Read Tombulu Lukas 10 Bible Online

Lukas 10 - Tombulu bible

Lukas 10

¹Tumondong niitu, si Yesus niméléng sé pituna pulu' [19] tou walina sé mahkiit ni Sia. Ni séra é méiatu tumahzuzua mapuuna mangé wana am wanua tua'na wo wana an tampa angéan-Na.

² Ang kuan ni Yesus wia ni séra, “An upu'en é lakez taan sé mupu' én toyo' uman. Niitumo, mahaléiola wia si Makauma wo awesan-Namé tou i mémupu'.

³ In tarékan, mangémo wo mile-ilek, pahpaan ni kamu i méiatu-Ku én tanu si domba witu un unez né serigala.

⁴ Ni kamu i mangé én tia'mo mahali u sompoi kaapa tatahu'an am walun, kaapa selop wo tia'mo kamu mento' i sumigi' sé tou ipahpasungkul niou witi lalan.

⁵Sa kamu muntepla witu um walé, ung kataré-taré ikuala én téntii, ‘Mahlé'o-lé'osan wia ni kamu im wia um walé kenu.’

⁶Sa witu um walé itii ém wéwéhan si tou paaz u mahlé'o-lé'osan, u méikua nioua ém wéwéhan torona im wia si tou itii. Taan sa zéi'kan siapa tou paaz u méikua nioua, u méikua nioua itii é mawurimé wia ni kamu.

⁷ Sa kamu sungkulela ni makawalé, ni kamu é mento'mola witu um walé itii wo tia'mo mahééra wana am walé walina, wo kuman wo melepola apa uman un iwéhéla ni makawalé. Pahpaan si tou mahpaayang ém wangun i makailek um wawaér.

⁸Sa kamu muntepa witu um wanua tua'na wo wéwéhan sé tou sumungkulé ni kamu, kanenla un iwéhé néramé wia ni kamu.

⁹Lé'osela sé tou saki sé witu um wanua tua'na itii, wo ikuala wia sé tou witu, ‘Ung Kakolanoan ni Opo Empung é lelezokan im wia ni kamu.’

¹⁰Taan sa kamu muntepa witu um wanua tua'na wo zéi'kan siapa si simungkul ni kamu, mangémo wana a lalan tua'na witu um wanua tua'na itii wo mahkéréta in téntii,

¹¹‘An awu wia um wanua tua'na kenu a méikalaput wana an a'é nai én itangkar naima, i mapagenanga sa ni kamu é soo tumalinga si Opo Empung.’ Gena-genangen ung kenu, ‘Ung Kakolanoan ni Opo Empung é lelezokan.’

¹² Ikua-Kuma wia ni kamu, im witu un endo si Opo Empung in tumotoz ulit kaapa zéi'kan am pahlé'osen né tou, un ukuman wia sé tou witipé' Sodom u rorak taan un ukuman wia sé tou witu um wanua tua'na itii.”

¹³ Ang kuan ni Yesus, “Ikaléwo'mo kamu in tou Khorazim! Ikaléwo'mo kamu in tou Betsaida! Pahpaan sa a makakompo'en winangun-Ku wana am wanua niou ém winangun-Ku witi Tirus wo Sidon, tantumo urémo séra ing kimarai ung karai pengangaraien witi pinatéan wo an ulu néra ém wuzwuzan néra an awu, un tumuzu'mé ni séra é mene'selo wo timula'umola a singkéla' néra.

¹⁴Im witu un endo si Opo Empung in tumotoz ulit kaapa zéi'kan am pahlé'osen né tou, un ukuman wia sé tou witipé' Tirus wo Sidon u rorak taan un ukuman wia ni kamu.

¹⁵Ni kamu in tou witi Kapernaum, ni kamu é mahgenangla im wénéten ni Opo Empung makaz witi kasendukan? Zéi'kan, ni kamu én itumpa witu naraka!”

¹⁶ Ang kuan ni Yesus wia sé tou mahkii-kiit ni Sia, “Séi uman si mahtalinga ni kamu, ni sia é mahtalinga ni Aku. Séi uman si soo ni kamu, ni sia é soo ni Aku wo séi uman si soo ni Aku, ni sia é soo wia si nimatumé ni Aku.”

¹⁷Sé pituna pulu' tou méiatu ni Yesus nimawurimé karia i mahpaa-paaz. A séra kumua wia si Yesus, “Tuang, sé sétang kangkasii é mahtali-talinga i méiwoho naimé karia u ngaran-Mu.”

¹⁸Ang kuan ni Yesus wia ni séra, “Niilek-Ku si tonaas né sétang nimagogomé im witi langit tanu an tila'pong.

¹⁹ Niitumo, totoz wéhanla genang, ang kawasa é mémoiwéhé-Ku wia ni kamu i luméék sé ulé', sé kalajengking wo kumala ang kawasa né kakoro' niou, si tonaas né sétang itii taka-takazan zéi'kan siapa si toro luméwo' ni kamu.

²⁰Taan zozo'pé' in téntu, ni kamu én tia'mo mahpaa-paaz, pahpaan ing kinala niouola sé sétang. Taan tawimo ni kamu mahpaa-paaz, pahpaan a ngaran niou é mémoipantik witi kasendukan.”

²¹In toro niitu, si Yesus é mahpaa-paaz wo mawuta-wuta ung kawasa ni Roh Lenas. Ang kuan ni Yesus, “Ni Aku kumuama u makasé wia ni Ko, Ama', Opo Empung u langit wo ung kaayahan. Pahpaan niana é méiwuni ni Ama' im wia sé tou tulap wo lakez ang kata'uan. Taan niana é méipapailek ni Ama' wia sé tou kanaramen sé mahkii-kiit uman tanu sé koki'. Niitu u nimangun un até ni Ama' i mahpaa-paaz.

