Read Tombulu Yohanes 20 Bible Online

Yohanes 20 - Tombulu bible

Yohanes 20

¹In endo kataré witu un duminggu itii, im woondopé' karengan, i rimbengbengpé', si Maria tou Magdala nimangé witi linewengan itii. Ni sia nimilek um watu méipalot u linewengan si Yesus itii é mémoikasoro'.

²A sia kumara'mé menéro si Simon Petrus wo si pahtuzu'en ni Yesus si ikararaaté-Na, a mahkua wia ni séra, “Si Tuang é niéndomoma né tou im witu u lelewengan-Na wo u zinetaan ni Sia én zéi'kan kata'uan nai.”

³A mangé si Petrus wo si pahtuzu'en ni Yesus walina itii witi lelewengan.

⁴Ni séra zua éng kimara'ma mahwali-wali, taan si pahtuzu'en walina itii éng kimara'ma rumorotpé'mé si Petrus, niitumo si pahtuzu'en walina itii si puuna méikaayoma witi lelewengan.

⁵Ni sia tumémboma witu un untep u lelewengan, an ilekenama u roko' méisaput un awak ni Yesus mezeta-zeta' witu un tana', taan ni sia én zéi'kan nimuntepa.

⁶A méyé si Simon Petrus menondongé ni sia a muntepa witi linewengan itii. Mailekena u roko' méisaput mezeta-zeta' witu un tana',

⁷taan u roko' méisaput witu ung gio karia un ulu ni Yesus zéi'kan méikazeta' witu rété u roko' pahkungkung itii taan malepet witu un tampa walina.

⁸Tumondong niitu, a muntepa si pahtuzu'en walina itii, si puuna méikaayoma witi linewengan. Ni sia nimuntepa a mamilek a ma'éman.

⁹Pahpaan makazla in toro niitu ni séra én zéi'kampé' makatulap u méipantik witu um Pinantik Lenas i ni Sia é léwo'zéi' in itou sumaup ni Opo Empung im wia sé nimaté.

¹⁰A mawurima sé pahtuzu'en itii witi walé néra.

¹¹Taan si Maria si tou Magdala é rimendai witi ondolé u linewengan itii karia i mahamé'. Karegas i mahamé'pé' sia nimatoma witi untep u linewengan itii,

¹²an ilekenama sé zua malaekat kimarai kulo', si esa é rimumez witu ung kasaru un ulu wo si esa witu ung kasaru un a'é un im puuna zinetaan un awak ni Yesus.

¹³Kuan né malaekat itii wia ni sia, “Ina', kaa ko mahamé'?” Ang kuan ni Maria wia ni séra, “Si Tuangku é niéndomoma né tou wo zéi'kan kata'uangku wisa u zinetaan ni Sia.”

¹⁴Makakuama niitu a sia luméngéhma witu u murina an ilekenama si Yesus makarendai witu, taan zéi'kan kata'uanna i ni Siamo si Yesus.

¹⁵Ang kuan ni Yesus wia ni sia, “Ina' kaa ko mahamé'? Séi wé si pahpenéronu?” Si Maria é mahgenangla i si tou itii é si tou mahwendu un uma, ang kuana wia si tou itii, “Ama', sa si Ama' si niméndoma ni Sia, ikuamé wia ni aku wisa u zinetaanu ni Sia, wo ni aku toro méndo ni Sia.”

¹⁶Kuan ni Yesus wia ni sia, “Maria!” A luméngéhma si Maria wia ni Sia karia i mahkua wia ni Sia witu ung kukuan Ibrani, “Rabuni!”, ung kalakoana é Méster.

¹⁷Ang kuan ni Yesus wia ni sia, “Tia' mahtion wia ni Aku, pahpaan ni Aku én zéi'kampé' nimenéka i mangé wia si Ama'. Taan mangémo wia sé katuari-Ku wo ikuala wia ni séra i ni Aku in tarékan é mangémo wia si Ama'-Ku wo Ama' niou, wia si Opo Empung-Ku wo Opo Empung niou.”

