Read Tombulu Yohanes 13 Bible Online

Yohanes 13 - Tombulu bible

Yohanes 13

¹In endo mahsiwo-siwo i lumé'os un endo Paskah né tou Yahudi, si Yesus é mata'umo in oras-Namo tumula'u ung kaayahan kenu wo mangé wia si Ama'-Na. Ni Sia é rumaraaté sé tou sé nimaéndo anu-Na sé wia ung kaayahan kenu wo ni Sia é rumaraaté ni séra makaz ni Sia ing kalekepan.

²I si Yesus wo sé pahtuzu'en-Na mahkan mahwali-wali, si tonaas né sétang éng kimewitoma ung genang léwo' witu un até ni Yudas Iskariot, si oki' ni Simon, i mangkér ni Sia wia sé kakoro'-Na.

³Si Yesus mata'u i si Ama' é niméhémo péléng am péléng wia ni Sia. Wo ni Sia ém wia si Opo Empung a méyé wo mawuri sumaup wia si Opo Empung.

⁴A si Yesus rumendaié, wuka-Nama ung karai tonton-Na, a Sia mendomé un anduk, an iapus-Nala witu un eembetan-Na.

⁵Tumondong niitu, Sia mérama un zano witu u loyang, a méhé i mo'as an a'é né pahtuzu'en-Na wo un a'é néra kumii-kiit im pahperan-Nama karia un anduk méiapus-Na witu un eembetan-Na.

⁶Ikaayola Sia wia si Simon Petrus, ang kuan ni Petrus wia ni Sia, “Tuang, kaa un a'éku pahwo'asan-Nu?”

⁷Kuan ni Yesus wia ni sia, “Apa um pahwanguneng-Ku in tarékan én zéi'kan katulapannu in tarékan, taan niitu éng katulapannumokan in tumondong.”

⁸Ang kuan ni Petrus wia ni Sia, “Tia' pahwowo'asan-Nu un a'éku.” Kuan ni Yesus wia ni sia, “Sa un a'ému zéi'kan wo'asang-Ku, ni ko é méikatampaso im wia ni Aku.”

⁹Kuan ni Simon Petrus wia ni Sia, “Tuang, sa téntu, tia' un a'éku uman, taan maan u lengen wo un uluku!”

¹⁰Kuan ni Yesus wia ni sia, “Séi uman si limelé'mo, ni sia én zéi'mo totoz im weresin, un a'éna uman um wo'asala pahpaan un touna ém weresimo. Ni kamu ém weresimo taan zéi'kan péléng ni kamu.”

¹¹Si Yesus kimua téntu pahpaan kata'uan-Namo séi si mamangkér ni Sia. Niitumo ni Sia kimua, “Ni kamu ém weresimo taan zéi'kan péléng ni kamu.”

¹² Makasampetla Sia i mahwo'as an a'é néra, ang karaien-Nala sumaup ung karai tonton-Na, a rumumez sumaup. A Sia kumua wia ni séra, “Apa katulapan niou un taré winangun-Kuma wia ni kamu?

¹³Ni kamu é mahkua ni Aku i Méster wo Tuang, um pahkuan niou itii én ulit, pahpaan ni Aku é Méster wo Tuang.

¹⁴Niitumo, sa ni Aku in Tuang wo Méster niou é mahwo'as an a'é niou, ni kamu é léwo'zéi' i mahwowo'asan un a'é niou.

¹⁵Ni Aku mahwéhéma wia ni kamu ung kékéréan, wo ni kamu kangkasii é mahwangunla am winangun-Kumoma wia ni kamu.

¹⁶ Uli-ulit ikua-Kuma wia ni kamu: si ata én zéi'kan lumousé si tuangna, wo si aatu én zéi'kan lumousé si nimatumé.

¹⁷Sa niia péléng kinata'uan niouola, ni kamu é mahpaa-paaz sa ni kamu mahwangun niana.

¹⁸ An ikua-Ku kenu én zéi'kan tumoro ni kamu péléng. Kata'uang-Ku séi sé pinéléng-Ku. Taan u méipantik witu um Pinantik Lenas é léwo'zéi' mamuali, ‘Si tou kiman u roti karia-Ku é maéndo kakoro'-Ku.’

¹⁹Niitu é méikua-Ku wia ni kamu in tarékan, puunala niitu i mamuali, wo sa niitu mamuali in tumondong, ni kamu é ma'éman i ni Akumo Sia si pengento-ngento'en niou.

