Read Tombulu Markus 5 Bible Online

Markus 5 - Tombulu bible

Markus 5

¹A si Yesus wo sé pahtuzu'en-Na ikaayoma witi lewet u louz Galilea, witi tana' né tou Gerasa.

²Kaitumpamé ni Yesus witu u londéi, a méyé si tou sinelazan né sétang si witi pahlewengan, mémahilekan karia-Na.

³Si tou itii é mahwiti-witi pahlewengan wo zéi'kan siapa tou makawawa i mapus ni sia zozo' karia u ranté,

⁴pahpaan u lengen wo un a'éna é makalakezo rinanté, taan a ranté itii ém pahrepesen umana. Niitumo zéi'mo siapa tou si makawawa i mapus ni sia.

⁵Endo wengi ni sia ém wayaan ung kalaésan im wana a lelewengan wo wana ang kimeleng karia i mengéré-ngérét wo mahpéla' un touna in esa karia um watu.

⁶In zou'pé'ma an ilekennama si Yesus, a sia rengan ing kimara'ma ang kumuruzla witu u saru-sarun ni Yesus.

⁷A si tou itii kumérété, “É Yesus, Oki' ni Opo Empung si Totoz Rakék! Apa um pemandungen-Nu wia ni aku? Karia u ngaran ni Opo Empung, pahaléiengku, tia' pahzézéhan aku!”

⁸Si tou itii kimuama in téntu, pahpaan puunala niitu si Yesus éng kimuama wia ni sia, “É, sétang! Mondolé im wia si tou kenu!”

⁹Tumondong niitu si Yesus meligau wia ni sia, “Apa u ngarannu?” A sia mingkotla, “U ngaranku é Legion, pahpaan ni kai é lakez.”

¹⁰Ni sia mahaléi wia si Yesus wo séra tia'mo ipahwowoho mondolé im witi tana' itii.

¹¹Witi rété witu é lakez sé wawi karegas i mengan witi siri'na ung kimeleng.

¹²A sé sétang itii mahaléia wia si Yesus, “Iatumomé kai i muntepa wia sé wawi kenuma.”

¹³An énéala ni Yesus um pahaléien néra. Sé sétang itii é rengan i nimondolé im wia si tou itii, a muntepa wia sé wawi. A sé wawi itii rengan ing kimara'ma witu u ri'ping a mapanawu'ma witi louz, a malemesla witu. Ung kalakez né wawi ém woo zuana riwu.

¹⁴A sé mahtéiz sé wawi itii kumara'ma a makumua a nimamuali itii witi wanua tua'na wo am wanua makaliklik witu. A sé tou rengan niméyé i mémilek u nimamuali witu.

¹⁵Ni séra niméyé wia si Yesus, ileken nérama si tou sinelazan né sétang makangaran Legion itii é makarumezo, kimaraio wo ung genangna ém wanguno. Kaiilekla niitu ni séra é maindé'.

¹⁶Sé tou nimilek u nimamuali itii é simirita wia sé tou un taré mamualima wia si tou sinelazan né sétang itii wo tumoro u nimamuali wia sé wawi itii.

¹⁷A sé tou mahwiti-witi wanua itii mahlusu si Yesus i mondolé im witi tana' néra.

¹⁸I si Yesus simakéma sumaup witu u londéi, si tou sinelazan woan né sétang itii mahaléi, wo sia toro énéané ing kumiit si Yesus.

¹⁹Si Yesus én zéi'kan niménéla, taan kuan-Na wia si tou itii, “Mawurimoma witi walému, wia sé kawanuamu, wo ikuala wia ni séra péléng am winangun ni Opo Empung wia ni ko wo kura u raraatéan-Na wia ni ko.”

²⁰A si tou itii mangé, a masumirita witi tana' pahkuan Dekapolis, péléng am winangun ni Yesus wia ni sia wo péléng ni séra é mengusi-ngusingsing.

²¹Kumawusa niitu, si Yesus limeweta sumaup u louz karia u londéi, sé tou lakez mahtotondongané i mahéyé, a rumimbungla wia ni Sia. Karegas ni Sia im witi tembir u louz itii,

²²a méyé si tonaas um walé peraragésan né tou Yahudi makangaran Yairus. Kaiileknama si Yesus, ni sia é rengan ing kimuruza witu u saru-sarun-Na,

²³a sia mengimbali wia si Yesus, kuana, “Si kooki'ku ndo'tuu é saki tawimo maté. Sa tanu an toro, mangépé'mé witi waléku, wo izeta'mé u lengen-Mu wia ni sia wo sia toro malé'os, zéi'kan maté.”

