Read Tombulu Yohanes 21 Bible Online

Yohanes 21 - Tombulu bible

Yohanes 21

¹Tumondong niitu a si Yesus mapailek kasii un tou-Na wia sé pahtuzu'en-Na witi tembir Louz Tiberias. Téntii u nimamuali:

²Im witi tembir u louz itii nimaréwok si Simon Petrus, Tomas si pahkuan Kambar, si Natanael tou Kana witi propinsi Galilea, sé zua oki' ni Zebedeus[24] wo sé zua pahtuzu'en-Na walina.

³ Kuan ni Simon Petrus wia ni séra, “Ni aku é mangé menéropé'mé seza'.” Ang kuan néra wia ni sia, “Ni kai kasii éng kumiit ni ko.” A séra mangé simakéma u londéi. Taan i sana wengi itii zéi'kan siapa seza' kinailekan nérala.

⁴I mahseritomé si endo, si Yesus rimendai witi tembir u louz, taan sé pahtuzu'en-Na én zéi'kan mata'u sa ni Sia é Yesus.

⁵Kuan ni Yesus wia ni séra, “É kamu oki'-Ku, wéwéhan seza' kamu?” Wingkoten nérala, “Zéi'kan siapa.”

⁶ Ang kuan ni Yesus wia ni séra, “Ilombo'ma u lolombo' niou witu ung kakan u londéi, ni kamu é makailek seza'.” An ilombo' nérama u lolombo' witu ung kakan, pahpaan sé seza' én totoz lakez niitumo ni séra én zéi'kan makawawa i mahkéhongé u lolombo' itii.

⁷A si pahtuzu'en si karaaté ni Yesus itii kumuama wia si Petrus, “Ni Sia én Tuang.” I si Petrus timalingama i ni Sia én Tuang, a sia kumaraila pahpaan ni sia é rimonai ang kumonta'ma witu un zano.

⁸A méyé sé pahtuzu'en walina simakémé witu u londéi pahpaan ni séra é rété uman un tembir louz, woo sana atus meter uman wo ni séra é mahkéhongé u lolombo' mawuta-wuta seza'.

⁹I ni séra méikaayomola witu un tembir u louz, ni séra nimilek um wahana un api wo um witu um wawona ém wéwéhan seza' wo roti.

¹⁰Kuan ni Yesus wia ni séra, “Aliané seza' woopira, sé taré kailekan nioué itii.”

¹¹Si Simon Petrus sumakéma witu u londéi ang kéhongenamé u lolombo' itii méitembiré. U lolombo' itii é mawuta-wuta sé seza' tua'na, sé sana atus limana pulu' wo telu ung kalakezna wo zozo' in téntu u lolombo' itii én zéi'kan nimarentas.

¹²Kuan ni Yesus wia ni séra, “Mémo kuman.” Im wia ni séra, zéi'kan siapa si wuaya i lumigau wia ni Sia, “Séi Ko wé?” Pahpaan kata'uan néramo i ni Sia é si Yesus Tuang néra.

¹³A si Yesus rumétéma wia ni séra, méndomé u roti an iwéhé-Nama u roti itii wia ni séra, téntu kasii um winangun-Na wia si seza'.

¹⁴Niitu péléng éng katelumo si Yesus nimapailek un tou-Na wia sé pahtuzu'en-Na kumawusa ni Sia i méitoumé sumaup ni Opo Empung im wia sé nimaté.

¹⁵Makasampetla séra ing kiman, a si Yesus kumuala wia si Simon Petrus, “Simon oki' ni Yohanes, apa u raraatéannu wia ni Aku é lumouspé'mé u raraatéan né tou kenu wia ni Aku?” Wingkotela ni Petrus wia ni Sia, “Ulit Tuang, Kata'uan-Numo i ni aku é rumaraaté ni Ko.” Kuan ni Yesus wia ni sia, “Piarala sé domba-Ku.”

¹⁶Ang kuan kasii ni Yesus wia ni sia ing kazua, “Simon oki' ni Yohanes, apa ni ko rumaraaté ni Aku?” Wingkotela ni Petrus wia ni Sia, “Ulit Tuang, Kata'uan-Numo i ni aku é rumaraaté ni Ko.” Kuan ni Yesus wia ni sia, “Piarala sé domba-Ku.”

¹⁷Kuan ni Yesus wia ni sia ing katelu, “Simon oki' ni Yohanes, apa ni ko rumaraaté ni Aku?” Pahpaan si Yesus kimua, “Apa ni ko rumaraaté ni Aku?” ing katelumo, niitumo un até ni Petrus é rumara. A sia kumuala wia si Yesus, “Tuang, ni Ko é mata'u péléng am péléng, kata'uan-Nu i ni aku é rumaraaté ni Ko.” A si Yesus kumuala wia ni sia, “Piarala sé domba-Ku.

¹⁸Uli-ulit ikua-Kuma wia ni ko: I ni ko tarétumoupé', zéi'kan siapa si mahsawang ni ko i maké ung karai wo ni ko mahlampang wisa uman um paaz angéannu, taan i ni ko tu'amo ni ko é mayo u lengenmu wo sé tou walina é mapus ni ko wo mahwali ni ko witi tampa kasoomu.”

¹⁹Niia é méikua-Na i mapata'u kura si Petrus i maté wo karia in téntu si Opo Empung pahloozen wo pahsigi'en. Makakuala niitu a Sia kumuala wia si Petrus, “Kumiitomé ni Aku.”

²⁰ I si Petrus liméngéhma, ni sia nimilek i si pahtuzu'en ikararaaté ni Yesus é mahkiita ni séra, ni sia é si pahtuzu'en si rimumez witu ung kasaru ni Yesus i ni séra mahkan mahwali-wali wo kimuala, “Tuang, séi sia wé si mayo ni Ko?”

²¹I si Petrus nimileka si pahtuzu'en itii, ni sia kimuama wia si Yesus, “Tuang, apa u mamuali wia si tou kenu?”

²²Ang kuan ni Yesus, “Sa sia kapaaz-Ku menou-nou makaz ni Aku i mawurimé sumaup, niitu én zéi'kan urusannu. Taan ni ko, kumiitomé ni Aku.”

²³An ikaserama im wia sé katuari sé mahkii-kiit si Yesus itii u sirita i si pahtuzu'en itii én zéi'kan maté. Taan si Yesus én zéi'kan kimuama wia si Petrus i si pahtuzu'en itii én zéi'kan maté. U méikua-Na, “Sa ni sia kapaaz-Ku menou-nou makaz ni Aku i mawurimé sumaup, niitu én zéi'kan urusannu.”

²⁴Ni siamo si pahtuzu'en si mahkuama an niilek wo an tinalingana tumoro niia péléng wo si nimantiko, wo kata'uanta sa am pahkuana tumoro a niilek wo an tinalingana én ulit.

²⁵Lakezpé' kasii am paayangen walina am winangun ni Yesus. Taan sa niana péléng ipakapantika, ung kaayahan kenu én zéi'kan awes i lumé'os péléng ang kitap un totoz im pantiken itii.