Read Tombulu Markus 9 Bible Online

Markus 9 - Tombulu bible

Markus 9

¹A si Yesus kumua kasiila wia ni séra, “Uli-ulit ikua-Kuma wia ni kamu, sé woopira im wia ni kamu sé wia un tampa kenu én zéi'kan maté puunala séra nimilek ung kawasa wo ung Kakolanoan ni Opo Empung.”

²I limangkoiola un enemna endo, si Yesus mahwalima si Petrus, si Yakobus karia ni Yohanes i simosoza witu ung kentur rakék. Im witu én zéi'kan siapa tou walina akaz uman ni séra. In toro niitu ileken nérama si Yesus é nimawalinamoma.

³Ung kinarai-Na é nimakulo'ma meto-petot. Im wia ung kaayahan kenu én zéi'kan siapa tou toro kumemes ung karai wo itu makulo' tanu niitu.

⁴An ileken nérama si Elia wo si Musa é mahsirita karia ni Yesus.

⁵Kuan ni Petrus wia si Yesus, “Méster, totoz wangun ni kita im wia un tampa kenu. Ni kai é rumendai un terung telu, un esa én anu ni Méster, un esa én anu ni Musa, wo un esa én anu ni Elia.”

⁶Zéi'mo kata'uan ni Petrus apa u léwo'zéi' in ikuana, pahpaan ni sia wo sé kakariana én totozo maindé'.

⁷ Tumondong niitu an tumumpamé u ninahak ang kumungkungé wia ni séra. Wo witu un untep u ninahak itii talingané u nuwu' kimuamé in téntii, “Si kenumo si Oki'-Ku, si ikararaaté-Ku, pahtalingala Sia!”

⁸Kumompo'mé, i ni séra nimilekla makaliklik, zéi'mo siapa tou walina sé witu, akazokan si Yesus.

⁹I ni séra nimerosé im witi kentur itii, si Yesus é nimapagenanga wia ni séra, wo séra zéi'kan masumirita wia si séi uman a niilek néra itii, puunala si Oki' ni Tou matoumé sumaup im wia sé nimaté.

¹⁰U méipapagenangé itii éng kiniitan néra, taan ni séra é mahliligauan tumoro ung kalakoan “matoumé sumaup im wia sé nimaté.”

¹¹ A séra lumigau wia ni Sia, “Kaa sé tou tulap un Torat é mahkua i si Elia é léwo'zéi' mapuunamé i méyé taan si Oki' ni Tou?”

¹²A si Yesus mingkotla, “Totoz ulit. Si Elia é mapuunamé i mémimek péléng am péléng. Taan kura un tumoro si Oki' ni Tou? Kaa un tumoro ni Sia é méipantik i lakez an zézéha wo mapahséro'an né tou?

¹³Taan ikua-Kuma wia ni kamu, si Elia é niméyémo wo sé tou é simusama ni sia pahkiit uman um paaz néra, mengiit u méipantik im puuna tumoro ni sia.”

¹⁴I si Yesus karia né telu pahtuzu'en-Na nimawurimoma sumaup wia sé pahtuzu'en-Na walina, ileken nérama lakez sé tou rimimbung wia sé pahtuzu'en-Na itii. Wo im witu ém wéwéhan sé woopira tou tulap un Torat mahéndo-éndoan karia néra.

¹⁵I si Yesus niileka né tou lakez, ni séra é méikanganga a merewe-rewek i simungkula ni Sia.

¹⁶A si Yesus lumigaula wia ni séra, “Apa um pahéndo-éndoan niou karia né tou tulap un Torat?”

¹⁷Si esaané im wia sé tou lakez itii é nimingkotla, “Méster, ni aku é nimahwalimé si koki'ku kenu wia si Méster, pahpaan ni sia é sinelazan ni sétang, si nimangun ni sia nimawowo'.

