Read Tombulu Lukas 15 Bible Online

Lukas 15 - Tombulu bible

Lukas 15

¹ Makasamé, sé menanagi am pajak wo sé tou memua-muali a singkéla', méyé in tumalinga si Yesus.

²Mileka ni séra, sé tou wia sé sana réwok tou Farisi wo sé tou tulap un Torat, menembu-nembut ang kuan néra, “Si tou kenu, mahsungkul wo mahkan karia né tou memua-muali a singkéla'.”

³A si Yesus sumirita un aandéan wia ni séra,

⁴“Sa im wia ni kamu ém wéwéhan si makaanu sé sana atus domba, ang kaliongana si esa, zéi'kankuaa itula'unamé witi kazukutan sé siouna pulu' wo siou a mamenéro si domba méikalulu makaz ing kailekannamé?

⁵Sa kinailekannamomé si domba méikalulu itii, pasaanennamé si domba itii karia i mahpaa-paaz.

⁶Ikaayola witi walé, sia tumawah sé kakariana wo sé karéténa ang kumua wia ni séra, ‘Mémo kita mahpaa-paaz. Pahpaan si dombaku méikalulu éng kinailekanomé.’

⁷Ni Aku éng kumuama wia ni kamu, ‘Téntu kangkasii u mahpaa-paaz mamuali witi kasendukan, pahpaan wéwéhan si tou tumula'ula a singkéla'na. U mahpaa-paaz itii é lumouspé'mé u mahpaa-paaz wia sé siouna pulu' wo siou tou ulit sé zéi'mo memandung in tumula'u a singkéla' néra.’ ”

⁸A si Yesus sumirita kasii karia un aandéan, “Wéwéhan si wéwéné makaanu u mapulu' zoit péra'.[30] Sa ikaliongla un zoit péra' esa, zéi'kankuaa tumutungla solo sia wo tumepi[31] um waléna i ngumerez menéro makaz ing kailekanna un zoit itii?

⁹Sa kinailekannamola, ni sia tumawah sé kakaria wo sé karéténa, ang kumua, ‘Méyémo kita mahpaa-paaz, pahpaan kinailekangkumola sumaup un zoit péra'ku u méikaliong.’

¹⁰Ni Aku kumuama wia ni kamu, téntu kangkasii sé malaekat ni Opo Empung sé witi kasendukan é mahpaa-paaz pahpaan wéwéhan si tou mahsingkéla' timula'u a singkéla'na.”

¹¹A si Yesus sumirita kasii karia un aandéan, “Wéwéhan si ama' makaoki' sé tuama zua.

¹²Si taweng kumuala wia si ama'na, ‘Ama', iwéhémomé wia ni aku um wéténgku wana a sangkumta.’ Am pahzuala ni ama' néra a sangkum itii an iwéhéla wia sé oki'na itii um wéténgna.

¹³Woo pirana endo tumondongé, ipakawangkérla ni taweng péléng am wéténgna a sia mangé witi wanua né tou walina totoz zou'ma. Im wana ni sia é nimapaapumé an zoitna, wayaan ung kaseroian.

¹⁴I nimaapumola péléng an zoitna, in toro niitu mawiamé ung kaahreman witi tana' itii. Ni sia é nimaéndomola tou susa.

¹⁵A sia mamaayang wia si tou witu un tana' itii. Ni sia é méiatuma ni tou itii witi uma i mahtéiz sé wawina.

¹⁶I ni sia totozo maharem, kapaaznamo ing kuman ang kakanen né wawi itii. Taan, zozo' ni sia én totozo maharem, zéi'kan siapa si paaz méhé tikohon wia ni sia.

¹⁷Ang kagenangala ni taweng itii ung katou-touanna, kuana, ‘Lakez sé tou mahpaayang wia si ama'ku wo am pahkanen néra én totoz lakez, taan im wia'i ni aku én tawimo maté i maharem.

¹⁸Itula'uku un tana' kenu wo mawuri wia si ama'ku. Ni aku makumua wia si ama'ku: Ama', ni aku é simingkéla'mola wia si Opo Empung si witi kasendukan wo wia si ama'.

¹⁹Ni aku én zéi'mo wangun im pahkuan oki' ni ama'. Niitumo éndonola ni aku maéndo esaané wia sé tou mahpaayang wia si ama'.’

²⁰An itula'unama un tana' itii a sia mangé wia si ama'na. Zou'pé'ma é si niilekoma ni ama'na, a mawiamé u raraatéanna wia si oki'na itii. Si ama'na kumara'ma i sumungkul ni sia. Masungkula séra, ingki'ennama a siomennama si oki'na itii.

²¹Ang kuan ni taweng itii wia si ama'na, ‘Ama', ni aku é simingkéla'mola wia si Opo Empung si witi kasendukan wo wia si ama'. Ni aku én zéi'mo wangun im pahkuan oki' ni ama'.’

²²Taan kuan ni ama'na wia sé atana, ‘Mahrewe-rewek pahaliné wia'i ung karai tonton totoz wangun, ikaraila wia ni sia wo sisimala un tutundu'na wo sapatuala un a'éna.

²³Éndoné si sapi peranggang rembuz wo kerizela. Sa nimakasiwomola, méyémo kita kuman mahwali-wali karia mahpaa-paaz.

²⁴Pahpaan si oki'ku kenu én tanu a nimatémo a matoumé sumaup, si méikalulu éng kinailekanola sumaup.’ A séra péléng rengan i mahpaa-paaz.

²⁵Taan si oki'na tu'a ém witipé' uma. Sia mesu'mé, i merétémoma um walé néra, talinganamé un zanina u musik wo ang kakantaren i mahmanari.

²⁶Tawahennamé si atana witi waléna a sia ligauanna, ‘Wéwéhan apa wé um witi walé?’

²⁷Si atana itii mingkotla, ‘Si tuarimu é nimawurimomé. Niitumo, si ama'mu éng kimerizla si sapi peranggang rembuz, pahpaan kinailekannamola sumaup si tuarimu wo ni sia é lé'o-lé'os uman.’

²⁸Kaitalingamé niitu, si koki' tu'a itii é maupi' wo soo muntep. A mondolé si ama'na i mémenou ni sia.

²⁹Taan si ama'na ém winingkotna umanla, ‘Pahta'unano ni aku mahpaayang wia si ama' wo zéi'kampé' kawisa ni aku soo mahtalinga am perénta ni ama', taan zéi'kampé' kawisa ni aku wéhanla ni ama' zozo' ing kambing uman im péstaangku karia né kakariaku.

³⁰Taan si oki' ni ama' itii si mapaapu umané an zoitna, a sangkumna karia né wéwéné sangaya, si taré mawiamé é mémoikerizla si sapi peranggang rembuz.’

³¹A sia wingkotela ni ama'na, ‘É oki'ku, ni ko sekezé é memali-mali kariaku wo péléng a sangkumku é sangkummu.

³²Niitumo ni kita ém wangun i mahpaa-paaz pahpaan si tuarimu én tanu nimatémo a matoumé sumaup, si méikalulu éng kinailekanola sumaup.’ ”