Read Tombulu Lukas 24 Bible Online

Lukas 24 - Tombulu bible

Lukas 24

¹Woondopé' karengan witu un endo kataré in duminggu itii, séra mangé witi lelewengan nimahalima um pengingisu' wia sé nimatémo u niimek néramo.

²Maileken néra um watu méipalot u lelewengan é mémoikasoro'.

³Muntepa séra, maileken néra un awak ni Yesus si Mahpiara én zéi'mo witu.

⁴Karegas séra rimendai wo mengusi-ngusingsing pahpaan niitu, kumompo'mokané ém wéwéhano sé tou zua rimendai witu u rété néra kimarai ung karai meto-petot.

⁵Ni séra én totoz kinaindé'an ang kumuruzla wo ung gio néra é nimakaz witu un tana'. Taan sé tou zua itii éng kimua wia ni séra, “Kaa kamu menéro ni Sia si menou-nou im wia sé nimaté?

⁶Ni Sia én zéi'mo wia'i, ni Sia é nimatoumomé sumaup. Amoké genangen nioula u méikua-Namo wia ni kamu im witipé' Galilea,

⁷i si Oki' ni Tou é maiayo wia sé tou mahsingkéla' wo salipen, taan im witu un endo katelu én itou sumaup ni Opo Empung.”

⁸Ang kagenangala né wéwéné itii u méikua ni Yesus itii.

⁹A séra mawurimé im witi lelewengan a masumirita péléng a nimamuali itii wia sé mapulu' wo esa pahtuzu'en-Na wo wia sé mahkii-kiit walina.

¹⁰Sé wéwéné itii é si Maria tou Magdala, si Yohana wo si Maria ina' ni Yakobus karia né wéwéné walina. Ni séra é nimahwalima i makumua wia sé aatu ni Yesus.

¹¹Taan witu ung genang né pahtuzu'en-Na um pahkua né wéwéné itii én zéi'kan ulit wo zéi'kan pa'émanen néra.

¹²Taan si Petrus rimendaié a mereweka nimangé witi lelewengan. Sia mongkotla an tumémboma witu un untep u lelewengan, um witu én akazokan u roko' sasaput un awak ni Yesus. A sia mawuri wo zéi'kan mazéi' sia i megena-genang u nimamualimo itii.

¹³In endo itiikan, sé tou zua im wia sé mahkii-kiit si Yesus mahlampang mangé witi wanua Emaus, um woo mapulu' wo esa kilometer[45] im witi Yerusalem.

¹⁴Karegas i mahlampang, ni séra é mahsirita tumoro péléng a nimamualima.

¹⁵Karegas séra mahsirita wo mahliligauan, a rumétémé si Yesus wia ni séra a lumampang mahwali-wali karia néra.

¹⁶Niilek nérala si Yesus taan kana' im wéwéhan u nimapé' um weren néra an zéi'kan nimakana'ula ni Sia.

¹⁷Si Yesus kumua wia ni séra, “Apa um pahsiritan niou karegas i mahlampang?” A séra mento'la taan ung gio néra én tekur.

¹⁸Si esaané im wia ni séra si makangaran Kleopas, mingkotla ni Sia, “Woo ni Ko uman si tou limepuh umané im wia u Yerusalem kenu si zéi'kan mata'u a nimamualima wana an endo ing kamurian kenu?”

¹⁹Ang kuan-Na wia ni séra, “Apa itu wé?” Am wingkoten nérala, “U nimamuali wia si Yesus tou Nazaret. Ni Sia é nabi, si mawuta-wuta ung kawasa im wana am pahpaayangen wo am pahnuwu'en-Na witu u sinaru ni Opo Empung wo wia péléng sé tou.

²⁰Taan sé tonaas né walian wo sé tonaas nai é nimayo ni Sia in ukumen im wunu'en wo simalipla ni Sia.

²¹Taan im puuna ni kai é mahéré'la i ni Siamo si mamilot sé tou Israel. In tarékan teluna endomo rengan niitu i nimamualima.

²²Taan sé woopira wéwéné sé méikakaria ni kai éng kimompo'la ni kai. Im woondopé' karengan a séra mangémé witi lelewengan,

²³taan maileken néra un awak ni Yesus én zéi'mo witu. A séra makumua wia ni kai im wéwéhan sé malaekat nimapaileké ang kumuamé i ni Sia é menou-nou.

²⁴Timalingamé niitu, woopira im wia sé kakaria nai é nimangémomé witi lelewengan itii. Maileken néra é masuat wo u méikua né wéwéné itii taan si Yesus én zéi'mo niilek néramé.”

²⁵Ang kuan ni Yesus wia ni séra, “É ni kamu in tou lemou, tahlous ngerez un até niou i ma'éman péléng a mémoikuamé né nabi!

²⁶Totoz kata'uan nioula i si Mesias é léwo'zéi' mazézéhapé'la taré makailek u looz wo sigi'.”

²⁷A si Yesus mapata'uma wia ni séra a mémoipantik witu péléng um Pinantik Lenas tumoro ni Sia, rengané witu ung kitap pinantik ni Musa makaz wana ang kitap pinantik né nabi.