¹⁸A si Maria tou Magdala mangé wo mahkua wia sé pahtuzu'en-Na, “Ni aku é nimileko si Tuang!” wo ni sia kasii é mahkua péléng a méikuamé ni Tuang wia ni sia.

¹⁹In Duminggu wengi itii sé pahtuzu'en ni Yesus é nimaréwok witu um walé, am pepenet um walé itii éng kinusi' pahpaan ni séra é maindé' wia sé tonaas né tou Yahudi. In toro niitu a méyé si Yesus wo rimendai witu un unez néra ang kumua, “Ung kaluasan witu un até é menaté-natér ni kamu!”

²⁰Makakuama niitu, an ipapailek-Nama u lengen-Na wo um wentuhan-Na wia ni séra. Sé pahtuzu'en-Na itii é mahpaa-paaz i ni séra nimileka si Tuang.

²¹ A si Yesus makasapé' kasii ing kimuama, “Ung kaluasan witu un até é menaté-natér ni kamu! Tanu si Ama' nimatumé ni Aku, téntu kangkasii in tarékan ni Aku matuma ni kamu.”

²²Makakuama niitu a Sia sumengoma wia ni séra wo mahkua, “Sungkulenola si Roh Lenas.

²³ Sa ni kamu mahwéhé un ampungan wana a singkéla' ni tou, u siningkéla'na ém winéhan ampungan ni Opo Empung, wo sa ni kamu zéi'kan mahwéhé un ampungan wana a singkéla' ni tou, u singkéla'na kangkasii én zéi'kan ampungan ni Opo Empung.”

²⁴Taan si Tomas, si esaané im wia sé mapulu' wo zua pahtuzu'en ni Yesus, si pahkuan Didimus, zéi'kan mahwali-wali karia néra i si Yesus niméyé witu.

²⁵Niitumo, sé pahtuzu'en walina éng kimua wia ni sia, “Ni kai é nimileko si Tuang!” Taan si Tomas éng kimuala wia ni séra, “Sa zéi'kampé' niilekula um walulangna um pinakuan witu u lengen-Na wo timeptepa un tutundu'ku witu um walulang um pinakuan itii, wo sa zéi'kampé' timeptepla un tutundu'ku witu um wentuhan-Na, ni aku én zéi'kampé' ma'éman.”

²⁶Waluna endo in tumondongé sé pahtuzu'en ni Yesus é riméwok witi walé itii sumaup wo si Tomas éng kimaria ni séra. Im péléng am pepenet kinusi', kumompo'mé si Yesus niméyé wo rimendai witu un unez néra a mahkua, “Ung kaluasan witu un até é menaté-natér ni kamu!”

²⁷A Sia kumuala wia si Tomas, “Iteptepé un tutundu'mu wia'i wo ilekenola u lengen-Ku. Iayomé u lengenmu wo iteptepé un tutundu'mu witu u wentuhan-Ku wo tia'mo kasii ni ko zéi'kan ma'éman taan ma'émanola.”

²⁸A si Tomas mingkotla wia ni Sia, “O Tuang wo Opo Empungku!”

²⁹Kuan ni Yesus wia ni sia, “Pahpaan ni ko nimilekomé ni Aku, niitumo ni ko ma'éman. Mahpaa-paazla sé tou zéi'kan nimilek taan ma'éman.”

³⁰A makakompo'en walina am winangun ni Yesus an niilek né pahtuzu'en-Na é lakezpé', taan zéi'kan méipantik witu um pinantikan kenu.

³¹Taan péléng niia é méipantik wo kamu ma'éman i si Yesus é Mesias, Oki' ni Opo Empung. Wo pahpaan ma'éman wia ni Sia, ni kamu é makailek ung katou-touan makaz ing kauré-uré karia-Na.