Read Tombulu Yohanes 9 Bible Online

Yohanes 9 - Tombulu bible

Yohanes 9

¹I si Yesus mahlampang, ni Sia mileka si letok renganpé' i nimatoumé.

²Sé pahtuzu'en-Na meligau wia ni Sia, “Méster, séi wé si mahwangun a singkéla' taka-takazan si tou kenu rengan in taré nimatoumé é letoko, ni sia in esa kaapa sé tu'ana?”

³Si Yesus mingkotla, “Ni sia nimaletok én zéi'kan pahpaan a siningkéla'na wo zéi'kan kangkasii pahpaan a siningkéla' né tu'ana, taan wo sé tou toro milek um pahpaayangen ung kawasa ni Opo Empung wia ni sia.

⁴Ni kita é léwo'zéi' i mangun am paayangen ni Opo Empung si nimatumé ni Aku, in endopé' taré. Zéi'mo mauréma ém wengimo wo in toro niitu én zéi'kan siapa si toro maayang.

⁵ I ni Aku memia-mia ung kaayahan kenu, ni Akumo si sena' ung kaayahan.”

⁶Tumondongla si Yesus kimuama péléng niitu, Sia rumura'ma witu un tana', semboren-Nala u rura' karia un tana' a maéndoma pentak, an ipurisi-Nala um pentak itii witu um weren ni tou letok itii

⁷wo mahkua wia ni sia, “Mangémo, maruma'musla witi kolam Siloam.” (Ung kalakoan Siloam é “Si méiatu”.) A si tou itii mangé i maruma'mus. I ni sia mawurimé, ni sia én toromo mahilek.

⁸Taan sé karéténa karia né mata'u ni sia i mengangaléi mahkua, “Zéi'kankuaa si tou kenu si sekezé é merume-rumez i mengangaléi?”

⁹Wéwéhan sé mahkua, “Ulit, ni sia.” Wéwéhan kasii sé mahkua, “Zéi'kan, taan ni sia é makahgio wo si tou itii.” Taan si tou itii éng kimuala, “Ni akumo si tou itii.”

¹⁰Ang kuan néra wia ni sia, “Kura wo um werenmu toromo mahilek?”

¹¹Wingkotenala, “Si tou makangaran Yesus nimangunla um pentak, am purisi-Namé um werenku karia um pentak itii ang kumuamé wia ni aku, ‘Mangémo witi kolam Siloam wo ruma'musla.’ A ni aku mangé wo i makara'musola, ni aku én toromo mahilek.”

¹²A séra kumuala wia ni sia, “Wisa Sia?” Wingkotenala, “Zéi'kan kata'uangku.”

¹³Ipahwali nérama si tou letok woan itii wia sé sana réwok tou Farisi,

¹⁴pahpaan si Yesus i simembor un tana' karia u rura'-Na a lumé'os si letok itii ém witu un endo Sabat.

¹⁵Niitumo sé sana réwok tou Farisi meligau wia ni sia, kura sia makaz toromo mahilek. Wingkotenala, “Méipurisi-Namé um pentak witu um werenku, a ni aku maruma'musé wo in tarékan ni aku toromo mahilek.”

¹⁶Ang kuan né woopira im wia sé sana réwok tou Farisi itii, “Si tou nimangun niitu én zéi'kan wia si Opo Empung a méyé, pahpaan ni Sia én zéi'kan mahtali-talinga an tinotoz tumoro un endo Sabat.” Taan sé walina mahkua, “Sa Sia tou mahsingkéla', kura kahuman Sia toro mangun u makakompo'en tanu niitu?” A séra rengan i mahéndo-éndoan.

¹⁷Ni séra meligau kasii wia si tou itii, “Kura un ikuamu tumoro ni Sia, pahpaan ni Sia limé'oso um werenmu?” Wingkotenala, “Ni Sia é nabi.”

¹⁸Taan sé tonaas né tou Yahudi én zéi'kan ma'éman sa si tou itii é letok woan wo in tarékan én toromo mahilek. Niitumo ni séra timawahmé sé tu'ana,

¹⁹a meligau, “Ulit wé si tou kenu én oki' niou si letok renganpé' i nimatoumé? Kura kahuman wo sia toromo mahilek in tarékan?”

²⁰Ang kuan né tu'ana, “Ni sia én ulit in oki' nai wo ni sia é letoko renganpé' i nimatoumé.

