Read Tombulu Yohanes 19 Bible Online

Yohanes 19 - Tombulu bible

Yohanes 19

¹An iatuma ni Pilatus sé surarona i mahwalimé si Yesus wo sumambok ni Sia.

²Sé suraro mayamla um poporongen um panga rintek menulah am wangunen, an iporong nérala wia ni Sia. Ni Sia éng kinaraian nérala ung karai tonton monong.

³Tumondong niitu, ni séra mahsasawelana mahrétéma wia ni Sia a mahkua, “Sigi' wangko', é Kolano né tou Yahudi!” A Sia pahsepalen nérama.

⁴A mondol kasiima si Pilatus wo mahkua, “Ilekenola, ni Sia méiondolkumé wia ni kamu, wo toro kata'uan nioua i ni aku én zéi'kan nimilekla u sinala' zozo' in esa im wia ni Sia.”

⁵A mondolé si Yesus, nimaké poporongen ni kolano um panga rintek menulah am wangunen, wo ung karai tonton monong. A si Pilatus kumuama wia ni séra, “Ilekenoma si tou itii!”

⁶I si Yesus niilekla né tonaas né walian karia né menénéiz um Walé ni Opo Empung, ni séra é mahkérét, “Salipenola Sia, salipenola Sia!” Ang kuan ni Pilatus wia ni séra, “Éndonoma Sia wo kiitola um paaz niou i sumalip ni Sia, pahpaan zozo' in esa én zéi'kan siapa u sinala' kinailekangku im wia ni Sia.”

⁷Am wingkotela né tou Yahudi itii wia ni sia, “Ni kai ém wéwéhan un ukum Torat wo mengiit an ukum itii ni Sia é léwo'zéi' ukumen i maté. Pahpaan ni Sia éng kimuamola i ni Sia én Oki' ni Opo Empung.”

⁸In timalingamé u méikua néramé itii, si Pilatus éng kalousnamo i maindé'.

⁹A sia muntepa sumaup witi istanana. I si Yesus méipahwalimomé i nimuntepé, a si Pilatus kumuama wia ni Sia, “Wisa Ko a méyé wé?” Taan si Yesus zéi'kan nimingkotla.

¹⁰Pahpaano niitu si Pilatus kimuala wia ni Sia, “Kaa Ko soo numuwu' wia ni aku? Zéi'kan kata'uan-Nu wé i ni aku ém wéwéhan kawasa i milot ni Ko wo kangkasii wéwéhan kawasa i sumalip ni Ko?”

¹¹Si Yesus nimingkotla, “Ni ko én zéi'kan siapa kawasa zozo' in esa wia ni Aku, sa ung kawasa itii zéi'kan méiwéhémé ni Opo Empung. Pahpaano niitu, si tou nimayo ni Aku wia ni ko, u singkéla'na é lumouspé'mé u singkéla'mu.”

¹²Rengané in toro niitu, si Pilatus mahtututu' i milot ni Sia, taan sé tou Yahudi mahkérét, “Sa Sia ipilotmumé, ni ko én zéi'kan kakaria ni Kaisar. Séi uman si mapakua ing kolano é mahsaru si Kaisar.”

¹³I si Pilatus timalingamé an ipahkua néramé itii, ni sia nimatuma sé tou i mahwalimé si Yesus i mondolé, wo si Pilatus rimumezla witu u rurumezan i mahtotoz in ulit kaapa zéi'kan am pahwangunen né tou. Un tampa itii ém pahkuan Welah Watu.[19] Witu u nunuwu'en Ibrani ém pahkuan Gabata.

¹⁴Un endo itii én endo mahsiwo-siwo i lumé'os um Paskah né tou Yahudi. In toro niitu ém woo jam mapulu' wo zua i lolambot. A si Pilatus kumuama wia sé tou Yahudi itii, “Ileknola si Kolano niou!”

¹⁵A séra mahkérét, “Wunu'enola Sia! Wunu'enola Sia! Salipenola Sia!” Ang kuan ni Pilatus wia ni séra, “Paaz kamu wé sa si Kolano niou salipengku?” Ang kuan né tonaas né walian, “Si Kolano nai én esa uman, ni siamo si Kaisar!”

¹⁶Ing kamurian si Pilatus nimayola si Yesus wia ni séra i salipen. Angé néramé si Yesus an ipahwali nérama Sia i salipen.

¹⁷Si Yesus é nimasaan u salip-Na nimondolé im witi wanua tua'na a mangé witi tampa makangaran Tampa an Tengkora'. Witu u nunuwu'en Ibrani ém pahkuan Golgota.

¹⁸Si Yesus é méisalip néra witu. Witu ung kawihi wo kakan-Na é méisalip kasii sé zua tou walina wo si Yesus é méiunez.

¹⁹Si Pilatus nimatuma i méhéma witu un atas u salip ni Yesus um papang pinantikan: “Yesus tou Nazaret, Kolano né tou Yahudi”.

²⁰Lakez sé tou Yahudi nimaca u méipantik itii, pahpaan u sinalipan si Yesus é rété uman u Yerusalem. Wo u méipantik witu é nunuwu'en Ibrani, nunuwu'en Latin wo nunuwu'en Yunani.

²¹A sé tonaas né walian né Yahudi kumuama wia si Pilatus, “Tia' ipahpantikmu, ‘Kolano né tou Yahudi’, taan ipantikla ‘Si tou kenu é mahkua: ni Akumo si Kolano né tou Yahudi.’ ”

²²Am wingkotela ni Pilatus, “Apa u mémoipantikkula, téntumo u méikapantik.”