¹⁸Sekez si sétang itii kumawasama wia ni sia, si koki' itii én ipahwasalna witu un tana' wo u sumahna é mahsewu, am waangna éng karékétokan wo un touna é mengesé-ngeséi. Ni aku é nimahaléiola wia sé pahtuzu'en ni Méster wo si sétang itii iwoho nérama, taan ni séra én zéi'kan nimakawawama.”

¹⁹Ang kuan ni Yesus wia ni séra, “É kamu sé tou zéi'kan ma'éman, makaz sawisa ni Aku léwo'zéi' i mento' mahwali-wali karia niou? Makaz sawisa ni Aku léwo'zéi' i mezen wia ni kamu? Ipahwalimé wia'i si koki' itii!”

²⁰An ipahwali néramé si koki' itii wia ni Sia. I si sétang itii mileka si Yesus, a si koki' itii rengan i wangunenna ni sétang itii i mengesé-ngeséi, an ikawasala witu un tana' wo mahuli-uliz, karegas niitu u sumahna é mahsewumé.

²¹A si Yesus lumigaula wia si ama' ni koki' itii, “Urémo sia in téntu?” Am wingkotenala, “Rengané ing koki'pé' ndootuu.

²²Wo ni sia é makalakez im pahkéhongena ni sétang itii witu un api kaapa witu un zano i mahwuwunu' ni sia. Taan sa sia toro tulungena ni Méster, tulungené wo iraraaté ndootuumé kai.”

²³A si Yesus mingkotla, “Kaa kuanu sa Aku én toro? Péléng am péléng én toro mamuali im wia sé tou ma'éman!”

²⁴A si ama' ni koki' itii rengan ing kimérété, “Ni aku é ma'éman, tulungené ni aku si zéi'kan ma'éman kenu.”

²⁵I si Yesus mileka sé tou éng kalakeznamo i mahréwoké witu, a rekaken-Nama si sétang itii, kuan-Na, “É ko, sétang si nimangun si tou nimawowo' wo lunteng, mondolomé im wia si koki' kenu wo tia'mo mahseselaz sumaup wia ni sia!”

²⁶A si sétang itii mondola karia ing kiméréta wo nimanguna si koki' itii in totoz mengesé-ngeséi. Si koki' itii ém pahileken tanu si tou nimatémo, taka-takazan lakez sé tou mahkua, “Ni sia é nimatémo.”

²⁷Taan si Yesus én timiona u lengen ni koki' itii, wongké-Namé, a si koki' itii rumendaié.

²⁸Kumawusa niitu, si Yesus wo sé pahtuzu'en-Na muntepa witu un walé esa. I ni séra uman sé witu, a séra meligau wia ni Sia, “Kaa ni kai én zéi'kan makawawa i moho si sétang itii?”

²⁹A séra wingkotela ni Yesus, “Si sétang tanu si kenu én toro uman iwoho karia i mengaléi.”

³⁰Si Yesus wo sé pahtuzu'en-Na én timula'umé un tampa itii a lumangkoia ung Galilea. Kasoo ni Yesus sé tou walina i mata'uma sa ni Sia é limangkoia witu,

³¹pahpaan ni Sia éng karegas i mahtuzu' sé pahtuzu'en-Na. Ni Sia kumuala wia ni séra, “Si Oki' ni Tou é maiayo witu ung kawasa né tou, wo ni Sia ém wunu'en néra. Tumondongla niitu, witu un endo katelu ni Sia é matou sumaup.”

³²Sé pahtuzu'en ni Yesus én zéi'kan makatulap ung kalakoan u méikua-Namé, taan katéntu néra i lumigau niitu wia ni Sia.

³³A si Yesus wo sé pahtuzu'en-Na ikaayola witi Kapernaum. I ni séra witimo walé, si Yesus meligau wia ni séra, “Apa um pahéndo-éndoan niou im witi lalan ing kataré?”

