Read Tombulu Lukas 8 Bible Online

Lukas 8 - Tombulu bible

Lukas 8

¹Tumondongé niitu, si Yesus mangé wana am wanua tua'na wo wana am wanua. Im wana ni Sia mahwoka' u Nuwu' Lé'os tumoro ung Kakolanoan ni Opo Empung. Sé mapulu' wo zua pahtuzu'en-Na é mahwali-wali karia-Na,

²wo kasii sé wéwéné woopira. Sé wéwéné itii é sé winohoan ni Yesus sé sétang simelaz wia ni séra wo sé liné'os-Na im wana a saki néra. Si esa im wia sé wéwéné itii é si Maria tou Magdala, sé sétang méiwohomé im wia ni sia ém pitu.

³ Wo si Yohana si mahayo ni Khuza. Si Khuza kenu én tonaas né mahpaayang witi istana ni Herodes.[14] Wéwéhan kasii si makangaran Susana wo lakez sé wéwéné walina. Sé wéwéné itii é mahsawang si Yesus wo sé pahtuzu'en-Na karia an zoit néra.

⁴Makasamé lakez sé tou sé wana am wanua tua'na, mahtotondongané méyé wia si Yesus. Maréwokla sé tou itii, a si Yesus kumua un aandéan. Kuan-Na,

⁵“Wéwéhan si mengengeroz makimeroz am watuna tatanemen. Karegas sia i mahkeroz am watuna tatanemen, wéwéhan am watuna tatanemen méikagogoma witu un tembir u lalan, am watuna tatanemen itii ém pahkaléékana né tou wo sé tumétéwél mékimulat am watuna tatanemen itii makaz nimaapu.

⁶Am watuna tatanemen walina é méikagogoma witu un tana' watu-watun. Am watuna tatanemen itii én timoumé taan zéi'kan uré é nimaperamoma pahpaan zéi'kan siapa zano.

⁷Am watuna tatanemen walina é méikagogoma witu un tana' an tinouan an zukut menulah. Tumoumé am watuna tatanemen itii wo maan an zukut menulah kasii é mahtou. Kauréna am watuna tatanemen mahtou itii é méisé'sé'la an zukut menulah akaz an tinanem itii nimaté.

⁸Am watuna tatanemen walina é méikagogoma witu un tana' rembuz, am watuna tatanemen itii timoumé makaz i mahwua'. Am wua'na é makasana atusé.” Tumondong niitu, ang kuan ni Yesus, “Séi si wéwéhan lunteng i mahtalinga é mahtalingama lé'os!”

⁹Sé pahtuzu'en ni Yesus meligau wia ni Sia tumoro ung kalakoan un aandéan itii.

¹⁰ Ang kuan-Na, “Ni kamu én tinambéran ung kamang in toro makatulap u méikawunipé' tumoro ung Kakolanoan ni Opo Empung, taan im wia sé tou walina én ipahtuzu' karia an aandéan. Karia in téntu, ‘zozo' ni séra mahilek, taan zéi'kan makana'u wo zozo' ni séra mahtalinga taan zéi'kan makatulap.’

¹¹Téntii ung kalakoan un aandéan itii: Am watuna tatanemen itii é Nuwu' ni Opo Empung.

¹²Am watuna tatanemen méikagogo witu tembir u lalan, ung kalakoana é sé tou akazo in timalingama u Nuwu' ni Opo Empung, a méyé si tonaas né sétang an éndonama u Nuwu' ni Opo Empung im witu un até néra. Karia in téntu, ni séra én zéi'kan ma'éman makaz ni séra kangkasii én zéi'kan ipilot im witu un ukuman wana a singkéla'.

¹³A méikagogo wana an tana' watu-watun é sé tou timalingama u Nuwu' ni Opo Empung a sumungkul niitu karia mahpaa-paaz taan zéi'kan nimahmut witu un até néra. Ni séra nima'éman taan zéi'kan nimauréma, i méyé um pema'wa'en, ni séra soomo ma'éman.

¹⁴A méikagogo witu un tana' tinouan an zukut menulah, ung kalakoana é sé tou timalingama u Nuwu' ni Opo Empung, taan ni séra é maarét tumoro ung katou-touan néra, paaz mawa'ilan wo mahkiit uman a lelo wia ung kaayahan, taka-takazan zéi'kan nimaririhan.

¹⁵A méikagogoma witu un tana' rembuz, ung kalakoana é sé tou timalingama u Nuwu' ni Opo Empung, totoz winéhan néra genang akaz nimahmut witu un até lé'os néra wo ni séra zéi'kan mazéi' i memangu-mangun u Nuwu' ni Opo Empung itii.”

¹⁶ Ang kuan ni Yesus, “Zéi'kan siapa tou tumutungla u solo wo niitu keleuannala karia un tampayang kaapa iwéhéna witu lalem ung kokolo'an. Taan u solo itii én izeta'na witu um penono'tolan u solo wo péléng sé tou muntepa witu um walé itii én toro milek u sena'na.