²³Kumawusa sé suraro itii i simalipa si Yesus, ni séra niméndomé ung karai-Na am pahepaten nérama, si esa wo si esa é makailek sana wéténg. Ni séra kasii niméndomé ung karai tonton ni Yesus. Ung karai tonton itii én zéi'kan siapa wiwilitan, nimasondol witu un atas makaz witu um wawa'.

²⁴ Pahpaano niitu ni séra mahkuaala, “Tia'mo wéténgenta ung karai tonton kenu, taan tawimo isawutla lot[20] wo toro makailek niitu.” Karia in téntu malekepa u méipantik witu um Pinantik Lenas in téntii, “Ung karai-Ku ém pinemété-météng néra wo ni séra é simawut lot i makailek ung karai tonton-Ku.” Niitumo um winangun né suraro itii.

²⁵Si ina' ni Yesus wo si wéwéné katuari ni ina' ni Yesus, si Maria mahayo ni Klopas wo si Maria tou Magdala é rimendai witu rété u salip ni Yesus.

²⁶I niilekla ni Yesus si Maria ina'-Na wo si pahtuzu'en si ikararaaté-Na witu ung kasaru ni Maria, a Sia kumuama wia si ina'-Na, “Ina', kenumo si oki'mu!”

²⁷Tumondong niitu Sia kumuama wia si pahtuzu'en-Na, “Kenumo si ina'mu!” Rengané in toro niitu si ina' ni Yesus é méipahwalima witi walé ni pahtuzu'en-Na itii.

²⁸ Tumondong niitu, pahpaan ing kata'uano ni Yesus im péléng am paayangen-Na é simampetola, wo u méipantik witu um Pinantik Lenas malekep, ni Sia kimua, “Ni Aku é maré'o!”

²⁹Im witu ém wéwéhan ung kuré' winuta un anggor esem. An éndo néramé um wunga karang pahkuan spons[21] an ito'to' nérama witu un anggor esem. Iruki nérama um wunga itii witu u rendaina ung kai pahkuan hisop[22], an ilaput nérama witu um wiwih ni Yesus.

³⁰Makapé'anla un anggor esem itii, a si Yesus kumuama, “Simampetola.” A Sia tumuktukla an iayo-Nala ung katou-touan-Na.

³¹Si Yesus i sinalip én endo mahsiwo-siwo i lumé'os un endo Sabat. Un endo Sabat in toro niitu én totoz wangko' pahpaan nimasepu'an karia un endo i lumé'os um Paskah né tou Yahudi. Sé tonaas né tou Yahudi é masimaru wia si Pilatus wo mahaléi wia ni sia i rumepu' an a'é né méisalip wo séra rewek i maté wo mekitumpa ni séra sé nimaté witu salip itii. Pahpaan sé tonaas né tou Yahudi é soo sa wéwéhan tou nimaté méisalip i ni séra lumé'os u Sabat.

³²A méyé sé suraro a rumepu'ma un a'é ni kataré wo ni kazua sé méisalip karia ni Yesus.

³³Taan i ni séra méikaayola wia si Yesus a milekla i ni Sia é nimatémo, ni séra én zéi'kan rimepu'ma un a'é-Na.

³⁴Taan si esaané im wia sé suraro itii nimetuma um wentuhan ni Yesus karia un wengkou a rengan sumaroié un zaha' wo un zano.

³⁵Si tou nimilek in esa u nimamuali itii, ni sia in esa si mahkua tumoro an niilekna itii wo un ipahkuana én ulit. Wo kata'uana un ipahkuana én ulit, wo ni kamu kangkasii é ma'éman.

³⁶ Niitu nimamuali wo malekep u méipantik witu um Pinantik Lenas in téntii, “Zéi'kan siapa zozo' in esa un zuhi-Na u rinepu'.”

³⁷Wéwéhan kasii u méipantik witu um Pinantik Lenas in téntii, “Ni séra é milek ni Sia si winetuan néramola.”

³⁸Tumondong niitu si Yusuf tou Arimatea mahaléi wia si Pilatus wo sia toro matumumpa un awak ni Yesus. (Si Yusuf é mahkii-kiit si Yesus, taan ni sia mahwuni-wuni uman pahpaan ni sia é maindé' wia sé tonaas né tou Yahudi). Um pahaléien ni Yusuf itii é niénéané ni Pilatus. A sia mangé in timumpamé un awak ni Yesus.

³⁹Si Nikodemus kangkasii é nimangé witu. Ni siamo si i makasa niméyé wia si Yesus im wengi. Ni sia nimahalima u lana mur wo ung gaharu um pinasemboro, ung kawutezna ém woo teluna pulu' kilo.

⁴⁰Ni séra nimangémé un awak ni Yesus, a saputen nérala karia u roko' lenan karia im pahisu'na u lana mahwou tariis un tou-Na mengiit ung kinanaram né tou Yahudi i lumeweng si tou.

⁴¹Im witu u rété un tampa ni Yesus sinalip ém wéwéhan un uma wo im witu un uma itii ém wéwéhan u lelewengan[23] weru un zéi'kampé' pinahlewe-lewengala.

⁴²Pahpaan in toro niitu én endo mahsiwo-siwo u Sabat wo u lelewengan é rété uman, niitumo un awak ni Yesus é méileweng néra witu.