Read Tombulu Lukas 2 Bible Online

Lukas 2 - Tombulu bible

Lukas 2

¹Zéi'kan uré si Yohanes i nimatoumé, si Kaisar Agustus nimerénta im péléng sé tou witi kakolanoanna, a ngaran néra én ipantik wo toro kata'uan ung kalakez né tou.

²Um perénta i mantik a ngaran né tou kenu éng kataré-taré winangun, i si Kirenius nimaéndo gubernur witi Siria.

³Pahpaano um perénta itii péléng sé tou mangé wana am wanua tua'na né nimaopo néra i maipantik wana.

⁴Téntu kangkasii si Yusuf, ni sia timula'umé um wanua tua'na Nazaret witi Galilea a mangé witi Yudea witi wanua tua'na ni Daud, u makangaran Betlehem, pahpaan ni sia é suzu ni Daud.

⁵Niitumo si Yusuf wo si Maria si timantumo[3] wo mahawa-awako, nimangé witi Betlehem wo u ngaran néra zua toro ipantik wana.

⁶I ni séra witi Betlehem, orasnamo si Maria i makaoki',

⁷a sia makaileké si lowai, si oki'na tu'a. Ang kampilennala si lowai itii karia u roko' an ikolo'nala witu u lontang, pahpaan ni séra én zéi'kan méikailekla walé in tulian.

⁸Im wengi itii, witi ataran kazukutan ém wéwéhan sé woopira sé memimiara domba, sé mahtéiz sé domba néra.

⁹Kumompo'mé si malaekat ni Opo Empung mapaileka un touna witu u rété néra. Wo u sena' ni Opo Empung simena'ma wia ni séra, a séra totoz kinaindé'an.

¹⁰Ang kuan ni malaekat itii wia ni séra, “Tia'mo maindé'! Pahpaan ni aku i niméyé é nimahalimé u nuwu' lé'os wia ni kamu un totoz makapaazen wia péléng sé tou.

¹¹Téntii u Nuwu' Lé'os itii, ‘In endo kenu é nimatoumomé witi wanua tua'na ni Daud, si Milot ni kamu im witu un ukuman wana a singkéla'. Ni Siamo si Kristus, si Mahpiara.’

¹²Ung kenu u maileken niou: Ni kamu é mamilek si Lowai si kinampil u roko' wo méikolo' witu lontang.”

¹³Kumompo'mé si malaekat itii éng kinariamo né malaekat sé totoz lakez witi kasendukan sé mahlooz si Opo Empung, kuan néra,

¹⁴“U sigi' wo u looz én iwéhé uman wia si Opo Empung si witi kaséndukan! Wo ung kaluasan witu un até wia sé tou wia ung kaayahan, sé mahwangun si Opo Empung mahpaa-paaz.”

¹⁵Kumawusa niitu sé malaekat mawurima witi kasendukan. A sé memimiara domba mahkuaala, “Méyémo kita mangé witi Betlehem i mamilek u nimamuali wana, tanu u méikua ni Opo Empung wia ni kita.”

¹⁶A séra merewe-reweka mangé witi Betlehem. Maileken néra si Maria, si Yusuf wo si lowai si méikolo' witu lontang.

¹⁷I niilekla né memimiara domba si lowai itii, an ikua nérala a méikua ni malaekat tumoro si lowai itii.

¹⁸Péléng sé tou é mengusi-ngusingsing in timalingala a sirita né memimiara domba itii.

¹⁹Taan péléng a sirita itii ém pegena-genangen ni Maria wo pinahtata'una ung kalakoan niitu.

²⁰Tumondong niitu, sé memimiara domba mawurima sumaup witi ataran kazukutan. Karegas niitu, ni séra é mahlooz wo mahsigi' si Opo Empung pahpaan an tinalinga wo a niilek néra ém péléng masuat wo a méikua ni malaekat wia ni séra.

²¹ I si Lowai itii waluna endomo, a Sia sunaten. A Sia ngaranan nérala Yesus, u ngaran méikua ni malaekat wia si ina'-Na puunala i mahawa-awak ni Sia.

²² I méikaayomola un oras, si Maria wo si Yusuf mangé witi Yerusalem i mameresi un tou mengiit an tinotoz witu un ukum ni Musa. Ni séra kangkasii nimahwalima si Yesus i maiayo wia si Opo Empung.

²³ Pahpaan witu un ukum Torat é méipantik in téntii, “Péléng sé lowai kataré én iwéhé wia si Opo Empung i maéndo anu-Na uman.”

²⁴ Ni séra kasii é mahali u raragés sé wuku zua kaapa sé bombo zua sé peranggangpé' mengiit u méipantik witu un ukum Torat.

²⁵In toro niitu im witi Yerusalem ém wéwéhan si tou makangaran Simeon. Ni sia én tou ulit wo mahkiit uman am paaz ni Opo Empung wo mengento-ngento' un oras ni Opo Empung i milot sé tou Israel. Si Roh Lenas én totoz memali-mali kariana.

²⁶Mémoikua ni Roh Lenas wia ni sia i ni sia én zéi'kampé' maté sa zéi'kampé' nimilek si Mesias, si Kolano milot sé tou, si méitaaz ni Opo Empung.

²⁷Si Roh Lenas nimahkita si Simeon muntep witu um Walé ni Opo Empung. In toro niitu a muntepa si Yusuf wo si Maria i mangun wia si Yesus tanu an tinotoz witu un ukum Torat.

