Read Tombulu Markus 8 Bible Online

Markus 8 - Tombulu bible

Markus 8

¹In toro niitu, totoz lakez kasii sé tou nimaréwok witu. Pahpaan ni séra én zéi'kan siapa kanen, niitumo si Yesus timawahmé sé pahtuzu'en-Na ang kumuama,

²“Iraraaté-Kumo sé tou lakez kenu. Pahpaan teluna endomo séra i mengii-ngiit ni Aku wo ni séra én zéi'mo siapa kanen.

³Sa séra maharem an ipapawuri-Kuma, ni séra én ikawesah witi lalan, pahpaan wéwéhan sé witi zou'ma a méyé.”

⁴A mingkotla sé pahtuzu'en-Na, “Méster, im wia un tampa zou'momé im wana am wanua kenu, kura kita toro méhé ung kanen wia ni séra wo séra mawesuh?”

⁵A si Yesus lumigaula wia ni séra, “Pira ung kalakez u roti niou?” A séra mingkotla, “Pitu.”

⁶An ipekirumez-Nala sé tou lakez itii witu un tana'. Tumondong niitu an éndon-Namé u roti pitu itii, ang kumuama u makasé wia si Opo Empung. Pemété-météngen-Nama a roti itii, an iwéhé-Nama wia sé pahtuzu'en-Na wo niitu maipeméténg nérama. A niitu ipeméténg nérama wia sé tou lakez.

⁷Ni séra kangkasii ém wéwéhan sé seza' kori' woopira. Endo-Namé sé seza' itii a Sia kumuama u makasé wia si Opo Empung, an iatu-Nama sé pahtuzu'en-Na i maméténg sé seza' itii wia sé tou lakez.

⁸A séra kuman makaz i nimawesuh. Tumondong niitu a réwokené né pahtuzu'en ni Yesus a roti nimateza, ung kalakezna ém pituna lo'lo'.

⁹Ung kalakez né tou kiman in toro niitu ém woo epatna riwu tou. A séra péléng ipekiwurima ni Yesus.

¹⁰Si Yesus rengan simakéma witu u londéi karia né pahtuzu'en-Na, a mangé witi tana' Dalmanuta.

¹¹ Tumondong niitu, a méyé sé woopira tou im wia sé sana réwok tou Farisi a mahzéi'-zéi'an karia ni Yesus. Ni séra é niméyé i mélumigau wia si Yesus i mapahsasala' ni Sia. Ni séra é mahaléi wia ni Sia i mangun u makakompo'en um witi kasendukan a méyé, i mema'wa' ni Sia.

¹² Tumalingamé niitu si Yesus é nimasenga selah ang kumuama, “Kaa sé tou in tarékan én totozokan i mahaléi u makakompo'en? Uli-ulit ikua-Kuma wia ni kamu, ni Aku én zéi'kan mangun u makakompo'en wia sé tou kenu in tarékan.”

¹³A séra itula'u-Namé, a sumakéla witu u londéi karia né pahtuzu'en-Na a lumeweta witi kasaru u louz.

¹⁴Sé pahtuzu'en ni Yesus é nimaliuz umané i nimahalimé roti. Ni séra wéwéhan uman u roti esa im witi londéi.

¹⁵ A si Yesus mapagenangla wia ni séra, “Ni kamu én totoz in tuméga-tégam wo mile-ilek im wana a ragi né sana réwok tou Farisi wo ni kolano Herodes.”

¹⁶A sé pahtuzu'en-Na mahsirita i si Méster mahkua in téntu pahpaan ni séra én zéi'kan siapa roti.

¹⁷Kata'uan ni Yesus am pahsiritan néra itii, a Sia kumuala wia ni séra, “Kaa kamu é maza'i uman in zéi'kan siapa roti? Zéi'kampé' kata'uan wo katulapan niou wé niitu? Kaa un até niou én tahlous ketéh?

¹⁸ Ni kamu ém wéwéhan weren, kaa kamu zéi'kan makailek wo ni kamu ém wéwéhan lunteng, kaa kamu zéi'kan makatalinga? Kinaliuzan niouo wé,

¹⁹i ni Aku nimeni'a-ni'aula u roti lima an iwéhéla wia sé limana riwu tou, pirana lo'lo' u roti teza u rinéwok nioula?” A séra mingkotla, “Mapulu' wo zuana lo'lo'.”

