Read Tombulu Yohanes 8 Bible Online

Yohanes 8 - Tombulu bible

Yohanes 8

¹Tumondong niitu a si Yesus mangé witi kentur Zaitun.

²Masandonamé, woondopé' karengan ni Sia ém witimo lésaz um Walé ni Opo Empung wo lakez sé tou mahéyé wia ni Sia. Ni Sia rumumezla a mahtuzu' ni séra.

³A sé tou tulap un Torat karia né sana réwok tou Farisi mahwalimé wia ni Sia si wéwéné rinasak karegas i mahsamek.

⁴Si wéwéné itii é méirendai nérala witu un unez a séra kumua wia si Yesus, “Méster, si wéwéné kenu é rinasak karegas i mahsamek.

⁵ Witu un ukum Torat si Musa é nimerénta wia ni kita i merit karia am watu wia sé wéwéné téntu. Kura un ikua-Mu tumoro niitu?”

⁶Ni séra kimua niitu i mema'wa' ni Sia, wo séra toro mapahsasala' ni Sia. Taan si Yesus nimongkot umanla a mantik witu un tana' karia un tutundu'-Na.

⁷I ni séra zéi'kan mazéi' i meliga-ligau wia ni Sia, a Sia tumeréné a mahkua wia ni séra, “Séi uman im wia ni kamu si zéi'kan siapa singkéla', si tou itiimo si puuna i merit si wéwéné kenu karia am watu.”

⁸A Sia mongkot kasiila a mantik witu un tana'.

⁹Taan in timalingamoma u méikuama itii, ni séra mena'samé i mahtingkasé, rengané wia si totoz tu'a. Ing kamurian sé méikatezama akazokan si Yesus karia ni wéwéné itii si merenda-rendai witu un tampana.

¹⁰A si Yesus tumeréné ang kumua wia si wéwéné itii, “É Ina', wisamo séra? Zéi'kan siapa ndéén zozo' in esa si nimukum ni ko?”

¹¹Kuana, “Zéi'kan siapa, Tuang.” Ang kuan ni Yesus, “Ni Aku kangkasii én zéi'kan mukum ni ko. Mangémo wo rengan in tarékan, tia'mo memangu-mangun a singkéla'.”]

¹² A si Yesus kumua kasiima wia sé tou lakez itii, “Ni Akumo si sena' ung kaayahan. Si tou mahkiit ni Aku én zéi'kan mahlampang witu ung karimbengbengan taan ni sia makailek u sena' u mahwangun sé tou makailek ung katou-touan makaz ing kauré-uré.”

¹³ Ang kuan né tou im wia sé sana réwok tou Farisi wia ni Sia, “Ni Ko uman si mahkua tumoro un tou-Mu in esa, um pahkua-Mumé én towo.”

¹⁴Kuan ni Yesus wia ni séra, “Zozo' ni Aku mahkua tumoro un tou-Kukan, um pahkua-Ku én ulit, pahpaan kata'uang-Ku, wisa ni Aku a méyé wo wisa un angéang-Ku. Taan ni kamu én zéi'kan mata'u, wisa ni Aku a méyé wo wisa un angéang-Ku.

¹⁵Ni kamu mahtotoz in ulit kaapa zéi'kan am pahwangunen né tou mengiit ung kinanaram né tou, taan zéi'kan siapa zozo' in esa si tou tinotoz-Ku in ulit kaapa zéi'kan um pahwangunenna,

¹⁶wo sa ni Aku tumotoz am pahwangunen né tou, um pakahtotoz-Ku én ulit, pahpaan i ni Aku mahtotoz am pahwangunen né tou, ni Aku én zéi'kan mengesa-ngesa taan ni Aku é mahkari-karia si Ama' si nimatumé ni Aku.

¹⁷Im witu un ukum Torat niou é méipantik, sa sé tou zua kimuamo tumoro a niilek wo an tinalinga néra, niitumo un ulit.

¹⁸Ni Akumo si mahkua tumoro un tou-Ku in esa wo kangkasii si Ama', si nimatumé ni Aku é mahkua tumoro ang kata'uan-Na wia ni Aku.”

¹⁹Ang kuan néra wia ni Sia, “Wisa wé si Ama'-Mu?” Si Yesus mingkotla, “Ni kamu én zéi'kan mata'u ni Aku wo si Ama'-Ku. Sa kamu mata'u ni Aku, ni kamu kangkasii é mata'u si Ama'-Ku.”

²⁰Péléng niitu é méikua ni Yesus i ni Sia mahtuzu' witi lésaz um Walé ni Opo Empung rété um penanahu'an an zoit raragés. Taan zéi'kan siapa zozo' in esa si timion ni Sia, pahpaan zéi'kampé' méikaayola witu un oras-Na.