²⁰ Uli-ulit ikua-Kuma wia ni kamu: Séi uman si simungkul si tou méiatu-Kumé, ni sia é simungkul ni Aku. Wo séi uman si simungkul ni Aku, ni sia kangkasii é simungkul ni Sia si nimatumé ni Aku.”

²¹I si Yesus nimakakuamola niitu un até-Na é rumara, ang kumua, “Uli-ulit ikua-Kuma wia ni kamu, si esaané im wia ni kamu é mayo ni Aku.”

²²A sé pahtuzu'en-Na mahwewerenala si esa wo si esa karia i melinga-linganga, pahpaan zéi'kan kata'uan néra séi si paza'i-Na.

²³Si esaané im wia sé pahtuzu'en ni Yesus, si ikararaaté-Na, rimumez totoz rété witu ung kakan-Na.

²⁴Wia si pahtuzu'en itii si Simon Petrus éng kimapéia wo kimua, “Ligauenna séi si paza'i-Na!”

²⁵A si pahtuzu'en si rimumez witu ung kasaru ni Yesus itii luméngéma wo meligau wia si Yesus, “Tuang, séi si tou itii?”

²⁶A si Yesus mingkotla, “Si tou itii é si tou wéhang-Ku u roti méisousou-Kumo.”[16] Makakuala niitu a Sia sumousoua u roti itii an iwéhé-Nama wia si Yudas, si oki' ni Simon Iskariot.

²⁷I si Yudas nimakailekola u roti itii a si tonaas né sétang sumelazla wia ni sia. A si Yesus kumuala wia ni sia, “Apa um paaz im wangunennu, rewekenola i mangun niitu.”

²⁸Taan zéi'kan siapa zozo' in esa im wia sé rimumez mahkan itii makatulap kaa si Yesus kimua niitu wia si Yudas.

²⁹Pahpaan si Yudas si mahlé'os an zoit, niitumo wéwéhan sé mahgenangla i ni sia é méiatu ni Yesus i matumeles am pemandungen witu um pésta itii kaapa i méhé zoit wia sé tou zéi'kan siapa apa.

³⁰I nimakailekomé u roti itii a si Yudas mangé. In toro niitu ém wengimo.

³¹I si Yudas nimangémo a si Yesus kumua, “In tarékan si Oki' ni Tou ém pahloozen wo pahsigi'en, wo si Opo Empung ém pahloozen wo pahsigi'en mengiité ni Sia.

³²Sa si Opo Empung pahloozen wo pahsigi'en mengiité ni Sia, si Opo Empung kangkasii é mangun si Oki' ni Tou pahloozen wo pahsigi'en né tou. Wo ni Sia é rengan i loozen wo sigi'en ni Opo Empung.

³³ É kamu sé oki'-Ku, zéi'mo mauréma ni Aku i mahwali-wali karia niou. Ni kamu é mamenéro ni Aku, wo tanu u mémoikua-Kula wia sé tonaas né tou Yahudi: ‘Ni kamu én zéi'kan mamuali i méyé witi tampa angéang-Ku’, téntu kangkasii un ikua-Ku wia ni kamu.

³⁴ Ni Aku é méhéma um perénta weru wia ni kamu: Mahraa-raatéanla si esa wo si esa, tanu ni Aku i rumaraaté ni kamu téntu kangkasii ni kamu é léwo'zéi' i mahraa-raatéan.

³⁵Sa ni kamu mahraa-raatéan, péléng sé tou é mata'u i ni kamu ém pahtuzu'eng-Ku.”

³⁶Si Simon Petrus kimuala wia si Yesus, “Tuang, wisa un angéan-Nu wé?” Kuan ni Yesus, “Ni ko én zéi'kan mata'u kumiit i mangé witi tampa angéang-Ku in tarékan. Taan in tumondong ni ko é makumiit ni Aku.”

³⁷Ang kuan ni Petrus wia ni Sia, “Tuang, kaa ni aku zéi'kan mata'u kumiit ni Ko in tarékan? Ung katou-touangku én iayoku pahpaan ni Ko!”

³⁸A si Yesus mingkotla, “Apa ulit ni ko é mayo ung katou-touannu pahpaan ni Aku? Uli-ulit ikua-Kuma wia ni ko, puunala si laka' ing kumukuké, ni ko é makatelumo ing kimélong ni Aku.”