¹⁷ Pahpaan zéi'kan siapa a méikawuni an zéi'kan maipapailek wo zéi'kan siapa a méiwuni an zéi'kan makata'uan wo maiwoka'.

¹⁸ Niitumo, totoz pahwéhanla genang an tinalinga niouo. Pahpaan séi si mahtata'u u Nuwu' ni Opo Empung, ni sia é mawangunen ni Opo Empung makatulap niitu. Taan séi si soo mahtata'u u Nuwu' ni Opo Empung, makaz am pahgenangennala ing kata'uannamo ém pakaéndon.”

¹⁹Si ina' wo sé katuari ni Yesus mémahilekan karia ni Yesus taan ni séra én zéi'kan mata'u rumété wia ni Sia pahpaan totoz lakez sé tou witu.

²⁰Wéwéhan si tou makimua wia si Yesus, kuana, “Si ina' wo sé katuari-Mu ém witi ondol, ni séra ém paaz mahilekan karia-Mu.”

²¹A si Yesus mingkotla, “Si ina'-Ku wo sé katuari-Ku é sé tou mahtalinga wo mahwangun u Nuwu' ni Opo Empung.”

²²Makasamé si Yesus wo sé pahtuzu'en-Na sumakéla witu u londéi. Ang kuan-Na, “Méyémo kita mangé witi leweta u louz.” A séra mangé.

²³Karegas séra i mahlewet u louz, si Yesus é nimatekel. Kumompo'mé a méyé u reges totoz repet witi louz, akaz un zano é mahuntepoma witu u londéi makaz ni séra én tawimo ikatenem.

²⁴A si Yesus mawongkéné né pahtuzu'en-Na, kuan néra, “Méster, Méster ikaléwo'mo kita!” Si Yesus rumendaié a rekaken-Nama u reges repet wo un zano mahsempa' itii. U reges repet wo un zano mahsempa' é rengan i nimento'la wo u louz é nimapenesa.

²⁵Ang kuan ni Yesus wia sé pahtuzu'en-Na, “Kaa kamu zéi'kan ma'éman wia ni Aku?” Ni séra é maindé' wo mengusi-ngusingsing, a si esa wo si esa im wia ni séra mahkua, “Séi Sia wé, taka-takazan u reges wo un zano mahsempa' itii é mahkiit um perénta-Na?”

²⁶Tumondongé niitu, a séra sumuwa'la witi lewet u louz Galilea, witi tana' né tou Gerasa.[15]

²⁷I si Yesus timumpamé witu u londéi, a méyé si tuama esa, ni sia é sinelazan né sétang, ni sia ém witi wanua tua'na itii a méyé. Si tuama itii én urémo in zéi'kan kimarai wo zéi'mo mahento' witi waléna, taan ni sia é mahento'mokan witi pahlewengan.

²⁸Kaiileknama si Yesus, a sia mahkérét ang kumuruzla ung gio makaz witu un tana' witu u sinaru ni Yesus, ang kuana karia i rimimeza, “É Yesus, Oki' ni Opo Empung si Totoz Rakék! Apa un éyé-Nu wia ni aku? Pahaléiengku wia ni Ko, tia'mo zumézéha ni aku.”

²⁹Si tou sinelazan né sétang itii é mahkua in téntu wia si Yesus, pahpaan sé sétang itii é méiwohoma ni Yesus im wia si tou itii. Pahpaan si tou itii sekezé éng kinawasa né sétang, niitumo u lengen wo un a'éna ém pahapusen né tou karia u ranté taan um pahrepesena umana. Si tou itii ém pemamalima né sétang wana an zéi'kan pahento'an né tou.

³⁰A si Yesus meligau wia si tou itii, “Apa u ngarannu?” A sia mingkoté, “U ngaranku é Legion”[16], pahpaan sé sétang simelaz wia ni sia é lakez.

³¹Sé sétang itii mahaléi wia si Yesus in tia' pahpeperénta-Na séra i muntep witu um woso um patéan, um pahukuman sé sétang.

³²Zéi'kan zou' im witu ém wéwéhan sé wawi totoz lakez, karegas i mengan witu u siri' ung kimeleng. A sé sétang itii mahaléi wia si Yesus wo séra toro muntep wia sé wawi itii. An énéala ni Yesus um pahaléien néra.

³³Mondolé sé sétang im wia si tou itii, a muntepa wia sé wawi itii, a sé wawi itii rengan ing kimara'ma witu u ri'ping a mapanawu'ma witi louz a matéla nimalemes.

³⁴I sé mahtéiz sé wawi nimilek u nimamuali itii, ni séra éng kimara'ma mangé witi wanua tua'na wo wana am wanua limiklik witu a sumirita u nimamuali itii.

³⁵A sé tou mondolé i mamilek u nimamuali itii. Ni séra méyé wia si Yesus an ileken nérala si tou sinelazan né sétang woan itii é rimumezo witu u rété un a'é ni Yesus, ni sia éng kimaraio wo lé'oso. I milekla niitu sé tou itii éng kinaindé'an.

