Read Tombulu Yohanes 18 Bible Online

Yohanes 18 - Tombulu bible

Yohanes 18

¹Kumawusa si Yesus i mengaléi, ni Sia karia né pahtuzu'en-Na nimangé witi leweta u so'so'an Kidron. Im witu ém wéwéhan un uma, a si Yesus wo sé pahtuzu'en-Na muntepa witu un uma itii.

²Si Yudas si nimangkér si Yesus wia sé kakoro'-Na é mata'u kangkasii un tampa itii pahpaan sekezé si Yesus wo sé pahtuzu'en-Na é meréwo-réwok witu.

³A méyé si Yudas witi tampa itii, mahwalimé sé sana réwok suraro né Romawi wo sé woopira tou sé menénéiz um walé ni Opo Empung, sé méiatumé né tonaas né walian wo né sana réwok tou Farisi. Ni séra niméyé é nimahalimé solo, obor wo ang kokoro'.

⁴Si Yesus si mata'u péléng a mamuali witu un tou-Na, simungkula ang kumua wia ni séra, “Séi si penéron niou?”

⁵Kuan néra, “Si Yesus tou Nazaret.” Ang kuan-Na wia ni séra, “Ni Akumo Sia.” Si Yudas si nimangkér ni Sia wia sé kakoro'-Na é rimendai kangkasii witu karia néra.

⁶I si Yesus kimuama, “Ni Akumo Sia,” ni séra péléng nimunduré ang kazeta'la witu un tana'.

⁷A si Yesus lumigau kasiima wia ni séra, “Séi si pahpenéron niou?” Kuan néra, “Si Yesus tou Nazaret.”

⁸Am wingkotela ni Yesus, “Mémoikua-Kula wia ni kamu, ni Akumo Sia. Sa ni Aku si pahpenéron niou, iwayamoma sé tou kenu i mangé.”

⁹Karia ing kimuama téntu, nimawutulola u mémoinuwu'-Na, “Ama', im wia sé tou méiwéhémé ni Ama' wia ni Aku, zéi'kan siapa zozo' in esa si ikaléwo'.”

¹⁰A si Simon Petrus si nimahalimé um pisou, sumawuté um pisouna a mira'ma u lunteng kakan ni ata ni Walian Wangko' makaz nimatengkola. Ngaran ni ata itii é Malkhus.

¹¹ Kuan ni Yesus wia si Petrus, “Iuma'la um pisoumu itii, apa pahgenangenula ni Aku én tumingkas im wana an zézéha tinotozo ni Ama'-ku im pendaneng-Ku?”

¹²A sé suraro né Romawi karia ni tonaas néra wo sé menénéiz um walé ni Opo Empung sé méiatumé né tou Yahudi, tumiona wo mapusa si Yesus.

¹³Ing kataré-taré, ni Sia é méipahwali nérama wia si Hanas si Walian Wangko' im puuna. Si Hanas é mahnuang ni Kayafas. Si Kayafas ém Walian Wangko' in ta'un itii.

¹⁴ Wo si Kayafas é simésamola wia sé tonaas né tou Yahudi in téntii, “Tawimo si esa si maté taan péléng sé tahsasana wanua sé maté.”

¹⁵Si Simon Petrus wo si pahtuzu'en walina[17] éng kimiita si Yesus. Si pahtuzu'en itii é mata'u si Walian Wangko', niitumo ni sia é nimuntepa witi lésaz u istana karia ni Yesus,

¹⁶taan si Petrus é nimento' witi kauntepané rété um pepenet. Si pahtuzu'en ni Yesus walina si mata'u si Walian Wangko' é nimondolé, a sia numuwu'ma karia ni wéwéné timéiz um pepenet, a mahwalimé si Petrus i nimuntepé.

¹⁷Si ata wéwéné si timéiz um pepenet kumuama wia si Petrus, “Zéi'kankuaa ni ko kangkasii ém pahtuzu'en ni tou itii?” Wingkotela ni Petrus, “Zéi'kan!”

¹⁸Karegas niitu sé ata wo sé menénéiz um walé ni Opo Empung é zimiketola un api, pahpaan u reges in toro niitu én zaté wo ni séra rimendai witu i mahrarang. Si Petrus kangkasii é rimendai witu i mahrarang.

¹⁹Si Walian Wangko'[18] meligau wia si Yesus tumoro sé pahtuzu'en-Na wo an tutuzu'-Na.

²⁰A sia wingkotela ni Yesus, “Zéi'kan siapa an ipahwuni-wuni-Ku i mahnuwu'ma wia sé tou lakez. Sekezé ni Aku é mahtuzu' wana am walé peraragésan né tou Yahudi wo witi Walé ni Opo Empung, witi peréréwokan péléng né tou Yahudi. Ni Aku zéi'kan kawisa mahwuni-wuni i mahnuwu'ma.