²⁰Si Yesus lumigaula sumaup, “I ni Aku nimeni'a-ni'aula u roti pitu an iwéhéla wia sé epatna riwu tou, pirana lo'lo' mawuta-wuta a roti teza rinéwok nioula?” Séra mingkotla, “Pituna lo'lo'.”

²¹Ang kuan-Na wia ni séra, “Zéi'kampé' kasii makatulapla kamu?”

²²Tumondong niitu, si Yesus karia né pahtuzu'en-Na méikaayola witi Betsaida. A sé tou mahwalima si tou letok wia si Yesus. Ni séra mahaléi wia si Yesus in tumiona wia si tou itii wo sia malé'os.

²³Tionané ni Yesus u lengen ni tou itii, an iwali-Nama si tou itii nimondolé im witu um wanua itii. Ruraala ni Yesus um weren ni tou itii an zumeta'ma u lengen-Na witu um weren ni tou itii, a lumigaula wia si tou itii, “Kura, toromo mahilek ko?”

²⁴Si tou itii mileka witu sinaruna, ang kuana, “Ni aku é mahileka sé tou tanu uman ang kai, taan ni séra é melampa-lampang.”

²⁵A si Yesus zumeta'ma sumaup u lengen-Na witu um weren ni tou itii, a si tou itii uli-ulit mahileko wo lé'oso wo péléng am péléng ém pahilekennamo karia im wangun.

²⁶A si tou itii ipekiwurima ni Yesus karia ing kimuala, “Tia'mo mawuri witi wanua itii!”

²⁷A si Yesus karia né pahtuzu'en-Na mangé wana am wanua witi rété un tana' Kaisarea-Filipi. Im witi lalan, ni Sia meligau wia sé pahtuzu'en-Na, “Pahkuan né tou, ni Aku é séi?”

²⁸ A séra mingkotla, “Wéwéhan sé mahkua: Si Yohanes Menanarani, sé walina é mahkua: Si Elia, wo sé walina kasii é mahkua: Si esaané im wia sé nabi.”

²⁹A Sia meligau wia ni séra, “Taan sa ikiit ni kamu, ni Aku é séi?” A mingkotla si Petrus, “Ni Komo si Mesias!”

³⁰A séra séro'ela ni Yesus, wo séra zéi'kan kumua wia si séi uman tumoro ni Sia.

³¹A si Yesus rengan i mahtuzu' wia sé pahtuzu'en-Na i si Oki' ni Tou é léwo'zéi' i mazéha wo kasoo né pahtutu'an né tou Yahudi, né tonaas né walian wo né tou tulap un Torat, wo sé tou é munu' ni Sia, taan ni Sia é matou sumaup witu un endo katelu.

³²Péléng niitu én ipahkua ni Yesus wo zéi'kan susa ing katulapan. Taan ni Sia éng kinéhongé ni Petrus rimuruhla, a Sia séro'ennala.

³³A si Yesus luméngéma a mileka wia sé pahtuzu'en-Na a si Petrus séro'en-Nala, “Mangémo ko tonaas né sétang! Ni ko é mahgenang uman ung ginenang ni tou, zéi'kan ung ginenang ni Opo Empung.”

³⁴ A si Yesus tumawahmé sé tou lakez wo sé pahtuzu'en-Na, ang kumua wia ni séra, “Séi si paaz kumiit ni Aku, ni sia én zéi'mo mahgenang ung katou-touanna in esa, masaan u salipna wo kumiit ni Aku.

³⁵ Séi si paaz mahkelung ung katou-touanna, ni sia éng kaliongan ung katou-touan. Taan séi si kinaliongan ung katou-touanna pahpaan ni Aku wo pahpaan i mahwoka' u Nuwu' Lé'os-Ku, ni sia é makailek ung katou-touan makaz ing kauré-uré.

³⁶Apa un torona si tou nimakailek péléng am wia ung kaayahan, taan ni sia éng kinaliongan ung katou-touanna?

³⁷Pahpaan, apa un toro iwéhéna i sumawel ung katou-touanna?

³⁸Pahpaan im wia sé tou zéi'kan ma'éman wo mahsingkéla' kenu, séi uman si maizang makaulit i mahkii-kiit ni Aku wo pahpaan an ipahkua-Ku, si Oki' ni Tou kangkasii é maizang pahpaan si tou itii, i ni Sia méyé sumaup karia ung kawangko'an ni Ama'-Na kinariamé né malaekat lenas.”