Read Tombulu Yohanes 6 Bible Online

Yohanes 6 - Tombulu bible

Yohanes 6

¹Tumondong niitu si Yesus mangé witi leweta u Louz Galilea um pahkuan kangkasii Louz Tiberias.

²Lakez sé tou mahkiit ni Sia, pahpaan ni séra nimilek a makakompo'en pahwangunen-Na wia sé tou saki.

³A si Yesus karia né pahtuzu'en-Na sumosoza witi wawona ung kentur a rumumez witu.

⁴In toro niitu, un endo mahpésta né tou Yahudi um pahkuan Paskah én zéi'mo uré.

⁵I ni Sia nimileka u makaliklik-Na wo mileka lakez sé tou mahéyé wia ni Sia, a Sia kumuala wia si Filipus, “Wisa un toro telesantamé roti, wo séra toro kuman?”

⁶Niitu é méikua-Na i milek um wangunen ni Filipus, pahpaan kata'uan-Namo un totoz im wangunen-Na.

⁷A si Filipus mingkotla wia ni Sia, “Un zoit zuana atus dinar én zéi'kan awes iteles roti iwéhé wia ni séra zozo' tahkokori'an uman ung kailekan néra.”

⁸Si Andreas, si totoz katuari ni Simon Petrus, si esaané im wia sé pahtuzu'en ni Yesus kimuala wia ni Sia,

⁹“Im wia'i ém wéwéhan si tolé oki' mahali-ali u roti jelai[5] lima wo sé seza' zua, taan apa niitu awes iwéhé wia sé tou téntu ung kalakez?”

¹⁰Kuan ni Yesus, “Pekirumezpé'la séra.” Un tampa itii éng kazukutan, a séra rumumezla witu. Ni séra péléng, taré sé tuama ém woo limana riwu.

¹¹Tumondong niitu si Yesus méndomé u roti itii ang kumuama u makasé wia si Opo Empung, am peméténg-Nama u roti itii wia sé tou rimumez witu. Téntu kangkasii um winangun-Na wia sé seza' itii wo ni séra kiman makaz nimawesuh.

¹²I ni séra péléng kimanola makaz im wesuh, si Yesus kimuala wia sé pahtuzu'en-Na, “Pakaréwokené a nimateza wo tia' wéwéhan a méikatia'.”

¹³A réwoken néramé an teza im witu u roti jelai lima ang kinan né tou itii, ung kalakezna é mapulu' wo zuana lo'lo'.

¹⁴I niilekla né tou itii u makakompo'en winangunla ni Yesus, ni séra mahkua, “Ni Sia én uli-ulit Nabi si méitaaz ni Opo Empung i méyé wia ung kaayahan kenu.”

¹⁵Kata'uan ni Yesus ni séra é mamenutu' ni Sia i maéndo kolano néra. Niitumo Sia nimangé witi kimentur mengesamé.

¹⁶I mahwengimoma, sé pahtuzu'en ni Yesus nimangé witi louz.

¹⁷A séra sumakéma londéi i lumewet mangé witi Kapernaum. Un endo é rimbengbengo taan si Yesus én zéi'kampé' mahwali-wali karia néra.

¹⁸Karegas niitu un zano witi louz é mahsempa'mo pahpaan u reges repet.

¹⁹Im woo lima kaapa enemna kilométer ung kazou'na um pinanggayuan néra, an ileken nérama si Yesus mahlampangé witu um wawo un zano mahrétémé u londéi sinakéan néra. Ni séra én totoz maindé'.

²⁰Taan si Yesus kimuama wia ni séra, “Kenu é ni Aku, tia'mo maindé'!”

²¹Niitumo ni séra é mahpaa-paaz i ni Sia simakémé witu u londéi wo in toro niitu u londéi sinakéan néra é méikaayomola witi tampa angéan néra.

²²Masandomé sé tou lakez é nimento' witi leweta u louz menéro-néro si Yesus. Pahpaan kata'uan néra ing kahwii u londéi witu én esa uman wo si Yesus én zéi'kan simakéma mahwali-wali karia né pahtuzu'en-Na witu u londéi itii i lumewet u louz itii.

²³Karegas niitu a mawitula um woopira londéi walina am witi Tiberias a méyé. Ni séra méikaayola witi rété un tampa né tou lakez ing kiman u roti tumondongla si Yesus ing kimuama u makasé.

²⁴Ing kinata'uanola né tou lakez i si Yesus wo sé pahtuzu'en-Na zéi'mo witu, sé tou itii é simakéma wana a londéi a séra mangé witi Kapernaum i menéro si Yesus.

²⁵I si Yesus kinailekanola né tou lakez im witi leweta u louz itii, ni séra meligau wia ni Sia, “Méster, kawisa a ni Ko ikaayomé wia'i?”

²⁶A si Yesus mingkotla, “Uli-ulit ikua-Kuma wia ni kamu, ni kamu é menéro-néro ni Aku zéi'kan pahpaan ni kamu nimilekola a makakompo'en am winangun-Kumola, taan pahpaan ni kamu éng kimano u roti itii makaz nimawesuh.