²¹Taan kura wo sia toromo mahilek in tarékan, zéi'kan kata'uan nai. Wo séi si nimanguné ni sia toromo mahilek, niitu kangkasii én zéi'kan kata'uan nai. Ligauenola wia ni sia, ni sia én tarétumoumo, ni sia toro kumua niitu in esa.”

²²Sé tu'ana kimuala téntu, pahpaan ni séra é maindé' wia sé tonaas né tou Yahudi. Pahpaan sé tonaas né tou Yahudi é nimaesaanola i sé tou mahkua si Yesus é Mesias, ni séra én zéi'mo mata'u muntep witi walé peraragésan né tou Yahudi.

²³Niitumo sé tu'ana éng kimua, “Ni sia én tarétumoumo, ligauenola wia ni sia.”

²⁴An tawahen néramé sumaup si letok woan itii a mahkua wia ni sia, “Ikuamé an ulit witu u sinaru ni Opo Empung, kata'uan nai si tou itii én tou mahsingkéla'.”

²⁵Wingkotenala, “Si tou itii mahsingkéla' kaapa zéi'kan én zéi'kan kata'uangku. Taan, ung kata'uangku i ni aku é letok woan wo in tarékan ni aku én toromo mahilek.”

²⁶Ang kuan néra wia ni sia, “Apa um winangun-Nama wia ni ko? Kura um werenmu i liné'os-Nama?”

²⁷Am wingkotenala, “Mémoikuakula wia ni kamu, taan ni kamu é soo tumalinga. Kaa kamu paazpé' in tumalinga niitu? Toro kuaa ni kamu kangkasii ém paaz i maéndo pahtuzu'en-Na?”

²⁸A séra mahsalou ni sia wo mahkua, “Ni ko ém pahtuzu'en-Na, ni kai én zéi'kan! Ni kai ém pahtuzu'en ni Musa.

²⁹Kata'uan nai si Opo Empung éng kimuamo wia si Musa. Taan tumoro si tou itii, zéi'kan kata'uan nai wisa Sia a méyé.”

³⁰Si tou itii nimingkotla, “Ni kamu én totoz makalingangan! Ni kamu é mahkua i ni Sia én zéi'kan kata'uan niou wisa a méyé, taan ni Sia é limé'osoma um werenku.

³¹Kata'uantamo i si Opo Empung én zéi'kan mahtalinga sé tou mahsingkéla' taan sé tou mahsigi' ni Sia wo mahwangun am paaz-Na.

³²Rengané im puuna makaz in tarékan zéi'kampé' pinahtali-talingala im wéwéhan si tou letok renganpé' nimatoumé i liné'osa.

³³Sa si tou itii zéi'kan wia si Opo Empung a méyé, zéi'kan siapa un toro wangunen-Na.”

³⁴Ang kuan néra wia ni sia, “Ni ko renganpé' i nimatoumé é lakezo a singkéla' wo ni ko mahtutuzu' ni kai?” A sia iwoho nérama i mondola.

³⁵Si Yesus én timalinga i si letok woan itii é méiwoho néramé mondolé im witu. A si Yesus mahilekala karia ni letok woan itii ang kumua, “Apa ko ma'éman wia si Oki' ni Tou?”

³⁶Am wingkotenala, “Tuang, séi Sia, wo ni aku ma'éman wia ni Sia?”

³⁷Ang kuan ni Yesus wia ni sia, “Ni ko én zéi'kan uman nimilek ni Sia, taan ni Sia kangkasii é mahsirita kariamu in tarékan.”

³⁸Kuana, “Ni aku é ma'éman, Tuang!” A sia sumigi' karia ing kimuruzla ung gio makaz witu un tana' witu u sinaru ni Yesus.

³⁹Ang kuan ni Yesus, “Ni Aku niméyé wia ung kaayahan kenu in tumotoz in ulit kaapa zéi'kan am pahwangunen né tou, wo séi uman si zéi'kan mahilek én toro mahilek, wo séi uman si toro mahilek é maletok.”

⁴⁰A méikua-Nama itii én tinalingama né woopira im wia sé sana réwok tou Farisi sé witu, a séra meligau wia ni Sia, “Apa ni kai kangkasii é letok?”

⁴¹Ang kuan ni Yesus wia ni séra, “Sa woo ni kamu letok, ni kamu zéi'kan mahsingkéla', taan pahpaan ni kamu kimuamé i ni kamu én toro mahilek, niitumo ni kamu é mahsingkéla'pé'.”