Read Tombulu Lukas 12 Bible Online

Lukas 12 - Tombulu bible

Lukas 12

¹ In toro niitu én totoz lakez sé tou nimaréwok makaz ni séra é mahsésé'-sé'an, a si Yesus mahtuzu' kimataréma wia sé pahtuzu'en-Na, kuan-Na, “Ni kamu é mile-ilek im witu u ragi[23] né sana réwok tou Farisi sé mahgau-gau lé'os.

² Zéi'kan siapa ang kineleuan an zéi'kan mawukaan wo zéi'kan siapa a méikawuni an zéi'kan makata'uan.

³Péléng an ipahwuni-wuni niou éng kata'uan né tou lakez. Péléng a méipahkewit niou wana a méikawuni én iwoka' wia sé tou tanu im witu um wawo um walé wo mahwoka'.”

⁴Ang kuan kasii ni Yesus, “Ni kamu ing kakaria-Ku, ni kamu én tia' maindé' wia sé tou toro uman munu' un awak niou wo zéi'mo mata'u mangun u lumousé niitu im wia ni kamu.

⁵In tarékan én ituzu'-Kuma wia ni kamu séi si léwo'zéi' in ikaindé' niou. Ikaindé'la si Opo Empung, pahpaan ni Sia ém wéwéhan kawasa i munu' un awak niou wo lumombo' si roh niou witi naraka. Uli-ulit ikua-Kuma wia ni kamu, ikaindé'la Sia!

⁶Zéi'kankuaa sé ringkéng lima én iwangkér karia un zoit totoz rintek[24]uman? Taan zéi'kan siapa zozo' in esa im wia sé ringkéng si kinaliuzan ni Opo Empung.

⁷Woopé' kasii ni kamu, makaz am wuuk witu un ulu niou ém pinakarékéno. Niitumo, ni kamu én tia' maindé', pahpaan ni kamupé' sé ipahpuu-puuna taan sé ringkéng lakez.”

⁸Ang kuan ni Yesus, “Séi uman si makaulitla wia sé tou i ni sia é ma'éman ni Aku, si Oki' ni Tou kangkasii é makaulit i ni sia én tou-Ku im witu u sinaru né malaekat ni Opo Empung.

⁹Taan séi uman si mahkélong i ni sia én tou-Ku witu u sinaru né tou, si Oki' ni Tou kangkasii éng kumélong ni sia im witu u sinaru né malaekat ni Opo Empung.

¹⁰ Si tou mahkuama a mahsaru si Oki' ni Tou, ni sia ém wéhan ampungan. Taan si tou mahséro' wia si Roh Lenas, ni sia én zéi'kan wéhan ampungan.

¹¹ Sa wéwéhan tou mahwali ni kamu witu u sinaru né tonaas né tou Yahudi witi walé peraragésan né tou Yahudi, kaapa wia sé mahperénta wo sé mahkawasa, tia'mo ikaarét niou apa u léwo'zéi' in ikua niou wo kura ing kumelung un tou niou.

¹²Pahpaan in toro niitukan, si Roh Lenas én tumuzu' wia ni kamu u léwo'zéi' in ikua niou.”

¹³Si esa im wia sé tou lakez kumuama wia si Yesus, “Méster, ikuapé'la wia si totoz katuariku im wéténgané ni aku im wana a sangkum méitula'uma né tu'a nai.”

¹⁴Taan kuan ni Yesus wia si tou itii, “Séi si timuzu'la ni Aku i maéndo menonotoz kaapa meméméténg a sangkum méitula'uma né tu'a niou?”

¹⁵Ang kuan-Na wia sé tou lakez, “Mile-ilek wo tuméga-tégam én taa kamu maéndo tou angkum. Pahpaan zozo' in totoz lakez a sangkum ni tou, ung katou-touanna én zéi'kan niméré' uman witu ung kawa'ilananna.”

¹⁶A si Yesus kumuama un aandéan, kuan-Na, “Wéwéhan si tou totoz wa'ilan. Am pahupu'en wana an umana én totoz lakez.

¹⁷A si tou itii megena-genang in téntii, ‘Kuramo um wangunengku, am pahupu'en wana an umaku én zéi'mo siapa lé'osan.’

¹⁸Ang kuana, ‘Téntii um wangunengku: Am pahlé'osan am pahupu'en éng gogaren wo mangun an tumua'napé'mé makaz péléng am pahupu'engku wo a sangkumku én toro ipahlé'os witu.’

¹⁹Tumondong niitu ni aku éng kumua witu un touku in esa in téntii, ‘Ni aku én totozo wa'ilan, am pahupu'en ém wangun wo kumuwu-kuwu, pahta'unan ing kuman niana. Niitumo in tarékan ni aku én toro kumana'pé'la. Kuman wo melepé'la karia i mahpaa-paaz.’