²¹A si Yesus kumua kasiila wia sé tou lakez, “Ni Aku é mangé tumula'uma ni kamu wo ni kamu é mamenéro ni Aku, taan ni kamu é maté karia a singkéla' niou. Ni kamu én zéi'kan mamuali i méyé witi tampa angéang-Ku.”

²²Niitumo, kuan né tonaas né tou Yahudi itii, “Mapawunu'mo katuu Sia taka-takazan Sia mahkua i ni kita én zéi'kan mamuali i mangé witi tampa angéan-Na?”

²³A Sia kumua wia ni séra, “Ni kamu ém wia um wawa' kenu a méyé, ni Aku ém witi atas a méyé. Ni kamu ém wia ung kaayahan kenu a méyé, taan ni Aku én zéi'kan wia ung kaayahan kenu a méyé.

²⁴Pahpaano niitu ing kataré ni Aku éng kimuama wia ni kamu i ni kamu é maté karia a singkéla' niou. Pahpaan sa ni kamu zéi'kan ma'éman i ni Akumo ni Sia si méipahkua-Kumola, ni kamu é maté karia a singkéla' niou.”

²⁵Ang kuan néra wia ni Sia, “Séi Ko wé?” Kuan ni Yesus wia ni séra, “Rengané ing kataré é mémoikua-Kula wia ni kamu.

²⁶Lakezpé' u léwo'zéi' in ikua-Ku wia ni kamu wo tumotoz ulit kaapa zéi'kan am pahwangunen niou. Taan ni Aku é mahkua uman an tinalinga-Kumé wia si Opo Empung si nimatumé ni Aku. Péléng a méikua-Na én ulit wo niitu kangkasii un ipahkua-Ku wia ni kamu im wia ung kaayahan kenu.”

²⁷Sé tou timalingama niitu, zéi'kan katulapan néra sa um pahkuan ni Yesus én tumoro si Ama'-Na.

²⁸A si Yesus kumuama wia ni séra, “I ni kamu timoozola[7] si Oki' ni Tou, taré kamu mata'u i ni Akumo Sia si méipahkua-Kula. Wo ni kamu é mata'u im péléng am pahwanguneng-Ku én zéi'kan pahwanguneng-Ku mengiit um paaz-Ku in esa. Taan ni Aku mémahkua umana a méituzu' ni Ama'-Ku wia ni Aku.

²⁹Ni Sia, si nimatumé ni Aku é menaté-natér ni Aku. Zéi'kan iwaya-Na ni Aku i mengesa-ngesa, pahpaan ni Aku sekezé é mahwangun a mangun ni Sia mahpaa-paaz.”

³⁰Kumawusa si Yesus ing kimuama niitu péléng, lakez sé tou ma'éman wia ni Sia.

³¹A si Yesus kumuama wia sé tou Yahudi sé ma'émano wia ni Sia, “Sa ni kamu zéi'kan mazéi' i mahkiit a nuwu'-Ku, ni kamu én uli-ulit pahtuzu'eng-Ku.

³²Ni kamu é mata'u ung kaulitan wo ung kaulitan itii é mangun ni kamu ipilot im witu um pahata-atan.”

³³A séra mingkotla, “Ni kai é suzu ni Abraham wo zozo' in esa ni kai én zéi'kampé' pinahata-atala né tou. Kura kahuman Ko mahkua i ni kamu én ipilot im witu um pahata-atan?”

³⁴Kuan ni Yesus wia ni séra, “Uli-ulit ikua-Kuma wia ni kamu, péléng sé tou mahwangun a singkéla' én ata a singkéla'.

³⁵Si ata én zéi'kan ikarékén sana awu ni tuangna taan si oki' én ikarékén sana awu né tu'ana makaz ing kauré-uré.

³⁶Niitumo, sa si Oki' ni Opo Empung si nimilot ni kamu im witu um pahata-atan, ni kamu én uli-ulit méipilot im witu um pahata-atan.”

³⁷“Kata'uang-Ku ni kamu é suzu ni Abraham, taan ni kamu é mahtututu' i munu' ni Aku, pahpaan ni kamu soo sumungkul a nuwu'-Ku.

³⁸Apa a niilek-Ku wia si Ama', niitu an ipahkua-Ku. Téntu kangkasii ni kamu, ni kamu mahwangun an tinalinga niou im wia si ama' niou.”

³⁹A séra mingkotla wia si Yesus, “Si ama' nai é si Abraham.” Kuan ni Yesus wia ni séra, “Sa ni kamu uli-ulit suzu ni Abraham, tantumo ni kamu é mahwangun am pahwangunen ni Abraham.

⁴⁰Ni Aku é mahkuama wia ni kamu ung kaulitan tinalingakumé wia si Opo Empung, taan ni kamu é mahtututu' i munu' ni Aku. Si Abraham én zéi'kan mahwangun tanu um pahwangunen niou.

