Read Tombulu Yohanes 11 Bible Online

Yohanes 11 - Tombulu bible

Yohanes 11

¹ Wéwéhan si saki makangaran Lazarus mahento' witi Betania karia ni Maria wo ni Marta sé totoz katuarina.

² Si Maria é si wéwéné si nimuwu' u lana mahwou tariis witu un a'é ni Yesus wo nimisu' un a'é ni Yesus karia um wuukna. Lazarus si saki itii én totoz katuarina.

³Sé wéwéné zua itii é nimatuma tou i makimuamé wia si Yesus, “Tuang, si kakaria totoz ikararaaté-Mu é saki.”

⁴Taan in timalingama u méikuamé itii, Sia kimua, “U saki itii én zéi'kan mangun ni sia i maté. Niia nimamuali wo si Opo Empung loozen wo sigi'en wo pahpaan u saki itii si Oki' ni Opo Empung é loozen wo sigi'en.”

⁵Si Yesus é rumaraaté si Marta, si Maria wo si Lazarus.

⁶Taan in tinalinga-Nama si Lazarus i saki, ni Sia én zéi'kan rengan i mangé taan nimento'pé'la zuana endo im witu.

⁷Tumondong niitu Sia kimuala wia sé pahtuzu'en-Na, “Méyémo kita mawurimo sumaup witi Yudea.”

⁸Sé pahtuzu'en-Na kimuala wia ni Sia, “Méster, zéi'kampé' uré sé tou Yahudi mahwewerité ni Ko karia am watu wo in tarékan kaa ni Ko paazpé' i mawuri witu?”

⁹Kuan ni Yesus, “Zéi'kankuaa in endo é mapulu' wo zuana jam? Séi si mahlampang in endopé' un a'éna én zéi'kan kasundui pahpaan ni sia é mahilek witu un ayah ung kaayahan kenu.

¹⁰Taan sa si tou mahlampang im wengimo, un a'éna éng kasundui pahpaan zéi'kan siapa u mahwéhémé un ayah wia ni sia.”

¹¹Téntu u méikua-Na, wo kumawusa niitu Sia kimua wia ni séra, “Lazarus si kakariata é nimatekelo taan ni Aku é mangé witu i mamongké ni sia.”

¹²Ang kuan né pahtuzu'en-Na wia ni Sia, “Tuang, sa sia nimatekel, ni sia é malé'os uman.”

¹³Un ulitna si Yesus mahkua i si Lazarus é nimatémo. Taan ni séra é mahgenangla i si Lazarus én uli-ulit timekel uman.

¹⁴Pahpaano niitu si Yesus é nimakaulitla, “Si Lazarus é nimatémo,

¹⁵taan ni Aku é mahpaa-paaz pahpaan ni Aku én zéi'kan witu in toro niitu. Niitu ém wangun wia ni kamu, wo ni kamu toro ma'éman. Méyémo kita mangé wia ni sia in tarékan.”

¹⁶A si Tomas, si pahkuan Didimus[9], kumuama wia sé kakariana, sé pahtuzu'en walina, “Méyémo kita kasii mangé i maté karia-Na.”

¹⁷I si Yesus méikaayomola witi tampa itii, ang kata'uan-Nala si Lazarus én epatna endomo i méileweng.

¹⁸Um Betania ém witi rété u Yerusalem, woo teluna kilometer ung kazou'na.

¹⁹Im witu é lakezo sé tou Yahudi niméyé wia si Marta wo Maria i menté' un até néra pahpaan si totoz katuari néra én taré matéma.

²⁰In tinalingama ni Marta si Yesus i niméyé, a sia mangé i sumungkul si Yesus. Taan si Maria ém witi walé uman.

²¹Ang kuan ni Marta wia si Yesus, “Tuang, sa ni Ko wia'i in toro niitu, si totoz katuariku én zéi'kan nimaté.

²²Taan zozo' in téntu kata'uangku in oras kenukan péléng am pahaléien-Nu wia si Opo Empung én iwéhé-Na wia ni Ko.”

²³Ang kuan ni Yesus wia si Marta, “Si totoz katuarimu é matou sumaup.”

²⁴Kuan ni Marta wia ni Sia, “Kata'uangku ni sia én itou sumaup im wia sé nimaté im witu un endo kaakazan ung kaayahan i sé nimatémo itou sumaup.”

²⁵Ang kuan ni Yesus wia ni sia, “Ni Akumo si tumou sumaup sé nimatémo wo mahwéhé ung katou-touan. Séi uman si ma'éman wia ni Aku, ni sia é mamenou-nou zozo' ni sia nimatémo.

²⁶Wo péléng sé tou menou-nou wo ma'éman wia ni Aku, zéi'kan maté makaz ing kauré-uré. Apa pa'émanennu un taré ikua-Kuma itii?”

²⁷Am wingkotela ni Marta, “Éné, Tuang, ni aku ma'éman i ni Komo si Mesias, si Oki' ni Opo Empung, si méyé wia ung kaayahan.”

²⁸I si Marta makakuala un téntu, a sia matumawahmé si Maria totoz katuarina ang kumewitla wia ni sia, “Si Méster ém witi kenuma wo ni Sia é menawah ni ko.”

²⁹In timalingamé niitu, si Maria rengan i rimendaié a merorota i mamahilekan karia ni Yesus.

³⁰In toro niitu si Yesus én zéi'kampé' nimuntep witi wanua itii. Ni Sia ém witipé' tampa pinahilekan-Na karia ni Marta.

