Read Tombulu Lukas 21 Bible Online

Lukas 21 - Tombulu bible

Lukas 21

¹Im witi lésaz um Walé ni Opo Empung, si Yesus nimilek sé tou wa'ilan timahu'ma u raragés néra witu um penanahu'an a raragés.

²An ileken-Na kasiima si wéwéné mahesa-esamokan si zéi'kan siapa apa timahu'ma un zua zoit tambaga[40] witu um penanahu'an itii.

³Ang kuan ni Yesus, “Uli-ulit ikua-Kuma wia ni kamu, u méiwéhéma ni wéwéné mahesa-esamokan si zéi'kan siapa apa kenu é lumakezpé'mé u méiwéhéma péléng né tou itii.

⁴Ni séra é niméhéma an zoit raragés néra wana ang kalakez an anu néra, taan si wéwéné mahesa-esamokan kenu é niméhéma wana an anuna an toyo' uman, lumouspé'mé niitu péléng am pemandungenna i menou-nou é méiwéhénamoma.”

⁵Sé woopira tou é mahsirita wo mahlooz ung kawangunan um Walé ni Opo Empung un totoz wangun pahpaan pinerong karia am watu totoz wangun wo am peperong mémoiragés né tou wia si Opo Empung. Ang kuan ni Yesus wia ni séra,

⁶“A niilek niou witu ém wéwéhan un orasna in zéi'kan siapa zozo' in esa im wana am watu itii un iwaya i nimausunampé', péléng niitu é makemun.”

⁷A séra meligau wia si Yesus, “Méster, sawisa niitu mamuali? Apa un tumuzu'mé sa niitu mamuali?”

⁸Am wingkotela ni Yesus, “Tuméga-tégam én taa kamu ilulu. Pahpaan lakez sé tou é méyé wo maké u ngaran-Ku wo kumua in téntii, ‘Ni akumo si Mesias’ wo ‘Un orasna é lelezo’. Ni kamu én tia' mahkii-kiit ni séra.

⁹Sa kamu tumalingamé sé mahkoro' wo sé mahsaru sé tonaas, ni kamu én tia'mo maindé'. Pahpaan péléng niana é léwo'zéi' i mamuali puunala, taan zéi'kan niitu un tumuzu'mé i rétémo un orasna ung kaakazan ung kaayahan.”

¹⁰Ang kuan ni Yesus kasii, “Sé tahsasana wanua é makumoro' wo sé tahsasana wanua walina wo ung kakolanoan esa é makumoro' wo ung kakolanoan walina.

¹¹Un éhzo' totoz repet wo a saki melaput karia ang kaahreman é mamuali wana lakez tampa. Wo witi langit é mamuali a makaindé'en wo an zéi'kan kakuaan.

¹²Taan puunala niana péléng i mamuali, ni kamu én tionan wo pahzézéhan. Ni kamu én iayo wana am walé peraragésan né tou Yahudi, iuntep wana am bui wo maisaru wia sé kolano wo sé mahkawasa pahpaan mahkiit ni Aku.

¹³In toro niitumo un oras niou ing kumua an niilek niou tumoro ni Aku.

¹⁴ Niitumo, enté'enola un até niou wo tia'mo megena-genang un iwingkot niou ing kumua i ni kamu én ulit.

¹⁵Pahpaan ni Aku in esa si mapata'u wia ni kamu a nunuwu'en mawuta-wuta karia ang katulapan in iwingkot niou, wo sé kakoro' niou zéi'kan makawingkot um pahkua niou kaapa sumaru ni kamu.

¹⁶Ni kamu én iayo né tu'amu, né totoz tuarimu, né katuarimu, né kalomu wo sé woopira im wia ni kamu ém wunu'en

¹⁷wo maikazi'zis péléng né tou pahpaan mahkiit ni Aku.

¹⁸Taan ni kamu én tia'mo maindé' pahpaan zozo' in esa uman um wuukmu én zéi'kan siapa u magogo.