⁴¹Ni kamu é mahwangun am pahwangunen né ama' niou.” Séra mingkotla, “Ni kai én zéi'kan oki' né simamek. Si ama' nai én esa uman, ni Siamo si Opo Empung.”

⁴²Kuan ni Yesus wia ni séra, “Sa si Opo Empung én Ama' niou, ni kamu é marumaraaté ni Aku, pahpaan ni Aku ém wia si Opo Empung a méyé wo in tarékan ni Aku ém wia'i. Ni Aku i niméyé én zéi'kan pahpaan um paaz-Ku in esa, taan ni Siamo si nimatumé ni Aku.

⁴³Ni kamu zéi'kan makatulap an ipahkua-Ku pahpaan ni kamu é soo tumalinga an ipahkua-Ku.

⁴⁴Si ama' niou é si tonaas né sétang wo ni kamu ém paaz mahwangun ang kapaaz ni ama' niou. Rengané im puuna ni sia é mahwunu' sé tou wo ni sia én zéi'kan kawisa mahwangun an ulit. Pahpaan, ni sia zéi'kan kawisa kumuala an ulit. I ni sia mahtowo, un ipahkuana ém witu un aténa a méyé, pahpaan ni sia én tantowo wo ama' péléng né tantowo.

⁴⁵Taan pahpaan ni Aku mahkuama ung kaulitan wia ni kamu, ni kamu én zéi'kan ma'éman wia ni Aku.

⁴⁶Im wia ni kamu, séi si toro tumuzu'mé i ni Aku é simingkéla'mola? Sa ni Aku mahkua ung kaulitan, kaa ni kamu zéi'kan ma'éman ni Aku?

⁴⁷Séi uman si wia si Opo Empung a méyé, ni sia é mahtalinga u nuwu' ni Opo Empung. Taan ni kamu én zéi'kan wia si Opo Empung a méyé, pahpaano niitu ni kamu soo tumalinga u nuwu' ni Opo Empung.”

⁴⁸Sé tonaas né tou Yahudi mingkotla wia si Yesus, “Ulito um pahkua nai i ni Ko én tou Samaria wo sinelazan.”

⁴⁹Kuan ni Yesus, “Ni Aku én zéi'kan sinelazan, taan ni Aku é mahsigi' si Ama'-Ku wo ni kamu én zéi'kan mahsigi' ni Aku.

⁵⁰Ni Aku én zéi'kan mahaléi sé tou i sumigi' ni Aku. Wéwéhan si esa si paaz wo ni Aku sigi'en, ni Siamo si mahtotoz in ulit kaapa zéi'kan um pahwangunen né tou.

⁵¹Uli-ulit ikua-Kuma wia ni kamu: Séi uman si mahkiit u nuwu'-Ku, ni sia én zéi'kan maté makaz ing kauré-uré.”

⁵²Kuan né tonaas né tou Yahudi wia ni Sia, “Kata'uan nai in tarékan ni Ko é sinelazan. Pahpaan si Abraham é nimatémoma wo téntu kangkasii sé nabi, taan ni Ko é mahkua: Séi uman si mahkiit u nuwu'-Ku, ni sia én zéi'kan maté makaz ing kauré-uré.

⁵³Sa si Abraham é nimatémoma wo sé nabi kangkasii é nimatémoma, séi Ko wé? Toro kahuman wo ni Komo si wangko' taan si nimaopo nai Abraham!”

⁵⁴A si Yesus mingkotla, “Sa ni Aku mahsigi' wo mahlooz uman un tou-Ku in esa, u sigi' wo u looz itii én zéi'kan siapa torona. Si mahsigi' wo mahlooz ni Aku é si Ama'-Ku, si pahkuan niou in Opo Empung niou.

⁵⁵Un ulitna ni kamu zéi'kan mata'u ni Sia, taan ni Aku é mata'u ni Sia. Sa ni Aku kumuama in zéi'kan mata'u ni Sia, ni Aku én tantowo, kasuat niou. Taan ni Aku mata'u ni Sia wo ni Aku é mahwangun am pahkua-Na.

⁵⁶Si Abraham si nimaopo niou én totoz mahpaa-paaz i ni sia mamilek un endo i ni Aku méyé. Ni sia é nimileko ni Aku i niméyé wo ni sia én totoz mahpaa-paaz.”

⁵⁷Ang kuan né tonaas né tou Yahudi wia ni Sia, “Ni Ko én zéi'kampé' limana pulu' ta'un, kura kahuman Ko mahkua nimileko si Abraham?”

⁵⁸Kuan ni Yesus wia ni séra, “Uli-ulit ikua-Kuma wia ni kamu, puunala si Abraham im wia, ni Aku ém wiamo.”

⁵⁹A séra méndomé watu i merit ni Sia, taan si Yesus én zéi'mo niilek nérama in timula'uma u lésaz um Walé ni Opo Empung.