Read Tombulu Yohanes 16 Bible Online

Yohanes 16 - Tombulu bible

Yohanes 16

¹Si Yesus mahkua, “Péléng niia én ikua-Kuma wia ni kamu, wo ni kamu zéi'kan mazéi' i ma'éman wia ni Aku.

²Ni kamu én iwoho né tonaas né tou Yahudi im wana am walé peraragésan néra. Wo un orasna é méyé i si tou mahwuwunu' ni kamu é mahgenangla ni sia é mahpaayang wia si Opo Empung.

³Ni séra mahwangun an téntu wia ni kamu pahpaan ni séra én zéi'kampé' mata'u si Ama' wo ni Aku.

⁴Taan péléng niitu én ikua-Kuma wia ni kamu, wo i méyé un oras méikua-Kuma itii, ni kamu é maikagenang i ni Aku éng kimuamola niitu wia ni kamu.” A si Yesus kumua, “Niia én zéi'kan méikua-Ku rengan ing kataré-taré, pahpaan ni Aku é mengari-ngariapé' ni kamu.

⁵Taan in tarékan ni Aku é mangémo wia ni Sia si nimatumé ni Aku. Wo zéi'kan siapa zozo' in esa im wia ni kamu si meligau, ‘Wisa un angéan-Nu?’

⁶Taan un até niou in tarékan é rumara pahpaan ni Aku kimuama niitu wia ni kamu.

⁷Taan ni Aku mahkuama an ulit wia ni kamu: Sa ni Aku mangé, niitupé' um wéwéhan torona im wia ni kamu. Pahpaan sa ni Aku zéi'kan mangé, si Menunulung itii én zéi'kan méyé wia ni kamu. Taan sa ni Aku mangé, ni Aku é matumé ni Sia wia ni kamu.

⁸Sa si Menunulung itii méyé, ni Sia é mémapata'u wia sé tou wia ung kaayahan kenu i ni séra én tou simingkéla'. Wo ni Sia kasii é mapata'u wia ni séra i ni Aku én ulit witu u sinaru ni Opo Empung wo kangkasii tumoro kura si Opo Empung in tumotoz ulit kaapa zéi'kan am pahwangunen né tou wia ung kaayahan kenu.

⁹Ni Sia si mapata'u i sé tou wia ung kaayahan kenu én tou simingkéla' pahpaan ni séra zéi'kan ma'éman wia ni Aku,

¹⁰i ni Aku én ulit witu u sinaru ni Opo Empung pahpaan ni Aku é mangé wia si Ama' wo ni kamu kangkasii én zéi'mo milek ni Aku.

¹¹Wo ni Sia kasii mapata'u i si Opo Empung én timotozo ulit kaapa zéi'kan am pahwangunen né tou, pahpaan si tonaas né sétang si mahkawasa wia ung kaayahan kenu é niukumo.

¹²Lakezpé' u léwo'zéi' ikua-Kuma wia ni kamu, taan in tarékan ni kamu én zéi'kampé' makawawa i makailek niitu.

¹³Taan sa si Roh Kaulitan itii méyé, ni Sia é mahkit ni kamu i mata'u péléng ang kaulitan. Pahpaan ni Sia zéi'kan mahkua mengiit ung ginenang-Na in esa taan ni Sia é mahkua péléng an tinalinga-Na wia si Opo Empung, wo ni Sia éng kumua wia ni kamu a mamuali witu un endo tumondong.

¹⁴Ni Sia é sumigi' wo lumooz ni Aku, pahpaan ni Sia éng kumua wia ni kamu ang kinailekan-Na im wia ni Aku.

¹⁵Péléng an anu ni Ama' én anu-Ku, niitumo ni Aku kumuama: ni Sia é makumua wia ni kamu ang kinailekan-Na im wia ni Aku.”

¹⁶A si Yesus kumua kasii wia sé pahtuzu'en-Na, “Zéi'mo mauréma ni kamu én zéi'mo milek ni Aku wo zéi'mo mauré kasiima ni kamu é mileko ni Aku sumaup.”

