumna sa sia zéi'kampé' niapusnala. Sa sia niapusnamola taré sia toro kumahat am witu um walé itii.

²⁸Uli-ulit ikua-Kuma wia ni kamu: Péléng a singkéla' wo a séséro'an winangunla ni tou én toropé' ampungan.

²⁹ Taan séi uman si mahséro' wia si Roh Lenas, si tou itii én zéi'kan ampungan makaz ing kauré-uré, taan simala'mola pahpaan nimangunola u singkéla' makaz ing kauré-uré.”

³⁰Si Yesus mahkua in téntu, pahpaan ni Sia ém pahkuan néra i sinelazan ni roh léwo'.

³¹A méyé si ina' wo sé katuari ni Yesus witi walé pahtuzu'an-Na. Karegas séra i rimendai witu rété um pepenet, ni séra matuma tou i matumawah ni Sia.

³²Im witu én totoz lakez sé tou rimumez limiklik si Yesus, a séra kumuala wia ni Sia, “Ilekena, si ina' wo sé katuari-Mu ém witi lésaz. Ni séra é mahtututu' i mahilekan karia-Mu.”

³³A si Yesus mingkotla wia ni séra, “Séi wé si ina'-Ku wo séi wé sé katuari-Ku?”

³⁴Werenan-Nama péléng sé tou rimumez limiklik ni Sia ang kuan-Na, “Ni kamu kenumo sé ina' wo sé katuari-Ku!

³⁵Séi uman si mahwangun ung kapaaz ni Opo Empung, ni séramo sé katuari-Ku tuama, katuari-Ku wéwéné wo ina'-Ku.”