²⁰Taan kuan ni Opo Empung wia ni sia, ‘É ko in tou lemou! Im wengi kenukan, ung katou-touannu én éndon im wia ni ko. Séi si wéhannu péléng a rinéwokmu itii?

²¹Téntu u mamuali wia si tou si mahtututu' uman i mahréwok a sangkumna, taan zéi'kan mahtututu' i maéndo wa'ilan witu u sinaru ni Opo Empung.’ ”

²²Ang kuan ni Yesus wia sé pahtuzu'en-Na, “Niitumo ikua-Kuma wia ni kamu, tia'mo ikaarét ung katou-touan niou, tumoro ung kanen niou wo tia' kangkasii ikaarét un awak niou, tumoro ang karaien niou.

²³Pahpaan ung katou-touampé' un ipahpuu-puuna taan ung kakanen, wo un awakpé' un ipahpuu-puuna taan ung karai.

²⁴Amoké ileken nioula sé kokoak, zéi'kan mahkeroz wo zéi'kan mahupu', zéi'kan siapa pahtahu'an kaapa pahlé'osan an niupu', taan zozo'pé' in téntu si Opo Empung si mahwéhé ang kakanen néra. Ni kamupé' sé ipahpuu-puuna taan sé kokoak itii!

²⁵Séi si wia ni kamu si pahpaan im paharétan, toro mawes zozo' in zéi'kan uré witu ung katou-touanna?

²⁶Sa ni kamu zéi'kan makawawa i mawes ung katou-touan niou zozo' in zéi'kan uré, tawimo ni kamu in zéi'kan paharétan tumoro am walina.

²⁷ Amoké ileken nioula am wunga bakung. Am wunga itii én zéi'kan mahwangun am wanang im wangunen karai, taan am wunga itii én totoz wangun. Ikua-Kuma wia ni kamu, si Salomo im witu ung kawangko'anna, zéi'kan nimahkara-karaila tanu ung kawangun un esaané im wana am wunga itii.

²⁸Niitumo, sa an zukut witi kapelasan an tumoumé in tarékan wo i sando én ziketano ém pahimeken ni Opo Empung, woopé' kasii ni kamu, ung katou-touan niou én imeken ni Opo Empung, é kamu sé zéi'kan tahlous ma'éman!

²⁹Niitumo, tia'mo kamu megena-genang ang kanen wo an elepen niou wo tia'mo paharétan un até niou.

³⁰Péléng niana ém penéro-néron né tou wia ung kaayahan sé zéi'kan mata'u si Opo Empung. Taan si Ama' niou si witi kasendukan é mata'u, i ni kamu é memandung niana péléng.

³¹Taan penérompé'la ung Kakolanoan ni Opo Empung, wo péléng niana én iawes wia ni kamu.

³²Ni kamu én toyo' uman! Taan zozo'pé' in téntu, ni kamu én tia'mo maindé'. Pahpaan si Ama' niou si witi kasendukan é mahpaa-paaz i ni kamu nimaéndomo tou witi Kakolanoan-Na.

³³Iwangkérola péléng a sangkum niou wo un zoit én iwéhéla wia sé tou zéi'kan siapa apa. Sa téntu um pahwangunen niou, niitu én tanu ni kamu limé'os a sangkum niou witi kasendukan wo niitu én zéi'kan maapu. Niitu én zéi'kan siksiken né meniksik wo zéi'kan siapa si rumemu'.

³⁴Pahpaan wisa a sangkum niou, ung genang niou kasii ém witu.”

³⁵ Kuan ni Yesus, “Ni kamu é léwo'zéi' mahime-imek i maayang wia si Opo Empung, tanu si tou si sekezé éng kimaraio um pengangaraien i maayang wo sekezé én timutungo u solo.

³⁶ Ni kamu kangkasii é léwo'zéi' tanu sé ata ma'ento' si tuang i mawurimé im witi pahkawéngan, wo sa sia tuméngkoré ni séra é rengan i mukama um pepenet.

³⁷Mahpaa-paazla sé ata sé timégam i méileken ni tuang néra. Uli-ulit ikua-Kuma wia ni kamu, si tuang néra itii é mimek un touna, tawahennamé sé ata ing kuman wo ni sia si masumelewir sé atana.

³⁸Sa si tuang itii mawiamé im wengi uré kaapa i mamomaayah, a méilekenna sé atana én timégam i ma'ento' ni sia, sé ata itii kasii é mahpaa-paaz.

³⁹ Kata'uan nioula ang kenu, sa kata'uan ni makawalé un oras ni maremu' i mérumemu', zéi'kan iwayana si maremu' i muntep witu um waléna.

⁴⁰Niitumo, ni kamu kangkasii én tuméga-tégam, pahpaan si Oki' ni Tou é méyé witu un oras zéi'kan kata'uan niou.”