²⁸I si Simeon nimilekla si Koki' itii, maéndonamé a rawakennala si Koki' itii a mahlooz si Opo Empung. Kuana,

²⁹“O Opo Empung, in tarékan é linekep-Mumola u méitaaz-Mu im puuna. Niitumo in tarékan, si ata-Mu én toromo maté karia ung kaluasan witu un até.

³⁰Pahpaan niilekkumola, si méiatu-Mumé i milot sé tou-Mu.

³¹Ni Sia si méitégam-Mu wia péléng sé tahsasana wanua,

³² ni Sia én tanu u sena' i sumena'ma witu u lalan né tahsasana wanua walina, wo ni séra méyé wia ni Ko, u sena' itii é maéndo sisigi'an wo lolooz né tou-Mu, Israel.”

³³Kaitalingamé u méikuamé ni Simeon tumoro si Koki' néra itii, si Yusuf wo si Maria é mengusi-ngusingsing.

³⁴Si Simeon mengaléi wia si Opo Empung a méhéma ang kamang wia ni séra ang kuana wia si Maria, si ina' ni Koki' itii, “Si Koki' kenu ém pinéléng ni Opo Empung i mukum sé tou Israel, sé zéi'kan ma'éman wia ni Sia wo kasii i mangun ni séra maéndo ulit witu u sinaru-Na. Ni Sia ém pinéléng ni Opo Empung i mapagenang wia sé tou a siningkéla' néra, taan lakez sé tou mahsaru uman ni Sia.

³⁵Karia in téntu péléng am pegena-genangen né tou é makata'uan. Wo un atému é mamendan u rumara tanumokan im pahrukin karia um pahagi'.”

³⁶Wéwéhan si nabi wéwéné makangaran Hana. Ni sia én tu'amo. Si Hana kenu én oki' ni Fanuel si wia sé suzu ni Asyer. Pituna ta'uno ni sia ing kimawéng, a matéma si mahayona,

³⁷niitumo ni sia é mahesa-esamokan. Wo ung katou-touanna in tarékan ém waluna pulu' wo epatna ta'uno. Ni sia sekezé é mahragés wia si Opo Empung witi Walé ni Opo Empung. Endo wo wengi ni sia é mahpuasa wo sekezé é mengaléi.

³⁸Makanuwu'la si Simeon wia si Yusuf wo si Maria, a méyé witu si Hana. A sia mahkua u makasé wia si Opo Empung wo mahkua un tumoro si Koki' itii wia péléng sé tou sé mengento-ngento' si Opo Empung i milot sé tou Israel.[4]

³⁹ I si Yusuf wo si Maria nimangunomé péléng a léwo'zéi' im wangunen néra tanu u méipantik witu un ukum Torat, a séra mawuri witi walé néra witi wanua tua'na Nazaret, witi Galilea.

⁴⁰Si Koki' itii é makatua'namomé wo kaenté'namo. Ni Sia kasii én totoz tulap wo si Opo Empung én totoz rumaraaté ni Sia.

⁴¹ Sekez in ta'un, sé tu'a ni Yesus é mengangangé witi Yerusalem ing gumenang un endo Paskah né tou Yahudi.[5]

⁴²I si Yesus mapulu' wo zuana ta'uno ung katou-touan-Na, ni Sia wo sé tu'a-Na simosoza mangé witi Yerusalem i lumé'os un endo Paskah né tou Yahudi tanu ung kinanaram néra.

⁴³Ing kimawusola an endo i lumé'os um Paskah itii, ni séra é mawurimo. Taan si Yesus nimento' witi Yerusalem zéi'kan kata'uan né tu'a-Na.

⁴⁴Pahgenangen néra umanla sa si Yesus éng kimaria sé tou mahlampang karia néra. Ni séra i limampangomé sana endo, a Sia penéron néra. Peligauen néra Sia wia sé katuari wo sé tou kata'uan néra.

⁴⁵Pahpaan ni Sia én zéi'kan kinailekan nérala, a séra mawuri sumaup witi wanua tua'na Yerusalem i mamenéro ni Sia.

⁴⁶In teluna endomo, ang kailekan nérala Sia witi Walé ni Opo Empung. Ni Sia é rimumez witu un unez né méster um pa'émanen né Yahudi, ni Sia é mahtalinga wo mahligau wia ni séra.

⁴⁷Wo péléng sé timalinga an ipahkua ni Yesus é mengusi-ngusingsing, pahpaan ni Sia én totoz tulap wo an ipahwingkotna én totoz timoro.

⁴⁸Kaiileka ni Sia, si ama' wo si ina'-Na é mengompo'. Ang kuan ni ina'-Na wia ni Sia, “Tolé, kaa téntu um pahwangunen-Nu wia ni kai? Si ama'-Mu wo si ina'-Mu én totozo paharétan i menéro ni Ko.”

⁴⁹Taan si Yesus é nimingkot umanla, “Kaa si ama' wo si ina' é menéro-néro ni Aku? Zéi'kan kata'uan niou wé i ni Aku én totoz uman memia-mia um walé ni Ama'-Ku?”

⁵⁰Taan zéi'kan katulapan néra un ipahkua-Na.

⁵¹A Sia mawuri witi Nazaret mahwali karia ni ama' wo ni ina'-Na. Ni Sia én totoz mahtali-talinga uman wia sé tu'a-Na. Péléng a nimamuali itii ém pegena-genangen uman ni ina'-Na.

⁵² Si Yesus é makatarétumoumomé wo katulapnamo, wo kalousna u raraatéan ni Opo Empung wo né tou.