²⁷Ni kamu én tia'mo mahpaayang i menéro an tikohon rewek maapu wo toro uman mawuul, taan maayangla i menéro an tikohon zéi'kan mawuul, a mahwéhémé ung katou-touan makaz ing kauré-uré un iwéhé ni Oki' ni Tou wia ni kamu. Pahpaan ni Siamo si winéhan kawasa ni Opo Empung, si Ama'.”

²⁸Ang kuan néra wia ni Sia, “Apa u léwo'zéi' im wangunen nai, wo kai toro maayang am paayangen kapaaz ni Opo Empung?”

²⁹Kuan ni Yesus wia ni séra, “Ung kenumo um paayangen kapaaz ni Opo Empung: Pa'émanela Sia si méiatumé ni Opo Empung.”

³⁰Niitumo ni séra mahkua wia ni Sia, “Apa u makakompo'en um wangunen-Nu un toro ileken nai, wo kai ma'éman wia ni Ko? Apa um paayangen-Nu?

³¹ Sé nimaopo nai éng kimano un tikohon pahkuan ‘manna’ im witi kapelasan, tanu u méipantik witu um Pinantik Lenas, ‘Ni séra ém winéhan-Na u roti witi kasendukan a méyé.’ ”

³²Ang kuan ni Yesus wia ni séra, “Uli-ulit ikua-Kuma wia ni kamu, zéi'kan si Musa si niméhé wia ni kamu u roti witi kasendukan a méyé, taan si Ama'-Ku si niméhé wia ni kamu un uli-ulit roti witi kasendukan.

³³Pahpaan u roti méiwéhémé ni Opo Empung é roti un timumpamé im witi kasendukan wo mahwéhé ung katou-touan wia sé tou wia ung kaayahan kenu.”

³⁴A séra kumuala wia ni Sia, “Tuang, peméhé-méhémé u roti itii wia ni kai.”

³⁵Kuan ni Yesus wia ni séra, “Ni Aku kenumo u roti mahwéhé ung katou-touan. Séi uman si méyé wia ni Aku én zéi'mo mahpenda-pendanla u maharem. Wo séi uman si ma'éman ni Aku én zéi'mo mahpenda-pendanla u maré'o.

³⁶Taan tanumo u mémoikua-Ku wia ni kamu: Zozo' ni kamu nimileko ni Aku, ni kamu én zéi'kan ma'éman ni Aku.

³⁷Péléng sé tou méiwéhé ni Ama' wia ni Aku é méyé wia ni Aku wo péléng sé méyé wia ni Aku, sé tou itii é sungkuleng-Ku.

³⁸Pahpaan ni Aku én timumpamomé im witi kasendukan zéi'kan i mangun um paaz-Ku, taan i mangun um paaz ni Opo Empung si nimatumé ni Aku.

³⁹Ung kenumo um paaz ni Opo Empung si nimatumé ni Aku: Wo im wia sé tou méiwéhé wia ni Aku, zéi'kan siapa zozo' in esa si ikaliong, taan ni Aku tumou sumaup ni séra im witu un endo kaakazan ung kaayahan.

⁴⁰Pahpaan niiamo um paaz ni Ama'ku: Wo péléng sé tou nimilek wo sé ma'éman si Oki' é makailek ung katou-touan makaz ing kauré-uré wo ni séra én itou-Ku sumaup im witu un endo kaakazan ung kaayahan.”

⁴¹A sé tou Yahudi rengan i mengengu-ngengut tumoro si Yesus pahpaan ni Sia kimuama, “Ni Aku kenumo u roti timumpamé im witi kasendukan.”

⁴²Kuan néra, “Zéi'kankuaa ni Sia é si Yesus, oki' ni Yusuf, si ina' wo ama'-Na éng kata'uanta? Kura kahuman Sia mahkua, ni Sia én timumpamé im witi kasendukan?”

⁴³Ang kuan ni Yesus wia ni séra, “Ni kamu én tia'mo mengengu-ngengut.

⁴⁴Zéi'kan siapa zozo' in esa si toro méyé wia ni Aku, sa sia zéi'kan ipahwalimé ni Ama' si nimatumé ni Aku. Wo si tou niméyé wia ni Aku én itou-Ku sumaup im wia sé nimaté im witu un endo kaakazan ung kaayahan.

⁴⁵ Wana am pinantik né nabi é méipantik, ‘Ni séra péléng én tuzu'en ni Opo Empung.’ Péléng sé tou sé timalingamo wo nimakaileko an tutuzu' ni Ama' é méyé wia ni Aku.

⁴⁶Ni Aku én zéi'kan mahkuama im wéwéhano si tou nimilek si Ama'. Si wia si Opo Empung a méyé uman si nimileko si Ama'.

⁴⁷Uli-ulit ikua-Kuma wia ni kamu: Séi uman si ma'éman, ni sia é makaanu ung katou-touan makaz ing kauré-uré.

⁴⁸Ni Aku kenumo u roti mahwéhé ung katou-touan.