³¹I sé tou Yahudi sé mahenté' un até ni Maria nimileka si Maria i rimendaié a merorota i nimondola, ni séra éng kimiita ni sia pahpaan pahgenangen nérala ni sia é mangé witi lelewengan i mamamé' witu.

³²I si Maria méikaayomola witi tampa ni Yesus a mileka ni Sia, sia kumuruzla ung gio makaz witu un tana' witu u sinaru un a'é ni Yesus a mahkua wia ni Sia, “Tuang, sa ni Ko wia'i in toro niitu, si totoz katuariku én zéi'kan nimaté.”

³³I niilekla ni Yesus si Maria mahamé' wo kasii sé tou Yahudi sé kimiité ni sia é mahamé', un até ni Yesus én totoz rumara wo nimasusa a Sia kumua,

³⁴“Wisa u linewengan niou sia?” Ang kuan néra, “Tuang, méyémo wo méileken!”

³⁵A si Yesus mamé'.

³⁶Ang kuan né tou Yahudi, “Ilekena, ni Sia én totoz rumaraaté si Lazarus!”

³⁷Taan sé woopira im wia ni séra é mahkua, “Ni Sia nimangun si letok toromo mahilek, kaa Sia zéi'kan kimurala, wo si Lazarus zéi'kan nimaté?”

³⁸Makasapé' kasii un até ni Yesus rumara, a Sia mangé witi lelewengan itii. U lelewengan itii én tuleng pinalot karia um watu.

³⁹Kuan ni Yesus wia sé tou witu, “Isoro'ma um watu itii!” Si Marta totoz katuari ni Lazarus, kimuama wia ni Sia, “Tuang, ni sia é mahwoumo pahpaan epatna endomo i nimaté.”

⁴⁰Ang kuan ni Yesus, “Zéi'kankuaa mémoikua-Kula wia ni ko: sa ko ma'éman ni ko é milek ung kawangko'an ung kawasa ni Opo Empung?”

⁴¹An isoro' nérama um watu itii. A si Yesus lumoho'ma witi langit wo mahkua, “Ama', ni Aku mapaayoma u makasé wia ni Ko, pahpaan ni Ko én timalingamo ni Aku.

⁴²Kata'uang-Ku ni Ko sekezé é mahtalinga ni Aku, taan pahpaan sé tou lakez sé rimendai makaliklik kenu, ni Aku éng kimua niitu, wo séra ma'éman i ni Komo si nimatumé ni Aku.”

⁴³I nimakakuala un téntu, a Sia kuméréta, “Lazarus, mondolomé!”

⁴⁴A mondolé si tou nimatémo itii. Un a'é wo u lengenna é niapuspé' karia u roko'[10] sasaput sé tou nimatémo wo ung giona é niapé'ampé' u léso. Kuan ni Yesus wia ni séra, “Wukana a roko' itii wo iwayamola sia i mangé.”

⁴⁵Lakez im wia sé tou Yahudi sé niméyé i menté' un até ni Maria wo nimilek am winangun ni Yesus, nima'éman wia ni Sia.

⁴⁶Taan sé woopira im wia ni séra nimangé wia sé sana réwok tou Farisi a sumirita wia ni séra am winanguna ni Yesus itii.

⁴⁷A sé tonaas né walian wo sé sana réwok tou Farisi tumawahmé sé tou méikauntep witu u Mahkama Agama i maréwok wo ni séra é mahkua, “Si Tou itii é nimanguno lakez makakompo'en, niitumo apa u léwo'zéi' im wangunenta?

⁴⁸Sa Sia iwayata, péléng sé tou é ma'éman wia ni Sia wo sé tou Roma é méyé wo luméwo' um walé ni Opo Empung anuta wo kumawasa sé tahsasana wanuata.”

⁴⁹Taan si esaané im wia ni séra, si Kayafas, si Walian Wangko'[11] in ta'un itii, kimuama wia ni séra, “Ni kamu én zéi'kan siapa kata'uan

⁵⁰wo zéi'kan katulapan niou apa um wangun wia ni kamu. Tawimo si esa si maté wia péléng sé tahsasana wanua taan péléng sé tahsasana wanua sé maté.”

⁵¹Taan u méikuama ni Kayafas itii én zéi'kan mengiit ung genangna. Taan im Walian Wangko' witu un ta'un itii ni sia éng kimuama u méikuamé ni Opo Empung in esa i si Yesus é maté wia sé tahsasana wanua itii.

⁵²Wo zéi'kan uman wia sé tahsasana wanua itii taan kangkasii i ruméwok wo mapaheesa sé oki' ni Opo Empung sé méikasera.

⁵³Rengané in endo itii sé tonaas né tou Yahudi nimaesaan i munu' ni Sia.

⁵⁴Pahpaano niitu, si Yesus soomo mapailek wia sé tou Yahudi lakez. Ni Sia én timula'umé un tampa itii, a mangé witi Efraim rété ung kapelasan. Ni Sia karia né pahtuzu'en-Na nimento' witu.

⁵⁵In toro niitu un endo Paskah né tou Yahudi zéi'mo uré wo lakez sé tou sé wana am wanua mangé witi Yerusalem i meresi un tou[12] puunala un endo Paskah itii.

⁵⁶Ni séra é menéro-néro si Yesus wo karia merenda-rendai witi porés um Walé ni Opo Empung ni séra mahkua wia sé tou walina, “Sa kiit ko éng kura? Apa Sia méyé im witi pésta?”

⁵⁷Karegas niitu sé tonaas né walian wo sé sana réwok tou Farisi é nimeréntamoma sa wéwéhan si tou mata'u wisa Sia én ikuamé, wo Sia toro tionan néra.