²¹Kaa kahuman ni Aku pahligauannu? Lumigaula wia ni séra, sé timalingamo a méikua-Ku. Totoz kata'uan néra a mémoipahkua-Kula.”

²²I ni Sia kimuama niitu, si esaané im wia sé menénéiz um Walé ni Opo Empung si rimendai witu, simepala ni Sia karia i mahkua, “Téntu um pakahwingkot-Mu wia si Walian Wangko'?”

²³Kuan ni Yesus wia ni sia, “Sa u méikua-Kuma itii simala', ituzu'mé apa u sumala'na, taan sa u méikua-Kuma itii ulit, kaa ko simepalé ni Aku?”

²⁴An iatuma ni Hanas sé tou i mahwalima si Yesus si niapus, mangé wia si Kayafas si Walian Wangko' itii.

²⁵Si Simon Petrus é rimendaipé' witu i mahrarang. Ang kuan né tou witu wia ni sia, “Zéi'kankuaa ni ko kangkasii én esaané wia sé pahtuzu'en-Na?”

²⁶Ni sia éng kimélong umanla, kuana, “Zéi'kan.” Si esaané wia sé ata ni Walian Wangko', si katuari ni ata kinetorané ni Petrus u lunteng kumua, “Zéi'kankuaa ni ko kangkasii é niilekumé witi uma itii mahkari-karia ni Sia?”

²⁷Si Petrus kimélong uman kasiila. In toro niitukan ang kumukuké si laka'.

²⁸Tumondong niitu, ipahwali nérama si Yesus im witi walé ni Kayafas a mangé witi istana ni gubernur Romawi. In toro niitu ém woondopé' lé'os. Sé tou Yahudi én zéi'kan nimuntepa witi istana itii, pahpaan sa kiit ung kinanaram né tou Yahudi, un tou néra é makati'tiren sa mahkari-karia wo sé tou zéi'kan Yahudi wo zéi'mo mata'u kuman im Paskah. In toro niitu ni séra é mamokuman witu um pésta Paskah.

²⁹Pahpaano niitu si Pilatus nimondolé i mahilekan karia néra a mahkua, “Apa u méitoké niou wia si tou kenu?”

³⁰Kuan néra wia si Pilatus, “Sa Sia zéi'kan tou léwo', tantumo ni Sia én zéi'kan méipahwali naimé wia ni ko!”

³¹Kuan ni Pilatus wia ni séra, “Éndonoma Sia wo matotozela in ulit kaapa zéi'kan um winangun-Na karia un ukum niou in esa.” Ang kuan né tou Yahudi itii, “Ni kai én zéi'kan mata'u mukum si tou i maté.”

³² Téntu u nimamuali wo malekep u méinuwu' ni Yesus, i nimapata'u tumoro kura Sia i maté.

³³Si Pilatus nimuntepa sumaup witi istanana, tawahenamé si Yesus a meligau wia ni Sia, “Apa ni Komo si Kolano né tou Yahudi?”

³⁴Ang kuan ni Yesus, “Apa niitu um peligauennu mengiit ung genangmu, kaapa sé tou walina sé kimua tumoro ni Aku wia ni ko?”

³⁵Kuan ni Pilatus, “Tou Yahudi aku wé? Sé kawanua-Mu karia né tonaas né walian sé nimayo ni Ko wia ni aku. Apamo um winangun-Mula wé?”

³⁶Wingkotela ni Yesus, “Ung Kakolanoang-Ku én zéi'kan wia ung kaayahan kenu. Sa ung Kakolanoang-Ku ém wia ung kaayahan kenu, tantumo sé tou-Ku é sumaru, wo ni Aku zéi'kan iayo wia sé tou Yahudi, taan ung Kakolanoang-Ku én zéi'kan wia ung kaayahan kenu a méyé.”

³⁷Ang kuan ni Pilatus wia ni Sia, “Sa téntu, ni Ko ndéén éng Kolano?” A si Yesus mingkotla, “Ni ko si kimua i ni Aku éng Kolano. Pahpaano niitu a ni Aku itoumé wo niméyé wia ung kaayahan kenu, wo ni Aku toro kumua a niilek wo tinalinga-Ku tumoro ung kaulitan. Sé tou paaz ung kaulitan itii é mahtalinga ni Aku.”

³⁸Ang kuan ni Pilatus wia ni Sia, “Apa wé ung kaulitan itii?” I nimakakuamola niitu, si Pilatus nimondola i mahilekan karia né tou Yahudi a mahkua wia ni séra, “Zéi'kan siapa zozo' in esa ung kasumalaan kinailekangku wia ni Sia.

³⁹Taan im witu um pésta Paskah niou, wéwéhan ung kinanaramku i milot si esaané im wia sé binui. Paaz kamu in ipilotkuma si kolano né tou Yahudi kenu wia ni kamu?”

⁴⁰Ni séra mahkérété, “Tia' si tou kenu si ipiloté taan si Barabaso si ipiloté!” (Si Barabas é si tou mahsaru sé pemerénta né Romawi).