Read Tombulu Markus 4 Bible Online

Markus 4 - Tombulu bible

Markus 4

¹ Makasamé, si Yesus é mahtuzu' kasii witi tembir u louz Galilea. A méyé sé tou totoz lakez nimaréwoké wia ni Sia. Niitumo ni Sia simakéma witu u londéi u simuwa' witu un tembir u louz a rumumezla witu wo sé tou lakez itii ém witi katanaan, witu un tembir u louz.

²Lakez an tutuzu' méipahtuzu'-Na wia ni séra karia un aandéan. Wana an tutuzu'-Na, ni Sia é mahkua in téntii,

³“Talingana lé'os! Wéwéhan si mengengeroz makimeroz am watuna tatanemen.

⁴Karegas sia i mahkeroz, wéwéhan am watuna tatanemen méikagogoma witu un tembir u lalan. A méyé sé tumétéwél mékimulat am watuna tatanemen itii makaz nimaapu.

⁵Wéwéhan kasii a méikagogoma witu un tana' watu-watun, un tana'na én toyo' uman. Am watuna tatanemen itii é rengan in timoumé, pahpaan un tana'na én toyo' uman.

⁶Taan i simeritomé si endo, an tinanem itii é nimawelesa wo nimaperama pahpaan zéi'kan tahlous nimahmut.

⁷Wo am watuna tatanemen walina é méikagogoma witu un tana' tinouan an zukut menulah. I mahtoumomé am watuna tatanemen itii, an zukut menulah kangkasii éng kaselahna, a sumé'sé'la an tinanem itii makaz i nimaté, zéi'kan nimua'mé.

⁸Taan am watuna tatanemen walina é méikagogoma witu un tana' rembuz, timoumé totoz wangun a mua'mé. Am wua'na niupu'mé wana an tinanem itii ém wéwéhan a makateluna pulu'mé, wéwéhan a makaenemna pulu'mé wo wéwéhan kasii a makasana atusé.”

⁹A si Yesus kumua kasiila, “Séi si wéwéhan lunteng i mahtalinga é mahtalingama lé'os.”

¹⁰I si Yesus mengesa-ngesamokan, a sé mapulu' wo zua pahtuzu'en-Na wo sé woopira tou sé nimengiité ni Sia meligau tumoro ung kalakoan un aandéan itii.

¹¹A mingkotla si Yesus, “Ni kamu éng kinuaanoma u méikawunipé' tumoro ung kakolanoan ni Opo Empung. Taan im wia sé tou walina, ém pahtuzu'an karia un aandéan,

¹² wo mamuali u méipantik witu um Pinantik Lenas in téntii: ‘Zozo' séra i mahilek, taan ni séra zéi'kan makana'u, zozo' séra i mahtalinga, taan ni séra zéi'kan makatulap, wo séra zéi'kan tumula'u a singkéla' wo ampungan.’ ”

¹³Ang kumuala si Yesus wia sé pahtuzu'en-Na wo wia sé tou kimiité ni Sia, “Zéi'kan katulapan niou wé un aandéan itii? Sa téntu, kura kamu i makatulap an aandéan walina?

¹⁴Ung kalakoana én téntii: si mengengeroz am watuna tatanemen itii é si tou mahwoka' u Nuwu' ni Opo Empung.

¹⁵Am watuna tatanemen méikagogo witi lalan é masuat wo sé tou timalingama u Nuwu' ni Opo Empung, a méyé si tonaas né sétang a rengan méndoma u Nuwu' un taré talinga nérama.

¹⁶Am watuna tatanemen méikagogo witu un tana' watu-watun é sé tou sé timalinga u Nuwu' ni Opo Empung a rengan i sumungkul niitu karia i mahpaa-paaz.

¹⁷Taan u Nuwu' itii én zéi'kan totoz nimahmut witu un até néra wo zéi'kan nimauréma. Sa méyé u susa wo un zéha pahpaan u Nuwu' itii, ni séra é rengan in timamburila im wia si Opo Empung.

¹⁸Wo am watuna tatanemen walina a méikagogo witu un unez an zukut menulah é sé tou sé timalinga u Nuwu' ni Opo Empung,

¹⁹a méyé um paharétan tumoro ung katou-touan néra wo an eenou towo ung kawa'ilanan wo ang kapaaz walina. Niitu u nimangun u Nuwu' ni Opo Empung zéi'kan siapa torona im wia ni séra, makaz u Nuwu' itii zéi'kan nimua' witu un até néra.

