Read Tombulu Lukas 6 Bible Online

Lukas 6 - Tombulu bible

Lukas 6

¹Witu un endo Sabat, i si Yesus wo sé pahtuzu'en-Na mahlampang witu un uma tinaneman ang gandum, sé pahtuzu'en-Na é mahupu'ma ang gandum am pahpurisi nérala karia a lengen néra ang kanen.

²Taan wéwéhan sé woopira im wia sé sana réwok tou Farisi é mahkua, “Kaa kamu mahwangun an zéi'kan toro pahwangunen witu un endo Sabat?”

³ A séra wingkotela ni Yesus, “Zéi'kampé' binaca nioula wé um winangun ni Daud, i ni sia wo sé mahkii-kiit ni sia maharemo?

⁴ Kura sia i nimuntepa witu un Ténda Lenas ni Opo Empung a méndomé u roti méiragés wia si Opo Empung [11] ang kanennala am wéhana kasiila sé mahkii-kiit ni sia. Taan un ulitna, sé toro kuman u roti méiragés én akaz uman sé walian.”

⁵Kuan ni Yesus kasii wia ni séra, “Si Oki' ni Tou ém wéwéhan ung kawasa in tumotoz un toro wangunen né tou witu un endo Sabat.”

⁶Witu un endo Sabat walina kangkasii, si Yesus muntepa witu um walé peraragésan né Yahudi a mahtuzu'. Im witu ém wéwéhan si tou u lengenna kakan é lailai.

⁷Sé tou tulap un Torat wo sé sana réwok tou Farisi é mena'u-na'u wia si Yesus sa sé tou wéwéhan saki é lé'osen-Na witu un endo Sabat, wo séra toro ikailekla ung kawalian i mapahsasala' ni Sia.

⁸Taan kata'uan-Na um pegena-genangen néra, ang kuan-Na wia si tou makalengen kakan lailai, “Tumoozé wo rumendaila witu un unez!” A si tou itii tumoozé a rumendaila witu un unez.

⁹Ang kuan ni Yesus wia ni séra, “Ni Aku lumigaua wia ni kamu. Wisa un toro wangunen witu un endo Sabat, mangun u lé'os kaapa u léwo', tumulung si tou wo menou-nou kaapa munu' si tou?”

¹⁰Tumondong niitu Sia mileka makaliklik wia ni séra péléng ang kumuama wia si tou lailai itii, “Iayaté u lengenmu!” Am wangunenala tanu u méikuama ni Yesus, in toro niitukan a malé'osa u lengenna.

¹¹Taan sé tou tulap un Torat wo sé sana réwok tou Farisi én totoz maupi', a séra mahkuaala um wangunen néra wia si Yesus.

¹²In toro niitu, si Yesus simosoza witu ung kimeleng i mamengaléi. Im witu ni Sia é simanawengi i mengaléi wia si Opo Empung.

¹³In endomo an tawahen-Namé sé mahkii-kiit ni Sia a méléng im wia ni séra sé mapulu' wo zua tou. Sé pinéléng-Na itii ém pahkuan-Na aatu-Na.

¹⁴Sé mapulu' wo zua tou itii é: si Simon si nginaranan-Na kangkasii Petrus, si Andreas tuarina, si Yakobus, si Yohanes, si Filipus, si Bartolomeus,

¹⁵si Matius, si Tomas, si Yakobus oki' ni Alfeus, si Simon si wia sé sana réwok tou Zelot sé mahsaru sé tou Roma,

¹⁶si Yudas oki' ni Yakobus wo si Yudas Iskariot si ing kamurian nimangkér si Yesus.

¹⁷Kumawusa niitu si Yesus wo sé aatu-Na merosé im witi kimeleng a séra mento'la witu um patar. Im witu é nimaréwoko sé mahkiit ni Sia wo lakez sé tou walina sé witi Yudea, sé witi Yerusalem wo kangkasii sé witi Tirus wo Sidon, am wanua tembir un tasik a méyé.

¹⁸Ni séra niméyé i métumalinga ni Sia wo wéwéhan sé mekilé'os im wana a saki néra wo sé tou mekiwoho sé sétang sé simelaz wia ni séra.