³⁶Sé tou nimilek u nimamuali itii é mahsirita wia sé tou walina kura si tou sinelazan né sétang woan itii i nimalé'osa.

³⁷Am péléng sé tou witi tana' Gerasa mahaléi wia si Yesus in tumula'uma un tana' néra, pahpaan ni séra én totoz maindé'. A si Yesus sumakéla witu u londéi a suméngkot sumaup tumula'uma un tana' itii.

³⁸Si tou mémoipiloté im wia sé roh léwo' itii mahaléi wia si Yesus ing kumiit ni Sia. Taan si méipekiwuri umana ni Yesus, kuan-Na,

³⁹“Mawurimoma witi walému wo isiritala wia péléng sé tou um winanguna ni Opo Empung wia ni ko.” Si tou itii mangé a mahliklik um wanua tua'na i mahsirita péléng am winanguné ni Yesus wia ni sia.

⁴⁰I si Yesus mawurimé im witi lewet u louz, lakez sé tou simungkul ni Sia karia i mahpaa-paaz, pahpaan ni séra péléng é ma'ento' ni Sia.

⁴¹A méyé wia si Yesus si tonaas um walé peraragésan né tou Yahudi makangaran Yairus. Sia kumuruzla ung gio makaz witu un tana' witu u sinaru ni Yesus, a mahaléi wia si Yesus i mangé witi waléna,

⁴²pahpaan si kooki'na si esa uman é saki wo tawimo maté. Ung katou-touan ni kooki' itii ém woo mapulu' wo zuana ta'uno. A si Yesus mangé witi walé ni Yairus. Karegas Sia i mahlampang, sé tou lakez é mahsésé'sé'an witu u rété-Na.

⁴³Im wia sé tou lakez itii, wéwéhan si wéwéné mapulu' wo zuana ta'uno zézéha im pahondolan, [a sangkumna é nimaapumoma pahpaan pahwaér sé mahundam ni sia] wo zéi'kan siapa si makawawa i lumé'os ni sia.

⁴⁴Si wéwéné itii rumétéma witu u muri ni Yesus a sumahiza u rawisna ung karai tonton ni Yesus. In toro niitukan a mento'la un zaha' mahondol wia ni sia.

⁴⁵A si Yesus meligau, “Séi si simahizé wia ni Aku?” Taan zéi'kan siapa si makaulité, ang kuan ni Petrus, “Méster, téntu ung kalakez né tou nimaréwok wo mahsésé-sé'sé'an witu u rété-Mu.”

⁴⁶Taan kuan ni Yesus, “Wéwéhan si simahizé wia ni Aku, pahpaan pinendan-Kuma im wéwéhan ung kawasa nimondola im wia ni Aku.”

⁴⁷I si wéwéné itii mata'ula um winangunnama éng kata'uan ni Yesus, karia i mahgerger sia kumuruzla ung gio makaz witu un tana' witu u sinaru ni Yesus. A sia sumirita wia sé tou lakez, kaa sia simahiza u rawisna ung karai tonton ni Yesus. Wo méisiritana kasii sa in toro niitukan ni sia é nimalé'osoma.

⁴⁸Ang kuan ni Yesus wia si wéwéné itii, “É oki'-Ku, um pa'émanennu u limé'os ni ko, mangémo karia ung kaluasan witu un até.”

⁴⁹Karegas si Yesus i mahnuwu', méyé si tou si witi walé ni Yairus i mékumua wia si Yairus, “Si kooki'mu é nimatémo, niitumo ni ko én tia'mo mahraung si Méster!”

⁵⁰Taan kinatalingaana ni Yesus u méikuama ni tou itii, ang kuan-Na wia si Yairus, “Ni ko én tia'mo maindé', ma'émanola, si kooki'mu é malé'os.”

⁵¹Ikaayola witi walé ni Yairus, zéi'kan iwéhé ni Yesus sé tou i muntep karia-Na. Sé toro muntep karia-Na én akaz uman si Petrus, si Yohanes, si Yakobus wo sé tu'a ni kooki' itii.

⁵²Péléng sé tou é mahamé' karia i mahkérét pahpaan si kooki' nimatémo itii. Taan kuan ni Yesus, “Tia'mo mahamé'! Si kooki' itii én zéi'kan nimaté, ni sia én timekel uman.”

⁵³Taan si Yesus én ipahké'ké' néra uman, pahpaan kata'uan néra si kooki' itii é nimatémo.

⁵⁴An tionala ni Yesus u lengen ni kooki' itii, ang kuan-Na, “É kooki', tumoozomé!”

⁵⁵In toro niitukan, si roh ni kooki' itii nimawurimé wia ni sia a nimatoumé sumaup a rumendaila. Tumondongé niitu, an ikuala ni Yesus wia ni séra im wéhanla kakanen sia.

⁵⁶Sé tu'a ni kooki' itii én totoz mengusi-ngusingsing i nimilek u nimamuali. Taan ni séra é sinéro'la ni Yesus i sumirita a nimamuali itii wia sé tou.