²⁰Wo am watuna tatanemen méikagogo witu un tana' rembuz é masuat wo sé tou mahtalinga u Nuwu' ni Opo Empung a sumungkul u Nuwu' itii wo ma'éman. Ni séra mahwua'mé lakez. Wéwéhan a nimua' makateluna pulu'mé, wéwéhan a makaenemna pulu'mé, wo wéwéhan kasii a nimakasana atusé.”

²¹ Ang kuan ni Yesus kasii wia ni séra, “Wéwéhan wé si tou tumutungla u solo wo keleuannala karia un tampayang kaapa izeta'nala witu u lalem un tetekelan? Zéi'kankuaa niitu én izeta'na witu um penono'tolan u solo?

²² Pahpaan zéi'kan siapa a méikawuni an zéi'kan maipapailek wo zéi'kan siapa a méiwuni an zéi'kan makata'uan.

²³Séi si wéwéhan lunteng i mahtalinga é mahtalingama lé'os!”

²⁴ A si Yesus kumuama sumaup, “Wéhanla genang am pahtalingan niou kenu! Kuramo kamu i mahtutulap an tinalinga niou, téntumo si Opo Empung i mangun ni kamu makatulap niitu, wo ni Sia mawes wia ni kamu u lumousé niitu makaz ni kamu uli-ulit makatulap niitu.

²⁵ Pahpaan séi si mahtata'u um paaz ni Opo Empung ni sia én awesampé', taan séi si soo mahtata'u um paaz ni Opo Empung, apa uman ang kata'uanamo én éndon.”

²⁶Ang kuan ni Yesus kasii, “Ung Kakolanoan ni Opo Empung én téntii: wéwéhan si kimeroz um watuna tatanemen witi uma.

²⁷Im wengi ni sia én timekel wo in endo ni sia ém wongké. Um watuna tatanemen itii é simuzumé an tumoumé makaz nimarakék. Taan zéi'kan kata'uanna kura um watuna tatanemen itii i nimamualima téntu.

²⁸Un tana' itiikan u mahwangun an tinanem mahwua'mé. Ung kataré-taré é lolona, tumondong niitu ém wakélna taré un itingna u mawuta-wuta am wua'na.

²⁹ Sa am wua'na orasnamo in upu'en, si mememendu itii éng kumii-kiit i sumoyou pahpaan orasnamo i mupu'.”

³⁰Si Yesus kumua kasiila wia ni séra, “Pasuatenta karia un apa ung Kakolanoan ni Opo Empung, kaapa karia un aandéan apa kita i mapata'u niitu?

³¹Ung Kakolanoan ni Opo Empung é masuat wo um watuna tanemen totoz rintek[4] u méikeroz witu un tana'. Um watuna itii én totoz rintek im wana am watuna wia ung kaayahan.

³²Taan sa am watuna itii mémoikerozla witu un tana', niitu én tumoumé wo tumua'namé wana am péléng an tinanem wana an uma tinaneman a séndé'en. Am pangana kangkasii én tua'na taka-takazan sé tumétéwél én toro sumuut wo sumalah witu.”

³³Lakez an aandéan tanu niitu, am pahpakén ni Yesus i mahtuzu' u Nuwu' ni Opo Empung wia ni séra mengiit un toro makatulapan néra,

³⁴wo sa zéi'kan karia un aandéan, ni Sia zéi'kan mahtuzu' wia ni séra. Taan wia sé pahtuzu'en-Na, pahpakaulit-Na i mahtuzu'.

³⁵Im wengindomo, kuan ni Yesus wia sé pahtuzu'en-Na, “Méyémo kita lumeweto.”

³⁶An itula'u néramé sé tou lakez itii a sumakéma witu londéi u sinakéan ni Yesus, a séra mangé. Wo a londéi walina kangkasii é nimengiita ni Sia.

³⁷Zéi'kan uré a méyé u reges repet wo a sempa' selah mahtoromé u londéi makaz un zano é mahuntepomé witu u londéi taka-takazan u londéi én tawimo mawuta un zano.

³⁸In toro niitu, si Yesus éng kinatekelan witi muri u londéi, un ulu-Na ém witu un tetendéan. A Sia wongkéla né pahtuzu'en-Na, kuan néra, “Méster, zéi'kan pandungen-Nu wé sa kita ikaléwo'ma?”

³⁹A si Yesus rumendaié a rekaken-Nama u reges itii, wo kumuama witu u louz, “Menesla! Mento'mola!” A mento'la u reges wo u louz én totoz nimapenesa.

⁴⁰A si Yesus kumuala wia sé pahtuzu'en-Na, “Kaa kamu maindé'? Kaa kamu zéi'kan ma'éman?”

⁴¹Ni séra én totoz maindé' a mahkua si esa im wia sé walina, “Séi Sia wé, taka-takazan u reges wo u sempa' é mahtali-talinga wia ni Sia?”