¹⁹Péléng sé tou lakez itii é mahtututu' in tumiona wia ni Sia, pahpaan wia ni Sia ém wéwéhan ung kawasa u mahondolé i lumé'os ni séra péléng.

²⁰A si Yesus mileka wia sé pahtuzu'en-Na ang kumua, “Mahpaa-paazola, é ni kamu sé tou zéi'kan siapa apa, pahpaan ni kamumo sé makaanu ung Kakolanoan ni Opo Empung.

²¹Mahpaa-paazola, é ni kamu sé in tarékan maharem, pahpaan ni kamu ém pakawesun. Mahpaa-paazola, é ni kamu sé in tarékan mahamé', pahpaan ni kamu éng kumé'ké'.

²² Mahpaa-paazola kamu sa pahpaan ma'éman si Oki' ni Tou ni kamu ikazi'zis né tou, kasoo né tou, pahséro'an né tou wo pahtawuruken né tou a léwo'an.

²³ Mahkonta-konta'la ni kamu i mahpaa-paaz, pahpaan um wawaér kailekan niou witi kasendukan én totoz wangko'; pahpaan téntu kangkasii am pinahwanguné né nimaopo néra im puuna wia sé nabi.

²⁴Taan ikaléwo'la ni kamu sé in tarékan tou wa'ilan, pahpaan ni kamu é nimahpaa-paazola witu ung kawa'ilanan niou.

²⁵Ikaléwo'la ni kamu sé in tarékan ém wesuh, pahpaan ni kamu é mamaharem. Ikaléwo'la ni kamu sé in tarékan mahké'ké' pahpaan un até niou é masusa wo mamamé'.

²⁶Ikaléwo'la ni kamu sa péléng sé tou é mahlooz ni kamu, pahpaan téntu kangkasii am pinahwanguné né nimaopo néra wia sé nabi towo im puuna.”

²⁷Ang kuan kasii ni Yesus, “Taan ikua-Kuma wia ni kamu sé mahtalinga ni Aku: Iraraatéla sé kakoro' niou. Mahtututu'la i mahwangun a lé'os wia sé tou mazi'zis ni kamu.

²⁸Ipengaléila wia si Opo Empung ing kamangené sé tou mahtiwa' ni kamu wo ipengaléila sé tou mahmuali a léwo' wia ni kamu.

²⁹Séi uman si sumepala um palingmu, iwéhé kasiila um palingmu kasaru i sepalenna. Wia si tou kumahata ung karai tontonmu, wéhan kasiila sia ung karaimu.

³⁰Wéhanla péléng sé tou mahaléi wia ni kamu wo tia'mo pahaaléiennu sumaup ung kinahata ni tou wia ni kamu.

³¹ Wisa ung kapaaz niou im wangunené né tou wia ni kamu, téntu kangkasii um wangunen nioula wia ni séra.

³²Sa kamu rumaraaté uman sé tou rumaraaté ni kamu, apa u méikaawesé wia ni kamu? Pahpaan sé tou mahsingkéla' kangkasii é rumaraaté sé tou rumaraaté ni séra.

³³Pahpaan sa kamu mangunla um wangun wia sé tou mahwangun um wangun wia ni kamu, apa un ikaawesé wia ni kamu? Sé tou mahsingkéla' kangkasii é mahwangun an téntu.

³⁴Sa ni kamu méhéla zoit im pinjangen, pahpaan ni kamu mahéré'la im wéwéhan ung kailekan nioué im wia ni sia, apa un ikaawesé wia ni kamu? Sé tou mahsingkéla' kangkasii é mahwéhé zoit im pinjangen né tou mahsingkéla', wo mahéré'la im wuriané masuat ung kalakez wo um pininjang.

³⁵Taan ni kamu, iraraatéla sé kakoro' niou wo mahwangunla a lé'os wia ni séra. Ipinjangla an anu niou wia ni séra wo tia' mahgenangla in iwuri néramé sumaup. Sa téntu am pahwangunen niou, ni kamu é makailek um wawaér wangko' wo ni kamu é maéndo oki' ni Opo Empung si Totoz Rakék. Pahpaan ni Sia é lé'os im wia sé tou soo mahkua u makasé wo wia sé tou léwo'.

