Read Tombulu Yohanes 2 Bible Online

Yohanes 2 - Tombulu bible

Yohanes 2

¹Im witu un endo katelu, witi Kana um witi Galilea ém wéwéhan pésta kawéng wo si ina' ni Yesus ém witu.

²Si Yesus wo sé pahtuzu'en-Na kangkasii éng kinua i mangé witi pésta kawéng itii.

³I nimaapumoma un anggor, ang kumuala si ina' ni Yesus wia ni Sia, “Ni séra éng kinaapuanola anggor.”

⁴A si Yesus mingkotla, “Ma', kaa ko kimuamé téntu wia ni Aku? Zéi'kampé' orasna ni Aku mapata'u séi ni Aku.”

⁵Taan si ina' ni Yesus éng kimuama wia sé menenelewir, “Wangunela apa un ikua-Namé wia ni kamu.”

⁶Im witu ém wéwéhan enem tampayang u niimek im penanahu'an zano pememeresi[4] mengiit ung kinanaram né tou Yahudi. Witu u sana tampayang én toro tahu'an zano woo waluna pulu' kaapa sana atus wo zuana pulu' liter.

⁷Si Yesus kimuama wia sé menenelewir itii, “Tahu'ala zano makaz mawuta an tampayang itii.” An tahu'an nérala zano makaz mawuta an tampayang itii.

⁸Tumondong niitu, si Yesus kumuala wia ni séra, “Tarékan sahapané wo pahalina wia si mahime-imek um pésta.” Am pahali nérama un zano itii wia ni sia.

⁹Am pé'anala ni mahime-imek um pésta itii un zano nimaéndomo anggor itii, zéi'kan kata'uanna wisa a méyé un anggor itii, taan sé menenelewir, sé simahapé un zano itii é mata'u. An tawahennamé si brédégom,

¹⁰ang kumua wia ni sia, “Péléng sé tou é méhépé'mé un anggor wangun wo sa sé tou teweleno, taré iondolé un anggor zéi'kan tahlous wangun. Taan ni ko, limé'os un anggor totoz wangun makaz in tarékan.”

¹¹Niitumo u makakompo'en winangun ni Yesus kataré-taré witi Kana um witi Galilea, karia in téntu ni Sia nimapaileko ung kawangko'an-Na wo sé pahtuzu'en-Na ma'éman ni Sia.

¹² Kumawusa niitu si Yesus nimangé witi Kapernaum karia ni ina'-Na wo sé katuari-Na wo sé pahtuzu'en-Na. Ni séra é nimento' witu woopirana endo uman.

¹³ I melelezoma un endo mahpésta um pahkuan Paskah né tou Yahudi, si Yesus nimangé witi Yerusalem.

¹⁴Im witi lésaz um Walé ni Opo Empung, si Yesus nimilek im witu é lakez sé mahwangkér sapi, domba wo bombo, wo wéwéhan kasii sé menanawel an zoit rimumez witu.

¹⁵A Sia méndomé tali am wangunen-Nama sabok, an iwoho-Nama péléng sé tou witu karia péléng sé domba wo sé sapi, an zoit né menanawel zoit é méisera-Nama witu un tana' wo a méja néra é méitonga'-Nama.

¹⁶Im wia sé mahwangkér sé bombo ni Sia éng kimua, “Pakaéndona péléng ang kenu im wia'i, tia' kamu mangun um Walé ni Ama'-Ku maéndo pemamangkéran.”

¹⁷ Ang kagenangala né pahtuzu'en ni Yesus u méipantik witu um Pinantik Lenas, “U raraatéang-Ku witu um Walé-Mu, o Opo Empung, nimangun un até-Ku wuaya tanumokan un api i mahlayas.”

¹⁸Sé tonaas né tou Yahudi é mahsaru si Yesus, ni séra mahkua, “Apa u makakompo'en un toro ipapailek-Mumé wia ni kai i mapailek ni Ko ém wéwéhan kawasa i mangun péléng niia?”

¹⁹Kuan ni Yesus wia ni séra, “Kemuna um Walé ni Opo Empung kenu wo wanguneng-Ku mokan sumaup witu un teluna endo.”

²⁰Ang kuan né tonaas né tou Yahudi wia ni Sia, “Epatna pulu' wo enemna ta'un sé tou i nimangun um Walé ni Opo Empung kenu, wo ni Ko é mangun niitu teluna endo uman?”

²¹Taan um Walé ni Opo Empung um pahza'i-Nala én awak-Na in esa.

²²Niitumo, kumawusa si Yesus i méitoumé sumaup ni Opo Empung im wia sé nimaté, sé pahtuzu'en-Na é méikagenanga i niitu é méikua-Namola wo ni séra kangkasii é nima'éman um Pinantik Lenas wo wana a méikua ni Yesus.

²³I si Yesus witi Yerusalem i lumé'os un endo mahpésta né tou Yahudi um pahkuan Paskah, lakez sé tou ma'éman ni Sia pahpaan ni séra é nimileko a makakompo'en am winangun-Na.

²⁴Taan ni séra én zéi'kan pa'émanen ni Yesus, pahpaan péléng sé tou éng kata'uan-Na.

²⁵Niitumo, sé tou én zéi'kan totoz kumua wia ni Sia tumoro péléng sé tou, pahpaan kata'uan-Namo am witu un até né tou.