³⁴ Taan ni séra é memene-menes uman, pahpaan ing kataré im witipé' lalan, ni séra é mahéndo-éndoan tumoro séi si totoz ipahpuu-puuna im wia ni séra.

³⁵A si Yesus rumumezla an tumawahmé sé mapulu' wo zua pahtuzu'en-Na. Kuan-Na wia ni séra, “Sa si tou paaz maéndo kataré-taré, ni sia é léwo'zéi' i maéndo totoz kamurian im wana am péléng wo maéndo mahsawa-sawang péléng né tou.”

³⁶A si Yesus tumawahmé si koki' an irendai-Nala witu un unez néra. Rawaken-Nala si koki' itii, ang kua-Na wia ni séra,

³⁷ “Séi uman si simungkul si koki' tanu si kenu pahpaan ma'éman ni Aku, ni sia é simungkul ni Aku. Séi uman si simungkul ni Aku, zéi'kan ni Aku si sinungkulna taan ni Sia si nimatumé ni Aku.”

³⁸A si Yohanes kumuala wia si Yesus, “Méster, ni kai é nimileké si tou mahwoho si sétang karia u ngaran ni Méster, a sia séro'en naimé, pahpaan ni sia én zéi'kan esaané im wia ni kita.”

³⁹Taan kuan ni Yesus wia ni séra, “Ni kamu én tia' mahséro' ni sia! Pahpaan zéi'kan siapa si tou nimangun u makakompo'en karia u ngaran-Ku, wo in toro niitu kangkasii é mahwuwuul u ngaran-Ku.

⁴⁰ Séi uman si zéi'kan mahsaru ni kita, ni sia éng kakariata.

⁴¹ Uli-ulit ikua-Kuma wia ni kamu, séi uman si méhéla wia ni kamu un zano elepen zozo' sana eelepan uman pahpaan ni kamu é mahkii-kiit si Kristus, ni sia én zéi'kan kaliongan um wawaér wia ni sia.”

⁴²Si Yesus kimua kasiila wia ni séra, “Séi uman si nimangun si esaané im wia sé koki' sé ma'éman wia ni Aku kenu in zéi'mo ma'éman wia ni Aku, tawimo u léhé'na apusala um watu tua'na ipahgiling wo mailombo'mé witi tasik.

⁴³ Sa u lengenmu kasaru mangunla ni ko i mahsingkéla', ketorenola u lengen itii! Pahpaan, tawimo ni ko menou-nou karia ni Opo Empung karia u lengen pokol kasaru, taan karia u lengen zua méiuntep umana witi naraka, witu un api zéi'kan mahpaté. [

⁴⁴Im witu, sé sapat zéi'kan mahpaté wo un api én zéi'kan mahpaté.]

⁴⁵Sa un a'ému kasaru mangunla ni ko i mahsingkéla', ketorenola un a'é itii! Pahpaan tawimo ni ko i menou-nou karia ni Opo Empung karia un a'é pokol kasaru, taan karia un a'é zua méiuntepa witi naraka. [

⁴⁶Im witu, sé sapat zéi'kan mahpaté wo un api én zéi'kan mahpaté.]

⁴⁷Sa um werenmu mangunla ni ko mahsingkéla', suitenola um weren itii! Pahpaan tawimo ni ko muntepa witi Kakolanoan ni Opo Empung karia um weren kasaru uman, taan ni ko é makaweren un zua méiuntep umana witi naraka.

⁴⁸ Im wana, sé sapat zéi'kan mahpaté, wo un api én zéi'kan mahpaté.

⁴⁹Péléng sé tou ém wa'wa'en karia am pengalin, niitu én tanu sé tou in asinan karia un api. [6]

⁵⁰ Un asin ém wangun, taan sa un asin én tewango, karia un apa ni kamu mangun niitu maasin sumaup? Niitumo ni kamu é léwo'zéi' maéndo tou lé'os tanu un asin wo menou-noula karia i mahlé'o-lé'osan wo sé tou walina.”