Read Tombulu Yohanes 4 Bible Online

Yohanes 4 - Tombulu bible

Yohanes 4

¹Si Yesus é nimata'umola i sé sana réwok tou Farisi én timalingamola i sé nimaéndo mahkii-kiit wo sé sinarani ni Yesus é lumouspé'mé ung kalakez né sinarani ni Yohanes Menanarani. (

²Un ulitna zéi'kan si Yesus si mahsarani taan sé pahtuzu'en-Na.)

³A Sia mondolé im witi Yudea a mawurima sumaup witi Galilea.

⁴ Taan ni Sia é léwo'zéi' i lumangkoié witi tana' Samaria.

⁵A Sia ikaayola witi Sikhar witi tana' Samaria, um witi rété un tana' méiwéhé ni Yakub wia si oki'na Yusuf im puuna.

⁶Im witu ém wéwéhan um parigi um pahkuan parigi Yakub. Si Yesus én totozo marawoi pahpaan i limapang, niitumo Sia rimumezla witu un tembir um parigi itii. In toro niitu ém woo jam mapulu' wo zua.

⁷A méyé si wéwéné tou Samaria mésumahap zano. Si Yesus kumuala wia si wéwéné itii, “Wéhanpé'mé zano elepen Aku.”

⁸In toro niitu sé pahtuzu'en-Na é nimangémo witi wanua tua'na in tumeles ang kakanen.

⁹ Si wéwéné tou Samaria itii éng kimuala wia ni Sia, “Kaa ko in tou Yahudi é mahaléi zano elepen wia ni aku in tou Samaria?” (Sé tou Yahudi é soo mahkari-karia sé tou Samaria.)

¹⁰Si Yesus nimingkotla, “Sa ko mata'u tumoro an tatambér ni Opo Empung wo séi si mahnuwu'ma wia ni ko im ‘Wéhanpé'mé zano elepen Aku’, tantumo ni ko é nimahaléiola wia ni Sia wo ni Sia é niméhémola wia ni ko un zano katou-touan.”

¹¹Kuan ni wéwéné itii wia ni Sia, “Tuang, ni Ko én zéi'kan siapa sasahap wo um parigi kenu én totoz rarem, wisa ung kailekan-Numé un zano katou-touan itii?

¹²Si Yakub ama' né nimaopo nai, niméhé um parigi kenu wia ni kai. Ni sia karia né oki'na é mengéngéndo zano pengengelepen néra im wia'i téntu kangkasii sé tatamun anuna. Apa pahgenangela ni Tuang i si Tuang lumousé si Yakub?”

¹³A si Yesus mingkotla, “Séi si melep un zano kenu, ni sia é maré'o sumaup,

¹⁴taan séi uman si melep un zano iwéhé-Ku, ni sia én zéi'mo maré'o makaz ing kauré-uré. Pahpaan un zano iwéhé-Ku é maéndo tanu ung kembu'an witu un touna u mengembu-ngembu' uman wo mahwéhé ung katou-touan makaz ing kauré-uré wia ni sia.”

¹⁵Kuan ni wéwéné itii wia ni Sia, “Tuang, iwéhémé wia ni aku un zano itii, wo ni aku zéi'mo maré'o-ré'ola wo zéi'mo mengéyé-ngéyé wia'i i mésumahap.”

¹⁶Kuan ni Yesus wia ni sia, “Mangémo, tawahené si mahayomu wo mawurimé wia'i.”

¹⁷Kuan ni wéwéné itii, “Ni Aku én zéi'kan siapa mahayo.” Ang kuan ni Yesus wia ni sia, “Timerang u méikuamumé i ni ko én zéi'kan siapa mahayo.

¹⁸Pahpaan ni ko é makalimamo ing kimawéngla wo in tarékan si mahwali-wali kariamu én zéi'kan mahayomu. Ni ko éng kimuamomé un ulit.”

¹⁹Kuan ni wéwéné itii wia ni Sia, “Taré kata'uangkula si Tuang é nabi.

²⁰Sé nimaopo nai é mahragés wia si Opo Empung wia um wawona ung kentur kenu, taan ni kamu in tou Yahudi é mahkua u Yerusalem ém peraragésan né tou wia si Opo Empung.”

²¹Kuan ni Yesus wia ni sia, “Ina', pa'émanela u méikua-Ku kenu, méyé un orasna i ni kamu mérumagés wia si Ama', zéi'kan witi wawona ung kentur kenu wo zéi'kan kangkasii witi Yerusalem.

²²Ni kamu in tou Samaria mahragés wia si zéi'kan kata'uan niou, ni kai in tou Yahudi é mahragés wia si kata'uan nai, pahpaan si tou mémilot sé tou im witu un ukuman wana a singkéla' ém wia sé tou Yahudi a méyé.

²³Taan un orasna é méyé wo tarékano un orasna i sé tou sé uli-ulit mahragés é marumagés wia si Ama' karia ung kawasa ni Roh Lenas wo ang kaulitan. Pahpaan si Ama' é mahpenéro sé tou mahragés tanu niitu wia ni Sia.

²⁴Si Opo Empung é Roh wo séi uman si mérumagés wia ni Sia é léwo'zéi' i rumagés wia ni Sia karia ung kawasa wo an tutuzu' kaulitan ni Roh Lenas.”

²⁵Kuan ni wéwéné itii wia ni Sia, “Kata'uangku i si Mesias si pahkuan kasii Kristus é méyé, i ni Sia méyé é mémapata'u péléng am péléng wia ni kai.”

²⁶Kuan ni Yesus wia ni sia, “Ni Akumo Sia, si mahsirita kariamu.”