¹⁹Sa ni kamu ezen, ni kamu é makailek ung katou-touan makaz ing kauré-uré.”

²⁰“I ni kamu milek u Yerusalem ém pinakalikliko né suraro, kata'uan niouola in zéi'mo uré um wanua tua'na itii é mamomakemu.

²¹In toro niitu ni séra sé witi Yudea én totoz in tumingkas wana ang kentur. Sé witi wanua tua'na én tumingkasé im witu um wanua tua'na itii, wo sé tou wana am wanua én tia'mo mahuuntep witu um wanua tua'na itii.

²² Niitumo un orasna i si Opo Empung méhé un ukuman wo péléng a mémoipantik witu um Pinantik Lenas é malekep.

²³Ikaléwo'la sé wéwéné mahawa-awak kaapa sé pahsusuan né taré itoumé in toro niitu! Pahpaan un zézéha totoz repet un tumuli sé tahsasana wanua wo kangkasii un upi' repet wia sé tahsasana wanua kenu é méyé.

²⁴Wéwéhan sé wunu'en karia um pisou wo sé walina é mationan an itia' wana am péléng tahsasana wanua walina. Wo um wanua tua'na Yerusalem é makawasaan né tahsasana wanua sé zéi'kan mata'u si Opo Empung makaz witu un oras tinotozo ni Opo Empung tumoro ni séra.”

²⁵ “Im wia si endo, si loloho'en wo sé tototi'en ém wéwéhan a mamuali. Im wia ung kaayahan péléng sé tahsasana wanua é maindé' wo malinganga i mahsaru un ender wo u sempa'na un tasik.

²⁶Sé tou én totoz maindé' akaz mahgerger pahpaan a mamuali wia ang kaayahan kenu, pahpaan ang kawasa witi langit é makayo'.

²⁷ In toro niitumo péléng sé tou é mamilek si Oki' ni Tou si witu um wawo u ninahak méyé karia péléng ang kawasa wo ang kawangko'an-Na.

²⁸Sa niitu mahmualimo, rumendaiola wo tia'mo mahtuktuk pahpaan zéi'mo uré ni ko én ipiloto im wana an zézéha itii.”

²⁹A si Yesus kumua un aandéan wia ni séra, kuan-Na, “Ileken nioula lumé'o-lé'os ung kai ara kaapa ang kai walina.

³⁰Sa ileken nioula ang kai itii mahsuzumomé, kata'uan nioula in zéi'mo uré é maraazeno.

³¹Téntu kangkasii, sa péléng a méikua-Ku ém pahileken niouola, kata'uan nioula sa ung Kakolanoan ni Opo Empung é lelezo.

³²Uli-ulit ikua-Kuma wia ni kamu: Sé tou in tarékan ém wéwéhan sé zéi'kampé' nimaté puunala niana péléng i mamuali.

³³U langit wo ung kaayahan é mazéi', taan u Nuwu'-Ku én zéi'kan mahzéi-zéi'la.”

³⁴“Tuméga-tégam un toumu wo tia' megena-genang uman u mahpaa-paaz im wana am pésta, wo u mahelep makaz i matewelen karia in tahlous mahgenang am pemandungennu i mendo-endo, wo i si Oki' ni Tou méyé sumaup ni kamu én zéi'kan mengompo'.

³⁵Pahpaan un endo itii i méyé én tanu um wetes wia péléng sé tou wia ung kaayahan.

³⁶Niitumo ni kamu én tuméga-tégamla karia i mengaléi, wo kamu makailek ung kaenté'an wo makawawa i mahsaru a mamuali itii wo ezen i rimendai witu u sinaru ni Oki' ni Tou.”

³⁷ In endo, si Yesus é mahtuzu' witi lésaz um Walé ni Opo Empung wo im wengi ni Sia mondolé i matumekel witi kentur Zaitun.

³⁸Woondopé' é lakezo sé tou niméyé wia ni Sia witi lésaz um Walé ni Opo Empung in tumalinga an ipahtuzu'-Na.