³⁶Ni kamu é léwo'zéi' rumaraatéla sé kasuat tou, tanu si Ama' niou i rumaraaté péléng sé tou.”

³⁷Ang kuan kasii ni Yesus, “Ni kamu én tia' mahtotoz ulit kaapa zéi'kan am pahwangunen né tou walina, wo kamu zéi'kan totozen ni Opo Empung wana am pinahwangun nioué. Ni kamu én tia' mapahsasala' sé tou wo ni kamu kangkasii én zéi'kan pahsasala'en ni Opo Empung. Ampungala ang kasumalaan né tou wia ni kamu, wo ang kasumalaan niou ampungan ni Opo Empung.

³⁸Mahwéhéla wia sé tou walina wo ni kamu pahwéhané ni Opo Empung an totoz lakez, lumakezpé'mé a méiwéhé niou wia sé tou walina. Niitu é masuat wo si tou mahtahu' un tewi' witu u lo'lo' wo ipahgo'go' makaz ing kimuwu takaz i mahtia'mokan. Pahpaan kuramo ni kamu i mahwéhé wia sé tou walina téntu kangkasii si Opo Empung i mahwéhé wia ni kamu.”

³⁹ A si Yesus kumua kasii un aandéan walina wia ni séra, “Toro wé si tou letok mahkit kangkasii si letok? Zéi'kankuaa maikatahu' witu um woso séra zua?

⁴⁰ Si pahtuzu'en én zéi'kan lumousé si mésterna. Taan i si pahtuzu'en nimalekepomé am pinahtata'una, ni sia é masuato karia ni mésterna.

⁴¹Kaa un emu' witu um weren ni katuarimu éng kaile-ilekannu, taan u salawako witu um werenmu in esa én zéi'kan kailekannu?

⁴²Kura ko toro kumua wia si katuarimu, ‘Wia'i, éndongkumokan un emu' witu um werenmu, taan u salawako witu um werenmu én zéi'kan kailekannu?’ É tou mahgau-gau lé'os, éndompé'la u salawako witu um werenmu, wo taré kaile-ilekannu un emu' witu um weren ni katuarimu wo niitu taré éndonnu.”

⁴³Kuan ni Yesus kasii, “Zéi'kan siapa kai wangun u mahwua' un zéi'kan wangun, wo kasii zéi'kan siapa kai zéi'kan wangun u mahwua' um wangun.

⁴⁴ Pahpaan péléng ang kai én toro kata'uan witu um wua'na. Pahpaan im witu un zukut menulah sé tou én zéi'kan mahupu'mé um wua'na un ara, wo wana an zukut menulah walina sé tou én zéi'kan mahupu'mé um wua'na un anggor.

⁴⁵ Si tou lé'os é mahnuwu'mé am wangun a mahondolé witu un aténa u mawuta-wuta am wangun. Wo si tou léwo' é mahnuwu'mé a léwo'an a mahondolé witu un aténa u mawuta-wuta a léwo'an. Pahpaan am pahnuwu'ennu é mahondolé witu un atému.”

⁴⁶Ang kuan kasii ni Yesus, “Kaa kamu mahtawah ni Aku, ‘Tuang, Tuang’, taan ni kamu én zéi'kan mahwangun an ipahkua-Ku?

⁴⁷Séi uman si méyé wia ni Aku, mahtalinga wo mahwangun an ipahkua-Ku, ni sia én toro pasuaten karia ni séi?

⁴⁸Ni sia é masuat wo si tou rimendai um walé. Ni sia éng kimiarla um woso rarem an izeta'nala witu am watu a mato'tolan i rumendai um walé. I lumewuhmé wo u séwélna un zano witi so'so'an tumoromé um walé itii, um walé itii én zéi'kan mogémé, pahpaan am watu to'tolan rinendaian um walé itii én enté'.

⁴⁹Taan séi uman si mahtalinga u nuwu'-Ku taan zéi'kan mahwangun niitu, ni sia é masuat uman wo si tou rimendai um walé witu um wawo un tana' zéi'kan siapa to'tolan. I méyé u lewuh tumoromé um walé itii, um walé itii é rengan i nimarewama wo totoz maléwo-léwo'ma.”