²⁸I merétémoma um wanua angéan néra, si Yesus én tanu mahteterus uman i lumampang.

²⁹Taan ni séra mengimbali wia ni Sia karia i mahkua, “Mento'moma karia nai pahpaan wengindomo wo lelezokan muntep si endo.” A Sia muntepla i mento' karia néra.

³⁰I si Yesus rimumezola ing kuman karia néra, Sia méndomé u roti, kumuama u makasé wia si Opo Empung, pemété-météngen-Nala an iwéhé-Nama wia ni séra.

³¹In toro niitukan a séra mata'umé tou a Sia na'u nérala, taan ni Sia rengan i nimazéi'ma im witu un unez néra.

³²A si esa wo si esa mahkua, “Niitumo ndéén ni kita i mahlampang, un atéta éng kawua-wuayana i ni Sia mahsirita kariata im witi lalan ing kataré, i ni Sia nimapata'u tumoro um Pinantik Lenas wia ni kita.”

³³Séra rumendaié a mawuri witi Yerusalem. Ileken néra, im witu é nimaréwok sé mapulu' wo esa pahtuzu'en ni Yesus wo sé tou walina sé mahkii-kiit si Yesus.

³⁴A séra kumua, “Totoz ulit si Yesus si Mahpiara nimatoumomé sumaup wo ni Sia é nimapaileko un tou-Na wia si Simon.”

³⁵A sé tou zua itii kasii sumirita u nimamuali wia ni séra karegas i mahlampang wo kura si Yesus si Mahpiara i nina'u néramokala i nimeni'a-ni'aula u roti.

³⁶Karegas séra i mahsirita tumoro niitu, kumompo'mé si Yesus é rimendaio witu un unez néra ang kumua wia ni séra, “Ung kaluasan witu un até é menaté-natér ni kamu!”

³⁷Ni séra é mengompo' wo maindé' pahpaan witu ung genang néra, ni séra nimilek si mengingindé'.

³⁸Taan ni Sia kimuala wia ni séra, “Kaa kamu mengompo' wo kaa un até niou é mahzua-zua genang?

³⁹Ilekené u lengen wo un a'é-Ku. Ni Aku in esa kenu! Tionané Aku wo ilekené pahpaan ni Aku ém wéwéhan lé'ona wo zuhi tanu um pahileken nioué wia ni Aku, taan si mengingindé' én zéi'kan siapa lé'ona wo zuhi.”

⁴⁰Karegas mahkua niitu, a Sia mapailek u lengen wo un a'é-Na wia ni séra.

⁴¹Taan ni séra én zéi'kampé' ma'éman pahpaan sé totoz mahpaa-paaz wo mengusi-ngusingsingpé'. Ang kuan ni Yesus wia ni séra, “Wéwéhan kakanen kamu im wia'i?”

⁴²A Sia wéhan nérala u sana ketor seza' tinunu.

⁴³An itu éndon-Namé ang kuman niitu witu u sinaru néra.

⁴⁴Kuan-Na wia ni séra, “Ung kenumo un ikua-Kuma wia ni kamu, a méikua-Kumo wia ni kamu i ni Aku memali-mali karia niou, im péléng a mémoipantik tumoro ni Aku witu ung kitap Torat, um Pinantik né nabi wo witu u Mazmur én totoz malekep.”

⁴⁵A séra sawangan-Nala i nimukama ung genang néra wo toro makatulap um Pinantik Lenas.

⁴⁶Kuan-Na wia ni séra, “Wéwéhan u méipantik téntii: Si Mesias én totoz mazézéha wo matou sumaup im wia sé nimaté witu un endo katelu.

⁴⁷Witu u ngaran-Na kangkasii um wowoka' tumoro un tumula'ula a singkéla' wo i si Opo Empung zuméi' a singkéla' én totoz maiwoka'la wia péléng sé tahsasana wanua, rengané witi Yerusalem.

⁴⁸Ni kamumo sé nimilek wo makumua péléng a nimamuali wia ni Aku.

⁴⁹ Ni Aku in esa si matu si Roh Lenas wia ni kamu, si mémoitaaz ni Ama'-Ku. Taan ni kamu é léwo'zéi' i mento'ma wia am wanua tua'na kenu akaz ung kawasa ni Opo Empung si witi kasendukan kailekan niou.”

⁵⁰A sé pahtuzu'en ni Yesus ipahwali-Nama witi ondol um wanua tua'na makaz witi rété um wanua Betania. Im witu ni Sia nimayata u lengen-Na i méhé kamang wia ni séra.

⁵¹Karegas Sia i mahwéhé ung kamang wia ni séra, Sia matampasana karia néra a mawénéta mangé witi kasendukan.

⁵²Séra kumuruzla ung gio makaz witu un tana' i mahsigi' ni Sia. A séra mawurima witi Yerusalem karia totoz i mahpaa-paaz.

⁵³Sekezé ni séra ém witi walé ni Opo Empung i lumooz wo sumigi' si Opo Empung.