²² Péléng am péléng é mémoiayo ni Ama'-Ku wia ni Aku. Zéi'kan siapa zozo' in esa si mata'u si Oki', akaz uman si Ama'. Zéi'kan siapa zozo' in esa si mata'u si Ama', akaz uman si Oki' wo sé tou sé kapaaz ni Oki' sé makuaan-Na tumoro si Ama'.”

²³Kumawusa niitu, si Yesus merena wia sé pahtuzu'en-Na a numuwu' wia ni séra uman, kuan-Na, “Ni kamu é mahpaa-paazola, pahpaan am pina'ilek niou in tarékan.

²⁴Pahpaan im puuna é lakez sé nabi wo sé kolano paaz milek a niilek niou in tarékan, taan zéi'kan nimilek niitu. Ni séra kasii ém paaz in tumalinga an tinalinga niou in tarékan, taan zéi'kan timalinga niitu.”

²⁵ Makasamé, wéwéhan si tou tulap un Torat rimendaié i mahwawa'wa' si Yesus, kuana, “Méster, apa u léwo'zéi' wangunengku i makailek ung katou-touan makaz ing kauré-uré?”

²⁶A si Yesus meligau wia ni sia, kuan-Na, “Kura a méipantik witu ung kitap Torat? Apa um binacamu witu?”

²⁷ Si tou itii mingkoté, “Iraraatéla si Opo Empungmu, karia péléng un atému wo karia péléng si rohmu wo karia péléng ung ketezmu wo karia péléng ung genangmu, wo iraraatéla sé kasuatmu tou, tanu ni ko i rumaraaté un toumu in esa.”

²⁸ Ang kuan ni Yesus wia si tou itii, “U méiwingkotmumé itii én ulit! Pahwangunennula niitu péléng wo ni ko makailek ung katou-touan makaz ing kauré-uré.”

²⁹Taan si tou itii i mapailek ni sia én ulit, ni sia meligau kasii, “Séi si kasuatku tou?”

³⁰Si Yesus mingkotla, “Wéwéhan si tuama Yahudi merosé im witi Yerusalem i mangé witi Yerikho. Karegas sia i mahlampang, a méyé sé tou léwo'. Ni sia ém pinahwélwél nérama ang kahat nérama péléng am pahali-alina, a sia itula'u nérama tawimo maté.

³¹In toro niitu wéwéhan si walian né Yahudi si witi Yerusalem a merosé malumangkoi witu. Niileknama si tou tawimo maté itii, taan si timalez umana ang kumiita witu un tembir kasaru u lalan.

³²Téntu kangkasii si tou suzu ni Lewi si mahpaayang wia si Opo Empung witi Walé ni Opo Empung, si limampanga witu an ilekennama si tou tawimo maté itii. Si suzu Lewi itii kangkasii én timalez umana kimiita witu un tembir kasaru.

³³ Tumondong niitu, wéwéhan si tou Samaria[20], si mahlampang a mélumangkoi witu. I niileknama si tou tawimo maté itii, mawiamé u raraatéanna wia si tou itii.

³⁴Si tou Samaria itii rumétéla si tou tawimo maté itii, weresinnala am péla'na karia un anggor an undamennala karia u lana ang kezkezannala.[21] Kumawusa niitu, a sia isakénala wia si keledaina, an ipahwalinama witi walé penunulian. Im witu si tou tawimo maté itii én totoz pinahimeknamé.

³⁵Masandomé, si tou Samaria itii méhéla un zua zoit péra' wia si makaanu um walé penunulian itii, ang kuana, ‘Imekempé'la si tou kenu. Sa un zoit kenu zéi'kan awes, mémokan awesangku i ni aku mawurimé.’ ”

³⁶A si Yesus meligau, “Sa ikiit ni ko, im wia sé tou telu itii é séi si pahkuan ing kasuat tou ni tou winélwélé né tou léwo' itii?”

³⁷Si tou itii mingkoté, “Si tou Samaria si nimapailek u raraatéanna wia si tou itii.” Ang kuan ni Yesus wia ni sia, “Ulit u méikuamumé! Niitumo mangémo wo mamangunla tanu niitu.”

³⁸ I si Yesus wo sé pahtuzu'en-Na mahlampang, a séra ikaayola witu um wanua. Im witi wanua itii ém wéwéhan si wéwéné makangaran Marta, a séra sungkulena ni wéwéné itii witi waléna.

³⁹Si Marta ém wéwéhan si totoz katuarina makangaran Maria. Im witu um walé itii si Maria rimumez witu rété un a'é ni Yesus i mahtalinga an ipahkua ni Yesus.

⁴⁰Taan si Marta é mahkara-kara' i mahimek ung kanen néra, a sia rumétéla si Yesus, ang kuana, “Tuang, zéi'kan ndootuu pandungen-Nu aku? Ni aku uman si mahpaayang wo si Maria én zéi'kan pekisawang-Mu. Iatupé'mé sia i sumawang ni aku!”

⁴¹Taan ni sia ém winingkot umanla ni Yesus, “Marta, Marta, ni ko én tahlous maarét wo tahlous mahsususa un toumu in esa wana péléng am péléng,

⁴²taan un ipahpuu-puuna én esa uman. Si Maria é niméléngola un totoz wangun, un zéi'kan éndon im wia ni sia.”