²⁴A si Yesus mangé karia ni Yairus. Totoz lakez sé tou mahkiité ni Sia wo mahsésé'sé'an witu u rété-Na.

²⁵Im witu kangkasii ém wéwéhan si wéwéné si mapulu' wo zuana ta'uno zézéha im pahondolan.

²⁶Ni sia é nimemuri-murimola wia sé dokter, makaz péléng a sangkumna é nimaapumoma. Ni sia én zéi'kan malé'os, taan u sakina éng kalousna uman taré.

²⁷Si wéwéné itii én timalingamola an tumoro si Yesus. Niitumo, im witu un unez né tou lakez, ni sia é rimétéla witu u muri ni Yesus a sumahiza u rawisna ung karai tonton ni Yesus,

²⁸pahpaan ni sia é mahgenangla, “Maan ni aku sumahiz umana ung karai tonton-Na, ni aku é malé'os.”

²⁹Kaitiona ni wéwéné itii ung karai tonton ni Yesus, in toro niitukan a mento'la un zaha' mahondol wia ni sia wo un touna ém pahpendanenna i lé'oso.

³⁰In toro niitukan kata'uala ni Yesus im wéwéhan ung kawasa u nimondola im wia ni Sia. Niitumo si Yesus liméngéma muri wia sé tou lakez itii a meligau, “Séi si simahizé witu ung karai tonton-Ku?”

³¹A mingkoté sé pahtuzu'en-Na, “Méster ilekela in esa, totoz lakez sé tou mahsésé'sé'an witu u rété-Mu, kaa si Méster é meligau, ‘Séi si simahizé witu ung karai tonton-Ku?’ ”

³²A si Yesus mileka wia sé tou witu u liklik-Na, i menéro si simahizé wia ni Sia ing kataré.

³³Si wéwéné itii én totoz maindé' wo mahgerger i nimata'ula u nimamuali wia ni sia. Ni sia méyé, ang kumuruzla witu u sinaru ni Yesus, an ipakakuanala péléng a nimamuali.

³⁴Ang kuan-Na wia si wéwéné itii, “É oki'-Ku, um pa'émanennu u limé'os ni ko. Mangémo karia ung kaluasan witu un até, ni ko én uli-ulit lé'oso!”

³⁵Karegaspé' si Yesus i mahnuwu', a méyé si tou witi walé ni Yairus ang kumuama, “Si kooki'mu é nimatémo. Apapé' un torona ni ko i merau-raung si Méster?”

³⁶Taan zéi'kan pinandungla ni Yesus a méikua nérala. Ang kuan-Na wia si Yairus, “Tia'mo maindé', ma'émanola.”

³⁷Zéi'kan iwéhé ni Yesus sé tou zozo' in esa ing kumiit ni Sia. Akaz uman si Petrus, si Yakobus wo si Yohanes si katuari ni Yakobus sé toro kumiit.

³⁸A séra ikaayola witi walé ni Yairus, ilekena ni Yesus sé tou é riomokan, mahamé wo mahamé' karia i mahkérét.

³⁹I nimuntepola a Sia meligau wia sé tou itii, “Kaa kamu riomokan wo mahamé'? Si kooki' itii én zéi'kan nimaté, ni sia én timekel uman!”

⁴⁰Taan si Yesus é méiké'ké' néra umanla. A séra péléng ipekiondola ni Yesus im witu. Tumondongla niitu an iwali-Nama si ina' wo si ama' ni kooki' itii, wo sé pahtuzu'en-Na sé nimahwalimé karia-Na, nimuntepa witu ung kinolo'an ni kooki' itii.

⁴¹An tionala ni Yesus u lengen ni kooki' itii, a Sia numuwu'ma, “Talita kum”[5] ung kalakoana, “É kooki', ikua-Kuma wia ni ko, tumoozomé!”

⁴²In toro niitukan, si kooki' itii é rengan i rimendaié a lumampanga pahpaan si kooki' itii é mapulu' wo zuana ta'uno. Péléng sé tou nimilek u nimamualima itii é mengusi-ngusingsing.

⁴³Ni séra én totoz sinéro'la ni Yesus, in zéi'kan toro ipengua-ngua wia si séi uman u nimamualima itii. A séra iatu-Nama i méhéla tikohon wia si kooki' itii.