¹⁷In timalingamé niitu, sé woopira pahtuzu'en-Na mahliligauan, “Apa ung kalakoana ing kimuamé, ‘Zéi'mo mauréma ni kamu én zéi'mo milek ni Aku wo zéi'mo mauré kasiima ni kamu é mileko ni Aku sumaup?’ Wo apa kasii ung kalakoan, ‘Ni Aku é mangémo wia si Ama'?’ ”

¹⁸Ang kuan néra, “Apa ung kalakoana Sia ing kimua, zéi'mo mauréma? Zéi'kan kata'uanta apa ung kalakoan u méikua-Namé.”

¹⁹Kata'uan ni Yesus i ni séra ém wéwéhan um peligauen wia ni Sia, a Sia kumuama wia ni séra, “Apa um pahnuwu'en niou én tumoro un taré ikua-Kuma in, ‘Zéi'mo mauréma ni kamu én zéi'mo milek ni Aku wo zéi'mo mauré kasiima ni kamu é mileko ni Aku sumaup?’

²⁰Uli-ulit ikua-Kuma wia ni kamu: ni kamu é mamé' karia i mahkérét, taan sé tou wia ung kaayahan kenu é mahpaa-paaz. Un até niou é marumara taan u rumara un até niou é maéndo mahpaa-paaz.

²¹Si wéwéné é mahpendan u rumara karegas sia i mahtoumé si oki'na, taan i mémoitoumé si oki'na, ni sia én zéi'mo mahgenang u rumarana pahpaan u mahpaa-paaz in timoumomé si oki'na wia ung kaayahan kenu.

²²Téntu kangkasii ni kamu, in tarékan un até niou é rumara, taan ni Aku é mahilekan sumaup karia niou, niitumo un até niou é mahpaa-paaz, wo zéi'kan siapa si tou toro méndo u mahpaa-paaz itii im witu un até niou.

²³In endo itii zéi'kan siapa u ligauen niou wia ni Aku. Uli-ulit ikua-Kuma wia ni kamu, péléng am pahaléien niou wia si Ama' én iwéhé-Na wia ni kamu mengiité u ngaran-Ku.

²⁴Makazla in tarékan zéi'kampé' siapa um pinahaléi niou witu u ngaran-Ku. Mahaléiola ni kamu é makailek, wo ni kamu mawuta-wuta u mahpaa-paaz.

²⁵Niia péléng én ikua-Kuma wia ni kamu karia un aandéan. Un orasna é méyé, i ni Aku zéi'mo mahkuama wia ni kamu karia u aandéan, taan makaulit wia ni kamu i mahkua tumoro si Ama'.

²⁶In endo itii ni kamu é mengaléi wia si Ama' witu u ngaran-Ku. Wo ni Aku én zéi'kan kumuama i ni kamu én ipengaléi-Kupé' wia si Ama',

²⁷si Ama' in esa é rumaraaté ni kamu, pahpaan ni kamu é rimaraatémola ni Aku wo ma'éman i ni Aku ém wia si Opo Empung a méyé.

²⁸Ni Aku ém wia si Ama' a méyé wo ni Aku é niméyé wia ung kaayahan kenu. Ni Aku kangkasii én tumula'uma ung kaayahan kenu wo mangé wia si Ama'.”

²⁹Ang kuan né pahtuzu'en-Na wia ni Sia, “Méster, in tarékan si Méster é makaulit i mahnuwu' wia ni kai wo zéi'mo mahkua karia u aandéan.

³⁰In tarékan kata'uan naimo i si Méster é mata'umo péléng am péléng wo sé tou én zéi'mo totoz meligau wia si Méster. Niitumo ni kai é ma'éman i si Méster ém wia si Opo Empung a méyé.”

³¹Kuan ni Yesus wia ni séra, “Ma'émano kahuman kamu in tarékan?

³²Gena-genangen, un orasna é méyé, lumouspé'tarémé niitu ém wiamo i ni kamu si esa wo si esa isera i mawuri witi walé niou wo tumula'u ni Aku mengesa-ngesa. Taan ni Aku én zéi'kan mengesa-ngesa, pahpaan si Ama' é mengari-ngaria ni Aku.

³³Péléng niitu méikua-Kuma wia ni kamu, wo un até niou maluasa pahpaan nimaesa karia-Ku. Im wia ung kaayahan kenu ni kamu é mendan an zézéha, taan enté-enté'en un até niou, ni Aku éng kimalamoma ang kawasa wia ung kaayahan.”