²⁷In toro niitu a mawurimé sé pahtuzu'en-Na. Sé pahtuzu'en-Na é mengompo' i nimilekla si Yesus mahsirita karia ni wéwéné. Taan zéi'kan siapa zozo' in esa si limigaula wia si wéwéné itii, “Apa ung kapaazmu?” Kaapa wia si Yesus, “Apa um pahsiritan-Nu karia ni wéwéné itii?”

²⁸Si wéwéné itii én timula'uma im witu un tampayangna a sia mangé witi wanua tua'na wo mahkua wia sé tou witu,

²⁹“Méyémo, méileken si tou si kimua wia ni aku péléng a nimualikumola. Woo ni Siamo si Kristus?”

³⁰A sé witi wanua tua'na mangé witi ondolé um wanua tua'na itii i mangé wia si Yesus.

³¹Karegas niitu sé pahtuzu'en-Na é mahtawah ni Sia, “Méster, méyémo kuman.”

³²Taan si Yesus kimuala wia ni séra, “Wia ni Aku ém wéwéhan ung kakanen zéi'kan kata'uan niou.”

³³Pahpaano niitu ni séra mahliligauan, “Apa wéwéhano si nimahalimé ung kakanen wia ni Sia?”

³⁴Kuan ni Yesus wia ni séra, “Ung kakaneneng-Ku é mahwangun um paaz-Na si nimatumé ni Aku wo sumampet um paayangen-Na.

³⁵Zéi'kankuaa ni kamu é mahkua in téntii, ‘Epatna loloho'enokan é mupu'mo.’ Taan ikua-Kuma wia ni kamu: ilekela u makaliklikmu wo werenala a méitanem wana an uma a meririhmo wo lutu'mo toromo upu'en.

³⁶In tarékan si mengungupu' éng karegaso im pahwaéran. Am wua'na pahréwokenna é sé tou ma'éman sé makailek ung katou-touan makaz ing kauré-uré. Niitumo si mahkeroz wo si mahupu' é mahpaa-paaz mahwali-wali.

³⁷Pahpaan ulito ung kukuan kenu: si esa mahkeroz wo sé walina é mahupu'.

³⁸Ni Aku nimatuma ni kamu i mupu' witi uma un zéi'kan winendu niou; sé tou walina sé nimendu wo ni kamu sé mémupu' um winendu néra.”

³⁹Lakez sé tou Samaria sé witi wanua tua'na itii a méyé é nima'éman wia si Yesus pahpaan si wéwéné itii mahkua, “Ni Sia éng kimuamé wia ni aku péléng a nimualikumola.”

⁴⁰I sé tou Samaria itii méikaayomola wia si Yesus, ni séra é mahaléi wia ni Sia i mento'ma karia néra, a Sia mento' witu zuana endo.

⁴¹Wo kalakezna sé tou ma'éman ni Sia pahpaan timalinga a méikua-Na.

⁴²A séra kumuala wia si wéwéné itii, “In tarékan ni kai ma'éman én zéi'kan uman pahpaan a méikuamu, taan pahpaan ni Sia si tinalinga naimo in esa wo kata'uan nai i ni Sia si uli-ulit milot sé tou wia ung kaayahan im witu un ukuman wana a singkéla'.”

⁴³In zuana endomo si Yesus nimento' witi tana' Samaria a Sia mangé witi Galilea.

⁴⁴ Si Yesus in esa éng kimuamo tumoro ung kata'uan-Na i si nabi én zéi'kan pahsigi'en im witi wanuana in esa.

⁴⁵ I méikaayomola witi Galilea, sé tou wana é simungkul ni Sia pahpaan ni séra é nimileko um winangun-Na witi pésta lumé'os um Paskah né tou Yahudi im witi Yerusalem pahpaan ni séra kangkasii é nimangé witi pésta itii.

⁴⁶ A si Yesus mawurima witi Kana um witi Galilea. I makasa si Yesus é nimanguné un zano maéndo anggor im witu. Im witi Kapernaum ung karétékan ung Kana ém wéwéhan si mahpaayang witi istana, si oki'na tuama é saki.

⁴⁷Ing kinatalingaanala si Yesus im witi Yudea niméyé witi Galilea, a sia mangé wia si Yesus mahaléi wia ni Sia i méyé witi Kapernaum wo lumé'osé si oki'na, pahpaan si oki'na én tawimo maté.

⁴⁸Kuan ni Yesus wia ni sia, “Sa kamu zéi'kan nimilek a makakompo'en, ni kamu én zéi'kan ma'éman.”

⁴⁹A si mahpaayang witi istana itii kumuala wia ni Sia, “Tuang, tulungempé' ndootuumé, méyépé' ilekena si oki'ku taa sia matéla.”

⁵⁰Kuan ni Yesus wia ni sia, “Mangémo, si oki'mu é lé'oso.” Si tou itii é ma'éman u méikuamé ni Yesus, a sia mawurima.

⁵¹Im witipé' lalan sé atana niméyé wia ni sia ang kumua i si oki'na é lé'oso.

⁵²A sia meligau wia ni séra sa jam pira si oki'na itii i mahlé'osoma. Kuan néra, “Kahwii lolambot in jam kataré um pasu'na é nimazéi'moma.”

⁵³A si ama' ni oki' saki itii ikagenanga in toro niitu kangkasii si Yesus kimua wia ni sia, “Si oki'mu é lé'oso.” A sia karia né mahento' witu um waléna ma'éman wia si Yesus.

⁵⁴Niitu u makakompo'en kazua um winangun ni Yesus witi Galilea i ni Sia nimawurimé im witi Yudea.