⁴⁹Sé nimaopo niou éng kimano un tikohon pahkuan ‘manna’ im witi kapelasan wo ni séra é nimatémoma.

⁵⁰Taan u roti un timumpamé im witi kasendukan én zéi'kan téntu, séi uman si kuman u roti itii ni sia én zéi'kan maté.

⁵¹Ni Akumo u roti mahwéhé ung katou-touan um witi kasendukan an tumumpamé. Sa wéwéhan si tou kumana u roti kenu é mamenou-nou makaz ing kauré-uré. U roti iwéhé-Ku én awak-Ku, u maiwéhé-Ku wo sé tou wia ung kaayahan kenu mamenou-nou.”

⁵²Kaitalingamé niitu, sé tou Yahudi mahzéi-zéi'an karia i mahkua, “Kura ni Sia toro méhé un awak-Na ing kanenta?”

⁵³A si Yesus kumuala wia ni séra, “Uli-ulit ikua-Kuma wia ni kamu, sa ni kamu zéi'kan kuman un awak ni Oki' ni Tou wo melep un zaha'-Na, ni kamu én zéi'kan uli-ulit menou-nou.

⁵⁴Séi uman si kuman un awak-Ku wo melep un zaha'-Ku, ni sia é makailek ung katou-touan makaz ing kauré-uré wo ni Aku én tumou sumaup ni séra im wia sé nimaté witu un endo kaakazan ung kaayahan.

⁵⁵Pahpaan, un awak-Ku un uli-ulit tikohon wo un zaha'-Ku un uli-ulit eelepen.

⁵⁶Séi uman si kuman un awak-Ku wo melep un zaha'-Ku, si tou itii é nimaesamo karia-Ku wo ni Aku é nimaesamo kariana.

⁵⁷Si Ama', si nimangun sé tou i menou-nou, nimatumé ni Aku wo ni Aku menou-nou pahpaan si Ama'. Téntu kangkasii, séi uman si kuman un awak-Ku, si tou itii é mamenou-nou pahpaan ni Aku.

⁵⁸Ni Akumo u roti timumpamé im witi kasendukan, zéi'kan tanu u roti kinan né nimaopo niou wo ni séra é nimatémoma. Séi uman si kumana u roti un iwéhé-Kuma kenu, si tou itii é mamenou-nou makaz ing kauré-uré.”

⁵⁹Péléng niia é méikua ni Yesus im witi Kapernaum i ni Sia mahtuzu' witi walé peraragésan né tou Yahudi.

⁶⁰In timalingamoma a méikuama ni Yesus, lakez sé mahkii-kiit ni Sia mahkua, “A méikuamé itii én totoz wutez, séi si toro kumiit a méikuamé itii?”

⁶¹Kata'uan ni Yesus i sé mahkii-kiit ni Sia é mengengu-ngengut pahpaan a méikua-Namé itii, a si Yesus kumuala wia ni séra, “Soomo ma'éman kamu wé ing kinuaang-Kuma niitu?

⁶²Kura u mamuali sa kamu milek si Oki' ni Tou mawénéta i mawuri witi pinahwéha-wéhan-Na ing kataré?

⁶³Si Roh ni Opo Empung si mahwéhémé ung katou-touan, ung kaenté'an ni tou én zéi'kan siapa torona. A nuwu' méikua-Kuma wia ni kamu é nuwu' ni Roh ni Opo Empung u mahwéhémé ung katou-touan.

⁶⁴Taan im wia ni kamu ém wéwéhan sé zéi'kan ma'éman.” Pahpaan rengané ing kataré-taré éng kata'uano ni Yesus, séi sé zéi'kan ma'éman wo séi si mamangkér ni Sia.

⁶⁵A Sia kumua, “Niitumo mémoikua-Kula wia ni kamu: Zéi'kan siapa zozo' in esa si toro méyé wia ni Aku, sa sia zéi'kan niénéan ni Ama'.”

⁶⁶Rengané in toro niitu lakez sé mahkii-kiit si Yesus timula'u ni Sia wo soomo kumiit ni Sia.

⁶⁷A si Yesus kumuama wia sé mapulu' wo zua pahtuzu'en-Na, “Apa ni kamu kasii én tumula'u ni Aku?”

⁶⁸ Wingkotela ni Simon Petrus wia ni Sia, “Tuang, séipé' si angéan nai? U nuwu'-Mu é mahwéhémé ung katou-touan makaz ing kauré-uré;

⁶⁹wo ni kai é ma'émano wo mata'u i ni Komo Si Lenas wia si Opo Empung a méyé.”

⁷⁰Kuan ni Yesus wia ni séra, “Zéi'kankuaa ni Aku si niméléng ni kamu sé mapulu' wo zua? Taan, si esaané im wia ni kamu é sétang.”

⁷¹Si pahkuan-Nala é si Yudas, oki' ni Simon Iskariot, pahpaan ni siamo si nimangkér si Yesus, zozo' ni sia én esaané wia sé mapulu' wo zua pahtuzu'en itii.