⁴¹A si Petrus meligau wia si Yesus, “Tuang, apa un aandéan itii én tumoro ni kai kaapa tumoro péléng sé tou?”

⁴²Si Yesus mingkotla, “Séi si ata mahtali-talinga wo tulap si éndon ni tuangna i maéndo tonaas né ata walina wo mahimek ung kanen né ata itii in orasnamo ing kuman?

⁴³Mahpaa-paazla si ata si méileken ni tuangna i nimawurimé, mahpaayang am paayangenna.

⁴⁴Uli-ulit ikua-Kuma wia ni kamu: Si tuangna itii én tumarawésa péléng a sangkumna wia si atana itii.

⁴⁵Taan sa si ata itii léwo' ang gumenangla in téntii, ‘Si tuangku é mauré-urépé' i mawurimé’. A rengan im pahpatezennama sé ata tuama wo sé ata wéwéné, wo ni sia kuman wo melep makaz nimatewelen.

⁴⁶Taan, i si tuangna itii mawurimé witu un endo zéi'kan pahgenangennala wo witu un oras zéi'kan kata'uanna, si ata itii én ukumen makaz maté. Ni sia én ukumen tanu sé tou zéi'kan mahkii-kiit si Opo Empung.

⁴⁷Sa kata'uan ni ata ung kapaaz ni tuang, taan si zéi'kan nimimek kaapa zéi'kan nimangun ung kapaaz ni tuang, un ukuman wia si ata itii ém wutez.

⁴⁸Taan si ata zéi'kan mata'u ung kapaaz ni tuangna, a sia sumala'la, ni sia én ukumen, taan un ukuman wia ni sia é rorak uman. Wia si tou lakezo a méiwéhé, lakez kangkasii am penutu'en wia ni sia. Wia si tou winéhan paayangen lakez, am penutu'en wia ni sia é lumakezpé'mé am paayangen méiwéhé wia ni sia.”

⁴⁹Ang kuan ni Yesus, “Ni Aku niméyé é mangun sé tou ma'éman wia ni Aku wo sé tou zéi'kan ma'éman é makahkoro', niitu é masuat wo ni Aku merita un api wia ung kaayahan wo ung kapaaz-Ku un api itii é mahlayaso.

⁵⁰ Wéwéhampé' an zézéha totoz wutez a mapengaling-Ku. Un até-Ku én totoz zézéha sa niitu zéi'kampé' nimamualima.

⁵¹Apa pahgenangen niou ni Aku i niméyé é mahalimé u mahlé'o-lé'osan wia sé tou wia ung kaayahan kenu? Zéi'kan! Ikua-Kuma wia ni kamu, zéi'kan u mahlé'o-lé'osan um pinahali-Kumé, taan ni Aku é nimahalimé am pahkoro'an.

⁵²Pahpaan rengan in tarékan, sé tou lima witu um walé esa éng kumoro'. Sé telu sé ma'éman wia ni Aku é mahsaru sé zua zéi'kan ma'éman wia ni Aku, kaapa sé zua sé ma'éman wia ni Aku é mahsaru sé telu zéi'kan ma'éman wia ni Aku.

⁵³ Ni séra é makahkoro', si ama' mahsaru si tuama oki'na, si tuama oki'na mahsaru si ama'na. Si ina' mahsaru si wéwéné oki'na, si wéwéné oki'na mahsaru si ina'na. Si mahnuang wéwéné mahsaru si oki' wéwéné, si oki' wéwéné mahsaru si mahnuangna wéwéné.”

⁵⁴Ang kuan ni Yesus wia sé tou lakez, “Sa kamu mileka u ninahak witi talikuzan, kuan niouo: Ang kenu é muzan, ulit nimuzané.

⁵⁵Sa rumegesé timuh, kuan niouo: In tarékan é rumaaz repet. Ulit rimaazé repet.

⁵⁶É kamu in tou mahgau-gau lé'os! A mahmuali wia ung kaayahan wo witi langit én toro kata'uan niou ung kalakoana. Kaa zéi'kan kata'uan niou ung kalakoan a mahmuali in tarékan am pahpaayangen ni Opo Empung?”

⁵⁷Ang kuan ni Yesus, “Kaa kamu zéi'kan makatotoz wisa un ulit?

⁵⁸Pahpaan sa wéwéhan si nimasingkutan kariamu masimaru wia sé pemerénta, karegas ni ko mahlampang kariana, tawimo ko malé'osala kariana. Pahpaan sa zéi'kan, ni ko én iayona wia si menonotoz ulit kaapa zéi'kan am pahwangunen né tou, wo si menonotoz itii é mayo ni ko wia si mahsawa-sawangna,[25] wo si mahsawa-sawangna itii é mahwalima ni ko witi bui.

⁵⁹Ikua-Kuma wia ni ko: Ni ko én zéi'kan ipahondo-ondolé im witi bui, sa an utangmu zéi'kampé' pinakawaérla.”